LEKSIYON 50
Sa Unsang Paagi Magmalipayon ang Imong Pamilya?—Bahin 2
Ang mga anak regalo gikan kang Jehova. Iyang gidahom nga atimanon pag-ayo sa ginikanan kana nga regalo. Naghatag pod si Jehova ug maalamong tambag nga makatabang sa ginikanan sa paghimo ana. Ang iyang tambag nagpakita pod kon unsay mahimo sa mga anak aron makatabang nga magmalipayon ang ilang pamilya.
1. Unsay tambag ni Jehova para sa ginikanan?
Gidahom ni Jehova nga higugmaon sa ginikanan ang ilang mga anak ug mogahin gyod silag dakong panahon kutob sa maarangan uban nila. Gusto pod niya nga protektahan sa ginikanan ang ilang mga anak ug gamiton ang mga prinsipyo sa Bibliya ingong basehanan sa pagbansay nila. (Proverbio 1:8) Iyang giingnan ang mga amahan: ‘Padayong matutoa ang inyong mga anak pinaagi sa tambag ni Jehova.’ (Basaha ang Efeso 6:4.) Malipay si Jehova kon sundon sa ginikanan ang iyang instruksiyon sa pagpadako sa ilang mga anak ug kon dili nila ipasa kana nga responsibilidad ngadto sa uban.
2. Unsay tambag ni Jehova para sa mga anak?
Si Jehova nagsugo sa mga anak: “Magmasinugtanon mo sa inyong ginikanan.” (Basaha ang Colosas 3:20.) Dihang tahoron ug sundon sa mga anak ang ilang ginikanan, mapalipay nila si Jehova ug ang ilang ginikanan. (Proverbio 23:22-25) Si Jesus naghatag ug maayong ehemplo dihang bata pa siya. Bisag hingpit siya, iyang gisunod ug gitahod ang iyang ginikanan.—Lucas 2:51, 52.
3. Unsay inyong himoon aron mas masuod mo sa Diyos ingong pamilya?
Kon ginikanan ka, seguradong gusto nimo nga higugmaon pod pag-ayo sa imong mga anak si Jehova. Sa unsang paagi nimo ni himoon? Pinaagi sa pagsunod sa giingon sa Bibliya: “Isilsil [ang mga pulong ni Jehova] sa imong mga anak ug isulti kini dihang maglingkod ka sa imong balay, dihang maglakaw ka sa dalan.” (Deuteronomio 6:7) Ang ‘pagsilsil’ nagpasabot ug balikbalik nga pagtudlo. Ingong ginikanan, nahibalo ka nga kinahanglan nimong balikbalikon ug sulti ang usa ka butang ngadto sa imong mga anak aron ila ning mahinumdoman. Kini nga teksto nagpasabot nga angay kang mangitag mga kahigayonan nga regular nimong maestorya ang imong mga anak bahin kang Jehova. Makahatag ug kaayohan sa pamilya ang paggahin ug panahon kada semana sa pagsimba ingong pamilya. Kon wala moy mga anak, makabenepisyo gihapon mo sa paggahin ug panahon kada semana sa pagtuon sa Pulong sa Diyos.
TUN-IG DUGANG
Sayra ang praktikal nga mga sugyot nga makatabang sa pamilya nga mobating luwas ug malipayon.
4. Bansaya ang imong mga anak sa mahigugmaong paagi
Lisod tingali ang pagbansay ug anak. Sa unsang paagi makatabang ang Bibliya? Basaha ang Santiago 1:19, 20, ug dayon hisgoti kini nga mga pangutana:
-
Unsaon pagpakita sa ginikanan ang gugma dihang makig-estorya sila sa ilang mga anak?
-
Nganong ang ginikanan dili angayng magdisiplina sa iyang mga anak dihang suko siya? a
5. Proteksiyoni ang inyong mga anak
Aron maproteksiyonan ninyo ang inyong mga anak, importante kaayo nga makig-estorya mo sa matag usa nila bahin sa sekso. Tingali dili ni sayon. I-play ang VIDEO, ug dayon hisgoti ang mosunod nga mga pangutana:
-
Nganong nalisdan ang ubang ginikanan sa pagpakig-estorya sa ilang mga anak bahin sa sekso?
-
Giunsa pagpasabot sa ubang ginikanan ngadto sa ilang mga anak ang bahin sa sekso?
Sumala sa gitagna, ang kalibotan ni Satanas nagkasamot ka daotan. Basaha ang 2 Timoteo 3:1, 13, ug dayon hisgoti kini nga pangutana:
-
Ang ubang daotang tawo nga gitumong sa bersikulo 13 seksuwal nga nag-abuso ug bata. Busa nganong importante nga tudloan sa ginikanan ang ilang mga anak bahin sa sekso ug kon unsaon nila pagprotektar ang ilang kaugalingon batok sa mga nag-abuso ug bata?
Nahibalo ba ka?
Ang mga Saksi ni Jehova naay daghang publikasyon nga makatabang sa ginikanan sa pagtudlo sa ilang mga anak bahin sa sekso ug sa pagprotektar kanila batok sa pag-abuso. Pananglitan, tan-awa ang:
-
Proteksiyoni ang Inyong mga Anak (video)
-
“Tudloi ang Imong Anak Bahin sa Sekso” (Pagmata! Num. 5 2016)
6. Tahora ang imong ginikanan
Ikapakita sa mga bata ug sa mga teenager ang ilang pagtahod sa ilang ginikanan sa paagi sa ilang pagpakig-estorya kanila. I-play ang VIDEO, ug dayon hisgoti ang mosunod nga mga pangutana:
-
Nganong maayo nga matinahoron ang bata o teenager dihang makig-estorya siya sa iyang ginikanan?
-
Unsaon pagpakita sa anak nga gitahod niya ang iyang ginikanan dihang makig-estorya siya nila?
Basaha ang Proverbio 1:8, ug dayon hisgoti kini nga pangutana:
-
Unsay angayng reaksiyon sa anak dihang sultihan siya sa iyang ginikanan kon unsay himoon?
7. Simbaha si Jehova ingong pamilya
Ang mga pamilya nga Saksi ni Jehova dunay eskedyul kada semana sa pagsimba nga magkauban. Ginaunsa paghimo kining pamilyahanong pagsimba? I-play ang VIDEO, ug dayon hisgoti ang mosunod nga mga pangutana:
-
Unsay himoon sa pamilya aron naa silay regular nga pamilyahanong pagsimba?
-
Unsay puwedeng himoon sa ginikanan aron ang pamilyahanong pagsimba mapuslanon ug makalingaw?—Tan-awa ang hulagway sa sinugdan niini nga leksiyon.
-
Unsa kahay makapalisod sa inyong pamilya sa pagtuon nga magkauban?
Sa karaang Israel, gidahom ni Jehova nga ang mga pamilya regular nga mag-estorya bahin sa Kasulatan. Basaha ang Deuteronomio 6:6, 7, ug dayon hisgoti kini nga pangutana:
-
Unsaon nimo pagpadapat kini nga prinsipyo?
Mga ideya para sa pamilyahanong pagsimba:
-
Pangandam para sa mga tigom sa kongregasyon.
-
Basaha ug hisgoti ang usa ka estorya sa Bibliya nga makalingaw sa imong pamilya.
-
Kon naa kay gagmayng anak, pag-download o pag-print gikan sa jw.org ug kalingawan para sa mga bata.
-
Kon naa kay teenager nga mga anak, hisgoti ninyo ang usa ka artikulo para sa mga teenager diha sa jw.org.
-
Idramadrama ang usa ka estorya sa Bibliya uban sa imong mga anak.
-
Tan-awa ug hisgoti ang usa sa mga video sa jw.org.
ANG UBAN MOINGON: “Lisod man nang Bibliya para sa mga bata.”
-
Unsay imong isulti?
SUMARYO
Gusto ni Jehova nga higugmaon, bansayon, ug proteksiyonan sa ginikanan ang ilang mga anak. Gusto pod niya nga tahoron ug sundon sa mga anak ang ilang ginikanan. Ug gusto niya nga ang mga pamilya magsimba kaniya nga magkauban.
Review
-
Unsaon pagbansay ug pagprotektar sa ginikanan ang ilang mga anak?
-
Unsaon pagpakita sa mga anak nga ilang gitahod ang ilang ginikanan?
-
Unsay mga kaayohan kon maggahin mog panahon kada semana sa pagsimba ingong pamilya?
SUSIHA
Unsa nga mga leksiyon ang makatabang sa imong anak aron maandam siya sa kinabuhing hamtong?
Sayra ang tambag sa Bibliya para niadtong nag-atiman sa ilang tigulang nga ginikanan.
“Unsay Giingon sa Bibliya Bahin sa Pag-atiman sa Tigulang nga mga Ginikanan?” (Web article)
Tan-awa kon sa unsang paagi ang usa ka lalaki nga dili makamaong magpadako ug anak nahimong maayo nga amahan.
Gitudloan Mi ni Jehova sa Pagpadako sa Among mga Anak (5:58)
Sayra kon sa unsang paagi mapalig-on sa amahan ang iyang relasyon sa iyang anak nga lalaki.
a Sa Bibliya, ang “disiplina” nagtumong sa instruksiyon, giya, ug pagtul-id. Wala gyod ni magtumong sa pag-abusar o pagmaltratar.—Proverbio 4:1.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
