YI 50
¿Bʉ mebẽrãra sãwũã sobia baseabʉ? (Yi 2)
Wũãwũãrãra Jeowaba diada, maʉ̃ kʼarea Jeowaba kãgabʉ yibariraba bia akʉdamarẽã ãyi wũãwũãrãra adewara ũrãgʼa biata diabʉ yibarira ãyi wũãwũãta bia akʉdamarẽã. Wũãwũãrabida ũrĩbara yibariraba ũrãgʼa diabʉra mawũã sobia panaita.
1. ¿Kʼãrẽ ũrãgʼa biata diabʉ Jeowabara yibarirãra?
Jeowabara jarabʉ yibariraba kãgamarẽã ãyi wũãwũãrata akʉza ewari jʉrʉmarẽã ãyibawara audre ãba bʼaita. Jeowabara kãgabʉ yibariraba ãyi wũãwũãra jaradiamarẽã Daizeze Bedʼearadebemata, mawũã nekayiruadeba kʼarebaita (Proverbios 1:8). Jeowaba jarabʉ yibarira: «Dapʉeidua» mara wũãwũãra Jeowaba «ũrãgʼa bia diabʉde» (akʉra Efesios 6:4). Jeowara arigʉ sobiabʉ yibariraba ãyi wũãwũãra bia dapʉebʉde mawũã awuruba ãyi wũãwũãra dapʉemarẽã dia ẽãne.
2. ¿Jeowabara kʼãrẽ ũrãgʼata diabʉ wũãwũãrãra?
Jeowabara jarabʉ wũãwũãra: «Ũrĩdua bʉ yibarira bedʼeata» (Colosenses 3:20). Wũãwũãraba yibarira bedʼea ũrĩbʉde akʉza wawia ũdubibʉde, Jeowata sobiabibʉ akʉza yibarirata (Proverbios 23:22-25). Jesubara iyi warraraenara yiza biata ũdubisi; iyi nekayirua okabasimina wawiata ũdubisi yibariraʼa akʉza ũrĩbasi ãyi bedʼeara (Lucas 2:51, 52).
3. ¿Kʼãrẽta oseabʉ bʉ mebẽrãra audre Jeowa kʼawa bʼai krĩchaita?
Bʉta zezebʉrʉ akʉza papabʉrʉ, kãgabʉ bʉ wũãwũãraba bʉa Jeowa kãgabʉ kĩrãkʼa kãgamarẽã, ¿sãwũã oseabʉ maʉ̃ra? Obʉde Daizeze Bedʼeaba jarabʉ kĩrãkʼa: «Jaradiada ʉ̃rʉ jaradiaibara bʉ wũãwũã [Jeowa bedʼeara] bʉ deda jewedabʉrʉde akʉza ode wãne» (Deuteronomio 6:7). «Jarada ʉ̃rʉ jaradiaibara» jarakĩrãbʉ, iyabaʉ bedʼeata jaradiaibarata, mara wũãwũãba kĩrãdua ẽ bamarẽãra, marabara kʼawuabʉ jarada ʉ̃rʉ jaradiaibarata. Naʉ̃ testobara jarakĩrãbʉ marabara ewari jʉrʉibarata mara wũãwũãra jaradiaita Jeowa ʉ̃rʉ. Ewari jʉrʉibara semanaza mebẽrãbawaraʉba kʼawuaita Jeowaba jarabʉ oita. Wũãwũã neẽbʉsida yibia bayi bʉa ewari jʉrʉita Daizeze Bedʼea akʉita.
AUDRE BIʼIA KʼAWUADADRɄ
Akʉdaya kʼãrẽ ũrãgʼaba kʼarebaseabʉta dayirã mebẽrãbawara sobia bʼaita.
4. Kãgade jaradiara bʉ wũãwũãrãra
Wũãwũãra jaradiaita zareabaseabʉ. Mamina, ¿Daizeze Bedʼeabara sãwũã kʼarebaseabʉ? Akʉra Santiago 1:19, 20, mõbe naʉ̃ta panʉidua:
-
¿Yibarirabara sãwũã kãgabʉta ũdubibara ãyi wũãwũãrãra ãyibawara bedʼeabʉrʉde?
-
¿Kʼãrẽa yibarirabara ãyi kĩrʉbʉdera yi wũãwũãrãra kʼẽã ẽ baibara? a
5. Jaradiara mara wũãwũãra
Mara wũãwũã mia erkʼãĩ ʉ̃rʉ jaradiaiba kʼarebayi bia jida kʼawuaita, mamina maʉ̃ ʉ̃rʉ bedʼeaiba dayita perabibʉ. Akʉra BIDEOTA, mõbe maʉ̃ ʉ̃rʉ bedʼeaidua:
-
¿Kʼãrẽa yibariraitara ãyi wũãwũãra mia erkʼãĩ ʉ̃rʉ bedʼeaira ãyi pera?
-
Ʉ̃kʉrʉ yibarirabara, ¿sãwũã jara ũrĩbibʉ ãyi wũãwũãrãra mia erkʼãĩ ʉ̃rʉra?
Daizeze Bedʼeaba jarabʉ kĩrãkʼa naʉ̃ drʉara dayirãba ũdu wãbʉrʉza audre mitia wã. Akʉra 2 Timoteo 3:1, 13, mõbe naʉ̃ta panʉidua:
-
Bersikulo 13ba jarabʉdera ʉ̃kʉrʉ ẽbẽrarãbara sewabʉ wũãwũãra wawa oita. ¿Kʼãrẽa yibarirabara jaradiaibara ãyi wũãwũãrãra ãyikʉza yi akʉ kʼawuamarẽã mawũã ẽbẽra kayiruaraba wawa oda ẽ bamarẽã?
¿Kʼawuabasika?
Jeowa ʉ̃rʉ Kʼawuabipanʉrãbara kartarata akʉza bideorata mejãcha ozebʉda, maʉ̃neba yibarirabara kʼawuaseapanʉ sãwũã yi wũãwũãra mia erkʼãĩ ʉ̃rʉ jaradiaita akʉza kʼãrẽta oseabʉta nekayiruaraneba jĩgara bʼaita, mawũã ãyi wũãwũã wawa oda ẽ bamarẽã. Bari jaradaita akʉra:
-
Jaradiara mara wũãwũãra (bideo)
-
Nejaradiabari audre yibia ʉ̃rʉ kʼawuadrʉ, kapitulo 10 akʉza 32
-
«Sãwũã bedʼeaseabʉ yibarirãra ãyi wũãwũãrãra mia erkʼãĩ ʉ̃rʉra» (¡Despertad! num. 5, 2016de)
6. Wawiata ũdubira bʉ yibariraʼa
Wũãwũãraba akʉza warraraba wawiata ũdubiseabʉ ãyi yibarira ãyi sãwũã bedʼeabʉdeba. Akʉra BIDEOTA, mõbe maʉ̃ ʉ̃rʉ bedʼeaidua:
-
¿Kʼãrẽa biga bʼai warrara yibarirabawara bedʼeabʉrʉde wawia ũdubita?
-
¿Warrarãra sãwũã bedʼeaseabʉ ãyi yibarira wawia ũdubita?
Akʉra Proverbios 1:8, mõbe naʉ̃ta panʉidua:
-
¿Warrarãra sãwũã bʼaibara yibariraba ãya kʼãrẽ omarẽã jarabʉdadera?
7. Mara mebẽrãbawara ãba baidua Jeowa ʉ̃rʉ kʼawuaita
Mebẽrã Jeowa ʉ̃rʉ Kʼawuabipanʉrãra semanaza ãba zepanabari kʼawuaita Jeowaba jarabʉ oita, ¿maʉ̃ra sãwũã oseabʉ? Akʉra BIDEOTA, mõbe naʉ̃ta panʉidua:
-
¿Mebẽrãbara kʼãrẽta oseapanʉ kʼawuaita ãbaʉba Daizeze Bedʼea ʉ̃rʉ semanaza?
-
¿Yibarirabara kʼãrẽta oibara ãyi wũãwũãra sobia panamarẽãra mebẽrãbawara ãba zebʉrʉde Jeowaba jarabʉ ʉ̃rʉ audre kʼawuaita? (Akʉra nabema poto yi 50debemata).
-
¿Kʼãrẽa bʉ mebẽrãitara zareabaseabʉ ãba zeita kʼawuaita Jeowaba jarabʉ oita?
Israel ewaribasidera Jeowabara kãgabasi ãyi mebẽrãta ãba zemarẽã Daizeze Bedʼea ʉ̃rʉ kʼawuaita. Akʉra Deuteronomio 6:6, 7, mõbe naʉ̃ta panʉidua:
-
¿Bʉara sãwũã oũdubiseabʉ naʉ̃ testode jarabʉra?
Naʉ̃ta oseabʉ bʉ mebẽrãbawaraʉba kʼawuabʉrʉde Daizeze ʉ̃rʉ:
-
Ewari jʉrʉda ãba yi jʉrebarima wãi naena maʉ̃ ʉ̃rʉ nãã akʉita.
-
Akʉidua nebʉra Daizeze Bedʼeade mara mebẽrãba kãgada ʉ̃rʉ, mõbe maʉ̃ ʉ̃rʉ bedʼeaidua.
-
Bʉta wũãwũãrabarabʉbʉrʉ, ʉ̃tʉzebira wũãwũãraita kʼawuaita abʉmae eda katʉ kʼãrãpe jw.org deba.
-
Warrarata erbʉbʉrʉ jʉrʉseabʉ eda jw.org de warrara abʉmae mõbe maʉ̃ ʉ̃rʉ bedʼeaita.
-
Bʉ wũãwũãrabawaraʉba oũdubira nebʉra Daizeze Bedʼeadebemata.
-
Bideo jw.org debema akʉda tẽã bedʼeaidua maraba kʼawuada ʉ̃rʉ.
Ʉ̃KɄRɄBA KRĨCHAPANɄTA: «Daizeze Bedʼea wũãwũãraba ũrĩra jipa zareabʉ».
-
¿Maʉ̃ kʼarea bʉa kʼaseai?
KĨRÃBEITA
Jeowabara kãgabʉ yibariraba ãyi wũãwũãra kãgamarẽã, jaradiamarẽã akʉza akʉmarẽã.
Panʉnadrʉ
-
¿Sãwũã yibarirabara bia akʉseabʉ ãyi wũãwũãra akʉza jaradiaseabʉ?
-
¿Sãwũã wũãwũãrabara wawia ũdubiseapanʉ yibarirãra?
-
¿Kʼãrẽa yibia ãbaʉba kʼawuaita semanaza Jeowaba jarabʉ oita?
JɄRɄDA AUDRE KʼAWUAITA
¿Kʼãrẽba kʼarebai bʉ wũãwũãra ẽbẽra bia bʼaita?
«Bʉ ũrãgʼa sei wũãwũãraba kʼawuaibarata» (¡Despertad! Num. 2, 2019de)
Kʼawuara Daizeze Bedʼearadebemaba sãwũã kʼarebabʉta ãyi yibarira zõrãrãbʉta akʉpanʉta.
«¿Daizeze Bedʼeabara kʼãrẽta jaradiabʉ dayirã yibarira zõrãrã babʉrʉde akʉi ʉ̃rʉ?» (Artikulo jw.org)
Akʉra sãwũã zeze abaʉba wũãwũã bia dapʉe kʼawuasita iya nãã dapʉe be ẽ basimina.
Jeowabara jaradiasi sãwũã dapʉeibarata dayirã wũãwũãra (5:58)
Akʉra sãwũã yibarirãra audre yi wũãwũãra neũdukʼawua baseabʉta.
«¿Wũãwũãbarabʉrãra sãwũã yi wũãwũãra neũdukʼawua baseabʉ?» (Jarakabʉ, 1ne noviembrede 2011de)
a Daizeze Bedʼeabara jarakĩrãbʉ ẽ «kʼẽãbʉrʉdera» ubea jidadaibarata, awuarabʉrʉ jarakĩrãbʉ ibiade kʼẽãibarata akʉza ibiade ũrãgʼa diaibarata (Proverbios 4:1).
