CɅNTESɅNTEL 50
¿Chuqui miʼ mejlel a mel chaʼan tijicña miʼ yajñel a familia? (parte 2)
Jiñi la calobilob lac majtañʌch tsaʼ bʌ i yʌqʼueyonla Jehová, i miʼ pijtan chaʼan wen mi laj cʌntañob. Jin chaʼan, miʼ yʌqʼueñonla wem bʌ ticʼojel tac chaʼan miʼ mejlel lac mel. Cheʼ jaʼel, miʼ yʌqʼuen ticʼojel jiñi alobob chaʼan miʼ chaʼleñob coltaya chaʼan wen miʼ yajñel jiñi i familia.
1. ¿Chuqui ti ticʼojel tac miʼ yʌqʼuen Jehová jiñi tatʌl ñaʼʌlob?
Jehová yom chaʼan jiñi tatʌl ñaʼʌlob miʼ cʼuxbiñob i yalobilob yicʼot chaʼan tiʼ pejtelel ora miʼ yʌqʼueñob i yorajlel chaʼan miʼ yajñel yicʼotob. Cheʼ jaʼel, yom chaʼan miʼ cʌntañob chaʼan maʼañic chuqui miʼ chaʼleñob yicʼot chaʼan miʼ cʌntesañob tiʼ chaʼan Dios (Proverbios 1:8). Dios miʼ suben jiñi tatʌlob chaʼan yom miʼ cosañob majlel jiñi i yalobilob ti jiñi ticʼojel tilem bʌ ti Jehová (pejcan Efesios 6:4). Jehová tijicña miʼ yubin i bʌ cheʼ bʌ miʼ qʼuel chaʼan jiñi tatʌlob cheʼʌch miʼ cosañob jiñi i yalobilob cheʼ bajcheʼ miʼ subeñob i maʼañic miʼ cʌybeñob tiʼ wenta jiñi yambʌlob.
2. ¿Chuqui ti ticʼojel tac miʼ yʌqʼuen Jehová jiñi alobob?
Jehová miʼ suben jiñi alobob: «Jacʼbenla i tʼan laʼ tat laʼ ñaʼ» (pejcan Colosenses 3:20). Mi jiñi alobob miʼ jacʼbeñob i tʼan i tat i ñaʼ yicʼot miʼ qʼuelob ti ñuc, miʼ yʌqʼueñob i tijicñʌyel yicʼot miʼ yʌqʼueñob i tijicñʌyel Jehová (Proverbios 23:22-25). Cheʼ bʌ Jesús tsajñi ila ti Pañimil, tsiʼ jacʼbe i tʼan i tat i ñaʼ yicʼot tsiʼ qʼueleyob ti ñuc anquese xmulilob (Lucas 2:51, 52).
3. ¿Chuqui miʼ mejlel i mel jumpʼejl familia chaʼan lʌcʼʌl miʼ yubin i bʌ ti Jehová?
Mi an a walobilob, a wom chaʼan miʼ wen cʼuxbiñob Jehová cheʼ bajcheʼ maʼ cʼuxbin jatet. ¿Bajcheʼ miʼ mejlel a mel? Jacʼʌ ili ticʼojel muʼ bʌ i yʌcʼ jiñi Biblia: «Chaʼ subeñob laʼ walobilob [jiñi i tʼan tac Jehová] cheʼ yaʼ añetla ti laʼ wotot, yicʼot cheʼ woliyetla ti xʌmbal ti bij» (Deuteronomio 6:7). Cheʼ mi lac chaʼ subeñob, yom i yʌl chaʼan mi lac chaʼ cʼajtesʌbeñob jiñi tsaʼix bʌ lac subeyob. Cheʼ an chuqui mi lac subeñob jiñi la calobilob an i tajol mach junyajlelic jach mi lac chaʼ subeñob chaʼan miʼ cʼajtesañob. Jin chaʼan, yom bʌ i yʌl ili texto jiñʌch chaʼan ti jujumpʼejl qʼuin yom maʼ sʌclʌben i yorajlel chaʼan maʼ suben jiñi a walobilob i chaʼan bʌ Jehová. Cheʼ jaʼel, yom maʼ sʌclʌben i yorajlel ti jujumpʼejl semana chaʼan maʼ pejcan jiñi Biblia a wicʼot a familia. I anquese maʼañic a walobilob, cheʼ mucʼʌch a pejcan jiñi Biblia ti jujumpʼejl semana mi caj i wen coltañet.
LAʼ LAC ÑUMEN ÑAʼTAN
Laʼ laj qʼuel wem bʌ ticʼojel tac muʼ bʌ i coltan jiñi familia tac chaʼan cʌntʌbil miʼ yubiñob i bʌ yicʼot chaʼan tijicña miʼ yajñelob.
4. Cʌntesan a walobilob yicʼot cʼuxbiya
Wocolʌch chaʼan miʼ mejlel laj cʌntesan la calobilob. ¿Bajcheʼ miʼ mejlel i coltañet jiñi Biblia? Pejcanla Santiago 1:19, 20 i tem alʌla iliyi:
-
¿Bajcheʼ miʼ mejlel i pʌsbeñob cʼuxbiya i yalobilob jiñi tatʌl ñaʼʌlob cheʼ bʌ miʼ chaʼleñob tʼan yicʼotob?
-
¿Chucoch juntiquil tatʌl mach yomic miʼ ticʼ i yalobilob cheʼ bʌ michʼ?
5. Cʌntan a walobilob
Chaʼan miʼ laʼ cʌntan jiñi laʼ walobilob ñuc i cʼʌjñibal cheʼ mi laʼ tsictesʌbeñob ti jujuntiquilob chaʼan bʌ jiñi piʼleya, anquese quisintic mi laʼ wubin. Qʼuelela jiñi VIDEO i tem alʌla iliyi:
-
¿Chucoch an tatʌl ñaʼʌlob wocol bʌ miʼ yubiñob chaʼan miʼ subeñob jiñi i yalobilob chaʼan bʌ jiñi piʼleya?
-
¿Chuqui an i colta jiñi tatʌl ñaʼʌlob chaʼan miʼ subeñob jiñi i yalobilob chaʼan bʌ jiñi piʼleya?
Cheʼ bajcheʼ tsaʼ wʌn ajli, jiñi i pañimil Satanás woliʼ ñumen asiyel majlel. Pejcanla 2 Timoteo 3:1, 13 i tem alʌla iliyi:
-
Cheʼ bajcheʼ miʼ yʌl jiñi versículo 13, an jontol bʌ lac piʼʌlob muʼ bʌ i ticʼlañob jiñi alobob. Jin chaʼan, ¿chucoch ñucʌch i cʼʌjñibal cheʼ jiñi tatʌl ñaʼʌlob miʼ subeñob jiñi i yalobilob chaʼan bʌ jiñi piʼleya? ¿I bajcheʼ miʼ mejlel i cʌntañob chaʼan maʼañic miʼ ticʼlʌntelob?
¿A wujilix ba?
Jiñi i testigojob Jehová an i meleyob cabʌl jun tac yicʼot video tac chaʼan jiñi tatʌlob miʼ mejlelob i cʼʌn i miʼ cʌntesañob jiñi i yalobilob chaʼan bʌ jiñi piʼleya yicʼot chaʼan maʼañic miʼ ticʼlʌntelob. Ila miʼ mejlel laʼ taj uxpʼejl:
-
Laʼ laj cʌn tiʼ tojlel jiñi Ñuc bʌ xcʌntesa, cʌntesʌntel 10 yicʼot 32
-
«¿Bajcheʼ miʼ mejlel a suben jiñi a walobil chaʼan bʌ jiñi piʼleya?» (¡Jamʌx a wut!, número 5 2016)
6. Qʼuele ti ñuc a tat a ñaʼ
Jiñi alobob yom miʼ qʼuelob ti ñuc i tat i ñaʼ, iliyi miʼ pʌsob cheʼ bajcheʼ miʼ pejcañob. Qʼuelela jiñi VIDEO i tem alʌla iliyi:
-
¿Chucoch juntiquil xcolel yom wen jach miʼ pejcan i tat i ñaʼ?
-
¿Bajcheʼ miʼ mejlel i pʌs juntiquil xcolel chaʼan miʼ qʼuel ti ñuc i tat i ñaʼ?
Pejcanla Proverbios 1:8 i tem alʌla iliyi:
-
¿Bajcheʼ yom miʼ jacʼ juntiquil xcolel cheʼ bʌ jiñi i tat i ñaʼ an chuqui miʼ suben i mel?
7. Tem chʼujutesanla Jehová
Jiñi i testigojob Jehová miʼ yʌqʼueñob i yorajlel ti jujumpʼejl semana chaʼan miʼ tem chʼujutesañob Dios yicʼot i familia. ¿I bajcheʼ miʼ melob jiñi chʼujutesaya ti familia? Qʼuelela jiñi VIDEO i tem alʌla iliyi:
-
¿Chuqui miʼ mejlel i coltañob jiñi tatʌl ñaʼʌlob chaʼan miʼ chʌcʌ melob jiñi i chʼujutesaya ti familia?
-
¿Chuqui miʼ mejlel i mel jiñi tatʌlob chaʼan wen miʼ melob jiñi i chʼujutesaya ti familia i cheʼ jiñi tijicña miʼ ñusañob? (Qʼuele jiñi foto am bʌ tiʼ tejchibal).
-
¿Am ba chuqui woliʼ mʌctañet maʼ wʌl chaʼan maʼ mel jiñi chʼujutesaya ti familia? ¿Baqui bʌ?
Ti wajali, Jehová tiʼ sube jiñi israelitajob chaʼan miʼ subeñob jiñi i familia muʼ bʌ i yʌl jiñi Tsʼijbujel tac. Pejcanla Deuteronomio 6:6, 7 i tem alʌla iliyi:
-
¿Bajcheʼ miʼ mejlel a jacʼ ili ticʼojel?
Muʼ bʌ mejlel laʼ mel ti laʼ chʼujutesaya ti familia:
-
Chajpan laʼ bʌ chaʼan jiñi tempa bʌ ti congregación.
-
Pejcanla yicʼot tem alʌla jumpʼejl relato muʼ bʌ laʼ mulan yaʼ ti Biblia.
-
Mi an chut bʌ a walobilob, chaʼlen ti descargar o chaʼlen ti imprimir jiñi eʼtel tac chaʼan alʌlob am bʌ ti jw.org.
-
Mi an ñucobix bʌ cajel a walobilob, yajcan jumpʼejl tema chaʼan xcolelob yaʼ ti jw.org.
-
Melela jumpʼejl escenificación chaʼan jumpʼejl relato am bʌ ti Biblia.
-
Qʼuelela jumpʼejl video am bʌ ti jw.org i tem alʌla.
AN MUʼ BɅ I YɅLOB: «Jiñi alʌlob maxto añic miʼ wen chʼʌmbeñob i sujm jiñi Biblia».
-
Ixcu jatet, ¿chuqui maʼ ñaʼtan?
TSAʼ BɅ LAJ CɅÑɅ
Jehová yom chaʼan jiñi tatʌlob miʼ cʼuxbiñob i yalobilob, miʼ cʌntesañob yicʼot miʼ cʌntañob. Chaʼan jiñi alobob miʼ qʼuelob ti ñuc i tat i ñaʼ yicʼot miʼ jacʼbeñob i tʼan, i chaʼan tiʼ pejtelel jiñi familia miʼ chʼujutesañob.
¿Chuqui tsaʼ cʌñʌ?
-
¿Bajcheʼ miʼ mejlel i cʌntesañob yicʼot i cʌntañob i yalobilob jiñi tatʌlob?
-
¿Bajcheʼ miʼ mejlel i pʌsob jiñi alobob chaʼan miʼ qʼuelob ti ñuc i tat i ñaʼ?
-
¿Bajcheʼ miʼ coltañob jiñi familia tac cheʼ miʼ yʌqʼueñob i yorajlel ti jujumpʼejl semana chaʼan miʼ melob jiñi chʼujutesaya ti familia?
CɅÑɅ YAN TAC BɅ
¿Chuqui yom miʼ cʌñob jiñi a walobilob chaʼan miʼ coltañob cheʼ baʼ ora colemobix?
Qʼuele wen tac bʌ ticʼojel muʼ bʌ i yʌqʼuentelob jiñi muʼ bʌ i cʌntañob jiñi añobix bʌ i jabilel.
Qʼuele bajcheʼ juntiquil wiñic mach bʌ yujilic bajcheʼ yom miʼ cosan jiñi i yalobilob tsaʼ sujti ti wem bʌ tatʌl.
Jehová tiʼ pʌsbeyon lon bajcheʼ yom mij cʌntesan lon calobilob (5:58)
Qʼuele chuqui yom miʼ mel juntiquil tatʌl chaʼan wen miʼ yajñel yicʼot i yalobilob.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
