ZANNOO 50
Wala Hoŋ Na Toɔ̃ E Ka Popeɛloŋ Be Ho Booree Poɔŋ?—Kyɛlee 2
Bibiiri e la kyɔɔtaa naŋ yi Jehoova zie. Azuŋ, Jehoova boɔrɔŋ ka bidɔgreba kaara ba bibiiri zu velaa zaa. O ko la bidɔgreba kawane a kyaare lɛ baŋ na toɔ̃ e a kaara ba bibiiri zu soŋ. Jehoova lɛ ko la bibiiri meŋ kawane a kyaare lɛ baŋ na toɔ̃ e a vɛŋ ka popeɛloŋ be a booree poɔŋ.
1. Bo kawane ka Jehoova ko bidɔgreba?
Jehoova boɔrɔŋ ka bidɔgreba nɔŋ ba bibiiri, a kyɛ taa wagre ko ba meŋ. O boɔrɔŋ ka bidɔgreba go ba bibiiri a yi yelzaa naŋ na toɔ̃ pere ba, a kyɛ de Baabole sowuli a wulo ba meŋ. (Yeng Yelibie 1:8) Jehoova yelko la saamine ka: “Yɛ guoli [yɛ bibiiri] . . . a Daana wuluu” eŋɛŋ. (Kanne Efesu 6:4.) Ka bidɔgrebaŋ de Jehoova sowuli a guolo neŋ ba bibiiri, a mɔɔ yaga zaa a ta de ba bibiiri na te ko neŋzaala kaŋa ka o guoli ko ba, Jehoova poɔ maŋ pɛleŋ yaga zaa.
2. Bo kawane ka Jehoova ko bibiiri?
Jehoova ko la bibiiri kawane ka: “Yɛ sagra a yɛ dɔgreba nɔɛ.” (Kanne Kolosi 3:20.) Ka bibiiriŋ wa wulo ba dɔgreba gyeremɛ a kyɛ sagra ba nɔɛ meŋ, a maŋ vɛmeŋ ka Jehoova neŋ ba dɔgreba zaa poɔ pɛle. (Yeng Yelibie 23:22-25) Saŋa na Yezu naŋ da be a teŋɛzuŋ kyɛ a naŋ e bibile na, o da eɛ ewuli soŋ kaŋa a ko te. Aneazaa ka Yezu da pɛgeyieŋ, kyɛ o da maŋ sagrɛɛ o dɔgreba naŋ da ba pɛgeyi na nɔɛ, a kyɛ wulo ba gyeremɛ meŋ.—Luka 2:51, 52.
3. Wala ka booree deme na toɔ̃ e a peɛle Naaŋmen yaga?
A e la bidɔgreba zaa boɔbo ka ba soŋ ba bibiiri ka ba nɔŋ Jehoova aŋa lɛ na ba naŋ nɔŋ Jehoova na. Wala hoŋ na toɔ̃ e a soŋ ho bibiiri ka ba nɔŋ Jehoova? A Baabole yeleeŋ ka aseŋ ka ho e a yɛlɛ ŋa: “Maŋ de [Jehoova yelbie] wulo ho bibiiri nimizeɛ̃, ka ho maŋ yele a yɛlɛ wagre ŋa hoŋ maŋ wa zeŋ ho dieŋ, ane wagre ŋa hoŋ maŋ wa kyɛnɛ soriŋ.” (Duturoonomi 6:7) Ka ba naŋ yelka ho de yelkaŋa a wulo neɛ “nimizeɛ̃,” wala ka lɛ wuli? A wuleeŋ ka ho wuli o soba a yɛlɛ gbɛɛ yaga. Aminekaŋaŋ, ho meŋɛ baŋɛɛŋ ka aseŋ ka ho wuli ho bibiiri yɛlɛ mine gbɛɛ yaga sɛre kyɛ ka ba na toɔ̃ nyɔgaa eŋ ba teɛroŋ poɔŋ. Lɛ neŋ o zu ka a Baabole sɛgre ŋa boɔrɔ ka o wuli, ka vuo zaaŋ wa yuo ko bo, mɔɔ a kyɛ manne Jehoova yɛlɛ a ko ho bibiiri na. A na somaŋ yaga zaa ka yɛ sɛgre wagre kaŋa biŋ daagbuli zaa a maŋ de e booree zannoo. Ka hooŋ ba taa bibiiri, kyɛ ho na baŋ bɔ la wagre biŋ daagbuli zaa a maŋ de zanne Naaŋmen Yelbiri na.
ZANNE YƐLƐ YAGA POƆ
Ho na zanne nyɛɛ yɛlɛ naŋ na toɔ̃ vɛŋ ka popeɛloŋ ane gomeŋɛ be ho booree poɔŋ.
4. De nɔmmo wulo ho bibiiri
Bibiiri wuluu ba e mɔlɔ fẽẽ zaa. A Baabole na toɔ̃ soŋ boŋ bee? Kanne Gyimisi 1:19, 20, a kyɛ gyieli a soorebie ŋa yɛlɛ:
-
Ka bidɔgreba neŋ ba bibiiriŋ wa dire dama, wala baŋ na toɔ̃ e a wuli a bibiiri ka ba nɔŋ baŋ?
-
Ka bidɔgrɔ suuriŋ wa iri, bonso aŋ ba seŋ ka o dɛnne o bie? a
5. Go ho bibiiri na
Ka hooŋ boɔrɔ ka ho go ho bibiiri na soŋ, a eɛ nimizeɛ yaga zaa ka ho manne gaŋneŋ taa yɛlɛ ko ba. Yelmeŋɛ la, vii na baŋ erɛ boŋ ka ho e lɛ, kyɛ aseŋ ka ho wuli ba gaŋneŋ taa yɛlɛ. Ŋmɛ a VIDIO, a kyɛ gyieli a soorebie naŋ tu na yɛlɛ.
-
Bonso aŋ maŋ e kpeɛŋaa ko bidɔgreba mine ka ba manne gaŋneŋ taa yɛlɛ ko ba bibiiri?
-
Sobobo ka bidɔgreba mine tu kyɛ manne gaŋneŋ taa yɛlɛ ko ba bibiiri?
A Baabole daŋyelbiŋeeŋ ka, neŋfaare na moɔ̃ la niŋe a erɛ yelfaare yaga zaa a Setaana donɛɛ ŋa poɔŋ, lɛ neŋ o zu la nyɛrɛ eebo zenɛ ŋa. Kanne 2 Timoti 3:1, 13, a kyɛ gyieli a soorebiri ŋa yɛlɛ:
-
A neŋfaare na mine o wɛlbo 13 naŋ yel ba yɛlɛ na e la noba naŋ maŋ nyɔge bibiiri a fere gaŋne ba. Azuŋ, bonso aŋ e nimizeɛ yaga zaa ka bidɔgreba wuli ba bibiiri gaŋneŋ taa yɛlɛ, a kyɛ lɛ wuli ba lɛ baŋ na toɔ̃ e a go ba menne yi noba naŋ boɔrɔ ka ba fere gaŋne ba?
Ho da baŋɛɛŋ?
Jehoova Sieree Deme maalɛɛ vidiori ane gama mine naŋ na toɔ̃ soŋ bidɔgreba ka ba manne gaŋneŋ taa yɛlɛ a ko ba bibiiri, a kyɛ lɛ wuli ba lɛ baŋ na toɔ̃ e a go ba bibiiri a yi noba naŋ boɔrɔ ka ba fere gaŋne ba nuureŋ. A boma mine la ŋa:
-
Gu Ho Bibiiri (vidio)
-
“Sori Hoŋ Na Toɔ̃ Tu A Manne Gaŋneŋ Taa Yɛlɛ Ko Ho Bie” (Awake! No. 5 2016)
6. Eŋnɛ ho dɔgreba
Bibiiri ane baapaalba na toɔ̃ tu la ba yelyaga eŋɛŋ a kyɛ wuli ka ba eŋnɛɛ ba dɔgreba. Ŋmɛ a VIDIO, a kyɛ gyieli a soorebie naŋ tu na yɛlɛ.
-
Bonso aŋ e nimizeɛ yaga zaa ka bibiiri ane baapaalba maŋ de gyeremɛ yele yɛlɛ korɔ ba dɔgreba?
-
Sobuo ka bibiiri ane baapaalba na toɔ̃ tu a de gyeremɛ yele yɛlɛ korɔ ba dɔgreba?
Kanne Yeng Yelibie 1:8, a kyɛ gyieli a soorebiri naŋ tu na yɛlɛ:
-
Wala aŋ seŋ ka bibiiri ane baapaalba e saŋa na ba dɔgreba naŋ yelka ba e yelkaŋa?
7. Yɛ laŋ puoro Jehoova aŋa booree deme
Booree deme zaa naŋ e Jehoova Sieree Deme maŋ sɛgrɛɛ wagre biŋ daagbuli zaa a e booree zannoo. Bo yɛlɛ baŋ maŋ zanne a booree zannoo saŋa? Ŋmɛ a VIDIO, a kyɛ gyieli a soorebie naŋ tu na yɛlɛ.
-
Wala ka booree deme na toɔ̃ e a maŋ erɛ ba Booree Zannoo daa zaa?
-
Wala ka bidɔgreba na toɔ̃ e a vɛŋ ka a booree zannoo noma kyɛ ka a booree neɛzaa meŋ nyɛ tɔnɔ yi be?—Kaa a zannoo ŋa piilee foto na.
-
Bo yɛlɛŋ na toɔ̃ vɛŋ ka a e kpeɛŋaa ka yɛ wa lantaa a zanne boma aŋa booree deme?
A yi a takoreŋ saŋa Izerayɛl paaloŋ na poɔŋ, Jehoova da yeleeŋ ka aseŋ ka bidɔgreba neŋ ba bibiiri maŋ dire a Baabole poɔ yɛlɛ dama. Kanne Duturoonomi 6:6, 7, a kyɛ gyieli a soorebiri ŋa yɛlɛ:
-
Wala hoŋ na toɔ̃ e a de a sowuli ŋa tonɔ neŋ toma?
Yɛlɛ mine hoŋ na toɔ̃ e yɛ booree zannoo saŋa:
-
Yɛ na baŋ zannɛɛ yɛlɛ na yɛŋ na zanne a lantaapuoruu lammo saŋa.
-
Yɛ na baŋ kannɛɛ a Baabole poɔ yɛlɛ naŋ pɛlɛ ho booree deme na poɔ. Ka yɛneeŋ wa kanne baare, yɛ di dama a kyaare yɛlɛ na yɛŋ kanne na.
-
Ka hooŋ taa bibiiri, ho na baŋ tageŋ bee ka ho printi bibiiri yɛlɛ naŋ be jw.org na.
-
Ka hooŋ taa baapaalba, yɛ na baŋ di la dama a kyaare yelzuri naŋ be jw.org a yele baapaalba yɛlɛ na.
-
Ho neŋ ho bibiiri na na toɔ̃ e la a Baabole poɔ yɛlɛ mine drama.
-
Yɛ na baŋ kaa la vidio kaŋa naŋ be jw.org, ka a vidioŋ baare, yɛ na baŋ di la dama a kyaare a vidio poɔ yɛlɛ.
NOBA MINE MAŊ YELEŊ KA: “A eɛ kpeɛŋaa ko bibiiri ka ba woŋ a Baabole muni.”
-
Wala hoŋ na yel?
A ZANNOO YELNIMIZEERE
Jehoova boɔrɔŋ ka bidɔgreba nɔŋ ba bibiiri. O boɔrɔŋ ka bidɔgreba wulo ba bibiiri a go ba meŋ. Jehoova boɔrɔŋ ka bibiiri meŋ eŋnɛ ba dɔgreba, a kyɛ sagra ba nɔɛ meŋ. O boɔrɔŋ ka a booree deme maŋ laŋ puoroo meŋ.
Bo Hoŋ Zanne
-
Wala ka bidɔgreba na toɔ̃ e a wuli ba bibiiri a kyɛ go ba meŋ?
-
Wala ka bibiiri na toɔ̃ e a de wuli ka ba eŋnɛɛ ba dɔgreba?
-
Ka yɛneeŋ sɛgre wagre kaŋa biŋ a daagbuli poɔŋ a maŋ de erɛ booree zannoo, bo tɔnɔ yɛŋ na nyɛ?
YƐLƐ MINE NAŊ LƐ BEBE
Kanne a yɛlɛ ŋa a nyɛ yɛlɛ naŋ na toɔ̃ soŋ ho bie ka o wa e neŋkpoŋ naŋ taa gyog-sonne.
“Yelnimizeere Ayoɔbo Mine Bibiiri Naŋ Seŋ Ka Ba Zanne” (Awake! No. 2 2019)
Kanne a yɛlɛ ŋa a nyɛ kawane a Baabole naŋ de ko noba naŋ kaara ba dɔgreba naŋ e neŋnyaane.
Dɔɔ kaŋa da ba baŋ lɛ oŋ na toɔ̃ e a guoli o bibiiri soŋ, kyɛ o da eɛ bi-saa naŋ soma yaga. Kaa a vidio ŋa a nyɛ yɛlɛ naŋ da somoo.
Wala ka saamine na toɔ̃ e ka ba neŋ ba bidɔbɔ niiloŋ toɔ̃ e kpeɛŋaa? Kanne a yɛlɛ ŋa a nyɛ a noɔre iribo.
“Wala Ka Saamine Na Toɔ̃ E Ka Ba Neŋ Ba Bidɔbɔ Niiloŋ E Kpeɛŋaa?” (A Watchtower, November 1, 2011)
a A Baabole poɔŋ, a yelbiri “dɛnnoo” tɛgɛ la hoŋ wulo neɛ kaŋa sori, bee hoŋ koo kawane, kyɛbee hoŋ somoo oŋ leɛre o teɛroŋ faare mine. Dɛnnoo ba wuli ka ho tuurɔ o soba zoma, bee a tannoo, bee a eroo nimikuonii.—Yeng Yelibie 4:1.
