SHIRONGWA 50
Weni lipata lyoye li kara lyaruhafo?—Ruha 2
Vana kuna kara ushwi wakutunda kwaJehova. Uye kutaterera kuvakondi va takamite nawa ushwi wavo. Jehova a tapa mapukururo ghamawa ogho gha vhuro kuvatera vakondi va tikite mo shirughana shavo. Mapukurura ghendi nka, kuvhura kuvatera vanuke omo va vhura kukambeka kuruhafo rwamulipata.
1. Mapukururo munke a tapa Jehova kuvakurona?
Jehova ana shanene vakondi va hore vana vavo nakukutulira po shirugho shakukara kumwe navo. Ana shana nka vakondi va popere vana vavo nakurughanita mpango damuBibeli mukuvashonga. (Vishegho 1:8) Uye kutantera vasha ashi: “Va pukururenu nakuvashonga momo a vi shanena Jehova.” (Varura Efesi 6:4.) Jehova kumuhafita ntjene vakondi ava kwama mavyukito ghendi pakuvarera nakupira kuvatapa vavarerere po wapeke.
2. Lipukururo munke a tapa Jehova kuvanuke?
Jehova kushonga vanuke ashi: “Limburukwenu kuvakondi venu.” (Varura Kolose 3:20.) Ntjeneshi vanuke ava fumadeke nalimburukwa vakondi vavo, ngava hafita Jehova navakondi vavo. (Vishegho 23:22-25) Jesus a tulire po shihonenito shashiwa opo a kalire mwanuke. Nampili ngoli a kalire wakutikilira mo, shimpe a limburukwire nakufumadeka vakondi vendi.—Lukas 2:51, 52.
3. Weni lipata li shwenena pepi naKarunga kumwe?
Ntjeneshi ove u mukurona, wa shanena vana voye va hore Jehova yira momo wamuhora naumoye. Weni u tikita mo shitambo shino? Pakurughana ovyo ya ghamba Bibeli ashi: “U di va shonge vana voye [nkango daJehova] ntani di va tantere ntjeneshi mumundi una kara ndi muruyendo.” (Deuteronomi 6:7) ‘Kushonga’ kutanta ashi kuvavyukurukira vininke. Nove walye wa dimburura ashi, una hepa kuvyukurukira vanuke vininke mposhi va vi vhuruke. Litjangwa lino kwa tamba ashi una hepa kushana-shana mpito kehe pano yakughamba navana voye kuhamena Jehova. Vya wapa kutura po ruvede kehe shivike mukukushonga kuhamena Jehova kumwe mulipata. Ntjeneshi kapi mwa kara navana, shimpe vya wapa kukutulira po shirugho shakukushonga Bibeli kumwe.
TEDA KO
Kona-kona mapukururo ghamwe ogho gha vatero lipata li kare lyaruhafo nakukuyuvha lipopero.
4. Shonga vana voye nashihoro
Kapi vya kara ureru kushonga mwanuke. Weni Bibeli yi kuvatera? Varura Jakobus 1:19, 20, makura timwitirenu mapuro ghano:
-
Weni vakurona va negheda shihoro pakughamba navana vavo?
-
Morwanke mukurona a pilira kupukurura monendi ntjene uye ana garapa? a
5. Popera vana voye
Mukupopera vana voye, vya kara namulyo kutimwitira nakehe mwanuke kuhamena likugwanekero panyama. Evi kuvhura vi kare udito nakuyita ntjoni. Kengera VIDIYO, makura timwitirenu mapuro ghano.
-
Morwanke vya va karereranga vakondi vamwe udito kutimwitira navana vavo kuhamana likugwanekero panyama?
-
Munkedi munke vakondi vamwe va vhura kufatulira vana vavo kuhamena likugwanekero panyama?
Yira momo va vi pumba, udjuni waSatana kuna kudonapa unene. Varura 2 Timotheus 3:1, 13, makura timwitirenu lipuro lino:
-
Vadinikarunga vamwe va twenya muvelise 13 kukwatera vanuke kunkondo. Nke ngoli vya karera mulyo vakondi va shonge vana vavo kuhamena likugwanekero panyama nomo vakukunga vavene kuvantu vakukwatera vanuke kunkondo?
Maukenu nka ghamweya
Mbangi daJehova va kara navirughanito vyavingi ovyo vi vatero vakondi va shonge vana vavo kuhamena likugwanekero panyama nakuvapopera kovo va kwaterango vanuke kunkondo. Pashihonena, kenga:
-
Popera vana voye (vidiyo)
-
“Teaching Your Child About Sex” (Awake! No. 5 2016)
6. Fumadeka vakondi voye
Vanuke navadinkantu kuvhura va neghede lifumadeko kuvakondi vavo munkedi oyo va ghambanga navo. Kengera VIDIYO, makura timwitirenu mapuro ghano.
-
Morwanke vyakarera mulyo mudinkantu a ghambe navakondi vendi nalifumadeko?
-
Weni mudinkantu a ghambita vakondi vendi munkedi yalifumadeko?
Varura Vishegho 1:8, makura timwitirenu lipuro lino:
-
Weni mudinkantu a kara ntjeneshi vakondi vendi kuna kumutantera ovyo a rughana?
7. Karerenu Jehova kumwe mulipata
Mapata ghaMbangi daJehova kwa kara naruvede kehe shivike shakukushonga Bibeli kumwe. Nke vya shorokango paukareli walipata? Kengera VIDIYO, makura timwitirenu mapuro ghano.
-
Weni lipata li kara nalikukwamo lyaUkareli walipata kehe pano?
-
Vinke a rughana mukondi mposhi Ukareli walipata u kare wauwa wakuhafera?—Kenga lifano kulivarekero lyashirongwa shino.
-
Nke vi mu karero udito kukushonga kumwe mulipata lyenu?
Pashirugho shaVaisrael va kare, Jehova a shanine ashi mapata gha timwitire kumwe kuhamena matjangwa. Varura Deuteronomi 6:6, 7, makura timwitirenu lipuro lino:
-
Weni u tura pashirughana mpango yino?
Maghano ghamwe murughana paukareli walipata:
-
Kuwapaikirenu vyakumapongo ghambungakriste.
-
Varurenu nakutimwitira shishorokwa shamuBibeli va hafera va mulipata.
-
Ntjeneshi wa kara navanuke vavadidi unene kuvhura u rughanite maghano gha karo muruha “Activity Collections” ku-jw.org.
-
Ntjeneshi wa kara navadinkantu, timwitirenu virongwa vya karo kuruha “Young People Ask” ku-jw.org.
-
Rughanenu shidanauka navana venu vyashishorokwa shamuBibeli.
-
Kengereni nakutimwitira vidiyo ku-jw.org.
VAMWE KUGHAMBA ASHI: “Bibeli udito va yi kwate lighano vanuke.”
-
Weni u mu limburura?
LIKAMO
Jehova ana shana vakondi va hore nakushonga nakupopera vana vavo; vanuke va limburukwe vakondi vavo; ntani mapata gha kushonge kumwe kuhamena Karunga.
Livyukuruko
-
Weni vakurona va deura nakupopera vana vavo?
-
Weni vanuke va negheda lifumadeko kuvakondi vavo?
-
Mauwa munke mapata gha wanena mo pakukutulira po ruvede kehe shivike shakukushonga Bibeli kumwe?
YIVAKO VYAVINGI
Virongwa munke vi wapaiko monoye ngavi kamuvatero muukondi?
Kushonge mapukururo ghamuBibeli va vhura kurughanita ovo va takamitango vakondi vakukurupa.
“Nke ya ghamba ko Bibeli kuhamena kutakamita vakondi vakukurupa?” (Shirongwa kuintanet)
Kenga omo murume ogho a piliro kuyiva omo va reranga vanuke vya yamutompokire kukara sha wamuwa.
Kona-kona omo vasha va nkondopeka likukwatakano lyavo navana vavo vavamati.
“Ngapi vaguhya nava likwatakana novana vawo wovagara?” (Ruhungu, Murongagona-Nsinano 2012)
a MuBibeli, kupukurura kwa tamba kushonga nakuvyukita. Kapi vya tamba ashí kukara naukenya ndi nyanya.—Vishegho 4:1.
