JOKWA 50
Ne̱ni ndabo ango̱ ńa mbia ńeno̱ ná e be̱ bonam e?—Dongo 2
Bana be nde jabea la Yehova. A mabaise̱ bayedi ná ba bongwe di jabea bwam. Yehova a mabola bayedi malea ma bwam mena ma mongwane̱ babo̱ o bola nika. A malangwea pe̱ bana nje beno̱ ná ba bola ná mbia mabu mu be̱ bonam.
1. Njika malea Yehova a mabolano̱ bayedi e?
Yehova a mapula ná bayedi ba to̱nde bana babu, ba tombise̱ pe̱ ponda jita na babo̱. A mapula ná ba tate bana babu, ba bolane̱ pe̱ bete̱sedi ba Bibe̱l o jokwe̱le̱ babo̱. (Minia 1:8) A malangwea basango ba bana ná: ‘Bongwa nde bana bańu o malea ma Yehova.’ (Langa Efeso 6:4.) Yehova e muńe̱nge̱ ke̱ bayedi ba mabupe̱ bediedi bao na ke̱ babo̱me̱ne̱ ba makokise̱ bana babu, o mulopo ma bola moto nupe̱pe̱ mu m’bē̱.
2. Njika malea Yehova a mabolano̱ bana e?
Yehova a mabaise̱ bana ná: “Sengane̱ basango na bańango bańu.” (Langa Kolose 3:20.) Bana ba masengane̱ te̱ bayedi babu ba bola pe̱ babo̱ edube, ba mabwese̱ Yehova na bayedi babu muńe̱nge̱. (Minia 23:22-25) Yesu a dī eyembilan a bwam ponda a tano̱ muna. To̱ná a tano̱ ke̱nge̱nge̱, a sengane̱ bayedi bao bena ba si ta ke̱nge̱nge̱, a bola pe̱ babo̱ edube.—Lukas 2:51, 52.
3. Ne̱ni mbia mo̱ngo̱ mweno̱ ná mu bata sisea be̱be̱ na Loba e?
O be̱n te̱ bana, ye̱ke̱i te̱ o mapula ná babo̱ pe̱ ba to̱nde Yehova kapo̱ ka wa. Ne̱ni weno̱ ná wongwane̱ babo̱ o bola nika e? Tongwea na bupe̱ man malea ma Bibe̱l ná: “O tata yikiye̱ bana bo̱ngo̱ [byala ba Yehova], o kwalea ońol’ao, ke̱ o jai omboa, ke̱ o madangwa o ngea.” (Ndimbisedi 6:7) “Yikiye̱” nika ńe nde langwea moto lambo ngedi jita ke̱ o malee̱ mo̱. O bi ná e yo̱ki pula ná o langweye bana bo̱ngo̱ lambo ngedi jita, ná ba si dimbea mo̱. Yen epas’a Bibe̱l e mapula nde kwala ná, ponda ye̱se̱ wangame̱n wasa epolo o kwalisane̱ bana bo̱ngo̱ jombwea Yehova. Ye bwam ná o te̱se̱ ponda ńena mbia mwe̱se̱ nu mokwano̱ Bibe̱l woki te̱. To̱ o si be̱n nde bana, we ná o no̱ngo̱ ponda o jokwa Eyal’a Loba woki te̱.
ALA O NJIBA
Ombwea malea mena me ná ma bola ná mbia mu be̱ bonam na mbo̱le̱.
4. Okwe̱le̱ bana bo̱ngo̱ na ndolo
Ye ná e be̱ ndutu o jokwe̱le̱ muna. Ne̱ni Bibe̱l ńeno̱ ná ńongwane̱ wa e? Langa Yakobo 1:19, 20, nde lo kwaleye pe̱ ońola min myuedi:
-
Ne̱ni bayedi beno̱ ná ba lee̱le̱ bana babu ndolo ke̱ ba makwala na babo̱ e?
-
Ońola nje moto a s’angame̱nno̱ ko̱kise̱ bana bao ponda a lingino̱ e? a
5. Tata bana bo̱ngo̱
Ná o tate bana bo̱ngo̱, ye mweńa jita ná o kwaleye ońola belongi ba yadi na muna te̱. Yen ebe we ná o bwa iso̱n o bola nika. Ombwa SINIMA, nde lo kwaleye pe̱ ońola myuedi mi mabupe̱.
-
Ońola nje yeno̱ bayedi bō̱ ndutu o kwalea ońola belongi ba yadi na bana babu e?
-
Ne̱ni bayedi bō̱ ba boledino̱ o kwalea ońola belongi ba yadi na bana babu e?
Ka nje te̱ Bibe̱l e se̱le̱no̱ bīse̱, was’a Satan e mabata nde be̱ bobe. Langa 2 Timoteo 3:1, 13, nde lo kwaleye pe̱ ońola min myuedi:
-
Bato ba bobe bō̱ myemba 13 mi makwaleano̱ ba mańamse̱ bana. Ońola nje so̱ yeno̱ mweńa ná bayedi ba kwaleye ońola belongi ba yadi na bana babu, ba lee̱ pe̱ babo̱ ne̱ni tata babo̱me̱ne̱ na ba bato ba bobe e?
Mo̱ o ta o bia nika e?
Mboṅ a Yehova i mabusise̱ belongisan jita bena be mongwane̱ bayedi o kwalea ońola belongi ba yadi na bana babu, na o tata babo̱ na bato ba bobe. K’eyembilan:
-
“Kwalea ońola belongi ba yadi na mun’ango̱” (Umwe̱! No̱. 5 2016)
6. Bola bayedi bo̱ngo̱ edube
Bana na beso̱mbe̱ be ná ba bola bayedi babu edube tongwea na mbadi ba makwalisane̱no̱ babo̱. Ombwa SINIMA, nde lo kwaleye pe̱ ońola myuedi mi mabupe̱.
-
Ońola nje yeno̱ bwam ońola muna to̱ eso̱mbe̱ ná a kwalisane̱ bayedi bao n’edube e?
-
Ne̱ni eso̱mb’a moto yeno̱ ná e kwalisane̱ bayedi bao o mbadi ni malee̱ ná a mabola babo̱ edube e?
Langa Minia 1:8, nde lo kwaleye pe̱ ońola min myuedi:
-
Nje eso̱mb’a moto yangame̱nno̱ bola ke̱ bayedi bao ba boli mo̱ malea e?
7. Owe̱ Yehova na mbia mo̱ngo̱
Mbia ma Mboṅ a Yehova mi mate̱se̱ ponda woki te̱ ońola jowe̱ la ndabo a mbia. Nje meno̱ ná mi bola o di jowe̱ la ndabo a mbia e? Ombwa SINIMA, nde lo kwaleye pe̱ ońola myuedi mi mabupe̱.
-
Ne̱ni mbia mweno̱ ná mu bola ná mu be̱ne̱ jowe̱ la ndabo a mbia woki te̱ e?
-
Nje bayedi beno̱ ná ba bola ná jowe̱ la ndabo a mbia di be̱ muse̱ṅ di bwesane̱ pe̱ muńe̱nge̱ e?—Ombwa duta la bebotedi la din jokwa.
-
Nje ye ná e bola ná e be̱ wa ndutu o jokwa Bibe̱l na mbia mo̱ngo̱ e?
O Israel ńa kwaṅ, Yehova a ta a pula ná mbia mi kwaleye ońola Eyal’ao ponda ye̱se̱. Langa Ndimbisedi 6:6, 7, nde lo kwaleye pe̱ ońola min myuedi:
-
Ne̱ni weno̱ ná o we̱le̱ ben bete̱sedi ba Bibe̱l o ebolo e?
Mambo weno̱ ná o bola o jowe̱ la ndabo a mbia:
-
Boṅsane̱ ndongame̱n.
-
Langa lo kwaleye pe̱ ońola myango ma Bibe̱l mbia mo̱ngo̱ mweno̱ ná mu to̱ndo̱.
-
O be̱n te̱ bana basadi, songwa to̱ busise̱ o mapapa mokwa o bedinge̱dinge̱ ońola bana mena me o jw.org.
-
O be̱n te̱ beso̱mbe̱ ba bana, bińo̱ kwalea ońola tema ońola bekoke̱le̱ yena ye o jw.org.
-
Bińo̱ embilane̱ myango ma Bibe̱l mō̱.
-
Ombwa sinima po̱ ńa jw.org, lo kwaleye pe̱ ońol’ao.
BATO BA MAKWALA NÁ: “Bana ba titi ná ba so̱ṅtane̱ Bibe̱l ońolana ba dia ba salo.”
-
O me̱nde̱ nde jalabe̱ ná nje e?
EBONGOLO
Yehova a mapula ná bayedi ba to̱nde bana babu, bokwe̱le̱ babo̱, ba tate pe̱ babo̱; a mapula ná bana ba bole bayedi babu edube ba sengane̱ pe̱ babo̱; a mapula pe̱ ná mbia mowe̱ mo̱ mwemba.
Ndimbisedi
-
Ne̱ni bayedi beno̱ ná bokwe̱le̱ bana babu ba tata pe̱ babo̱ e?
-
Ne̱ni bana beno̱ ná ba bola bayedi babu edube e?
-
Nje mbia mu matombwane̱no̱ ke̱ mu te̱se̱ ponda ońola jowe̱ la ndabo a mbia woki te̱ e?
BATA WASA
Njika belēdi be me̱nde̱ jongwane̱ bana bo̱ngo̱ ke̱ ba mákoka e?
“Belēdi mutoba bana bangame̱nno̱ jokwa” (Umwe̱! No̱. 2 2019)
E̱ne̱ malea ma bwam Bibe̱l e mabolano̱ ba ba mabongwe̱ bayedi babu ba mádune̱.
“Nje Bibe̱l e makwalano̱ jombwea dibongo la bayedi ba mádune̱ e?” (Tema o mulomba)
E̱ne̱ ne̱ni moto nu si ta nu bia ne̱ni bongwa bana a timbino̱ be̱ sango a bana ńa bwam.
Okwa ne̱ni bome beno̱ ná bouse̱ mulatako mabu na bana babu ba bome.
“Ne̱ni sango a muna eno̱ ná a be̱ be̱be̱ na mun’ao e?” (Njongo a Betatedi, Tinini 1, 2011)
a O Bibe̱l eyala ná “ko̱kise̱” e bambe̱ jo̱nge̱le̱ la lee̱ muna, bola mo̱ bediedi na te̱se̱ mo̱ o ngea. E si mapula kwala mitusan to̱ njo tomtom.—Minia 19:18.
