ADZESUA 50
Ebɛnadze Na Ibotum Ayɛ Ama Enyigye Aatsena W’ebusua Mu?—Ɔfa 2
Mbofra yɛ akyɛdze a Jehovah dze ama awofo, ntsi ɔpɛ dɛ awofo hwɛ hɔn mba yie paa. Jehovah dze afotu pa pii ama a obotum aboa awofo ma wɔaayɛ dɛm. Dɛm afotu ahorow yi botum aboa mbofra so ma woeehu dza hɔn so wobotum ayɛ ama enyigye aatsena ebusua no mu.
1. Ebɛn afotu na Jehovah dze ama awofo?
Jehovah pɛ dɛ awofo dɔ hɔn mba na wonya hɔn ho adagyer paa. Ɔpɛ dɛ awofo bɔ hɔn mba ho ban amma asɛm biara aannto hɔn, na wɔdze Bible mu afotusɛm tsetse hɔn mbofra. (Mbɛbusɛm 1:8) Bible no aka akyerɛ egyanom dɛ wɔnkɔ do ‘ntsetse hɔn mba wɔ Jehovah ne kasakyerɛ mu.’ (Kenkan Ephesusfo 6:4.) Jehovah dze ahyɛ awofo nsa dɛ hɔnankasa ntsetse hɔn mba. Ɔmmpɛ dɛ wɔdze dɛm edwuma yi ma afofor ma wɔyɛ ma hɔn. Sɛ awofo tsie dɛm asɛm yi, na wɔdze Jehovah n’akwankyerɛ tsetse hɔn mba a, ɔma Jehovah n’enyi gye.
2. Ebɛn afotu na Jehovah dze ama mbofra?
Jehovah tu mbofra fo dɛ: “Hom ntsie hom awofo asɛm.” (Kenkan Colossaefo 3:20.) Sɛ mbofra bu hɔn awofo na wotsie hɔn asɛm a, ɔma hɔn awofo na Jehovah nyina enyi gye. (Mbɛbusɛm 23:22-25) Aber a nna Jesus yɛ abofra no, ɔyɛɛ nhwɛdo kamakama bi a mbofra botum esuasua. Ɔwɔ mu dɛ nna bɔn biara nnyi noho dze, naaso nna obu n’awofo na otsie hɔn asɛm.—Luke 2:51, 52.
3. Ebɛnadze na ɔbɔboa ebusua bi ma wɔaabɛn Jehovah?
Sɛ eyɛ ɔwofo a, yɛgye to mu paa dɛ epɛ dɛ wo mba dɔ Jehovah dɛ mbrɛ edɔ Jehovah no. Naaso, ibesi dɛn ayɛ dɛm? Ɔwɔ dɛ edze asɛm a Bible aka yi yɛ edwuma: “Fa [Jehovah n’asɛm] kyerɛkyerɛ wo mba yie, na twetwe ho nkɔmbɔ aber a etse wo fie, nye aber a enam ɔkwan mu.” (Deuteronomy 6:7) Ebɛgye ato mu dɛ, sɛ emmpɛ dɛ wo mba hɔn werɛ fir asɛm bi a aka akyerɛ hɔn no a, ɔyɛ a isi dɛm asɛm no do kyerɛ hɔn mpɛn pii. Ntsi dza dɛm kyerɛwsɛm yi kyerɛ nye dɛ, aber biara ɔsɛ dɛ ehwehwɛ ho kwan bi a edze bɛka Jehovah ho asɛm akyerɛ wo mba. Ɔbɛyɛ papa dɛ dapɛn biara, hom beyi ber bi esi hɔ a ebusua no nyina bɔbɔ mu esua Bible no. Sɛ hom nnyi mba mpo a, hom mbɔ mbɔdzen nsua Nyankopɔn n’Asɛm no mbɔ mu dapɛn biara. Hom yɛ dɛm a ɔbɔboa hom paa.
PƐNSAPƐNSA MU KƆ EKYIR
Ma yɛnhwɛ ndzɛmba ahorow bi a sɛ obi yɛ a obotum aboa ma enyigye aatsena n’ebusua mu, na obiara n’akoma atɔ ne yamu.
4. Sɛ eretsetse wo mba a, ma wonhu dɛ edɔ hɔn
Nokwasɛm paa nye dɛ, mbatsetse nnda famu. Naaso Bible no besi dɛn aboa? Ma yɛnkenkan James 1:19, 20, na yensusu nsɛmbisa yi ho:
-
Sɛ awofo nye hɔn mba robɔ nkɔmbɔ a, ebɛnadze na wɔyɛ a ɔbɛkyerɛ dɛ wɔdɔ mbofra no?
-
Ebɛnadze ntsi na ɔnnsɛ dɛ ɔwofo bi dze ebufuw tsea ne ba? a
5. Bɔ wo mba ho ban
Ndzɛmba a ibotum ayɛ dze abɔ wo mba ho ban no, no mu kor a ohia paa nye dɛ enye hɔn mu biara bɔbɔ nda mu nkitahodzi ho nkɔmbɔ. Dɛm nkɔmbɔ yi dze, no bɔ botum ayɛ dzen ama wo kakra. Ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛnadze ntsi na ɔyɛ dzen ma awofo binom dɛ wɔbɛka nda ho asɛm akyerɛ hɔn mba?
-
Ebɛn akwan ahorow na awofo binom afa do aka nda ho asɛm akyerɛ hɔn mba?
Bible no aka ato hɔ dɛ, nsɛmbɔn bɔkɔ n’enyim paa wɔ wiadze a Satan dzi do tum yi mu, na dɛm pɛpɛɛpɛ so na ɔrokɔ do ndɛ. Ma yɛnkenkan 2 Timothy 3:1, 13, na yensusu asɛmbisa yi ho:
-
Nyimpa bɔn a wɔaka hɔnho asɛm wɔ nyiyimu 13 no, hɔn mu binom wɔ hɔ a, wɔseesee mbofra. Iyi ntsi, ehwɛ a, ebɛnadze ntsi na no ho hia dɛ awofo ka nda ho asɛm kyerɛ hɔn mba, na wɔma wohu mbrɛ wobesi abɔ hɔnho ban efi nyimpa bɔn a wɔtse dɛm no ho?
Ana inyim?
Jehovah Adasefo yɛ video nye nsɛm ahorow pii a ɔboa awofo ma wohu kwan a wobotum afa do nye hɔn mba abɔ nda mu nkitahodzi ho nkɔmbɔ, na wɔaabɔ hɔn mba ho ban efi hɔn a wɔseesee mbofra no ho. No mu bi nye:
-
Bɔ Wo Mba Ho Ban (video)
-
“Ma Wo Ba Nhu Nda Mu Nkitahodzi Ho Nsɛm” (Nyan! No. 5 2016)
6. Bu w’awofo
Ndzɛmba a mbofra nye mbabun botum ayɛ dze akyerɛ dɛ wobu hɔn awofo no mu kor nye dɛ wɔnye hɔn bɛkasa wɔ enyidzi mu. Ma yɛnhwɛ VIDEO yi, na yensusu nsɛmbisa a odzidzi do no ho.
-
Sɛ abofra bi nye n’awofo rekasa na ɔkasa yie a, ebɛn mfaso na ɔwɔ do?
-
Sɛ abofra bi nye n’awofo rekasa a, obesi dɛn akyerɛ dɛ obu hɔn?
Ma yɛnkenkan Mbɛbusɛm 1:8, na yensusu asɛmbisa yi ho:
-
Sɛ abofra bi n’awofo ka dɛ ɔnyɛ biribi a, ɔsɛ dɛ ɔyɛ n’adze dɛn wɔ ho?
7. Hom mbɔ mu nsom Jehovah dɛ ebusua
Dapɛn biara, mbusua a no mufo yɛ Jehovah Adasefo yi ber pɔtsee bi si hɔ dze sua Jehovah ho adze. Sɛ ebusua no hyia mu dɛm dɛ wɔrosom a, ɔyɛ a wɔyɛ no dɛn? Ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛnadze na ɔbɔboa ebusua bi ma wɔaayɛ Ebusua Som dapɛn biara?
-
Ebɛnadze na ɔwofo bi botum ayɛ ama hɔn ebusua som ase aayɛ dɛw na obiara eenya do mfaso?—Hwɛ mfonyin a ɔwɔ adzesua yi n’ahyɛse no.
-
Ebɛnadze na obotum ama wɔaayɛ dzen ama hom ebusua no dɛ hom bɔbɔ mu eesua adze?
Tsetse no, Jehovah kaa kyerɛɛ awofo a nna wɔwɔ Israel no dɛ, ɔsɛ dɛ wɔtaa nye hɔn mba bɔ Kyerɛwnsɛm no mu nkɔmbɔ. Ma yɛnkenkan Deuteronomy 6:6, 7, na yensusu asɛmbisa yi ho:
-
Ibesi dɛn dze dɛm afotusɛm yi ayɛ edwuma?
Dza ibotum ayɛ wɔ hom ebusua som ase:
-
Hom botum esua dza yebosusu ho wɔ asafo nhyiamu ase no.
-
Hom botum akenkan Bible mu asɛm bi a ehwɛ a hom ebusua no enyi bɛgye ho. Hom kenkan wie a, nna hom abɔ mu nkɔmbɔ.
-
Sɛ ewɔ mbofra a wosusuar a, ibotum atwe anaa aprent mbofra dwumadzi a ɔwɔ jw.org do no bi ama hɔn.
-
Sɛ ewɔ mbabun wɔ w’ebusua no mu a, enye hɔn nsusu nsɛm a wɔayɛ ama mbabun a ɔwɔ jw.org do no bi ho.
-
Hom botum ayɛ Bible mu asɛm bi ho drama.
-
Hom botum ahwɛ video ahorow a ɔwɔ jw.org do no bi, na hom abɔ mu nkɔmbɔ.
BINOM KA DƐ: “Bible no dze, ɔyɛ dzen dɛ mbofra bɛtse ase.”
-
Sɛ obi ka dɛm a, ebɛn asɛm na ebɛka?
DZA ESUA
Jehovah pɛ dɛ awofo dɔ hɔn mba, wɔtsetse hɔn na wɔbɔ hɔnho ban; ɔpɛ dɛ mbofra tsie hɔn awofo na wobu hɔn; na ɔpɛ dɛ mbusua so bɔ mu som no.
Mbobɔdo
-
Awofo besi dɛn atsetse hɔn mba na wɔaabɔ hɔnho ban?
-
Ebɛn ndzɛmba na mbofra botum ayɛ dze akyerɛ dɛ wodzi hɔn awofo nyi?
-
Sɛ ebusua bi yi ber bi si hɔ dapɛn biara dze sua Bible no a, ebɛn mfaso na wobenya efi mu?
HWEHWƐ PII KA HO
Ebɛn ndzɛmba na ibotum dze akyerɛ wo mba ma woeenyin abɛyɛ mpanyin pa? Kenkan asɛm yi na ibohu.
Kenkan asɛm yi, na ibohu Bible mu afotusɛm a obotum aboa hɔn a wɔhwɛ hɔn awofo a hɔn mfe akɔ enyim no.
Hwɛ video yi, na ibohu dza ɔboaa ɔbarimba bi a nna onnyim mbrɛ wosi tsetse mba ma ɔbɛyɛɛ egya pa.
Hwɛ dza obotum aboa egyanom ma wɔaabɛn hɔn mbabanyin paa.
“Egyanom, Hom Besi Dɛn Ama Hom Mba Enyi Aka Hom Ho?” (Ɔweɔn-Aban, November 1, 2011)
a Wɔ Bible mu no, sɛ wɔka dɛ “tsea” obi a, dza ɔkyerɛ nye dɛ ebɛtsen obi a ɔafom, anaadɛ edze akwankyerɛ nye nkyerɛkyerɛ bɛma no. Ɔnnkyerɛ dɛ yɛ obi ayakayakadze anaa pira no.—Mbɛbusɛm 19:18.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
