NIKASEMƆ 50
Te Oweku Lɛ Baafee Tɛŋŋ Aná Miishɛɛ?—Fã 2
Bii ji nikeenii ni jɛ Yehowa ŋɔɔ. Ekpaa gbɛ akɛ fɔlɔi baakwɛ nikeenii nɛɛ nɔ jogbaŋŋ. Yehowa kɛ ŋaawoi kpakpai ni baanyɛ awa fɔlɔi ni amɛfee nakai lɛ hãa. Eŋaawoi lɛ tsɔɔ gbekɛbii hu nɔ ni amɛbaanyɛ amɛfee koni miishɛɛ ahi amɛweku lɛ mli.
1. Mɛɛ ŋaa Yehowa woɔ fɔlɔi?
Yehowa sumɔɔ ni fɔlɔi asumɔ amɛbii ni amɛná dekã amɛhã amɛ. Esumɔɔ hu ni fɔlɔi abu amɛbii ahe, ni amɛkɛ Biblia mli ŋaawoi atsɔse amɛ. (Abɛi 1:8) Ekɛɔ tsɛmɛi akɛ: ‘Nyɛyaa nɔ nyɛkwɛa nyɛbii lɛ yɛ Yehowa ŋaawoo lɛ mli.’ (Kanemɔ Efesobii 6:4.) Kɛ́ fɔlɔi kɛ Yehowa ŋaawoi ni kɔɔ bii atsɔsemɔ he lɛ tsu nii, ni amɛkɛ amɛbii lɛ hãaa mɛi krokomɛi ni amɛtsɔse amɛ amɛhã amɛ lɛ, enáa miishɛɛ.
2. Mɛɛ ŋaa Yehowa woɔ bii?
Yehowa fãa bii akɛ: “Nyɛboa nyɛfɔlɔi atoi.” (Kanemɔ Kolosebii 3:20.) Kɛ́ bii jie bulɛ kpo amɛtsɔɔ amɛfɔlɔi ni amɛbo amɛ toi lɛ, ehãa Yehowa kɛ amɛfɔlɔi lɛ fɛɛ náa miishɛɛ. (Abɛi 23:22-25) Yesu fee enɛ he nɔkwɛmɔnɔ kpakpa be ni eji gbekɛ lɛ. Eyɛ mli akɛ eye emuu ni efɔlɔi lɛ yeee emuu moŋ, shi ebo amɛ toi ni ejie bulɛ kpo etsɔɔ amɛ.—Luka 2:51, 52.
3. Mɛni baawa okɛ oweku lɛ ni nyɛtsi nyɛbɛŋkɛ Nyɔŋmɔ?
Kɛ́ fɔlɔ ji bo lɛ, ŋwanejee ko bɛ he akɛ, osumɔɔ ni obii lɛ asumɔ Yehowa, tamɔ bɔ ni osumɔɔ lɛ lɛ. Te ooofee tɛŋŋ owa amɛ ni amɛsumɔ Yehowa? Ehe baahia ni ofee nɔ ni Biblia lɛ kɛɔ nɛɛ: ‘Tĩi Yehowa wiemɔi lɛ amli shii abɔ otsɔɔ obii, ní owie he be ni ota shi yɛ oshĩa kɛ be ni onyiɛ gbɛ nɔ.’ (5 Mose 6:7) Ekã shi faŋŋ akɛ, ole akɛ bei pii lɛ, ja otĩ nɔ ko mli shii abɔ otsɔɔ obii lɛ dani amɛnyɛɔ amɛkaiɔ. Ŋmalɛ nɛɛ tsɔɔ akɛ, esa akɛ otao hegbɛ ni okɛ obii lɛ agba Yehowa he sane daa. Ehi waa akɛ nyɛbaato be kɛkase Yehowa he nii daa otsi akɛ weku. Kɛ́ obɛ bi po lɛ, loloolo lɛ, kɛ́ oto be daa otsi kɛkase Nyɔŋmɔ Wiemɔ lɛ obaaná he sɛɛ.
KASEMƆ PII OFATA HE
Obaana ŋaawoi kpakpai ni baawa oweku lɛ mli bii lɛ fɛɛ koni amɛná miishɛɛ, ni amɛnu he akɛ amɛyɛ shweshweeshwe.
4. Jɛɛ suɔmɔ mli otsɔse obii lɛ
Bitsɔsemɔ kãaa shi akɔɔɔ. Mɛɛ gbɛ nɔ Biblia lɛ baanyɛ awa bo? Nyɛkanea Yakobo 1:19, 20 lɛ, ni nyɛsusua sanebimɔi nɛɛ ahe:
-
Kɛ́ fɔlɔi kɛ amɛbii miiwie lɛ, mɛɛ gbɛ nɔ amɛbaanyɛ amɛjie suɔmɔ kpo?
-
Mɛni hewɔ esaaa kɔkɔɔkɔ akɛ fɔlɔ ko tsɔseɔ ebi be ni emli efu lɛ? a
5. Buu obii lɛ ahe
Bɔ ni afee ni obu obii lɛ ahe lɛ, ehe miihia waa ni okɛ amɛteŋ mɔ fɛɛ mɔ awie bɔlɛnamɔ he. Ekolɛ, ebaafee bo hiɛgbele akɛ obaafee nakai. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛni hewɔ ewa hã fɔlɔi komɛi akɛ amɛkɛ amɛbii baawie bɔlɛnamɔ he lɛ?
-
Mɛɛ gbɛ nɔ fɔlɔi komɛi etsɔ amɛkɛ amɛbii ewie bɔlɛnamɔ he?
Aafee nibii fɔji yɛ Satan je lɛ mli bianɛ fe tsutsu lɛ, taakɛ Biblia lɛ egba lɛ. Nyɛkanea 2 Timoteo 3:1, 13 lɛ, ni nyɛsusua sanebimɔ nɛɛ he:
-
Gbɔmɛi fɔji ni atsĩ amɛtã yɛ kuku 13 lɛ ateŋ mɛi komɛi kɛ gbekɛbii feɔ bɔlɛnamɔ nibii. No hewɔ lɛ, mɛni hewɔ ehe hiaa ni fɔlɔi kɛ amɛbii awie bɔlɛnamɔ he, ni amɛtsɔɔ amɛ nɔ ni esa akɛ amɛfee koni mɛi fɔji nɛɛ kɛ amɛ akafee bɔlɛnamɔ nibii?
Ani ole akɛ . . .
Yehowa Odasefoi feɔ woji kɛ vidioi pii ni baanyɛ awa fɔlɔi ni amɛkɛ amɛbii awie bɔlɛnamɔ he, ni amɛbu amɛhe koni akafee amɛ niseniianii? Nibii nɛɛ ekomɛi nɛ:
6. Buu ofɔlɔi
Gbekɛbii bibii kɛ oblahii kɛ oblayei baanyɛ atsɔ bɔ ni amɛwieɔ amɛhãa lɛ nɔ amɛjie bulɛ kpo amɛtsɔɔ amɛfɔlɔi. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛni hewɔ ehi waa akɛ gbekɛbii baajɛ bulɛ mli amɛkɛ amɛfɔlɔi awie lɛ?
-
Mɛɛ gbɛ nɔ kɛ́ gbekɛbii kɛ amɛfɔlɔi wie lɛ ebaatsɔɔ akɛ amɛbuɔ amɛ?
Nyɛkanea Abɛi 1:8 lɛ, ni nyɛsusua sanebimɔ nɛɛ he:
-
Kɛ́ gbekɛ ko fɔlɔi kɛɛ efee nɔ ko lɛ, mɛni esa akɛ efee?
7. Nyɛfea ekome kɛjáa Yehowa
Wekui ni mli bii ji Yehowa Odasefoi lɛ feɔ ekome kɛjáa Yehowa daa otsi; amɛto be pɔtɛɛ ko ni amɛkɛfeɔ nakai. Te amɛfeɔ weku jamɔ nɛɛ amɛhãa tɛŋŋ? Jiemɔ VIDIO lɛ, ni nyɛsusua sanebimɔ nɛɛ he.
-
Mɛni weku ko baanyɛ afee koni amɛnyɛ amɛfee Weku Jamɔ daa otsi?
-
Mɛni fɔlɔi baanyɛ afee koni weku jamɔ lɛ aŋɔɔ ni weku lɛ mli bii lɛ aná he sɛɛ hu?—Kwɛmɔ mfoniri ni yɔɔ nikasemɔ nɛɛ shishijee lɛ.
-
Mɛni baanyɛ ahã ewa kɛhã nyɛ akɛ nyɛbaafee ekome kɛkase nii?
Yehowa kpa gbɛ akɛ blema Israel wekui lɛ amli bii lɛ baawie ŋmalɛi lɛ ahe daa. Nyɛkanea 5 Mose 6:6, 7 lɛ, ni nyɛsusua sanebimɔ nɛɛ he:
-
Mɛɛ gbɛ nɔ obaanyɛ okɛ ŋaawoo nɛɛ atsu nii?
Nibii komɛi ni abaanyɛ afee yɛ weku jamɔ mli:
-
Nyɛfea ekome kɛsaa nyɛhe kɛhã asafoŋ kpeei.
-
Nyɛkanea Biblia mli sane ko ni nyɛweku lɛ baanya he ni nyɛsusua he.
-
Kɛ́ gbekɛbii bibii yɛ weku lɛ mli lɛ, nyɛdaunlodia loo nyɛprintia jw.org lɛ nɔ nifeemɔi kɛhã gbekɛbii lɛ eko.
-
Kɛ́ oblahii loo oblayei yɛ weku lɛ mli lɛ, nyɛsusua jw.org lɛ nɔ sane kɛhã oblahii kɛ oblayei lɛ eko he.
-
Nyɛfea Biblia mli saji komɛi ahe drama.
-
Nyɛkwɛa jw.org lɛ nɔ vidioi lɛ eko ni nyɛsusua he.
MƐI KOMƐI KƐƆ AKƐ: “Biblia lɛ mli wa tsɔ kɛhã gbekɛbii.”
-
Kɛ́ mɔ ko kɛɛ nakai lɛ, mɛni obaakɛɛ?
EMLI OTI
Yehowa sumɔɔ ni fɔlɔi asumɔ amɛbii, amɛtsɔse amɛ, ni amɛbu amɛhe; esumɔɔ ni bii abu amɛfɔlɔi ni amɛbo amɛ toi; ni wekui afee ekome kɛjá lɛ.
Mɛni Okase?
-
Mɛɛ gbɛ nɔ fɔlɔi baanyɛ atsɔse amɛbii ni amɛbu amɛhe?
-
Mɛɛ gbɛ nɔ bii baanyɛ ajie bulɛ kpo amɛtsɔɔ amɛfɔlɔi?
-
Kɛ́ weku ko to be ko koni daa otsi lɛ amɛkɛfee weku jamɔ lɛ, mɛɛ jɔɔmɔi amɛbaaná?
EHE SAJI KROKOMƐI
Mɛɛ sui esa akɛ obi lɛ aná koni no awa lɛ kɛ́ eda?
Obaana ŋaawoi kpakpai ni Biblia lɛ kɛhã ni baanyɛ aye abua mɛi ni kwɛɔ mɛi ni egbɔlɔ lɛ.
“Mɛni Biblia Lɛ Kɛɔ Yɛ Fɔlɔi Ni Egbɔlɔ Lɛ Akwɛmɔ He?” (jw.org lɛ nɔ sane)
Obaana nɔ ni hã nuu ko ni kulɛ eleee bɔ ni ebaafee etsɔse ebii lɛ nyɛ etsɔse ebii lɛ fɛɛ jogbaŋŋ.
Obaana nɔ ni baawa tsɛmɛi koni naanyobɔɔ ni mli wa ahi amɛ kɛ amɛbihii ateŋ.
“Te Tsɛmɛi Aaafee Tɛŋŋ Amɛha Tsakpaa Kpakpa Akã Amɛkɛ Amɛbihii Ateŋ?” (Buu-Mɔɔ, November 1, 2011)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
