LÈSON 50
Kijan fanmi a-w pé ni tchè-kontan ? (2èm pati)
Sé timoun-la sé on kado Jéova fè-nou. I vlé kè sé paran-la pran swen a bèl kado-lasa. Sé pousa i ka ba-yo sé konsèy-la ki fo la pou yo rivé fè sa. Men i ka palé ba sé timoun-la osi ! I ka di-yo sa yo pé fè pou fanmi a yo ni tchè-kontan.
1. Ki konsèy Jéova ka ba sé paran-la ?
Jéova vlé kè sé paran-la enmé timoun a yo é kè yo fè tousa yo pé pou pasé onlo tan èvè yo. Anplis, i vlé kè yo pwotéjé timoun a yo é kè yo sèvi èvè sé prensip-la ki an Bib-la pou lévé-yo (Pwovèb 1:8). I ka di sé papa-la : « Kontinyé lévé-yo sèlon édikasyon é avèwtisman a Jéova » (li Éfézyen 6:4). A pa ti kontan Jéova ka kontan lè sé paran-la ka suiv konsèy-lasa ! Sa ki ka fè-y plézi osi, sé lè yo pa’a ba pondòt moun lévé timoun a yo an plas a yo.
2. Ki konsèy Jéova ka ba sé timoun-la ?
Mi sa Jéova ka di sé timoun-la : « Kouté fanmi a zòt » (li Kolosyen 3:20). Lè sé timoun-la ka rèspèkté fanmi a yo é yo ka kouté-yo, Jéova ka kontan é fanmi a yo osi (Pwovèb 23:22-25). Lè Jézi té toupiti, i lésé on bèl ègzanp toubònman. I té ka kouté paran a-y é i té ka rèspèkté-yo menmsi i té pawfè (Lik 2:51, 52).
3. Kijan fanmi a-w pé vin pibon zanmi èvè Bondyé ?
Si ou ni timoun, sèten ou vlé kè yo enmé Jéova menmjan ki-w. Kijan ou pé édé-yo fè sa ? Mi konsèy-lasa Bib-la ka ba-w : « Fò ou ké fè-yo rantré [sé pawòl-la Jéova ka di-nou la] an tchè a timoun a-w é kè ou palé dè yo lè ou ké sizé akaz a-w é lè ou ké ka maché an lari-la » (Détéwonòm 6:7). Sèten ou sav kè pou timoun a-w sonjé on biten, fò ou répété-y plizyè fwa. Donk menmjan-la, pou fè pawòl a Jéova rantré an tchè a timoun a-w, fò ou pran labitid palé dè Jéova èvè yo. Si ou ka étidyé Labib èvè fanmi a-w chak simenn, sé on bon biten. É menmsi ou pa ni timoun, sa ké toujou fè-w dibyen si ou pran tan étidyé Labib tousèl a-w chak simenn.
AN-NOU FOUYÉ PI FON
An-nou vwè ka chakmoun pé fè pou tout fanmi-la ni tchè-kontan é pou yo santi-yo ansékirité.
4. Lévé timoun a-w èvè lanmou
Sa pa toujou fasil dè lévé on timoun. Kijan Bib-la pé édé-w ? Li Jak 1:19, 20 é fè on ti kozé asi sé kèsyon-lasa :
-
Lè sé paran-la ka palé ba sé timoun-la, kijan yo pé montré kè yo enmé timoun a yo ?
-
Poukwa on paran pa dwèt jen korijé a timoun a-y lèwvwè i kòlè ?
5. Pwotéjé timoun a zòt
Si ou vlé pwotéjé timoun a-w, fò ou palé dè sa ki anrapò èvè sèks èvè yochak. Sa enpòwtan toubònman. Pétèt ou pé santi-w jenné dè palé dè sa. Gadé VIDÉO-la é fè on ti kozé asi sé kèsyon-la ki ka vin la.
-
Poukwa sèwten paran ka santi-yo jenné pou palé dè sèks èvè timoun a yo ?
-
Kijan sèwten paran rivé palé dè sèks èvè timoun a yo ?
Pi nou k’ay, é pi mond a Satan ka vin méchan. É sé pwofési-la té ja anonsé sa. Li 2 Timoté 3:1, 13 é fè on ti kozé asi kèsyon-lasa :
-
Lè vèwsé 13 la ka palé dè sé méchan-la, adan yo nou ka touvé sé moun-la ki ka fè malpwòpté èvè timoun. Alò poukwa sa enpòwtan kè sé paran-la palé dè sèks èvè timoun a yo ? É poukwa sa enpòwtan kè yo èspliké timoun a yo kijan yo pé pwotéjé-yo pou sé moun-lasa pa fè-yo ayen ?
Ès ou té sav sa ?
Sé Témwen a Jéova la ka pwopozé sé paran-la onlo piblikasyon ki ké édé-yo palé dè sèks èvè timoun a yo. Anplisdisa, sé piblikasyon-lasa ké édé-yo pwotéjé timoun a yo pou ponmoun pa fè malpwòpté èvè yo. Mi déotwa adan yo :
-
Pwotéjé timoun a-w (vidéo)
-
« Parler de sexualité à son enfant » (Réveillez-vous ! no 5 a 2016)
6. Rèspèkté fanmi a zòt
Lè on timoun oben on jennmoun ka palé ba fanmi a-y byen, i ka montré kè i ka rèspèkté-yo. Gadé VIDÉO-la é fè on ti kozé asi sé kèsyon-la ki ka vin la.
-
Lè on timoun oben on jennmoun ka palé èvè onlo rèspé ba fanmi a-y, ki bon biten sa pé pòté ba-y ?
-
Lè on jennmoun ka palé ba fanmi a-y, kijan i ka montré kè i ka rèspèkté-yo ?
Li Pwovèb 1:8 é fè on ti kozé asi kèsyon-lasa :
-
Kijan on jennmoun dwèt réyaji lè fanmi a-y ka ba-y on konsèy ?
7. Pran on tan pou zò étidyé Labib ansanm
Aka sé Témwen-la, tout sé fanmi-la ka pran on tan pou étidyé Labib chak simenn. Ka yo ka fè lè yo ka adoré Bondyé an fanmi ? Gadé VIDÉO-la é fè on ti kozé asi sé kèsyon-la ki ka vin la.
-
Ka on fanmi pé fè pou adoré Bondyé ansanm chak simenn ?
-
Lè on fanmi ka adoré Bondyé ansanm, fò toutmoun touvé sa itil é entérésan. Ka on papa oben on manman pé fè an sans-lasa ? (gadé imaj-la ki an tèt a lèson-la).
-
Ki difikilté ou pé rivé a jwenn lè ou bizwen étidyé Labib an fanmi ?
An tan a Izrayèl, Jéova té vlé kè sé fanmi-la pran labitid palé dè Pawòl a-y. Li Détéwonòm 6:6, 7 é fè on ti kozé asi kèsyon-lasa :
-
Kijan ou pé suiv prensip-lasa ?
Déotwa lidé pou adoré Bondyé an fanmi :
-
Préparé sé réinyon-la.
-
Li on istwa an Bib-la kè tout fanmi-la enmé é fè on ti kozé asi-y ansanm.
-
Si ou ni jenn timoun, téléchawjé oben enprimé on aktivité ki fèt pou sé timoun-la asi jw.org.
-
Si ou ni jennmoun akaz a-w, fè on ti kozé èvè yo asi on awtik ki fèt pou sé jennmoun-la é kè ou ké touvé asi jw.org.
-
Chwazi on istwa ki an Bib-la é fè on pyès-téat èvè-y, épi tout fanmi-la.
-
Gadé on vidéo asi jw.org é fè on ti kozé asi-y.
MI SA MOUN KA DI : « Granmoun ki granmoun pa’a rivé konprann sa ki maké an Bib-la. Ou ka di sé sé timoun-la ki ké konprann-li ? »
-
Ka ou té’é réponn ?
ON TI RÉZIMÉ
Jéova vlé kè sé paran-la pwotéjé timoun a yo, é kè yo lévé-yo èvè onlo lanmou. I vlé kè sé timoun-la rèspèkté é kouté fanmi a yo é anplisdisa, i vlé kè sé fanmi-la adoré-y ansanm.
Ka ou woutyenn
-
Kijan sé paran-la pé lévé timoun a yo é ka yo pé fè pou pwotéjé-yo ?
-
Kijan sé timoun-la pé montré kè yo ka rèspèkté fanmi a yo ?
-
Lè sé fanmi-la ka pran on tan pou adoré Bondyé ansanm chak simenn, ki bon biten sa ka pòté ba yo ?
AY GADÉ SA OSI
Ki konsèy ki ké édé on timoun lè i ké vin granmoun ?
« Six valeurs à transmettre aux enfants » (Réveillez-vous ! no 2 a 2019)
Déotwa konsèy Bib-la ka bay pou séla ki ka okipé dè on fanmi a yo ki ja ni on bèl laj.
Istwa a on boug ki pa té sav kijan pou i té lévé timoun a-y ; men magrésa i vin on bon papa kanmenm.
Kijan on papa pé fè pou i vin pibon zanmi èvè gason a-y.
« Comment un père peut-il rester proche de son fils ? » (Tou dè Gad a 1é novanm 2011 an fransé)
a Adan Labib, korijé on timoun vlé di anségné-y, èspliké-y ki dirèksyon pou i pran, é édé-y chanjé tout mové konpòwtèman oben tout mové mantalité i té é pé ni. Korijé pa jen vlé di maltrété oben britalizé (Pwovèb 15:5).
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
