REIREI 50
Ko na Kangaa ni Karekea te Kukurei n Am Utu?—Mwakoro 2
Naati boni bwaintangira mairoun Iehova. E kantaningaiia kaaro bwa a na tararua raoi te bwaintangira aei. E katauraoi taeka n reirei aika raraoi Iehova ibukini buokaia kaaro ni karaoa anne. A kona ni buokaki naba iai naati, n ataa tabeia ibukini boutokaan aia utu bwa e na kakukurei.
1. Tera ana taeka n reirei Iehova nakoia kaaro?
E kantaningaiia kaaro Iehova bwa a na tangiriia natiia ao ni kabanea aia tai ae bati ma ngaiia. E tangiriia naba kaaro bwa a na kamanoia natiia mani kabuanibwai, ao a na kamanenai ana boto n reirei te Baibara ni kataneiaia iai natiia. (Taeka N Rabakau 1:8) E kangai nakoia taama: “Kaikawaiia [natimi] i nanon . . . ana kaungaunga Iehova.” (Wareka I-Ebeto 6:4.) E kukurei Iehova irouia kaaro ngkana a kakairi n ana kaetieti, ae a na kaikawaaia natiia ao n aki mwiokoa temanna ibukia natiia.
2. Tera ana taeka n reirei Iehova nakoia naati?
E reireinia naati Iehova ni kangai: “Kam na ongeaba irouia ami karo.” (Wareka I-Korote 3:20.) Ngkana a karineia aia karo naati ao n ongeaba irouia, a kakukureia iai Iehova ao aia karo naba. (Taeka N Rabakau 23:22-25) E katea te katoto ae raoiroi Iesu ngke te teei ngaia. E ongeaba irouia ana karo ao e karineia, e ngae ngke e kororaoi.—Ruka 2:51, 52.
3. Ko na kangaa ni kaan riki ma te Atua ngkoe ma am utu?
Ngkana te karo ngkoe, ko bon tangiriia natim bwa a na tangira Iehova n aron tangirana iroum. E na kangaa n riki anne? Ni karaoan ae taekinaki n te Baibara ae kangai: “Kam riai ni karin i nanoia natimi [ana taeka Iehova] ao n taekini ngkana kam tekateka i nanon ami auti, ao ngkana kam nakonako i nanon te kawai.” (Te Tua-Kaua 6:7) Te taeka ae “karin” e nanonaki iai te okioki n reireinna te bwai teuana. Ko bae n ataia ae ko bon riai ni kaokioka te bwai teuana nakoia natim bwa a aonga n ururingnga. E nanonaki n te kibu aei bwa ko riai n ukeri taai ake ko na taekina iai Iehova nakoia natim. E raoiroi naba ngkana ko kamwaawa teuana te tai n te wiki ibukin te taromauri n utu. Ngkana akea natim, ko na boni kakabwaiaaki naba ngkana ko katoa wiki n ukeuke n Ana Taeka te Atua.
REIAKINA AE BATI RIKI
Iaiangoi taeka n ibuobuoki aika manena aika kona ni karekea te kukurei nakoia kaain te utu ao namakinan ae a kamanoaki raoi.
4. Kataneiaia natim ma te tangira
E kona ni kangaanga kataneiaan te nati. Tera te ibuobuoki man te Baibara? Wareka Iakobo 1:19, 20, ao maroroakin titiraki aikai:
-
A na kangaa kaaro ni kaotiota te tangira ngkana a maroro ma natiia?
-
Bukin tera ngkai a aki riai kaaro n reireinia ni kaetiia natiia ma te un? a
5. Kamanoia natim
E kakawaki ibukini kamanoaia natim, bwa ko na mamaroro ma ngaiia temanna ma temanna, taekan te wene n taanga. E kona ni kamwerengau karaoan aei. Kaota te TAAMNEI, ao maroroakin titiraki aikai.
-
E aera ngkai e kangaanga irouia kaaro tabeman maroroakinan te wene n taanga nakoia natiia?
-
A kangaa kaaro tabeman ni kona ni maroroakina te wene n taanga nakoia natiia?
N aron are e taetae ni burabetinaki, e na rikirake ni buakaka ana aonnaba Tatan aei. Wareka 2 Timoteo 3:1, 13, ao maroroakina te titiraki aei:
-
Tabeman aomata aika buakaka ake a taekinaki ni kibuna 13 a tangakoiia ataei. Ngaia are bukin tera bwa e kakawaki irouia kaaro bwa a na reireinia natiia taekan te wene n taanga, ao aroia ni kamanoia mairouia taan tangakoiia ataei?
Ko ataia?
A katauraoi bwaai n ibuobuoki aika bati Ana Tia Kakoaua Iehova ibukia kaaro, are a na kona n reireinia iai natiia bwa tera te wene n taanga, ao a na kangaa ni kamanoia mairouia taan tangakoiia ataei. N te katoto, nora:
-
Kamanoia Natim (taamnei)
-
Learn From the Great Teacher, mwakoro 10 ao 32
-
“Reireinia Natim Bwa Tera te Wene n Taanga” (Taratara! Na. 5 2016)
6. Karineia am karo
A kona ni kaota karineaia aia karo naati ao roro n rikirake, n aroia n taetae nakoia. Kaota te TAAMNEI, ao maroroakin titiraki aikai.
-
E aera ngkai e kakawaki iroun te roro n rikirake bwa e na maroro ma te karinerine nakoia ana karo?
-
E na kangaa te roro n rikirake n taetae ma te karinerine nakoia ana karo?
Wareka Taeka N Rabakau 1:8, ao maroroakina te titiraki aei:
-
Tera ae e riai ni karaoia te roro n rikirake ngkana e kaetaki irouia ana karo?
7. Taromauria Iehova ma am utu
A kamwaawa teuana te tai n te wiki Ana Tia Kakoaua Iehova bwa aia tai n taromauri n aia utu. Tera ae karaoaki n tain te taromauri n utu? Kaota te TAAMNEI, ao maroroakin titiraki aikai.
-
E na kangaa te utu teuana ni kateimatoa aia Taromauri n Utu?
-
Tera ae e kona ni karaoia te karo bwa e aonga n uaana ao ni kakukurei te taromauri n utu?—Nora te taamnei ni moan te reirei aei.
-
Tera te kangaanga ae ko rinanona ae e a aki kona n reke iai am tai ni kaai n taromauri n utu?
N aia tai tibun Iteraera rimoa, ao e kantaningaiia utu nako Iehova bwa a na mamaroroakina kanoan te Koroboki ae Tabu. Wareka Te Tua-Kaua 6:6, 7, ao maroroakina te titiraki aei:
-
Ko na kangaa ni maiuakina te boto n reirei aei?
Baika ko kona ni karaoi n am taromauri n utu:
-
Katauraoi nakoni bobotaki n taromauri.
-
Wareka ao maroroakina te rongorongo teuana man te Baibara ae a na unga iai kaain am utu.
-
Ngkana iai natim aika uarereke, karekea man jw.org baika katauraoaki ibukia ataei.
-
Ngkana rooro n rikirake natim, maroroakini kaongora ibukia rooro n rikirake aika n jw.org.
-
Karaoa te kaotioti teuana man te Baibara ma natim.
-
Mataku ao maroroakina te taamnei teuana man jw.org.
A TAKU TABEMAN: “E rangi ni kangaanga bwa a na ota ataei n te Baibara.”
-
Tera ngkoe am kaeka?
KAKIMOTOTOANA
E tangiriia kaaro Iehova bwa a na tangiriia natiia, a na kataneiaia, ao ni kamanoia natiia. E tangiriia naati bwa a na karineia aia karo ao n ongeaba irouia, ao e tangiriia utu nako bwa a na kaai n taromauria n aia utu.
Kauring
-
A na kangaa kaaro ni kataneiaia ao ni kamanoia natiia?
-
A na kangaa naati ni kaota karineaia aia karo?
-
Baikara kakabwaia mani kamwawaan teuana te tai n te wiki ibukin te taromauri n utu?
NORI NABA AIKAI
Baikara reirei aika kona ni katauraoa natim nakoni maiuna n roro n rikirake?
“Baika Onoua Aika Riai n Reireinaki Ataei” (Taratara! Na. 2 2019)
Nori taeka n ibuobuoki aika manena man te Baibara ibukia naake a tararuaiia aia karo aika kara.
“Tera ae Taekinaki n te Baibara ni Kaineti ma Tararuaaia Kaaro Aika Kara?” (Te kaongora n jw.org)
Nora aron te mwaane temanna n riki bwa te karo ae nakoraoi arona ma natina, e ngae ngke e babanga mai mwaina arona ni kaikawaiia natina.
a N te Baibara ao te taeka ae “reirei ni kaetieti” e irekereke ma te kairiri, te reirei, ao kaetan temanna. Akea irekerekena ma te kaetieti n te aro ae riao ke n ribuaka.—Taeka N Rabakau 4:1.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
