ƝAAKWƐLƐI 50

Ka pɛli kɛi ləi kwəinɛɛ hu ka yəi bɛlɛn ? (2 naa)

NWOO MƐN

Leapɛlɛɛ kaa a Zehova ŋɔ mɛinɛɛ. Zehova a kɛ longaanua diɛ di mɛinɛɛ tii hon a nɛlɛɛ. A liɛwoo lɛlɛɛɠaa tɛɛ di pɔ yii a kpɔnmaa tɛɛ di pɔ yili kɛ mɛni ɓa. Zehova a mo nwɔnɔ leapɛlɛɛɠaa diɛ yii da pɛli gɛi ə gɛ di yəi bɛlɛn nua diɛ pɛli kɛi kwəinɛɛ hu.

1. Liɛwoo ləkɛɛɠaa ɓə Zehova a dɛɛ longaanua pɔ ?

Zehova kaa bɔ longaanua di di lonnii wɛlilakɛ ə lɛɛ da di lonnii diɛ lowai kɛ gee ɓa kɛlɛ-kɛlɛ. Gaa nwɔnɔ bɔ longaanua diɛ di lonnii maakpɛ ə lɛɛ diɛ di lonnii hutɔɔ a Biblə ŋɔ liɛwooɠaa (Hanwon 1:8). Zehova a kɛ longaanua diɛ : [“ Ka ka lonnii] kulɔ ɉu, káá di hutɔɔ, káá di liɛwoo kɛ a wooɠaai a həɠə gu Namu pɔ ” (Efɛsə 6:4 ɓo). Longaanua diɛ kpinii ɓə maanɛɛ di di lonnii hutɔɔ maahonɛɛli di ho yili kalihwaɓo nu takpɛli ɓa. Da hwilɛn niɛwoo ŋɛi pulu yili a Zehova kwəinɛɛ kpɔ kɛnɛ.

2. Liɛwoo ləkɛɛɠaa ɓə Zehova a dɛɛ leapɛlɛɛ pɔ ?

Zehova a kɛ leapɛlɛɛ diɛ : “ Ká lɛɛ ká kaa-nua woo mu ” (Kolɔsə 3:20 ɓo). Leapɛlɛɛ da kɛi di kaanua maawiɛ, diɛ lɛɛ di woo mu, da Zehova kwəinɛɛ, ə lɛɛ da di kaanua kwəinɛɛ (Hanwon 23:22-25). Zesu ə kɔɔmaa lɛlɛɛ lɛ yili hu ɓɛlowai ə kɛ la a lokolo. Pələi ma ə kɛ la a nui nɛŋɛn hwə kɛ ma ə kɛi lɛɛ gaanua woo mu ə lɛɛ yɛ di maawiɛ (Lukə 2:51, 52).

3. Pɛlɛn ɲii ɓo nua da tɛɛ ləi ə gɛ di maa ə lɛɛ a nɛɠɛɛ Yálá ɓa kpɔ kɛnɛ ?

Akɛ longaa yɛ́, pələi ya Zehova wɛlilakɛla bələ lɔ ɓə ə́ kaa la bɔ ə́ lonnii di Zehova wɛlilakɛ la. Ya pɛli kpɔnmaa tɛɛ ləi di pɔ yili hu ? Ya pɛli kpɔnmaa tɛɛ di pɔ a ɓɛlowai ya kɛ niɛwoo ŋɛi pɔ túwɔ́ɓoi la yai kɛi ma : ‘ Ka [Zehova] ŋɔ tɔnŋaa hukulɔ ka lonnii diɛ, ka kɛ moi diɛ ; ka kɛ ka yəi bɛlɛ́n, ə ma kɛ hiɛ pələ pɔ, ka kɛ laani, ka ma kɛ tɔɔni ’ (Dɔ́n ɉɛɓɛ 6:7). Vɛlisɛɛ ŋɛi hu, da kɛ ma ka Zehova ŋɔ Tɔnŋaa “ hukulɔ ” ka lonnii diɛ mukulaa ɓaa kaa mo diɛ kɛlɛ-kɛlɛ. Ə́ gɔlɔn yɛ́ ma ə gɛ mɛni ta naakili ə lɛɛ ə́ lon ŋa maanɛɛ yɛ́ ɉukulɔ ma kɛlɛ-kɛlɛ. Vɛlisɛɛ ŋɛ mukulaa ɓaa nwɔnɔ yɛ́ lowai hɔlɔɓo kɛlɛ-kɛlɛ ə gɛ yɛ́ pɛli Zehova maamɛni hukulɔi ə lonnii diɛ. Mɛni lɛlɛɛ ɓaa nwɔnɔ ka lowai ta həɠə ɉu lɔwɔ kəlee kaa Zehova ɓatoo ka yəi bɛlɛn. Ə ma kɛ lon və yɛ́ ya kɛi lowai həɠə lɔwɔ kəlee yɛ́ Biblə kalan ya dɔlɔ kulɔ.

Ə́ WƆ MƐNKƆLƆNŊAA TA PƐLƐ MA

Gaa kpaaləɠaai da pɛli ma di gɛ pɛlɛn ɲii ɲaa yɛ nɛɛ.

4. Ə́ lonnii hutɔɔ a wɛlikɛmaalaa

Lokolo hutɔɔ kaa a mɛni yii gɛ laa ho nɛɛli. Biblə a pɛli kpɔnmaa tɛɛ ləi ə́ pɔ ? Ɉakə 1:19, 20 ɓo, ə lɛɛ ka lono kɛ gɛɛmaalənŋaa ŋɛi mɛi :

Longaanua da pɛli wɛlikɛmaalaa lɛi ləi di lonnii diɛ da diɛni da kɛi hwaa ?
Lə mɛni ɓa longaamun a kɛ liiholi a hu maahonɛɛli ho non ɉutɔɔ a naalowai ?

5. Ka ka lonnii maakpɛ

Ə gɛ kaa pɛli ka lonnii maakpɛi, mɛni wala-wala ɓaa mɛniɠaa da hwilɛn nɛɛnu mɛni ɓa da hulɔnu mɛni ɓa ka ɉukulɔ di tɛi-tɛi kəlee diɛ. Ka pɛli kiɛ ka yili kaa a nwun mɛn mɛni. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

VIDIO : Ka ka lonnii maakpɛ mɛniɲɔn dɔwɔ (2:58)

Lə mɛni ɓa gɛ laa ho nɛɛ li longaanua taɠaa yəi di nɛɛnu mɛni awala kɛtii hulɔnu mɛni hukulɔ di lonnii diɛ ?
Longaanua taɠaa di tɛɛ ləi diɛ nɛɛnu mɛni awala kɛtii hulɔnu mɛni hukulɔ di lonnii diɛ ?

Yɛ pələi Yálá ŋɔ lolowooɠaa di mo la, nwanalɔ mɛni hu kaa lɔ ma yɛ kɛnɛ Sətana ŋɔ yɛnɛɛ ŋɛi hu. Timote veelɛ 3:1, 13 ɓo, ə lɛɛ ka lono kɛ gɛɛmaalən ŋɛi mɛi :

Mɛniɲɔngɛnuai di maamɛni ɓoɔ nwookpuɔ 13 hu, daɠaa ɓaa a nuai da too leapɛlɛɛ mɛi. Lə mɛni ɓa mɛni wala-wala ɓaa longaanua di ɉukulɔ di lonnii diɛ, ə lɛɛ di mo diɛ pələi da pɛli di kpɔɔ maakpɛi la too mɛi kɛ nua yəi ?

Ə́ kili kaa ɉu ?

Zehova ŋɔ Kəlaɠaa daa hɛɓɛ tamaa kulɔ yii a kpɔnmaa tɛɛ longaanua pɔ, mɛniɠaa vilɛnŋaa nɛɛnu mɛni da hulɔ mɛni ɓa diɛ pɛli ɉukulɔi di lonnii diɛ ə lɛɛ diɛ pɛli di maakpɛi toomɛikɛnua yəi. Gɔɔmaaɠaa ka :

6. Ka ka kaanua maawiɛ

Leapɛlɛɛ da muhəɠəninɛɠaa da pɛli di di kaanua maawiɛ a pələi da kɛ hwaai la di pɔ. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

VIDIO : Ŋa pɛli hwaai ləi gaanua pɔ ? (2:19)

Lə mɛni ɓa mɛni wala-wala ɓaa muhəɠəlon yɛ hwaa gaanua pɔ a maawiɛlaa ?
Pələi muhəɠəlon a hwaa la gaanua pɔ a nɛ ləi diɛ yɛ ma a di maawiɛ ?

Hanwon 1:8 ɓo, ə lɛɛ ka lono kɛ gɛɛmaalən ŋɛi mɛi :

Muhəɠəlon kaanua da kɛi niɛwoo kɛ maanɛɛ yɛ túwɔ́ ləi ?

7. Ka ə́ yəi bɛlɛn nua ka Zehova ɓatoo gee ɓa

Zehova ŋɔ Kəlaɠaa da lowai ta həɠə ɉu a lɔwɔ kəlee diɛ Zehova ɓatoo di yəi bɛlɛn. Di yəi bɛlɛn galan dii kɛ pələ a kɛ ləi ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

VIDIO : Pɛlɛn galan : Mɛniɠaa gɛ laa ho nɛɛ li ɉu, ə lɛɛ yili pulu mɛinɛɛɠaa (8:04)

Pɛlɛn ɲii ɓo nua da pɛli tɛɛi ləi diɛ pɛli Zehova ɓatoo di yəi bɛlɛn a lɔwɔ kəlee ?
Lə ɓə longaamun a pɛli gɛi ə gɛ ɲəi bɛlɛn nua kəlee diɛ pɛli, di wɔ Yálá ɓatoo pələ di yəi bɛlɛn dɔlɔ kulɔi ə lɛɛ diɛ ɲaanɛɛ kulɔ ? (Votoi ŋɛi ɲaakwɛlɛi ŋɛi kɔwɔtɔɔi ka lono kɛ mɛi).
Lə mɛniɠaa ɓə a pɛli ma ə gɛ yɛ́ ka ə́ yəi bɛlɛn nua ka hwa Yálá Lawoo kalan gee ɓa ?

Zehova ə kɛ bɔ Israɛlə lonnii da di yəi bɛlɛn nua diɛ Yálá Lawoo ɓo gee ɓa kɛlɛ-kɛlɛ. Dɔ́n ɉɛɓɛ 6:6, 7 ɓo, ə lɛɛ ka lono kɛ gɛɛmaalən ŋɛi mɛi :

Ya pɛli dɔn-nwoo ŋɛi pɔ túwɔ́ɓoi ləi ?

Pɛlɛn galan gɛ pələ taɠaa :

Ka ka wɔ ŋaakpɔn dɔwɔ pɛli gee ɓa.
Ka lono kɛ Biblə ŋɔ pɔlɔ kiliinŋaa ta mɛi yii nwɛli kaa ə́ yəi bɛlɛn nua diɛ.
Akɛ lon gaa kaa ka li jw.org ɓa, hɛɓɛɠaa kaa laa a leapɛlɛɛ di wɔ ka da telezalisə awala kɛtii ka gulɔ hɛɓɛ kulɔ maɉin ma.
Akɛ muhəɠəlonnii kaa ka yəi, ka hɛɓɛ ta həɠə jw.org ɓa ka diɛni ka lono kɛ mɛi.
Biblə ŋɔ pɔlɔkiliinŋaa ta həɠə ka bɔɔkɔɔn gɛ.
Ka li jw.org ɓa ka vidio. ta kaa ə lɛɛ ka lono kɛ mɛi.

NUTAƓAA DA KƐ KƐI MA : “ Biblə kaa a hɛɓɛ yii ɲaakaa laa walaa kpɔ kɛnɛ leapɛlɛɛ yəi. ”

Da mo tii yɛ́ ə́ kaa pai kɛi ma lə ?

YII GU GALAN

Zehova kaa bɔ longaanua di di lonnii wɛlilakɛ, di di kalan, ə lɛɛ diɛ di maakpɛ ; gaa bɔ leapɛlɛɛ diɛ di kaanua maawiɛ, ə lɛɛ diɛ lɛɛ di woo mu ; gaa nwɔnɔ bɔ pɛlɛn nua diɛ Yálá ɓatoo gee ɓa.

Nɛɛ ə́ kili pɔ

Longaanua da pɛli di lonnii hutɔɔ ləi ə lɛɛ da pɛli di maakpɛi ləi ?
Leapɛlɛɛ da pɛli nɛi ləi diɛ ma da di kaanua maawiɛ ?
Gwa kɛi lowai həɠəi lɔwɔ kəlee guɔ Zehova ɓatoo gu yəi bɛlɛn mɛinɛɛ ləkɛɛɠaa ɓə gaa yili hu ?

Voloi ɲaakwɛlɛi 50 naa ə kpɛɛ la :

Yii maanɛɛ ə́ gɛ

Galangbɔn ɉu nua taɠaa maaləngɛ yii da kɛ gɛi di wɔ Yálá ɓatoo lowai di yəi bɛlɛn.

Mɛni takpɛli yii ya pɛli gɛ :

Mɛni takpɛli yii ya pɛli gɛ