EKIRAJAAYA 50
Naaʼinrajatka na kachonshiikana otta nachonnii süpüla anain nakuwaʼipa
Naapajala Jehová namüin na wayuukana na nachonniikana otta naaʼinmajüinjana naya. Makalaka nüküjain namüin tü naaʼinrajatkat süpüla nountuin tia. Nüküjainya Jehová namüin na tepichikana tü naaʼinrajatkat süpüla anain nakuwaʼipa namaa na wayuu kachooinkana naya.
1. ¿Jamüsü nünüiki Jehová namüin na kachooinkana?
Na wayuu kachooinkana alinjana napüla nachonnii otta akatalüinjana kaʼi napüla. Naaʼinmajüinjana suulia jamajüin naya otta nekirajüinjana sünain tü Bibliakat (Proverbios 1:8). «Anashii jikirajüle naya sünain tü nuluwataakat anain chi Maleiwakai» müsü tü Bibliakat namüin na laülaakana saaʼu napüshi (paashajeʼera Éfeso 6:4). Na wayuu kachooinkana nayainjana epijaka otta ekirajaka nachonnii naashin Jehová. Nnojotsü nooʼulaainjatüin tia napüla na waneinnua.
2. ¿Jamüsü nünüiki Jehová namüin na tepichikana?
«Jia achooinkana, anakaja müleka joonoole waneepia sümaa sünüiki jii je nünüiki jüshi» müshi Jehová namüin na tepichikana (paashajeʼera Colosas 3:20). Kojutule nümüin wanee jintüi nüshi sümaa nii jee noonoole sümaa nanüiki, talateena naya nümaa otta talateechi Jehová nümaʼaya (Proverbios 23:22-25). Jintüliiwaʼaya Jesús, oonooshi nia sümaa nünüiki nüshi jee sümaa sünüiki nii eerejeʼe naleʼeruʼuin tü kaainjalaakat (Lucas 2:51, 52).
3. ¿Kasa naaʼinrajatka na kachonshiikana namaa nachonnii süpüla aleewain naya nümaa Jehová?
Kachonle pia, eesüjaʼa keeʼireere paaʼin alin Jehová napüla püchonnii maʼaka alin nia püpüla. ¿Kasa paaʼinrajatka süpüla puuntuin tia? «Pikirajüinjana na püchonniikana sünain [tü nünüikikat Jehová], paashajaa süchiki wanaa sümaa püikalaain pipialuʼu, wanaa sümaa waraittüin pia» müsü tü Bibliakat (Deuteronomio 6:7). Püküjawalinjatü namüin püchonnii tü kasa pikirajeekalü anain naya. Paaʼinrajatü tia süpüla sotuin naaʼin tü pümakat namüin. Püchajaainjatü sukuwaʼipa soʼukaiwai süpüla paashajaain nüchiki Jehová namaa püchonnii. Pükatala kaʼi semaanawai süpüla pikirajaain nüchiki Jehová sümaa puʼwayuuse jee namaa püchonnii. Machonle pia, pikirajaa pümüiwaʼa sünain tü Bibliakat semaanawai, aneetkalaka pukuwaʼipa sünainjee tia.
WEKIRAJAA SOOʼOMÜIN
Wekirajaa süchiki waneirua pütchi aneetka atuma nakuwaʼipa na wayuukana namaa nachonnii.
4. Pikiraja püchonnii süka anaka akuwaʼipa
Eesü kapüleere nümüin wanee wayuu nikirajüin nüchonnii. Aneerü nakuwaʼipa püchonnii pikirajüle naya sünain tü Bibliakat. Jaashajeʼera Santiago 1:19, 20 otta yooto jia süchiki tüü:
-
¿Kasa naaʼinrajatka na kachonshiikana süpüla neeʼiyatüin naalin nachonnii yootopa naya namaa?
-
¿Jamüsü nnojotka anain nüchiaale wanee wayuu nüchon sümaa jashichin nia? a
5. Paaʼinmaja püchonnii
Püküja namüin püchonnii mojuin tü amaʼüjirawaakalü akuwaʼipaa jee mojuin sümülejünüle nakorolo. Paaʼinrüle tia, paaʼinmajeerü nakuwaʼipa. Eesüjaʼa kapüleejeerüle pümüin yootuin pia namaa süchiki tia. Jünaja tü VIDEOKOT otta yooto jia süchiki tüü:
-
¿Jamüsü kapüleeka namüin waneinnua wayuu nekirajüin nachonnii süchiki mojuin tü amaʼüjirawaakalü akuwaʼipaa jee mojuin sümülejünüle nakorolo?
-
¿Kasa akaalinjaka waneinnua wayuu süpüla yootuin naya namaa nachonnii süchiki tia?
Süküjatüjülia tü Bibliakat kooʼomüinjeerüin maʼin tü kasa mojusü naaʼinrakat na wayuu nuluwataakana aaʼu Satanás. Jaashajeʼera 2 Timoteo 3:1, 13 otta yooto jia süchiki tüü:
-
Noʼutku na wayuu mojulaashii saashajaakana achiki wetsiikulokot 13, naya na ataüjaaliikana tepichi. ¿Jamüshii nekirajüinjanaka nachonnii na wayuukana süchiki mojuin tü amaʼüjirawaakalü akuwaʼipaa jee mojuin sümülejünüle nakorolo? ¿Kasa paaʼinrajatka süpüla nnojoluin nataüjaanüin püchonnii?
¿Pütüjaa aaʼu tüü?
Wainma karaloʼuta otta video nakumajaka na Aküjaliikana pütchi süpüla nekirajünüin na tepichikana. Nekirajüinjana nachonnii na wayuukana süchiki mojuin tü amaʼüjirawaakalü akuwaʼipaa jee mojuin sümülejünüle nakorolo. Anuu süpüshi tü nekirajüinjatkalü aka:
6. Kojuta pümüin püshi sümaa püi
Na tepichikana otta na jimaʼaliikana namaa na majayünnüükana, kojutuinjana namüin nashi sümaa nei. Jaʼyainjatü tia suluʼu nanüiki naashajaapa namaa. Jünaja tü VIDEOKOT otta yooto jia süchiki tüü:
-
¿Jamüsü anaka kojutule nümüin wanee jimaʼai nüshi sümaa nii nusoutapa namüin?
-
¿Kasa naaʼinrajatka wanee jimaʼai süpüla kojutuin nümüin nüshi sümaa nii?
Jaashajeʼera Proverbios 1:8 otta yooto jia süchiki tüü:
-
¿Kasa naaʼinrajatka wanee jimaʼai nuluwataanüle sünain aaʼinraa wanee kasa nutuma nüshi jee sutuma nii?
7. Puʼwaaja Jehová sümaa puʼwayuuse otta püchonnii
Na aküjaliikana pütchi nüchiki Jehová, akatatshii kaʼi semaanawai süpüla naʼwaajüin Maleiwa sümaa napüshi. ¿Kasa naaʼinraka naʼwaajawaitpa Maleiwa sümaa napüshi? Jünaja tü VIDEOKOT otta yooto jia süchiki tüü:
-
¿Kasa paaʼinrajatka süpüla puʼwaajüin waneepia Maleiwa sümaa puʼwayuuse otta püchonnii?
-
¿Kasa naaʼinrajatka na kachonshiikana süpüla anain naaʼin nachonnii naʼwaajapa Maleiwa namaa? (Pünaʼla tü ayaakuaa yalakat suʼttianainjee ekirajaayakat tüü).
-
¿Eesüche wanee kasa ataʼülaka pukuwaʼipa suulia puʼwaajüin Maleiwa sümaa puʼwayuuse jee namaa püchonnii? Eere shia, ¿kasa ataʼülaka pukuwaʼipa?
Sümaiwa paala, nüküjain Jehová namüin na israelitakana yootowalinjanain naya sümaa naʼwayuuse otta nachonnii süchiki tü Nünüikikat Maleiwa. Jaashajeʼera Deuteronomio 6:6, 7 otta yooto jia süchiki tüü:
-
¿Kasa paaʼinrajatka süpüla müin pukuwaʼipa maʼaka saaʼin tü aküjünakat suluʼu tia wetsiikulokalüirua?
Puuʼulaka paaʼinrüin tüü puʼwaajapa Maleiwa sümaa püpüshi:
-
Yapa jutuma tü ekirajaanajatkalü anain sünain tü outkajawaakat.
-
Jaashajeʼera otta yooto jia süchiki waneirua kasa suluʼuka tü Bibliakat, aneetka atuma jukuwaʼipa.
-
Motsoyunnuule jüchonnii, jüdescargaaja otta jiʼinprimiija tü suluʼukat jw.org, napülajatka na tepichikana.
-
Jimaʼaliire jee majayünnüüle jüchonnii, jikirajaa sünain wanee pütchi suluʼuka jw.org napülajatka na jimaʼaliikana jee na majayünnüükana.
-
Jaainja wanee drama süchikimaajatü nakuwaʼipa na saashajaakana achiki tü Bibliakat.
-
Jünaja otta yooto jia süchiki tü video suluʼukat jw.org.
EESHII WAYUU EEKAI NAMÜIN: «Nnojotsü süpülajatüin tepichi tü Bibliakat».
-
¿Jamüsüjaʼa pünüiki süchiki tia?
WATÜJAAITPAKA AAʼU
Nücheka achikit Jehová alinjanain napüla nachonnii na wayuukana, nekirajüinjanain naya otta naaʼinmajüinjanain naya. Nücheka achikit Jehová kojutuinjanain namüin na tepichikana nashi jee nei otta noonooinjanain sümaa nanüiki. Paaʼinwainjana naya sünain aʼwaajaa Jehová.
Pusouta shiʼipajee
-
¿Kasa naaʼinrajatka na kachonshiikana süpüla nekirajüin nachonnii otta naaʼinmajüin naya?
-
¿Kasa naaʼinrajatka na tepichikana süpüla kojutuin namüin nashi sümaa nei?
-
¿Kasa anasü eeka sünainjee nükatalüin kaʼi wanee wayuu süpüla nuʼwaajüin Maleiwa semaanawai sümaa nuʼwayuuse otta nüchonnii?
PÜNAʼLA SOOʼOMÜIN
¿Kasa jikirajüinjanaka anain jüchonnii süpüla anain nakuwaʼipa miyoʼuyuupa naya?
«Aipiruasü kasa pikirajeeka anain na püchonniikana» (¡Eeja Waaʼin!, nuum. 2, 2019)
Paashajeʼera süchiki waneirua kasa naaʼinrajatka na aaʼinmajakana napüshi eekai laülaainnain.
Pünaja nüchiki wanee wayuu anakai atuma shipijia nüchonnii mayaainjeʼe mojuin nipijia sümaiwa.
Nükaalinjain waya Jehová süpüla anain nepijia wachonnii (5:58)
Paashajeʼera süchiki tü naaʼinrajatkat wanee wayuu süpüla aleewain nia namaa nüchonnii.
a Ekirajünüinjana na tepichikana otta achiaanüinjana naya saashin tü Bibliakat. Nnojoliipejeʼe müliainjanain maʼin naya atumawaa (Proverbios 4:1).
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
