LEKSIÓN 50
¿Mbaʼéichapa ikatu revyʼa nde rogapýpe? (Párte 2)
Umi mitã ningo peteĩ rregálo oúva Jehovágui, ha haʼe oipota umi sy ha túa okuida porã pe rregálore. Upévare omeʼẽ heta konsého porã ikatúva oipytyvõ tuakuérape ojapo hag̃ua upéva. Ha avei omeʼẽ konsého umi mitãme ikatu hag̃uáicha haʼekuéra omoĩ ipárte ojevyʼa hag̃ua pe ogapýpe.
1. ¿Mbaʼe konséhopa Jehová omeʼẽ tuakuérape?
Jehová oipota umi sy ha túa ohayhu ifamiliakuérape, ohasa hendivekuéra tiémpo ha oprotehe chupekuéra oimehaichagua pelígrogui. Avei siémpre oipuru vaʼerã la Biblia ohekomboʼe hag̃ua chupekuéra (Proverbios 1:8). La Biblia heʼi voi tuakuérape: ‘Pesegi pemongakuaa ha peñemoñeʼẽ pene famíliape Jehová heʼiháicha’ (elee Efesios 6:4). Jehová ovyʼaiterei ohechávo umi sy ha túa orekoha enkuénta haʼe heʼíva omongakuaa hag̃ua ifamíliape. Haʼe ndoipotái tuakuéra oheja ko rresponsavilida ótra persónape.
2. ¿Mbaʼe konséhopa Jehová omeʼẽ mitãnguérape?
Jehová omanda mitãnguérape: “Peneñeʼẽrendúkena pende tuakuérape” (elee Colosenses 3:20). Umi mitã orrespeta ha iñeʼẽrendúramo ituakuérape, ombovyʼaitereíta chupekuéra ha Jehovápe avei (Proverbios 23:22-25). Jesús oheja vaʼekue peteĩ ehémplo iporãitereíva, pórke imitãrõ guare siémpre iñeʼẽrendu ha orrespeta vaʼekue ituakuérape. Hiʼarive haʼekuéra ndahaʼéi vaʼekue perfékto haʼéicha (Lucas 2:51, 52).
3. ¿Mbaʼéichapa ikatu ne família kompletoite oñemoag̃uive Ñandejárare?
Oiméramo nefamília, katuete reipota haʼekuéra ohayhu avei Jehovápe ndéicha. ¿Mbaʼéichapa ikatu eipytyvõ chupekuéra? Esegívo ko konsého: ‘Remboʼe vaʼerã nde raʼykuérape ha reñeʼẽ vaʼerã chupekuéra koʼã mbaʼére reguapy jave nde rógape ha reguata jave tapére’ (Deuteronomio 6:7). Reipotáramo ne familiakuéra oaprende peteĩ mbaʼe, tekotevẽta ere jey jey chupekuéra upéva. Ha oiméne rehechakuaáma pyʼỹinte jarrepetíramo peteĩ mbaʼe umi mitãme, ifasilveha chupekuéra imanduʼa hag̃ua upévare. Upéicharõ, oiméramo nefamília, eheka meme vaʼerã oportunida pyʼỹinte eñemongeta hag̃ua hendivekuéra Jehováre káda día, ha una ves a la semána jepe pestudia la Biblia oñondivepa. Ha nanefamíliairõ jepe, ideprovéchota ndéve restudia la Biblia káda semána.
EJEPYʼAMONGETAMÍNA
Jahechamína unos kuánto konsého oĩva la Bíbliape oipytyvõva umi famíliape ovyʼa hag̃ua ha oñeñandu hag̃ua segúro.
4. Ehekomboʼe ne famíliape
¿Mbaʼéichapa la Biblia ikatu oipytyvõ tuakuérape omongakuaa porã hag̃ua ifamíliape? Elee Santiago 1:19, 20, ha upéi erresponde koʼã porandu:
-
¿Mbaʼéichapa umi sy ha túa ikatu ohechauka ohayhuha ifamíliape oñemongeta jave hikuái?
-
¿Mbaʼérepa tuakuéra núnka ndokorrehíri vaʼerã ifamíliape pochy reheve? a
5. Eprotehékena ne famíliape
Eprotehe hag̃ua ne familiakuérape, iñimportanteterei eñemongeta káda únondi umi rrelasión sexuál rehe. Péro ikatu retĩ térã ijetuʼu ndéve rejapo hag̃ua upéva. Ehecha pe VIDÉO, ha upéi erresponde koʼã porandu:
-
¿Mbaʼérepa ijetuʼu heta sy ha túape oñemongeta hag̃ua ifamiliakuérandi umi rrelasión sexuál rehe?
-
¿Mbaʼépa oipytyvõ unos kuánto sy ha túape ojapo hag̃ua upéva?
Ojepredesi haguéicha la Bíbliape, ko múndo oĩva Satanás poguýpe amás día ivaive ohóvo. Elee 2 Timoteo 3:1, 13, ha upéi erresponde koʼã porandu:
-
Versíkulo 13-pe oñeñeʼẽ umi hénte añáre, ha umíva apytépe oĩ umi oavusáva mitãre. Upéicharõ, ¿mbaʼérepa iñimportantete tuakuéra oñeʼẽ ifamiliakuérandi koʼã témare? ¿Mbaʼéichapa ikatu omboʼe chupekuéra ojeprotehe hag̃ua umichagua hénte añágui?
¿Reikuaápa raʼe?
Umi testígo de Jehová oguenohẽma heta informasión oipytyvõva tuakuérape oñemongeta hag̃ua ifamiliakuérandi umi rrelasión sexuál rehe, ha oprotehe hag̃ua chupekuéra. Por ehémplo:
6. Errespetákena nde tuakuérape
Umi mitã, mitãrusu ha mitãkuña orrespeta vaʼerã ituakuérape, ha upéva ikatu ohechauka oñeʼẽ lájare chupekuéra. Ehecha pe VIDÉO, ha upéi erresponde koʼã porandu:
-
¿Mbaʼérepa iñimportánte umi imitãva ohechauka orrespetaha ituakuérape oñemongeta jave hendivekuéra?
-
¿Mbaʼéichapa umi imitãva ohechaukáta orrespetaha ituakuérape?
Elee Proverbios 1:8, ha upéi erresponde ko porandu:
-
¿Mbaʼéichapa umi imitãva orreaksiona vaʼerã ituakuéra heʼi jave chupekuéra mbaʼépa ojapo vaʼerã?
7. Peadora Jehovápe en família
Entéro testígo de Jehová omboyke tiémpo káda semána oadora hag̃ua Jehovápe ifamíliandi. ¿Mbaʼéichapa nde avei ikatu ejapo upéva? Ehecha pe VIDÉO, ha upéi erresponde koʼã porandu:
-
¿Mbaʼépa oipytyvõta umi famíliape ojapo hag̃ua una ves a la semána jepe ijestúdio?
-
¿Mbaʼépa ikatu ojapo umi sy ha túa ifamiliakuéra odisfruta hag̃ua ijestúdiogui, ha ideprovécho hag̃ua chupekuéra? (Ehecha pe fóto oĩva oñepyrũvo ko leksión).
-
¿Mbaʼérepa ikatu hína ijetuʼu ne famíliape ostudia hag̃ua oñondive?
Jehová oipota vaʼekue umi israelita oñemongeta ifamiliakuérandi umi mbaʼe haʼe heʼívare chupekuéra. Elee Deuteronomio 6:6, 7, ha upéi erresponde ko porandu:
-
¿Mbaʼéichapa ikatu nde rekumpli ko téxto heʼíva?
Mbaʼe mbaʼépa ikatu pejapo pende estúdio de famíliape:
-
Pejeprepara umi rreunionrã.
-
Pelee ha peanalisa peteĩ rreláto bíblico ogustátava ne famíliape.
-
Peguerekóramo mitã, ikatu pemboguejy térã peimprimi umi aktivida mitãme g̃uarã oĩva jw.org-pe.
-
Ne familiakuéra ikariaʼy ha ikuñataĩmarõ, peanalisa oñondive peteĩ artíkulo mitãrusukuérape g̃uarã oĩva jw.org-pe.
-
Pelee peteĩ istória oĩva la Bíbliape ha peaktua peimeramoguáicha upépe.
-
Pehecha peteĩ vidéo oĩva jw.org-pe ha peje mbaʼépa peaprende chugui.
OĨRAMO HEʼÍVA: “Orerembiapoitereíngo ha naoretiémpoi roñeʼẽ hag̃ua ore famíliape la Bíbliare”.
-
¿Mbaʼépa repensa upévare?
RRESÚMEN
Jehová oipota umi sy ha túa ohayhu, ohekomboʼe ha oprotehe ifamiliakuérape. Oipota umi mitã orrespeta ha iñeʼẽrendu ituakuérape, ha oipota ojeadora chupe en família.
Rrepáso
-
¿Mbaʼéichapa tuakuéra ikatu ohekomboʼe ha oprotehe ifamíliape?
-
¿Mbaʼéichapa umi mitã ikatu ohechauka orrespetaha ituakuérape?
-
¿Mbaʼéichapa ou porãta ne famíliape pemboykéramo tiémpo una ves a la semána jepe peadora hag̃ua Jehovápe oñondive?
EINVESTIGA HAG̃UA
¿Mbaʼe mbaʼépa nepytyvõta ne família osẽ porã hag̃ua?
“Seis mbaʼe mitãnguéra tekotevẽva oaprende” (¡Pepáyke! Número 2 de 2019)
Ehecha mbaʼe konsého iporãvapa oreko la Biblia umi okuidávape g̃uarã ituakuéra ijedávare.
“¿Ikatúpa la Biblia oipytyvõ umi okuidávare ituakuéra ijedávare?” (Artíkulo oĩva jw-pe)
Ehecha mbaʼépa oipytyvõ peteĩ karaípe omongakuaa porã hag̃ua ifamiliakuérape, ñepyrũrã ndoikuaáiramo jepe kuri mbaʼéichapa ojapóta upéva.
Jehová oremboʼe romongakuaa porã hag̃ua ore famíliape (5:58)
Ehecha mbaʼéichapa peteĩ túa ikatu ojogueraha porãve itaʼýrandi.
“Mbaʼépa ojapokuaa peteĩ túva pono oñemomombyry itaʼýragui?” (Ñemañaha Enero-Marzo de 2012)
a La Bíbliape ojeʼévo tuakuéra ‘okorrehi’ vaʼerãha ifamíliape, heʼise haʼekuéra ohekomboʼe, ogia ha oipytyvõ vaʼerãha chupekuéra okambia hag̃ua peteĩ mbaʼe vai opensáva térã ojapóva. Péro ni mbaʼevéicharõ ndeʼiséi omaltrata vaʼerãha chupekuéra térã ojahéi hesekuéra (Proverbios 19:18).
Koʼã téma ikatu ndegusta avei
OÑEPORANDU MEMÉVA
¿Mbaʼéichapa umi testígo de Jehová ojapo peteĩ kúrso bíblico?
Ko kúrso bíblico oofresévape ndéve umi testígo de Jehová eipurukuaa pe traduksión bíblica ndegustavéva. Ndojekovrái mbaʼevete. Ikatu einvita ne família térã ne amigokuérape oĩ hag̃ua.
