KUKWE JA TÖTIKARA 50
¿Ño nüna raba kä jutobiti ni mräkäbe? (Ketebu)
Jehovata monsotre ye bien regalore ni rüne ie, aisete rabadre ngübare kwin ngübata kwe. Yekäre tä kukwe kwin monsotre jie ngwankäre bien nitre rüne ie. Aune tä mäträre kwin monsobätä ne kwe kä tädre juto ni ja mräkärebätä.
1. ¿Jehovata dre niere nitre rüne ie?
Ni rüne aune meyere käkwe monso kwe taredre aune kä diandrekä kwe jai kräketre ie Jehová tö. Arato rabadre ngäbäkre kriemike aune rabadre tötike kukwe ja jie ngwankäre Bibliabätä ye ererebätä ie Jehová tö (Proverbios 1:8). Ngöböta niere ni rüne ie: “Munkwe töi ükate bätä tötika jankunu Jehová kukwei yebätä” (mäkwe ñäkä Efesios 6:4 yebätä). Ni rüne tä monso jie ngwen kukwe Bibliabätä ye ererebätä aune ñan tuenmetre ngübadre jakrä ni madai, ye käita nemen juto Jehovabätä.
2. ¿Jehovata dre niere monsotre ie?
Munkwe mun rün aune mun meye mika täte nieta Jehovakwe monsotre ie (mäkwe ñäkä Colosenses 3:20 yebätä). Monsota rün aune meye mike täte aune mike ütiäte jai ngwane, tä kä mike juto rünbätä aune Jehovabätä (Proverbios 23:22-25). Jesús nämäne chi ngwane, kukwe kwin bä mikani kwe. Niara töi metre akwa rün töi ngite ye mikani ütiäte kwe jai aune mikani täte kwe (Lucas 2:51, 52).
3. ¿Ni ja mräkäre raba dre nuainne rökrakäre bäri Jehová ken?
Ngäbäkre tärä mäkwe ngwane, mäta Jehová tarere ye erere rabadre Jehová tarere ie mä tö, ¿ñokänti raba nemen bare mäi? Bibliata niere: Mäkwe Jehová kukwei drie “monsotre mäkwe ie aune mäkwe blita kukwe yebätä mä tädre gwi ye ngwane, mä rikadre ji ngrabare ye ngwane” ye köböire raba nemen bare mäi (Deuteronomio 6:7). Driedre ye abokän kukwe ye kädekadrete jankunu mikakäre ni töite gärätä. Kukwe rükadre törö monso mäkwe ie yekäre, mäta kädekete bati bobu ie ¿ñan ererea? Aisete, käre mä rabadre kä denkä jai blitakäre Jehovabätä monso mäkwe yebe meden nieta texto nekänti. Ne madakäre, ni ja mräkäre rabadre kä denkä jai bämän kratire kratire ja tötikakäre gwairebe Bibliabätä ye kwin krubäte. Monso ñaka mäkwe, akwa mäkwe kä diainkä jai bämän kratire kratire ja tötikakäre Ngöbö kukweibätä ngwane, mä dimikai krubäte kwe.
JA TÖTIKE BÄRI NGUSETA
Kukwe ja jie ngwankäre raba ni ja mräkäre dimike nüne kä jutobiti aune kriemike ye ani mike gare jai.
4. Ja tare yebiti monso tötike
Monsotre tötikadre ye ñan nuäre, ¿akwa Biblia raba mä dimike ño? Ñäkädre Santiago 1:19, 20 yebätä aune kukwe ne kädriedre jabe:
-
Ni rüne tä blite monso kwe ben ngwane, ¿tare kwe ye raba bämike ño ie?
-
Ni rüne tä rubun ngwane, ¿ñobätä ñaka rabadre jire mäträre monso kwebätä? a
5. Monso kriemike
Ñan nuäre blitakäre sexualidad yebätä monsotre ben akwa blitadrebätä itire itire ben kriemikakäre ye ütiäte krubäte. VIDEO mikadre ñärärä, biti kukwe ne kädriedre jabe:
-
¿Ñobätä ñan tä nemen nuäre nitre rüne ruäre kräke blitakäre sexo yebätä monso kwe ben?
-
¿Dre käkwe nitre rüne ruäre dimikanina blitakäre kukwe nebätä monso kwe ben?
Profecía tä niere erere kä Satanakwe ne kite bäri käme. Ñäkädre 2 Timoteo 3:1, 13 yebätä aune kukwe ne kädriedre jabe:
-
Nitre ruäre käme kädekateta bersikulo 13 ye tä küdrere käme monsotrebätä. Aisete, ¿ñobätä ütiäte nitre rüne rabadre monsotre tötike sexualidad yebätä? ¿Aune dre nuain raba ne kwe nitre käme ñaka küdredre monsobätä?
¿Ne gare mäi?
Nitre testiko Jehovakwe tä tärä aune kukwe mada keta kabre ükete ne kwe nitre rüne rabadre monsotre tötike sexualidad yebätä aune kriemike nitre küdrekä monsobätä yebätä. Ruäre abokän ne:
-
Munkwe monsotre ye kriemika (video)
-
““Blita raba ño sexo yebätä monso ben” (Ni Mikaka Ngwäte, núm. 5 2016)
6. Mä rün mike ütiäte jai
Monso kia aune monso brai brai rabadre rün mike ütiäte jai, tä blite ño ben yebiti tä mike ütiäte jai tätre bämike. VIDEO mikadre ñärärä, biti kukwe ne kädriedre jabe:
-
Monso tä blite rünbe ngwane, ¿ñobätä rabadre mike ütiäte jai?
-
¿Monso tä rün mike ütiäte jai ye raba bämike ño?
Ñäkädre Proverbios 1:8 yebätä aune kukwe ne kädriedre jabe:
-
¿Monso käkwe dre nuaindre ye rün aune meye käkwe niedre ie ngwane rabadre ja ngwen ño?
7. Jehová mike täte gwaire mä mräkäbe
Ni testiko Jehovakwe tä kä denkä jai bämän kratire kratire adoración en familia nuainkäre mräkäbe. ¿Adoración en familia yete dre nuainta? VIDEO mikadre ñärärä, biti kukwe ne kädriedre jabe:
-
¿Dre raba ni ja mräkäre dimike ne kwe adoración en familia rabadre bare käre?
-
Adoración en familia ye käi ñan rabadre krene aune rabadre bäre kwin, ¿yekäre nitre rüne raba dre nuainne? (Üai kena mikadre ñärärä).
-
¿Kukwe tärä keteiti abokän köböite mä ñan raba adoración en familia nuainne mä mräkäbe? ¿Meden?
Kirabe, nitre ja mräkäre isrealita rabadre blite käre kukwe Ngöbökwe yebätä ngüba nämäne Jehovakwe. Ñäkädre Deuteronomio 6:6, 7 yebätä aune kukwe ne kädriedre jabe:
-
¿Kukwe nieta ja jie ngwankäre ne mä raba mike ño täte?
Adoración en familia nuain raba kore:
-
Ja tötikadre gwaire gätä kräke.
-
Kukwe keteiti Bibliabätä raba ni dimike yebätä ñäkädre aune kädriedre jabe.
-
Monso kia tärä mäkwe ngwane, actividad monso kia kräke tä jw.org ye mäkwe dianka o imprimi.
-
Monso bati tärä mäkwe ngwane, artículo monso bati kräke tä jw.org ye mäkwe känä.
-
Kukwe namani bare tä Bibliabätä ye munkwe bämika gwaire.
-
Video tä jw.org ye munkwe tua aune kädrie jabe.
NITRE RUÄRE TÄ KUKWE NE NIERE: “Biblia ye ribi krubäte monsotre kräke”.
-
¿Ye tuin ño mäi?
¿DRE NIBI GARE MÄI?
Nitre rüne rabadre monsotre tarere, tötike, kriemike aune monsotre rabadre rün kwe kukwei mike täte, mike ütiäte jai aune keteitibe rabadre Jehová mike täte ie Jehová tö.
Ngwankäreta törö
-
¿Nitre rüne raba monso tötike aune kriemike ño?
-
¿Monsota rün kwe mike täte ye raba bämike ño?
-
¿Kä diandrekä jai bämän kratire kratire adoración en familia nuainkäre gwaire ye tä kukwe kwin meden mike bare?
KUKWE MIKE GARE BÄRI JAI
¿Dre käkwe monso mäkwe dimikai ja känenkäre?
“Kukwe keta ti ütiäte monso mäkwe kräke” (Ni Mikaka Ngwäte, núm. 2 2019)
Kukwe nieta Bibliakwe ni ni umbre ngübaka kräke yebätä ñäke.
“¿Dre nieta Bibliakwe ni rüne niena umbre ngübadre yebätä?” (Artículo jw.org)
Ngäbäkre ngübadre ño ñan nämäne gare ni iti ie, akwa biti namani bare kwin ie ye mike gare jai.
Monsotre nunkwe tötikadre ño ye Jehovakwe drieba nuen (5:58)
Ño ni rüne raba ja kete kwin monso kwe ben ye mike gare jai.
“¿Ni rüne raba dre nuainne ja ketakäre käre monso kwe ben?” (Ni Mikaka Mokre, 1 enero 2012)
a Mäträdre nieta Bibliabätä ye abokän monso jie ngwandre aune tötikadre ne kwe ja töi kwitadre kwe kukwe blo nuainta kwe yebätä. Nuaindre tare aune ngwandre ja tarenike ye ñan ai gärätä crueldad o abuso (Proverbios 4:1).
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
