ZAJ KAWM 50
Yuav Ua Li Cas Koj Tsev Neeg Thiaj Muaj Kev Zoo Siab?—Ntu 2
Me tub me nyuam yog koob hmoov los ntawm Yehauvas los. Nws xav kom cov ua niam ua txiv ua zoo saib xyuas thiab tu lawv cov me nyuam kom zoo zoo, nws thiaj cob qhia lawv kom lawv muaj tswv yim. Yehauvas cov lus cob qhia los kuj pab tau cov me nyuam kom lawv txawj pab lawv tsev neeg muaj kev zoo siab thiab.
1. Yehauvas hais li cas rau cov ua niam ua txiv?
Yehauvas xav kom cov niam cov txiv hlub lawv cov me nyuam thiab siv sij hawm kom ntau los nrog lawv cov me nyuam ua ke. Nws kuj xav kom lawv tiv thaiv tsis pub ib yam dab tsi phem los raug lawv cov me nyuam, thiab kom lawv muab nws Txoj Lus hauv phau Vajlugkub los cob qhia lawv. (Pajlug 1:8) Yehauvas hais rau cov uas ua txiv tias lawv yuav tsum muab Yehauvas “tej lus qhuab qhia thiab nws tej lus ntuas” los cob qhia lawv cov me nyuam. (Nyeem Efexus 6:4.) Yehauvas zoo siab heev thaum cov ua niam ua txiv ua li no thiab tsis muab lawv lub luag hauj lwm tso rau lwm tus ua.
2. Yehauvas hais li cas rau cov me nyuam?
Yehauvas hais rau cov me nyuam tias lawv ‘yuav tsum mloog lawv niam lawv txiv lus.’ (Nyeem Kaulauxais 3:20.) Cov me nyuam uas hwm lawv niam lawv txiv thiab mloog lawv niam lawv txiv lus ua rau Yehauvas thiab lawv niam lawv txiv zoo siab. (Pajlug 23:22-25) Thaum Yexus tseem yau, nws tso tau ib tug qauv zoo rau cov me nyuam xyaum. Txawm hais tias nws zoo tiav log los nws yeej tseem hwm nws niam nws txiv thiab mloog nkawd lus.—Lukas 2:51, 52.
3. Koj yuav pab koj tsev neeg li cas, nej thiaj muaj kev sib raug zoo nrog Yehauvas?
Yog koj muaj me nyuam, koj yeej xav kom lawv hlub thiab teev tiam Yehauvas ib yam li koj. Yog li, koj yuav ua li cas koj thiaj pab tau lawv? Phau Vajlugkub hais rau cov ua niam ua txiv tias, “Nej yuav tsum muab [Yehauvas Txoj Lus] qhia rau nej tej menyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua haujlwm.” (2 Kevcai 6:7) Yog li ntawd, thaum nej cob qhia nej tej me tub me nyuam, nej yuav tau qhia tag qhia dua, qhia mus qhia los, lawv thiaj yuav nco qab thiab to taub lub ntsiab. Twb yog vim li ntawd, nqe Vajlugkub no thiaj hais tias txawm nej yuav ua dab tsi los xij, nej yuav tsum nrhiav ntshis sij hawm los cob qhia nej cov me nyuam txog Yehauvas txhua txhua hnub. Ib qho uas yuav pab tau koj tsev neeg ua li ntawd yog koj yuav tsum teem sij hawm rau koj tsev neeg los pe hawm Yehauvas ua ke txhua txhua lub lim tiam. Txawm yog hais tias koj tsev neeg tsuas muaj koj tib leeg xwb los, yog koj ua li no yeej yuav pab tau koj thiab.
KAWM NTXIV
Phau Vajlugkub tej lus cob qhia yuav pab kom koj tsev neeg txhua tus muaj kev zoo siab thiab tsis txhawj tsis ntshai dab tsi.
4. Ua siab ntev cob qhia koj cov me nyuam
Cob qhia ib tug me nyuam yeej tsis yooj yim tiam sis phau Vajlugkub yuav pab tau koj. Nyeem Yakaunpaus 1:19, 20 thiab tham txog ob lo lus no:
-
Cov niam cov txiv uas hlub lawv cov me nyuam ua li cas thaum lawv nrog lawv cov me nyuam tham?
-
Vim li cas cov ua niam ua txiv yuav tsum tsis txhob qhuab qhia los sis qhuab ntuas lawv cov me nyuam thaum lawv tseem npau npau taws? a
5. Tiv thaiv koj cov me nyuam
Tej zaum koj yuav txaj muag tham txog qhov no, tiam sis tseem ceeb heev rau koj yuav tsum nrog koj cov me nyuam txhua tus tham txog kev sib deev, koj thiaj li yuav tiv thaiv tau lawv. Saib zaj YEEB YAJ KIAB thiab tham txog ob lo lus no:
-
Vim li cas thiaj tsis yooj yim rau ib txhia niam thiab txiv tham txog kev sib deev nrog lawv cov me nyuam?
-
Ib txhia niam thiab txiv tham li cas nrog lawv cov me nyuam txog kev sib deev?
Zoo li cov lus faj lem hauv phau Vajlugkub hais, Xatas lub qab ntuj tsuas muaj phem heev zuj zus xwb. Nyeem 2 Timautes 3:1, 13 thiab tham txog lo lus no:
-
Cov neeg uas ua phem hauv nqe 13 no ib txhia yog cov uas ua phem ua qias rau cov me nyuam. Yog li ntawd, thiaj tseem ceeb heev rau cov ua niam ua txiv cob qhia lawv cov me nyuam txog kev sib deev thiab ua phem ua qias. Cov me nyuam thiaj li yuav paub tiv thaiv lawv tus kheej ntawm cov neeg phem.
Koj puas paub?
Yehauvas Cov Tim Khawv ua tau ntau yam los pab cov ua niam ua txiv cob qhia lawv cov me nyuam txog kev sib deev thiab kev ua phem ua qias thiab pab tiv thaiv lawv cov me nyuam ntawm cov neeg phem. Xws li:
6. Hwm koj niam koj txiv
Cov me nyuam yaus thiab cov tub ntxhais hluas uas hwm lawv niam lawv txiv, hais lus saib taus lawv niam lawv txiv. Saib zaj YEEB YAJ KIAB thiab tham txog ob lo lus no:
-
Vim li cas thiaj tsim nyog cov me nyuam hais lus kom saib taus lawv niam lawv txiv thaum nrog lawv tham?
-
Cov me nyuam yuav hais lus li cas thiaj li yog lawv hwm lawv niam lawv txiv?
Nyeem Pajlug 1:8 thiab tham txog lo lus no:
-
Cov me nyuam yaus thiab cov hluas, thaum nej niam nej txiv qhia nej ua ib yam dab tsi, tsim nyog nej ua li cas?
7. Nrog koj tsev neeg pe hawm Yehauvas
Yehauvas Cov Tim Khawv teem ib lub sij hawm rau lawv tsev neeg pe hawm Yehauvas ua ke txhua lub lim tiam. Thaum lawv los pe hawm Yehauvas ua ke, lawv ua dab tsi xwb? Saib zaj YEEB YAJ KIAB thiab tham txog cov lus no:
-
Yuav ua li cas koj tsev neeg thiaj pe hawm tau Vajtswv ua ke txhua txhua lub lim tiam?
-
Cov ua niam ua txiv yuav ua li cas lawv tsev neeg thiaj nyiam pe hawm Vajtswv ua ke thiab thiaj li muaj nuj nqis rau lawv?—Saib thawj daim duab rau zaj kawm no.
-
Tej uas ua nyuaj rau koj tsev neeg pe hawm Yehauvas ua ke yog dab tsi?
Yav thaum ub, Yehauvas xav kom txhua yim neeg Ixayees niaj hnub tham txog nws Txoj Lus ua ke. Nyeem 2 Kevcai 6:6, 7 thiab tham txog lo lus no:
-
Koj yuav ua li cas koj thiaj ua tau li nqe Vajlugkub no hais?
Thaum koj tsev neeg pe hawm Vajtswv ua ke, nej yuav ua dab tsi?
-
Npaj rau tej kev sib txoos ua ke.
-
Nyeem thiab tham txog tej zaj hauv phau Vajlugkub uas koj tsev neeg nyiam.
-
Yog koj cov me nyuam tseem me ces theej los sis luam cov duab rau cov me nyuam hauv jw.org rau lawv kawm.
-
Yog koj cov me nyuam loj lawm ces mus nrhiav cov ntaub ntawv txog cov hluas hauv jw.org los nrog lawv tham.
-
Nrhiav ib zaj los sis ib tug neeg hauv phau Vajlugkub rau koj thiab koj cov me nyuam xyaum ua yeeb yam, ua txuj ua li nej yog lawv.
-
Saib thiab tham txog ib zaj yeeb yaj kiab hauv jw.org nrog koj tsev neeg.
IB TXHIA HAIS TIAS: “Phau Vajlugkub nyuaj dhau rau cov me nyuam to taub.”
-
Koj yuav teb li cas?
KOJ KAWM TAU DAB TSI
Yehauvas xav kom cov ua niam ua txiv hlub lawv cov me nyuam, cob qhia lawv, thiab tiv thaiv lawv. Nws xav kom cov me nyuam hwm thiab mloog lawv niam lawv txiv lus. Thiab nws xav kom txhua tsev neeg pe hawm nws ua ke.
Rov Tham Dua
-
Cov ua niam ua txiv yuav cob qhia thiab tiv thaiv lawv cov me nyuam li cas?
-
Cov me nyuam uas hwm lawv niam lawv txiv coj li cas?
-
Qhov uas tsev neeg teem ib lub sij hawm los pe hawm Vajtswv ua ke txhua txhua lub lim tiam pab tau lawv li cas?
TSHAWB NTXIV
Zaj kawm twg thiaj yuav pab tau koj cov me nyuam rau thaum lawv loj hlob tiav niam tiav txiv lawm?
“Rau Yam Uas Yuav Pab Me Nyuam Ua Neej” (Tsim Dheev! Phau 2 Xyoo 2019)
Phau Vajlugkub hais li cas rau cov uas tu lawv niam lawv txiv uas laus lawm?
“Phau Vajlugkub Hais Li Cas Txog Tu Cov Niam Cov Txiv Uas Laus Lawm?” (Nyeem hauv jw.org/hmn)
Saib seb ib tug txiv neej uas tsis paub cob qhia me nyuam ua li cas, nws thiaj ua tau ib leej txiv zoo rau nws cov me nyuam.
Cov ua txiv yuav ua li cas lawv thiaj haj yam yuav muaj kev sib raug zoo nrog lawv cov tub?
a Thaum phau Vajlugkub hais kom cov ua niam ua txiv qhuab qhia thiab qhuab ntuas lawv cov me nyuam, tsis yog hais kom lawv ua nruj ua tsiv los sis muab me nyuam ntau sab sab, tiam sis yog hais kom lawv ua zoo cob qhia thiab pab cov me nyuam kom paub kho lawv txoj kev xav thiab hloov lawv tus cwj pwm uas tsis zoo xwb.—Pajlug 4:1.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
