LESENI 50
Edena Dala ai Emu Ruma Bese Ia Moale Diba?—Kahana 2
Natudia be harihari gaudia Iehova amo. Ia ura tama sina ese natudia do idia naria namonamo. Bona Iehova ese tama sina dekenai sisiba ia henia unai idia karaia totona. Iena sisiba ese natudia ia hadibaia dahaka do idia karaia edia ruma bese ia moale totona.
1. Iehova ese tama sina dekenai dahaka sisiba ia henia?
Iehova ia ura tama sina ese edia natudia do idia lalokau henia, bona nega bada idia atoa idia bamodia totona. Danu, ia ura tama sina ese natudia do idia gimaia bona Baibel ena hakaua herevadia amo do idia hadibaia. (Aonega Herevadia 1:8) Dirava be tama dekenai ia gwau: “[Emui natudia] idia tubu noho lalonai, Iehova ena . . . sisiba amo idia umui hadibaia.” (Efeso 6:4 duahia.) Iehova ia ura tama sina be edia natudia idia naria neganai, iena sisiba idia badinaia bona unai maduna be ma ta dekenai idia henia lasi.
2. Natudia dekenai Iehova be dahaka sisiba ia henia?
Iehova be natudia dekenai ia gwau: “Emui tama sina do umui kamonai henia.” (Kolose 3:20 duahia.) Natudia be edia tama sina idia matauraia bona kamonai henia neganai, Iehova bona edia tama sina idia moale. (Aonega Herevadia 23:22-25) Iesu be natu maragina neganai haheitalai namona ia hahedinaraia. Ena be ia be goevadae, to iena tama sina ia kamonai henia bona matauraia.—Luka 2:51, 52.
3. Edena dala ai emu ruma bese be Dirava kahirakahira ia lao diba?
Bema oi be tama o sina ta, oi ura emu natudia ese Iehova do idia lalokau henia oi ese oi lalokau henia hegeregerena. Edena dala ai unai oi karaia diba? Baibel ena hereva oi badinaia, ia gwau: ‘Namona be [Iehova ena hereva be] emui natudia dekenai umui gwauraia loulou, emui ruma ai umui helai, bona dala dekenai umui raka neganai.’ (Deuteronomi 6:7) Oi diba emu natudia be gau ta idia laloatao totona, do oi gwauraia loulou. Unai siri ena anina be dala do oi tahua, hanaihanai emu natudia dekenai Iehova oi herevalaia totona. Wiki ta ta ai nega do umui atoa ruma bese tomadiho umui karaia be namo. Bema umui be natudia lasi, wiki ta ta ai Dirava ena Hereva umui stadilaia karana ese namo bada do ia havaraia danu.
DIBA MA HAIDA ABIA
Ruma bese ia noho namonamo bona moale totona heduru herevadia haida do oi dibaia.
4. Mai lalokau ida emu natudia oi hadibaia
Natuna hadibaia gaukara be mai ena hekwarahi. Baibel be edena bamona heduru ia henia diba? Iamesi 1:19, 20 duahia, bena inai henanadai herevalaia:
-
Tama sina be natudia ida idia herevahereva neganai, edena dala ai lalokau idia hahedinaraia diba?
-
Namo lasi tama sina be mai badu ida natudia idia matahakani henia, dahaka dainai? a
5. Emu natudia oi gimaia
Natudia gimaia totona, idia dekenai mahuta hebou karana oi herevalaia be mai anina bada. Reana unai oi herevalaia be do ia auka. VIDIO itaia, bona henanadai herevalaia.
-
Dahaka dainai tama sina haida be natudia dekenai headava karana idia herevalaia be auka?
-
Tama sina haida be edena dala ai natudia dekenai mahuta hebou karana idia herevalaia?
Peroveta herevadia hegeregerena, Satani ena tanobada taudia edia kara dika be ia bada momokani. Timoteo Iharuana 3:1, 13 duahia, bena inai henanadai herevalaia:
-
Siri 13 ese ia herevalaia kara dika taudia haida be natudia idia kara bodaga henidia. Dahaka dainai tama sina ese natudia dekenai mahuta hebou karana idia herevalaia, bona matabodaga taudia amo sibona idia gimaia dalana idia hadibaia be mai anina bada?
Inai oi diba, a?
Iehova ena Witnes taudia ese pablikeisen momo idia halasia tama sina idia durua edia natudia dekenai mahuta hebou karana idia herevalaia, bona matabodaga taudia amo sibona idia gimaia dalana idia hadibaia totona. Hegeregere, inai oi itaia:
-
Emu Natudia Oi Gimaia (vidio)
-
Hadibaia Tauna Badana amo Diba Abia, karoa 10 bona 32
-
“Emu Natuna Dekenai Mahuta Hebou Karana Oi Herevalaia” (Noga! No. 5 2016)
6. Emu tama sina oi matauraia
Natudia maragidia bona badadia ese edia hereva dalana amo tama sina dekenai hemataurai idia hahedinaraia diba. VIDIO itaia, bona henanadai herevalaia.
-
Dahaka dainai natuna maragina o badana ese mai hemataurai ida tama sina ia hereva henia be mai ena namo?
-
Edena dala ai natuna maragina o badana ese mai hemataurai ida tama sina ia hereva henia diba?
Aonega Herevadia 1:8 duahia, bena inai henanadai herevalaia:
-
Tama sina ese edia natuna idia hamaoroa gau ta do ia karaia neganai, natuna be dahaka ia karaia be namo?
7. Namona be ruma bese ese Iehova idia tomadiho henia
Iehova ena Witnes taudia edia ruma bese be wiki ta ta ai nega idia atoa idia tomadiho hebou totona. Unai ruma bese tomadiho be edena bamona idia karaia? VIDIO itaia, bona henanadai herevalaia.
-
Edena dala ai ruma bese be edia Ruma Bese Tomadiho idia karaia hanaihanai diba?
-
Edena dala ai tama sina ese ruma bese tomadiho be heduru bona moale negana ai idia halaoa diba?—Inai leseni ena matamanai ia hedinarai laulau itaia.
-
Dahaka ese emui ruma bese ena tomadiho hebou negana ia hadikaia diba?
Idaunegai Israela ai, Iehova ia ura ruma bese taudia be hanaihanai Toretore Helagadia do idia herevalaia. Deuteronomi 6:6, 7 duahia, bena inai henanadai herevalaia:
-
Edena dala ai unai hakaua herevana oi badinaia diba?
Ruma bese tomadiho karaia daladia:
-
Kongrigeisen heboudia totona hegaegae.
-
Ruma bese ese do ia moalelaia Baibel sivaraina ta umui duahia bona herevalaia.
-
Bema umui be mai emui natudia maragidia, jw.org amo natudia ese idia karaia gauna ta umui daonloud bona printaia diba.
-
Bema emui natudia be memero kekeni badadia, jw.org amo matamata taudia edia atikol umui herevalaia diba.
-
Natudia ida Baibel drama umui karaia.
-
Natudia ida jw.org ai vidio ta umui itaia bona herevalaia.
HAIDA IDIA GWAU: “Gaukara dekenai nega bada ai haorea dainai, nega be lasi natudia dekenai Baibel ai herevalaia totona.”
-
Edena bamona do oi haere?
POINT BADANA
Iehova ia ura tama sina be natudia do idia lalokau henidia, matahakani bona gimaia; natudia be tama sina do idia matauraia bona kamonai henia; bona ruma bese be ia do idia tomadiho henia hebou.
Riviu
-
Tama sina be edena dala ai edia natudia idia matahakani henia bona gimaia diba?
-
Natudia be edena dala ai tama sina idia matauraia diba?
-
Ruma bese be wiki ta ta ai Ruma Bese Tomadiho idia karaia ena namo be dahaka?
REFERENS ITAIA
Dahaka hadibaia herevadia ese emu natudia do ia durua taunimanima badadia ai idia lao totona?
Tama sina burukadia idia naria taudia totona Baibel ena heduru herevadia do oi dibaia.
“Tama Sina Burukadia Naria Karana Dekenai Baibel be Dahaka Ia Hereva?” (Websait atikol)
Tau ta ena sivarai oi duahia, ia be natudia naria dalana ia diba lasi, to tama namona ai ia lao.
Iehova ese Ai Dekenai Natudia Naria Dalana Ia Hadibaia (5:58)
Tama ese edia hetura karana natudia memero ida idia hagoadaia dalana oi dibaia.
“Edena Dala ai Tamadia ese Natudia Memero Idia Tura Henia Diba?” (Gima Kohorona, January 1, 2012)
a Baibel lalonai, matahakani ena anina be tama sina ese natuna idia hadibaia bona durua iena kara o lalohadai kererena ia haidaua totona. Ia be natuna botaia dikadika karana ia herevalaia lasi.—Aonega Herevadia 4:1.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
