EHONGWA 50
Eṱunḓu roye mari yenene vi okukara nondjoroka?—Orupa 2
Ovanatje otjiyandjewa okuza ku Jehova. Eye u vanga ovanene okutjevera otjiyandjewa hi momuano omuwa. Jehova u yandja ondunge ndji mai yenene okuvatera ovanene okutjita nao. Ondunge Ye ndjo wina i raisa oviṋa ovanatje mbi mave yenene okutjita okuvatera eṱunḓu rawo kutja ri kare nondjoroka.
1. Ondunge iṋe Jehova ndje yandja kovanene?
Jehova u vanga kutja ovanene ve suvere ovanatje vawo nokukara noruveze pu na wo otja pu mave yenene. Eye wina u vanga kutja ovanene ve tjevere ovanatje vawo komaumba, nokuungurisa omirari vyOmbeibela okuvehonga. (Omiano 1:8) Eye u tja nai kovanene: “Kuriseye [ovanatje veṋu] . . . nokuveronga otja Muhona pe vanga.” (Lesa Ovaefese 6:4.) Jehova u tjaterwa i yovanene tji mave kongorere omuhunga we indu tji mave kurisa ovanatje vawo, nokuhinokuyandja omerizirira nga komundu warwe.
2. Ondunge iṋe Jehova ndje yandja kovanatje?
Jehova u rakiza ovanatje nomambo nga: “Kareye nonḓuviro kovanene veṋu.” (Lesa Ovakolose 3:20.) Indu ovanatje tji ve nondengero nonḓuviro kovanene vawo, owo ve yorokisa Jehova novanene vawo. (Omiano 23:22-25) Jesus wa twa po otjihorera otjiwa indu tja ri omuatje. Nandarire kutja eye wa ri ohomonena, wa kara nonḓuviro nondengero kovanene ve mbe ha ri ohomonena.—Lukas 2:51, 52.
3. Mamu yenene vi okutumbuka popezu na Mukuru otjeṱunḓu?
Tji u novanatje, otjiperi kutja u vanga kutja ovanatje voye ve suvere Jehova tjimuna ove. Mo yenenisa vi ondando ndjo? Omokutjita imbi Ombeibela mbi i hungira. Oyo i tja: “Ṋiṋikizira [omambo wa Jehova] momitima vyovanatje voye, ye tamuna tji wa haama mondjuwo yoye na tji u ri mondjira.” (Deuteronomium 6:7) Embo ndi “ṋiṋikizira,” mari hee okuhonga mokuyarukira po otjiṋa. Mape ya mo tjiwa kutja mo hepa okuyarukira po otjiṋa povikando ovingi kovanatje voye kokutja ve tji zemburuke. Etjangwa ndi mari hee kutja mo hepa okupaha oruveze aruhe okuhungira ku novanatje voye ohunga na Jehova. Ma rire nawa okutwa po oruveze otjivike atjihe okukara nomerikotameneno weṱunḓu. Nandarire kutja ko novanatje, ove mo yenene okumuna ouwa mokutwa po oruveze otjivike atjihe okukonḓonona Embo ra Mukuru.
KONḒONONA OUKOTO
Tara koviṋa mbi mavi yenene okuvatera eṱunḓu okukara nondjoroka, na mondjeverero.
4. Honga ovanatje voye norusuvero
Okuhonga omuatje katjiṋa otjipupu. Ombeibela ma yenene okukuvatera vi? Lesa Jakobus 1:19, 20, nu okuzambo hungirira komapuriro nga:
-
Ovanene mave raisa vi orusuvero indu tji mave hungire ku novanatje vawo?
-
Ongwaye omunene tje ha sokuvyura omuatje we indu tja pindike? a
5. Tjevera ovanatje voye
Kutja u tjevere ovanatje voye, otjiṋa otjinanḓengu tjinene okuhungira ku nomuatje auhe ohunga nomahakaeneno womonyama. Iho mape ya katjiṋa otjipupu. Nyanda OKAVIDIO, nu okuzambo hungirira komapuriro ngu maye kongorere mba.
-
Ongwaye tje rira ouzeu kovanene tjiva okuhungira ku novanatje vawo ohunga nomahakaeneno womonyama?
-
Omomuano uṋe ovanene tjiva mu va kahurura omahakaeneno womonyama kovanatje vawo?
Otja komaprofetero, ouye wa Satan u ririra ko ouvi tjinene. Lesa 2 Timoteus 3:1, 13, nu okuzambo hungirira kepuriro ndi:
-
Ovandu ovarunde tjiva mba tamunwa mezeva 13 ve tjera ovanatje. Ku nao, ongwaye tje ri ounanḓengu kovanene okuhonga ovanatje vawo ohunga nomahakaeneno womonyama, nomuano mu mave yenene okuritjevera kovandu mbe tjera ovanatje?
Hapo ove oo tjiwa?
Ovahongonone va Jehova ve pitisa omambo omengi nge vatera ovanene okuhonga ovanatje vawo ohunga nomahakaeneno womonyama, nokuvetjevera kovandu mbe tjera ovanatje. Otjotjihorera, tara ku imbi:
-
Tjevera ovanatje voye (okavidio)
-
“Honga omuatje woye ohunga nomahakaeneno womonyama” (Penduka! No. 5 2016)
6. Tenga ovanene voye
Ovanatje nomitanda mave sokuraisa ondengero kovanene vawo indu tji mave hungire ku na wo. Nyanda OKAVIDIO, nu okuzambo hungirira komapuriro ngu maye kongorere mba.
-
Ongwaye tje ri ounanḓengu komuatje poo komutanda okuhungira ku novanene ve nondengero?
-
Omutanda ma hungire vi momuano wondengero ku novanene ve?
Lesa Omiano 1:8, nu okuzambo hungirira kepuriro ndi:
-
Omutanda ma sokuraisa ongaro iṋe, indu ovanene ve tji mave mu raere oviṋa mbi ma sokutjita?
7. Rikotameneye ku Jehova otjeṱunḓu
Omaṱunḓu wOvahongonone va Jehova ye twa po oruveze otjivike atjihe kutja ve rikotamene pamwe otjeṱunḓu. Pe tjitwa tjike pomerikotameneno weṱunḓu nga? Nyanda OKAVIDIO, nu okuzambo hungirira komapuriro ngu maye kongorere mba.
-
Eṱunḓu mari yenene vi okukara noprograma yomerikotameneno weṱunḓu aruhe?
-
Omunene ma yenene okutjita ye kutja omerikotameneno weṱunḓu ye vatere eṱunḓu nu ye ete ondjoroka keṱunḓu? Tara kotjiperendero pomautiro wehongwa ndi.
-
Ovikwaye mbi mape ya avi tjiti kutja i rire ouzeu keṱunḓu roye okurihonga pamwe?
MoIsrael otjikuru Jehova aa vanga kutja omaṱunḓu ye hungire aruhe ohunga nOmatjangwa. Lesa Deuteronomium 6:6, 7, nu okuzambo hungirira kepuriro ndi:
-
Omomuano uṋe mu mo yenene okuṱakamisa omurari mbwi?
Oviṋa mbi mo yenene okutjita pomerikotameneno weṱunḓu:
-
Rirongerisa kozombongarero zombongo.
-
Lesa nokuhungirira kehungi rOmbeibela ndi mari tjata keṱunḓu roye.
-
Tji u novanatje ovaṱiṱi, nana poo pirinda otjitjitwa tjovanatje ko jw.org.
-
Tji u novanatje omitanda, hungirira korupa rwomitanda ndu ru ri ko jw.org.
-
Nyanda enyando rOmbeibela ku novanatje voye.
-
Tarereye nokuhungirira kokavidio ko jw.org.
OVANDU TJIVA VE TJA: “Ombeibela onḓeu kovanatje okuizuva nawa.”
-
Ove otjo tja vi?
OKUYARUKIRA PO OUSUPI
Jehova u vanga kutja ovanene ve suvere, ve honge nokutjevera ovanatje vawo. Eye u vanga kutja ovanatje ve kare nondengero nonḓuviro kovanene vawo. Nu u vanga kutja omaṱunḓu ye rikotamene ku Ye pamwe.
Okurizemburukisa
-
Omomuano uṋe ovanene mu mave yenene okuhonga nokutjevera ovanatje vawo?
-
Ovanatje mave raisa vi ondengero kovanene vawo?
-
Ouwa waye mbu matu munu tji matu twa po oruveze okurikotamena ku Jehova otjeṱunḓu otjivike atjihe?
RIHONGA OVINGI
Ovikwaye mbi mavi rongerisa omuatje woye otja tji me kuru?
“Oviṋa hamboumwe ovanatje mbi mave sokurihonga” (Penduka! No. 2 2019)
Tara kondunge Ombeibela ndji i yandja ku imba mbe tjevera ovanene vawo mba kurupa.
“Ombeibela i tja vi ohunga nokutjevera ovanene mba kurupa?” (Okarupa okasupi morungovi)
Tara komuano omurumendu ngu hi na aa tjiwa okukurisa ovanatje ve, me rihonga omuano wokukurisa ovanatje nawa.
Tara komuano ovarumendu mu mave yenene okupamisa oupanga ku novanatje vawo ovazandu.
a MOmbeibela embo ndi “omavyuriro” ri heya okuhonga, okuhongorera po omuatje nokumuvatera kutja ma rundurure ongaro poo omeripura omavi. Oro kari hee okutjinda omuatje mongaro ombi poo okumutatumisa.—Omiano 15:5.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
