PELAJAR 50
Baka Ni Ruang Bilik Nuan Ulih Lantang?—Begian 2
Bala anak nya pemeri ari Jehovah. Ketegal nya, Jehovah dekaka apai indai nyaga anak sida enggau manah. Kena nulung apai indai enggau bala anak bejalaika tanggung pengawa sida, Jehovah udah nyediaka jaku lalau ti beguna dalam Bup Kudus.
1. Nama jaku ajar Jehovah ngagai bala apai indai?
Jehovah deka apai indai rindu sereta ngena mayuh awak begulai enggau bala anak sida. Iya mega dekaka apai indai nyaga bala anak sida sereta ngajar sida ngena prinsip Bup Kudus. (Jaku Dalam 1:8) Bup Kudus madahka tu ngagai bala apai: ‘Ngiring [bala anak] ngena . . . ajar Jehovah.’ (Bacha Epesus 6:4.) Jehovah udah meri apai indai tanggung pengawa ngemesaika bala anak. Nya alai, Iya enggai apai indai nyerahka tanggung pengawa nya ngagai orang bukai.
2. Nama jaku ajar ke diberi Jehovah ngagai bala anak?
Jehovah madahka, bala anak patut ‘ngasika apai indai sida.’ (Bacha Kolosi 3:20.) Bala anak ke bebasa sereta ngasika apai indai deka ngasuh Jehovah enggau apai indai sida gaga ati. (Jaku Dalam 23:22-25) Taja pan Jesus sempurna, tang iya ngayanka basa sereta ngasika apai indai iya ba dunya. Bala anak tentu deka nunda teladan Jesus.—Luke 2:51, 52.
3. Baka ni kita sebilik ulih semak ngagai Petara?
Apai indai, nuan tentu deka bala anak nuan rinduka Jehovah. Baka ni nuan ulih nulung sida bisi pengerindu ti dalam ngagai Jehovah? Bup Kudus madahka: “Ajar [jaku Petara] ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai.” (Ulang Adat 6:7) Nuan tentu nemu, bala anak tusah deka ingatka utai. Nyadi, lebuh nuan betanduka jaku Petara maya ngajar anak nuan, ajar Petara nya deka tama dalam ati sida. Kena meh tiap iti peluang ke bisi ngambika ulih bejaku enggau bala anak pasal Jehovah. Tetapka jadual ngambika ulih belajarka Bup Kudus enggau diri sebilik ninting minggu. Pia mega, taja pan nuan nadai anak, nuan agi bulih penguntung lebuh nuan magi awak ninting minggu kena belajarka Jaku Petara.
BELAJAR MAYUH AGI
Peratika jaku ajar ke ulih nulung kita sebilik berasai gaga ati sereta likun.
4. Ajar bala anak kita ngena pengerindu
Enda senang deka ngajar bala anak. Baka ni jaku ajar Bup Kudus ulih nulung nuan? Bacha James 1:19, 20, lalu kerandauka tanya tu:
-
Baka ni apai indai ulih ngayanka pengerindu lebuh bejaku enggau bala anak?
-
Apai indai engka ringat enggau penyalah ti digaga bala anak. Tang, nama kebuah apai indai enda patut disiplin anak lebuh sida benung ringat? a
5. Jaga meh anak kita
Kena nyaga anak ari nyadi mansa seks, nuan patut ngajar anak pasal seks, taja pan nuan berasai malu lebuh berandauka utai nya. Mainka VIDEO, lalu kerandauka tanya tu.
-
Nama kebuah apai indai tusah deka berandau enggau bala anak pasal seks?
-
Baka ni sekeda apai indai nerangka topik tu ngagai bala anak sida?
Baka ke udah dipadah dalam Bup Kudus, dunya Sitan deka majak jai-sejai. Bacha 2 Timoti 3:1, 13, lalu kerandauka tanya tu:
-
Orang ke jai ti disebut ba ayat 13 nyengkaum orang ke ngayahka bala anak ngena chara seksual. Nya alai, nama kebuah apai indai patut ngajar bala anak sida pasal seks sereta chara ngelindung diri ari nyadi mansa seks?
Nemu nuan?
Saksi-Saksi Jehovah bisi ngeluarka mayuh perengka ke ulih dikena apai indai ngajar anak sida pasal seks sereta chara ngelindung diri. Peratika sekeda chunto tu:
-
Jaga Anak Nuan (video)
-
Belajar meh ari Pengajar ti Pemadu Badas, pelajar 10 enggau 32
-
“Ajar Anak pasal Seks” (Peratika! No. 5 2016)
6. Ayanka basa ngagai apai indai nuan
Bala anak ulih ngayanka basa ngagai apai indai ari chara sida bejaku. Mainka VIDEO, lalu kerandauka tanya tu.
-
Nama kebuah bala nembiak patut bejaku enggau apai indai sida enggau chara ti basa?
-
Baka ni bala nembiak ulih nunjukka basa lebuh bejaku enggau apai indai iya?
Bacha Jaku Dalam 1:8, lalu kerandauka tanya tu:
-
Nama patut digaga bala nembiak lebuh apai indai sida ngasuh sida ngereja pengawa?
7. Diri sebilik sama nyembah Jehovah
Ruang bilik Saksi-Saksi Jehovah magi awak ninting minggu ngambika ulih begulai belajarka Bup Kudus. Nama ulih digaga lebuh belajarka Bup Kudus ba diri sebilik? Mainka VIDEO, lalu kerandauka tanya tu.
-
Baka ni ruang bilik ulih nentuka sida ngaga pengawa belajarka Bup Kudus ba diri sebilik enggau tetap?
-
Baka ni apai indai ulih nentuka pengawa belajarka Bup Kudus ba diri sebilik mai penguntung sereta ngagaka ati?—Peda gambar ba pun pelajar.
-
Nama utai ke ngasuh kita sebilik tusah deka begulai belajarka Bup Kudus ba diri sebilik?
Maya jeman Israel kelia, Jehovah deka diri sebilik ngena awak berandau pasal jaku Petara. Bacha Ulang Adat 6:6, 7, lalu kerandauka tanya tu:
-
Baka ni nuan ulih nitihka jaku lalau dalam ayat tu?
Utai ke ulih digaga maya belajarka Bup Kudus ba diri sebilik:
-
Nyediaka diri ke utai ti deka dipelajar ba gempuru.
-
Macha sereta berandauka cherita Bup Kudus ti dikerinduka diri sebilik.
-
Enti nuan bisi anak mit, download tauka chelak utai ari begian anak mit ba jw.org.
-
Enti nuan bisi anak ke agi nembiak, kena meh artikel ke bisi berandau pasal bala nembiak ba jw.org.
-
Lakunka cherita Bup Kudus enggau bala anak.
-
Peda sereta kerandauka video ba jw.org.
BISI ORANG MADAH: “Bala anak tusah deka meretika Bup Kudus.”
-
Nama saut nuan?
LANSA
Jehovah dekaka: 1) Apai indai rindu, ngajar, sereta nyaga anak. 2) Bala anak ngayanka basa sereta ngasika apai indai. 3) Ruang bilik begulai nyembah Iya.
Ulang Kaji
-
Baka ni apai indai ulih ngajar sereta ngelindung anak sida?
-
Baka ni bala anak ulih nunjukka basa ngagai apai indai sida?
-
Nama penguntung iya enti diri sebilik netapka jam ninting minggu ngambika ulih belajarka Bup Kudus ba diri sebilik?
ARAM BELAJAR
Baka ni nuan ulih ngelatih anak lebuh sida mansang nyadi orang besai tuai?
“Enam Iti Utai ke Patut Dipelajarka Bala Anak” (Peratika! No. 2 2019)
Belajarka sekeda chara kena nyaga apai indai ke udah tuai.
“Nama Ajar Bup Kudus Pasal Nyaga Apai Indai ke Udah Tuai?” (Artikel ba laman web jw.org)
Peratika baka ni seiku lelaki belajar nyadi apai ti manah.
Peda baka ni bala apai ulih ngemansangka kaul ti rapat enggau anak lelaki sida.
“Apai, Kemansangka meh Kaul ti Rapat enggau Anak Lelaki Kita” (Menara Jaga, 1 November 2011)
a Leka jaku “disiplin” mai reti ngajar, ngiring, sereta ngemetulka bala anak. Apai indai enda patut nyamah tauka ngemediska bala anak sida.—Jaku Dalam 4:1.
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
