ƐLĀ Ō NWU ƆMƐ 50
Ɛgɛnyá Nɛ Apɔlɛ Ku Uwɔ Géē Gweeye A?—Aya 2
Ayipɛ wɛ ɛhi ŋma ɛgiyi Ujehofa. Ó leyice ku adā mla ɛ́nɛ́ géē leyi kwu ɛhi nōo yɔ nyā lɔɔlɔhi. Ujehofa je aukɔ́ ku ijeeyi lɛ adā mla ɛ́nɛ́ nōo géē ta uwa abɔ ya ɛnyā. Aukɔ́ ku nu klla mafu ɔdā nɛ ayipɛ géē ya, o ya ɛɛ ku apɔlɛ ku uwa kóō gweeye duu.
1. Ukɔ́ nyá nɛ Ujehofa je lɛ adā mla ɛ́nɛ́ a?
Ujehofa dɔka ku adā mla ɛ́nɛ́ kéē yihɔtu ayipɛ ɔlɛ uwa, kéē klla lɛ eko taajɛ yɔ mla uwa lɔɔlɔhi ɛgɛ nōó tɔɔtɛ lɛ uwa lɛ a. Ó klla dɔka ku adā mla ɛ́nɛ́ kéē gbo ayipɛ ɔlɛ uwa ŋma ɔdobɔbi, kéē klla bi aukɔ́ ku Ubáyíbu le nwu uwa ɛlā. (Aíita 1:8) Ó da ācɛ nōo wɛ adā a kahinii: ‘Bi ayipɛ ɔlɛ uwɔ jɛ ku a nwu uwa ɔdā néē cika ō jé lɛyikwu Ujehofa a.’ (Jé Ācɛ Ɛ́fēsɔsi 6:4.) Ɔtu gē he Ujehofa nɛhi ɔdaŋ ku adā mla ɛ́nɛ́ yɛce ukɔ́ nɛ ó je lɛ uwa lɛyikwu ɔwɛ néē géē bi ayipɛ ɔlɛ uwa jɛ a, néē klla je uklɔ ɔɔma lɛ ɔcɛ ɔhá ŋ.
2. Ukɔ́ nyá nɛ Ujehofa je lɛ ayipɛ a?
Ujehofa da ayipɛ kahinii: “Aá lɛ ojīlīmā ce aádā aá mɛ́mla aɛ́nɛ́ aá.” (Jé Ācɛ Ukólōsi 3:20.) Ɔdaŋ ku ayipɛ gē lɛ ojilima cɛ adā mla ɛ́nɛ́ uwa klla gē lɛyitaajɛ lɛ uwa, é géē ya ku Ujehofa kóō gweeye. É klla géē ya ku adā mla ɛ́nɛ́ uwa kéē gweeye duu. (Aíita 23:22-25) Ujisɔsi lɛ ocabɔ olɔhi taajɛ eko nɛ ó wɛ ɔyipɛ a. Naana nɛ ó wɛ ɔcɛ nōo jila iyē a, ó lɛyitaajɛ klla lɛ ojilima ce adā mla ɛ́nɛ́ nu.—Ulúku 2:51, 52.
3. Ɛgɛnyá nɛ awɔ mla apɔlɛ ku uwɔ gáā tubla Ujehofa ajaajɛ fiyɛ a?
Ɔdaŋ ku a wɛ adā amāŋ ɛ́nɛ́, ó lɛ aafu ŋ, a géē dɔka ku ayipɛ ɔlɛ uwɔ kéē yihɔtu ku Ujehofa ɛgɛ nɛ a ya a duu. Ɛgɛnyá nɛ ɛnyā kē gáā tɔɔtɛ gla a? Oŋma lɛ ō ya ɔdā nɛ Ubáyíbu ka nōo kahinii: ‘Da uwa kéē nwu ayi uwa aíne ku Ujehofa lɔɔlɔhi. Ó klla da uwa kéē ka aíne a tɛɛcɛ lɛ ayipɛ ɔlɛ uwa eko néē ba ɔlɛ mla eko néē yɔ i yɛ ɔwɛ.’ (Oblatūkíne 6:7) Ō “nwu lɔɔlɔhi,” ɛyi ku nu wɛ ō yɔ i nwu uwa ɛlā ojigogo. Ó lɛ aafu ŋ, a jé ku a cika ō kɛla tɛɛcɛ igbalɛwa o ya ɛɛ ku ayipɛ ɔlɛ uwɔ kéē blakwu ɔ. Ɛyi ku Ubáyíbu nyā wɛ ku a dɔka ɛga ojigogo nɛ a géē kɛla lɛ ayipɛ ɔlɛ uwɔ lɛyikwu Ujehofa. Ó wɛ ɔdā olɔhi ō lɛ eko taajɛ alaadi doodu, cɛɛ ku a ya ɛ̄gbā ō gba ku apɔlɛ tɔha. Ɔdaŋ ku a ka ō lɛ ayi ŋ, a géē lɛ itene ŋma lɛ ō lɛ eko taajɛ alaadi doodu ō klɔcɛ Ɛlā ku Ɔwɔico.
JÉ GƆBU
Leyi yɛ ɔwɛ ōhī nōo géē ta eyeeye ku ācɛ nōo yɔ ipu apɔlɛ abɔ, kéē lɛ ogbotu klla gweeye.
4. Bi ayipɛ ɔlɛ uwɔ jɛ ɔwɛ ku ihɔtu
Ō bi ɔyi jɛ i wɛ ɔdā ō tɔɔtɛ ŋ. Ɛgɛnyá nɛ Ubáyíbu lɔfu ta abɔ a? Jé Ujɛ́mīsi 1:19, 20, cɛɛ ku aa kɔka lɛyikwu aɔka nōo ba nyā:
-
Ɛgɛnyá nɛ adā mla ɛ́nɛ́ géē mafu ihɔtu eko néē yɔ i kɛla mla ayipɛ ɔlɛ uwa a?
-
Ɔdiya nɛ adā amāŋ ɛ́nɛ́ i cika ō ya ayipɛ ɔlɛ nu itala eko nɛ ó yɔ i cɔnu ŋ ma? a
5. Gbo ayipɛ ɔlɛ uwɔ
O ya ɛɛ ku a gbo ayipɛ ɔlɛ uwɔ, ó cɛgbá nɛɛnɛhi ku a kɛla lɛ eyeeye ku uwa lɛyikwu ɔcɛnyilɔ mla ɔcɛnya ō gwuta mla iyi uwa. Ɛnyā i lɔfu tɔɔtɛ ŋ amāŋ ó lɔfu wɛ ɔdā ō ta uweyi. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɔdiya nōó gē lɔnɔ tu adā mla ɛ́nɛ́ ōhī ō kɛla lɛ ayipɛ ɔlɛ uwa lɛyikwu ɔcɛnyilɔ mla ɔcɛnya ō gwuta mla iyi uwa a?
-
Ɔwɛ ɛgɛnyá nɛ adā mla ɛ́nɛ́ ōhī lɛ ɔ ta ayipɛ ɔlɛ uwa eyī peee ɔdā nōó wɛ ka ɔcɛnyilɔ kóō gwuta mla ɔcɛnya a?
Ɛgɛ nɛ Ubáyíbu ka taajɛ a, ɛcɛ ku Usetan yɔ i bɔbi tōōtɔ̄ɔ̄. Jé 2 Utímōti 3:1, 13, cɛɛ ku aa kɔka lɛyikwu aɔka nōo ba nyā:
-
Ōhī ku ācɛ obɔbi nɛ ɔgba 13 kɛla lɛyikwu uwa a wɛ ācɛ nōo gē dɔka ō gwuta amāŋ cikpo ku ayipɛ nɛ̄ŋcɛ́ abɔfu. Ó lɛ a, ɔdiya nōó cɛgbá ku adā mla ɛ́nɛ́ kéē yɔ i nwu ayipɛ ɔlɛ uwa lɛyikwu ɔcɛnyilɔ mla ɔcɛnya ō gwuta mla iyi uwa a? Ɔdiya nōó kē cɛgbá ku adā mla ɛ́nɛ́ kéē nwu ayipɛ ɔlɛ uwa ɔwɛ néē géē gbo iyi uwa tu ŋma ɛgiyi ācɛ obɔbi ɛgɛnyā?
A jé?
Ācɛ Ocijali Ku Ujehofa lɛ aɔkpá alɛwa nōo gē ta adā mla ɛ́nɛ́ abɔ kéē nwu ayipɛ ɔlɛ uwa ɛlā lɛyikwu ɔcɛnyilɔ mla ɔcɛnya ō gwuta mla iyi uwa mla ɛgɛ néē klla géē gbo iyi uwa ŋma ɛgiyi ācɛ obɔbi a. Ocabɔ, má u:
-
“Teaching Your Child About Sex” (Awake! No. 5 2016)
6. Lɛ ojilima ce adā mla ɛ́nɛ́ uwɔ
Ayipɛ nɛ̄ŋcɛ́ mla aɛdrɔ lɔfu mafu ojilima lɛ adā mla ɛ́nɛ́ uwa ŋma lɛ ɔwɛ néē gē kɛla lɛ uwa a. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɔdiya nōó wɛ ɔdā nōo cika, ku ayipɛ amāŋ aɛdrɔ kéē kɛla lɛ adā mla ɛ́nɛ́ uwa ɔwɛ ku ojilima a?
-
Ɛgɛnyá nɛ ɔcɛ nōo wɛ ɛdrɔ lɔfu kɛla lɛ adā mla ɛ́nɛ́ ku nu ɔwɛ nōo géē mafu kóō lɛ ojilima ce uwa a?
Jé Aíita 1:8, cɛɛ ku aa kɔka lɛyikwu ɔka nyā:
-
Ɛgɛnyá nɛ ɔyi nōo wɛ ɛdrɔ cika ō ya uce lɛ eko nɛ adā mla ɛ́nɛ́ nu da ɔ ɔdā nɛ ó cika ō ya a?
7. Apɔlɛ cika ō gba Ujehofa ɛ̄gbā tɔha
Apɔlɛ nōo wɛ Ācɛ Ocijali Ku Ujehofa gē lɛ eko taajɛ alaadi doodu kéē gba ɛ̄gbā tɔha. Ɛgɛnyá nɛ ɛ̄gbā ō gba ku apɔlɛ nyā gē lɛ a? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɛgɛnyá nɛ apɔlɛ lɔfu lɛ ōmiya ku ɛgɛ néē géē yɔ i ya ɛ̄gbā ō gba ku apɔlɛ ku uwa ojigogo a?
-
Ɔdi nɛ adā mla ɛ́nɛ́ lɔfu ya o ya ɛɛ kéē jɔɔnyɛ ɛ̄gbā ō gba ku apɔlɛ ku uwa a?—Má ifoto nōo yɔ iyɔbu ku ɛlā ō nwu nyā.
-
Ɔdi lɔfu ya kóō lɔnɔ tu apɔlɛ ku uwɔ ō klɔcɛ tɔha a?
Ipu éwo ku Isrɛlu ku ikee a, Ujehofa leyice ku apɔlɛ géē yɔ i kɔka tɔha ojigogo ŋma ipu Ubáyíbu. Jé Oblatūkíne 6:6, 7, cɛɛ ku aa kɔka lɛyikwu ɔka nyā:
-
Ɛgɛnyá nɛ a géē bi ukɔ́ ku Ubáyíbu nyā le yuklɔ a?
Aɔdā ōhī nɛ a lɔfu ya ku ɛ̄gbā ō gba ku apɔlɛ ku uwɔ:
-
Ya otutu ku ōjila ku ujɔ.
-
Aa kɔka lɛyikwu ɔ̄kā ku Ubáyíbu nɛ apɔlɛ ku uwɔ géē jɔɔnyɛ nu.
-
Ɔdaŋ ku a lɛ ayipɛ nɛ̄ŋcɛ́ ɔlɛ, danlod ɔdā ōhī nōo lɛ ō ya mla ayipɛ nɛ̄ŋcɛ́ lɛ uwa ŋma ipu jw.org.
-
Ɔdaŋ ku ayipɛ ɔlɛ uwɔ kē wɛ ɛdrɔ, aa kɔka lɛyikwu aikpɛyi ɛlā ōhī nōo yɔ lɛ aɛdrɔ ŋma ipu jw.org.
-
Ya udrama ku ɔ̄kā ku Ubáyíbu éyi mla ayipɛ ɔlɛ uwɔ.
-
Aa má uvidio éyi ipu jw.org cɛɛ ku aa kɔka lɛyikwu ɔ.
ĀCƐ ŌHĪ GĒ KA: “Ubáyíbu lɔnɔ ibi, ayipɛ nɛ̄ŋcɛ́ i gáā jɛyi nu ŋ.”
-
Ohi nyá nɛ a géē ta a?
ƆDI NƐ A NWU A?
Ujehofa dɔka ku adā mla ɛ́nɛ́ kéē yihɔtu ayipɛ ɔlɛ uwa, kéē nwu uwa ɛlā klla je ogbotu lɛ uwa. Ujehofa kē dɔka ku ayipɛ kéē lɛ ojilima ce ada mla ɛ́nɛ́ uwa klla lɛyitaajɛ lɛ uwa, ó klla dɔka ku apɔlɛ kéē gba ɔ ɛ̄gbā tɔha.
Aɔka ō tu alɔ ɛlá kwu ɔdā nɛ alɔ nwu
-
Ɛgɛnyá nɛ adā mla ɛ́nɛ́ lɔfu nwu ayipɛ ɔlɛ uwa ɛlā klla je ogbotu lɛ uwa a?
-
Ɛgɛnyá nɛ ayipɛ lɔfu mafu ojilima lɛ uwa a?
-
Ɔdi wɛ itene ōhī nōo gē bɛɛcɛ ɔdaŋ ku apɔlɛ gē lɛ eko taajɛ alaadi doodu ō ya ɛ̄gbā ō gba ku apɔlɛ a?
JILA ƐLĀ NYĀ MÁ TŌŌTƆ̄Ɔ̄
Aɛlā ō nwu nyá gáā lɛ ayipɛ ɔlɛ uwɔ tutu ku eko néē géē je piya ijimkpa a?
Nwu aukɔ́ ku ijeeyi nōo yɔ ipu Ubáyíbu lɛ ācɛ nōo gē teyi tu adā mla ɛ́nɛ́ uwa nōo kwu hilokplici ɛ ma.
“Ɔdi Nɛ Ubáyíbu Ka Lɛyikwu Ō Teyi Tu Adā Mla Ɛ́nɛ́ Uwɔ Nōo Kwu Hilokplici Ɛ Ma?” (Web article)
Má ɛgɛ nɛ ɔcɛnyilɔ éyi nōó je ō bi ayi jɛ gbɔbu ŋ ma kwu piya adā nōo bi ayipɛ ɔlɛ nu jɛ mɛɛlɛ a.
Leyi yɛ ɛgɛ nɛ aadā géē lɔfu tu ɛma néē lɛ mla ayinɔnyilɔ ku uwa iyē a.
“How Can Fathers Stay Close to Their Sons?” (The Watchtower, November 1, 2011)
