UKỌCHẸ 50
Ẹñwu Neke Jẹñwu Akwọra Unyi Wẹ Ki N’ẹdẹbọ?—Ukpẹ 2
Am’ọma ch’ele ki kwugbo Jihofa. Jihofa atene k’amata kp’iye ku ma dejutẹ amoma ma. Jihofa d’amibe ọmẹmẹlẹ ñwu am’ata kp’iye ki neke jẹñwu ma ch’e-lẹ. Ibe lẹ añọ du ñ’amọma ẹñwu ki dukpẹ ku ma che ku ma neke jẹñwu akwọra unyi ki n’ẹdẹbọ.
1. Ibe ẹñwu Jihofa du ñwu am’ata kp’iye?
Jihofa atene k’amata kp’iye ku ma fẹdọ amọma ma ku ma la na dẹ kp’ama iko t’iko. Jihofa añọ tene k’amata kp’iye ki na dide amọma ma ku ma la na d’amukọ ki defu Baibul kọ ma. (Ita Ita 1:8) Jihofa ka ñwu am’ata kakini: “Mẹ na nẹ [amọma mẹ] gba efu . . . ibe e-Ondu edu ñwu ma.” (Gba Abo Ẹfẹsọs 6:4.) Ẹdọ Jihofa abọ nyọnyọ ichẹñwu k’amata kp’iye aleb’ukọ ki Jihofa du lugbo ọma enẹ ku ma ma la d’ọma ma ñwu ẹnẹ omunẹ ki nẹ n.
2. Ibe ẹñwu Jihofa du ñwu amọma?
Jihofa ka ñwu amọma kakini: “Mẹ ki na gbọla abo ku ma bi mẹ.” (Gba Abo Kọlọse 3:20.) Ichẹñwu k’amọma ad’ojima ñwu ata ma kp’iye ma ku ma la agbọla ma gbọ ma ajẹñwu ẹdọ Jihofa bọ, ẹdọ ata ma kp’iye ma añọ bọ gẹ. (Ita Ita 23:22-25) Jisọs d’ujiwe ọmẹmẹlẹ ña iko ki ch’imọtọ. Jisọs chẹ jọkpa, ama i gbọla ata kp’iye-wñ gbọ i la ñọ d’ojima ñwu ata kp’iye-wñ dagba ku ma ma jọkpa n.—Luke 2:51, 52.
3. Abu akwọra unyi wẹ neke tẹmẹr’Ọjọ?
Ichẹñwu k’ẹ ch’ata abẹki iye, ochochi i che kakini ẹ tene k’amọma wẹ ki mẹr’Ọjọ ọna k’onugo wẹ mẹr’Ọjọ. Abu ẹ neke ch’e-i le? Lefu echẹñwu ki Baibul ka: ‘uwẹ ki [n’ọla Jihofa] aka ka ñọ ka ñwu amọma-wẹ k’ẹ la n’oluka-wñ ache ẹgba k’ẹ gugu anẹ ef’unyi-wẹ kpai ẹgba k’ẹ t’ejọna alulẹ.’ (Ọlọda Eduwa Onukeji 6:7) Dabalu k’ẹ ma, i dukpẹ k’ẹ kọla aka ñọ ka ñwu amọma todu ku ma we gbenyọ ẹñwu k’ẹ ka ñwu ma. Ọgba Baibul-i du ña kaki i dukpẹ k’ẹ na tejanẹ iko k’ẹ na kọla ñwu amọma wẹ lugbo Jihofa iko t’iko. Ẹñwu ọmẹmẹlẹ i che ichẹñwu k’abo akwọra unyi duu ad’iko tanẹ ef’aladi duu ku ma na ch’ukọchẹ Baibul dama. Ichẹñwu k’ẹ ma la n’amọma n, ẹ ñọ neke jile ichẹñwu k’ẹ d’iko tanẹ k’ẹ ch’ukọchẹ Baibul ef’aladi duu.
N’UMA NYỌGBA
Kọchẹ amẹñwu ki neke jẹñwu akwọra unyi wẹ ki n’uyọ k’ẹdọ mẹ ki la wanẹ.
4. Na k’amọma wẹ efu ufẹdọ
Ọma enẹ ch’ukọlọ kẹkẹ i che n. Abu Baibul neke ch’atẹko wẹ? Gba Jemis 1:19, 20, ubilẹ mẹ ch’oluka oji am’ene-i:
-
Abu am’ata kp’iye neke d’ufẹdọ ñ’amọma ma ẹgba ku ma akọla kp’amọma ma?
-
Ẹñwu chi ki ma nyọ k’ata kp’iye ki na n’uwẹdọ k’amọma ma ọla n? a
5. Na dide amọma wẹ
K’ẹ neke dide amọma wẹ, i chẹñwu ogbogaga todu k’ẹ ka ñwu ma ẹñwu ki lugbo udachi ẹnẹkẹlẹ kp’onobulẹ. I neke gbiti ñwu abo ka ekọla lugbo ẹñwu-i. G’IFIDIO-i, ubilẹ mẹ ch’oluka oji am’ene-i.
-
Ẹñwu chi ki agbiti ñwu am’ata kp’iye ka ku ma kọla lugbo udachi ẹnẹkẹlẹ kp’onobulẹ ñwu amọma ma?
-
Ọna ẹñwu am’ata kp’iye ka kọla lugbo udachi ẹnẹkẹlẹ kp’onobulẹ ñwu amọma ma le?
Dabalu ki Baibul ka tanẹ, ilẹ-i arida, i abiẹnẹ nyọgba. Gba 2 Timoti 3:1, 13, ubilẹ mẹ ch’oluka oji ene-i:
-
Uchẹ ka efu am’ẹnẹbibi k’ọgba 13 akọla lugbo ma ab’amimọtọ dachi. Todulẹ, ẹñwu chi ki chẹñwu ogbogaga k’ata kp’iye ki k’amọma ma lugbo udachi ẹnẹkẹlẹ kp’onobulẹ kpai ọna ku ma neke dide ọlama?
Ẹ che ma?
Amẹnibenu Jihofa ch’amọtakada kpai am’ifidio wewe ki neke ch’atẹko am’ata kp’iye ku ma neke kọ amọma ma lugbo udachi ẹnẹkẹlẹ kp’onobulẹ kpai ọna ku ma neke dide ma kwefu ọwọ am’ẹnẹbibi. G’ujiwe:
6. Na b’ojima m’ata kp’iye wẹ
Amimọtọ kpai amagbadufu neke b’ojima m’ata kp’iye ma lọna ku ma akọla ñwu ma. G’IFIDIO-I, ubilẹ mẹ ch’oluka oji am’ene-i.
-
Ẹñwu chi ki chẹñwu ogbogaga k’amọma ku ma na kọla ñwu am’ata kp’iye ma lọna ojima?
-
Abu amọma neke na kọla ñwu am’ata kp’iye ma lọna ojima?
Gba Ita Ita 1:8, ubilẹ mẹ ch’oluka oji ene-i:
-
Ẹñwu dukpẹ k’ọma ki che ichẹñwu k’ata kp’iye-wñ aka ñwu ẹñwu ki dukpẹ ki che?
7. Mẹ na rẹ Jihofa dama efu akwọra unyi
Akwọra unyi amẹnibenu Jihofa ad’iko tanẹ ef’aladi duu ku ma neke rẹ Jihofa dama. Ẹñwu ma ache efu arẹ akwọra unyi? G’IFIDIO-i, ubilẹ mẹ ch’oluka oji am’ene-i.
-
Ẹñwu abo akwọra unyi neke che ku ma na ch’arẹ akwọra unyi iko duu?
-
Ẹñwu ata kp’iye neke che k’abo duu ki jile ku ma la jura kwefu arẹ akwọra unyi?—G’ifoto ki d’uchanẹ ukọchẹ-i.
-
Ẹñwu neke jẹñwu ki gbiti ñwu abo akwọra unyi ku ma ch’ukọchẹ dama?
Iko abo Israẹl igbele, Jihofa atene k’abo akwọra unyi duu ki na ch’ukochẹ Ọla-wñ dama iko duu. Gba Ọlọda Eduwa Onukeji 6:6, 7, ubilẹ mẹ ch’oluka oji ene-i:
-
Abu ẹ neke d’amukọ-i chekwu le?
Amẹñwu k’ẹ neke du chekwu ef’arẹ akwọra unyi:
-
Mẹ neke mọla amẹñwu ku ma akọchẹ ef’ujeju abudọ tanẹ.
-
Mẹ neke gba ọhiala ka ki nyọ ñwu mẹ kwefu Baibul ku mẹ la ch’oluka oji-wñ.
-
Ichẹñwu k’ẹ n’amọma kẹkẹ, ẹ neke danlodu amẹñwu k’amọma kẹkẹ neke che oji jw.org abẹk ẹ kọ dufu.
-
Ichẹñwu k’ẹ n’amagbadufu, mẹ neke ch’oluka kwefu oji-ọla ka ki akọla lugbo amagbadufu oji jw.org.
-
Mẹ neke che dabẹnẹ kaki uwẹ kpai amọma wẹ defu abo ku ma defu ọhiala Baibul lẹ.
-
Mẹ g’ifidio ka kw’oji jw.org, ku mẹ la ch’oluka-wñ dama.
ABO KA KAKINI: “Baibul chẹ gbiti ololo ñwu amimọtọ todulẹ i neke nẹr’uma eju n.”
-
Ẹñwu ẹ ka?
ẸY’ỌLA UKỌ-I
Jihofa atene k’amata kp’iye ki na fẹdọ amọma ma, ku ma na kọ amọma ma ku ma la na dide ma. Jihofa atene k’amọma ki na b’ojima m’ata kp’iye ma ku ma la na gb’ọla ma gbọ, i la ñọ tene k’abo akwọra unyi ki na r’owñ dama.
Ẹñwu ẹ kọchẹ?
-
Abu am’ata kp’iye neke na kọ amọma ma ku ma la na dide ma?
-
Abu amọma neke b’ojima m’ata kp’iye ma?
-
Ẹñwu ch’amile ki defu ed’iko ka tanẹ ñwu arẹ akwọra unyi ef’aladi duu?
KỌCHẸ MANYU
Am’ukọ ọmẹmẹlẹ ẹñwu ẹ dukpẹ k’ẹ kọ amọma wẹ alu ku ma agba alo ku ma neke ch’ẹnẹ ẹnyọ ichẹñwu ku ma mud’ogijo?
“Am’ukọ Mẹfa (6) Ki Dukpẹ K’amọma Ki Kọchẹ” (Awake! No. 2 2019)
Kọchẹ am’ibe ogbogaga ki Baibul du ñwu abo ku ma ad’ejutẹ ata kp’iye ma ki ch’ogijo.
“Ẹñwu Baibul Ka Lugbo Ed’eju Tẹ Am’ata Kp’iye Ki Ch’ogijo?” (I dẹ jw.org )
G’ẹñwu ki ch’atẹko ata ka ki ma m’eju en’ọma n ki neke n’amọma-wñ nyọnyọ.
Kọchẹ ọna k’ata neke jẹñwu ade-wñ kpai amọma ẹnẹkẹlẹ-wñ ki lonyanẹ.
“Abu Am’ata Neke Mẹr’amọma Ma Ẹnẹkẹlẹ?” (Ọdọgọ Ide, November 1, 2011)
a Efu Baibul, “ek’onẹ ọla” che k’onẹ ki hionẹ t’ọna, ki n’onẹ le kpai ech’atẹko onẹ ki neke r‘ibe abẹki ali ẹbiẹnẹ da t’e-ọmẹmẹlẹ. E-lẹ muda ch’echọma alachi abẹki ech’o ẹbiẹnẹ n. —Ita Ita 4:1.
