UWUHRẸ AVỌ 50
Ẹvẹ Uviuwou Ra O Sai ro Wo Evawere?—Abọ avọ 2
Emọ yọ okẹ nọ u no obọ Jihova ze. Ọ gwọlọ nọ esẹgbini a rẹrote okẹ na. Yọ ọ kẹ esẹgbini emamọ ehrẹ nọ e rẹ sai fiobọhọ kẹ ai ru ere. Ọ tẹ jẹ kẹ emọ ehrẹ nọ e sai fiobọhọ kẹ ai ru epanọ evawere e rẹ rọ jọ uviuwou na.
1. Didi ohrẹ Jihova ọ kẹ esẹgbini?
Jihova ọ gwọlọ nọ esẹgbini a you emọ rai, a vẹ jẹ hae raha oke kugbe emọ na. Ọ tẹ jọ gwọlọ nọ a rẹ thọ emọ na no enwoma. A vẹ je rehọ ehrẹ Ebaibol na ro wuhrẹ ai. (Itẹ 1:8) Ọ ta kẹ esẹ nọ: “Wha gbẹ hae rehọ . . . ehrẹ Jihova rọ yọrọ [emọ rai].” (Se Ahwo Ẹfisọs 6:4.) O rẹ were Jihova nọ esẹgbini a te bi lele ehrẹ riẹ nọ a be yọrọ emọ rai na. Yọ o rẹ were iẹe re nọ a gbẹ rehọ iruo na kẹ omọfa ha.
2. Didi ohrẹ Jihova ọ kẹ emọ?
Jihova ọ ta kẹ emọ inọ: “Wha yoẹme kẹ esẹgbini rai.” (Se Ahwo Kọlọsi 3:20.) Nọ emọ a tẹ be rọ adhẹẹ kẹ esẹgbini rai je bi yoẹme kẹ ae, eva e rẹ were Jihova gbe esẹgbini na. (Itẹ 23:22-25) Jesu o fi emamọ oriruo hotọ okenọ ọ jọ ọmaha. Dede nọ ọ jọ gbagba, o je yoẹme kẹ ọsẹgboni riẹ jẹ rọ adhẹẹ kẹ ae.—Luk 2:51, 52.
3. Ẹvẹ whai uviuwou na soso wha sai ro si kẹle Ọghẹnẹ ziezi?
Otẹrọnọ whẹ yọ ọsẹ hayo oni, whọ gwọlọ nọ emọ ra a re you Jihova wọhọ epanọ who you rie na. Rekọ ẹvẹ whọ sai ro ru onana? Who re ru oware nọ Ebaibol na ọ ta inọ: “Who re fi [eme Jihova] họ udu emọ ra hrọ, jẹ ta kpahe ae okenọ wha tẹ keria evaọ uwou rai, okenọ wha tẹ be nya evaọ edhere.” (Iziewariẹ 6:7) Re a ‘fi ẹme họ udu ohwo’ u dhesẹ nọ a re dhe oware nọ a bi wuhrẹ ohwo na ẹwẹwariẹ. Ẹsejọhọ whọ riẹ nọ re emọ ra a sae kareghẹhọ oware jọ, who re dhe oware na ẹwẹwariẹ. Fikiere oware nọ oria Ebaibol nana o be ta na họ, whọ rẹ gwọlọ uvẹ nọ whọ rẹ rọ ta ẹme kẹ emọ ra kpahe Jihova kẹse kẹse. U re woma gaga re whai uviuwou na wha fi oke jọ họ nọ wha rẹ rọ gọ Ọghẹnẹ kugbe koka koka. Whọ gbẹ maki wo emọ họ, who re fi oke jọ họ nọ who re ro wuhrẹ Ebaibol na koka koka.
GBE WUHRẸ EWARE EFA
Wuhrẹ eware nọ e rẹ sai fiobọhọ ru evawere jọ uviuwou, udu u ve je te ahwo uviuwou na otọ.
4. Rọ edhere oyoyou wuhrẹ emọ ra
Re a wuhrẹ ọmọ okolo iruo ho. Ẹvẹ Ebaibol na ọ sai ro fiobọhọ? Se Jemis 1:19, 20, kẹsena wha vẹ ta ẹme kpahe enọ nana:
-
Nọ esẹgbini a tẹ be ta ẹme kẹ emọ rai, ẹvẹ a sai ro dhesẹ uyoyou?
-
Fikieme u gbe fo ho re ọsẹ hayo oni ọ whọku emọ riẹ evaọ okenọ eva e be dhae? a
5. Thọ emọ ra
Re whọ thọ hayo sẹro emọ ra, u wuzou gaga re who lele ai omomọvo ta ẹme kpahe owezẹ ọzae-avọ-aye. Oma o sae vuọ ahwo jọ re a ru onana. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Fikieme o rẹ rọ jọ bẹbẹ kẹ esẹgbini jọ re a ta ẹme kẹ emọ rai kpahe owezẹ ọzae-avọ-aye?
-
Oghẹrẹ vẹ esẹgbini jọ a rọ ta ẹme kẹ emọ rai kpahe owezẹ ọzae-avọ-aye no?
Wọhọ epanọ Ebaibol na ọ ta, akpọ Setan o bi dhe eyeyoma. Se 2 Timoti 3:1, 13, kẹsena wha vẹ ta ẹme kpahe onọ nana:
-
Ahwo omuomu jọ nọ a fodẹ evaọ owọ avọ 13 na a rẹ gba emaha họ lele wezẹ. Nọ o rrọ ere na, fikieme u ro wuzou re esẹgbini a wuhrẹ emọ rai kpahe owezẹ ọzae-avọ-aye gbe oghẹrẹ nọ a sae rọ thọ omarai no obọ ekpehre ahwo yena?
Kọ whọ riẹ?
Isẹri Jihova a kere ebe je ru ividio sa-sa no nọ i re fiobọhọ kẹ esẹgbini wuhrẹ emọ rai kpahe owezẹ ọzae-avọ-aye jẹ thọ ae no obọ ekpehre ahwo. Wọhọ oriruo, rri:
-
Thọ Emọ Ra (ividio)
-
“Epanọ Whọ Sai ro Wuhrẹ Ọmọ Ra Kpahe Owezẹ Ọzae-avọ-Aye” (Awake! Ọrọ avọ 5 2016)
6. Kẹ ọsẹgboni ra adhẹẹ
Emaha gbe izoge a rẹ sae rọ adhẹẹ kẹ esẹgbini rai evaọ oghẹrẹ nọ a rẹ rọ ta ẹme kẹ ae. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Fikieme u ro woma re ọmọ ọ ta ẹme kẹ ọsẹgboni riẹ avọ adhẹẹ?
-
Ẹvẹ ọmọ ọ rẹ rọ ta ẹme kẹ ọsẹgboni riẹ evaọ edhere nọ u re dhesẹ nọ ọ be rọ ọghọ kẹ ae?
Se Itẹ 1:8, kẹsena wha vẹ ta ẹme kpahe onọ nana:
-
Ẹvẹ u fo nọ ọmọ o re ru nọ ọsẹgboni riẹ a tẹ kẹe ohrẹ?
7. Whai uviuwou na soso wha gọ Jihova kugbe
Iviuwou Isẹri Jihova a re fi ugogo oke jọ họ nọ a rẹ rọ gọ Ọghẹnẹ kugbe koka koka. Ẹvẹ a rẹ sai ru egagọ uviuwou na? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Ẹvẹ uviuwou o sai ro wo omaa nọ a re ro ru egagọ uviuwou kẹse kẹse?
-
Eme ọsẹ hayo oni a re ru re egagọ uviuwou rai o were, a ve je wuhrẹ oware jọ noi ze?—Rri uwoho nọ o rrọ emuhọ uwuhrẹ nana.
-
Eme o sai ru ei jọ bẹbẹ re wha kuomagbe wuhrẹ Ebaibol na?
Evaọ Izrẹl oke anwae, Jihova ọ gwọlọ nọ iviuwou a rẹ ta ẹme kpahe Ikereakere na kẹse kẹse. Se Iziewariẹ 6:6, 7, kẹsena wha vẹ ta ẹme kpahe onọ nana:
-
Ẹvẹ whọ sai ro ru oware nọ oria Ebaibol nana o ta na?
Eware nọ a rẹ sai ru evaọ egagọ uviuwou:
-
Wha ruẹrẹ oma kpahe kẹ iwuhrẹ ukoko.
-
Wha se iku Ebaibol jọ nọ e te were uviuwou ra jẹ ta ẹme kpahe iẹe kugbe.
-
Who te wo emọ, danlodu hayo printi ifoto jọ evaọ oria emọ nọ o rrọ jw.org na.
-
Who te wo izoge, rehọ uzoẹme izoge jọ evaọ jw.org ru ewuhrẹ na.
-
Wha rọ iku Ebaibol jọ ru edrama.
-
Wha rri ividio jọ evaọ jw.org jẹ ta ẹme kpahe iẹe kugbe.
AHWO JỌ A RẸ TA NỌ: “Ebaibol na ọ ga hrọ kẹ emaha.”
-
Eme whọ te ta kẹ ae?
EME WHO WUHRẸ NO?
Jihova ọ gwọlọ nọ esẹgbini a you emọ rai, a wuhrẹ ae, jẹ thọ ae. Emọ a rẹ rọ adhẹẹ kẹ esẹgbini rai je yoẹme kẹ ae. Uviuwou na soso a ve je ru egagọ uviuwou kugbe.
Ọkiẹkpemu
-
Ẹvẹ esẹgbini a sai ro wuhrẹ emọ rai jẹ thọ ae?
-
Ẹvẹ emọ a sai ro dhesẹ nọ a be rọ ọghọ kẹ esẹgbini rai?
-
Irere vẹ i re noi ze nọ uviuwou u te wo oke nọ a re ro ru egagọ uviuwou koka koka?
KIẸ KPAHE EFA
Eware vẹ e sai fiobọhọ kẹ ọmọ ra riẹ ru nọ ọ be kpako na?
“Eware Ezeza nọ U Fo nọ Emọ A re Wuhrẹ” (Awake! Ọrọ avọ 2 2019)
Se kpahe obọdẹ ehrẹ nọ Ebaibol na ọ kẹ enọ e be rẹrote esẹgbini rai nọ e kpako no.
“Eme Ebaibol na Ọ Ta Kpahe Ẹruorote Esẹgbini nọ E Kpako No?” (Uzoẹme nọ o rrọ itanẹte)
Rri epanọ ọzae jọ nọ ọ riẹ epanọ a rẹ yọrọ emọ họ ọ sae rọ yọrọ emọ riẹ ziezi.
Se kpahe oware nọ esẹ a re ru re usu rai avọ emezae rai o sae jọ kpekpekpe.
“Ẹvẹ Esẹ E Sai ro Wo Usu Okpekpe Kugbe Emezae Rai?” (Uwou-Eroro Na, Ọvo 1, 2012)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
