LESN 50
Wa Yu Fi Du Fi Av Wan Api Fambili Laif?—Paat 2
Pikni a wan prezent fram Jeuova. Jeuova waahn di mada an faada dem fi mek shuor se dem a tek kier a da prezent de we im gi dem. So im tel di mada an faada dem wa dem fi du so dat dem kyan du dis. Bot a no onggl di mada an faada dem im tel wa fi du. Jeuova mek di pikni dem nuo wa dem fi du tu fi mek dem fambili api.
1. Wa Jeuova se di mada an faada dem fi du?
Jeuova waahn di mada an faada dem fi lov dem pikni dem an fi du dem bes fi spen wol iip a taim wid dem. Im waahn di mada an faada dem fi du evriting we dem kyan du fi kip dem pikni dem sief fram tingz we kyan ort dem. An im waahn dem fi yuuz di sitn dem we dem lorn fram di Baibl fi gruo dem pikni dem. (Pravorbz 1:8) Jeuova tel di faada dem se dem fi “tiich [dem pikni] dem fi liv di wie ou di Laad waahn dem fi liv.” (Riid Ifiijan 6:4.) A di mada an faada dem Jeuova waahn fi gruo dem pikni dem, an im waahn dem fi du wa im se dem fi du. Wen dem du dat, it mek Jeuova api.
2. Wa Jeuova se di pikni dem fi du?
Jeuova tel di pikni dem se: “Unu fi ier wa unu mada an faada se unu fi du.” (Riid Koloshan 3:20.) Wen di pikni dem du wa dem mada an faada se dem fi du, an shuo se dem av nof rispek fi dem, it no onggl mek dem mada an faada api, it mek Jeuova api tu. (Pravorbz 23:22-25) Wen Jiizas did a wan likl bwai, iivn duo im did porfek, im did du wa im mada an faada se im fi du an im did shuo se im av nof rispek fi dem tu.—Luuk 2:51, 52.
3. Wa yu fi du fi mek yu fambili get kluos wid Gad?
Ef yu a wan mada ar wan faada, wi nuo se yu waahn yu pikni dem fi lov Jeuova jos laik ou yu lov im. Ef yu du wa di Baibl se iina Dyuutaranami 6:7, it kyan elp yu fi du dat. It se: ‘Yu fi mek shuor se yu no tap tiich yu pikni dem dem sitn ya, an yu fi taak bout dem sitn ya wen yu sidong iina yu ous, an wen yu waak pan di ruod.’ Yu nuo se ef yu waahn yu pikni dem fi memba sitn, yu afi tel dem uova an uova agen. So da skripcha ya mek wi si se evri chaans we yu get, yu fi yuuz it fi taak tu yu pikni dem bout Jeuova. Pan tap a dat, it wuda gud ef yu av wan taim evri wiik wen di wol a unu du unu fambili Baibl stodi tugeda. Iivn ef yu na’av no pikni, it a-go elp yu ef evri wiik yu mek som taim fi stodi Gad Wod.
LORN SOM MUO
Luk pan som sitn we yu kyan du so dat evribadi iina yu fambili kyan fiil api an aarait.
4. Wen yu a gruo yu pikni dem, dwi’it iina wan wie we shuo se yu lov dem
It aad fi gruo pikni, no chuu? A ou di Baibl kyan elp wi? Riid Jiemz 1:19, 20, an den wi a-go taak bout dem kwestiyan ya:
-
Wen di mada an faada dem a taak tu dem pikni, ou dem kyan shuo se dem lov dem wen dem a dwi’it?
-
Wen sitn apm we mek wan mada ar wan faada afi chrietn out dem pikni dem, wa mek dem no fi dwi’it wen dem beks? a
5. Protek yu pikni dem
Ef yu waahn fi protek yu pikni dem fram tingz we kyan ort dem, yu no fi fried fi taak tu dem bout seks. Wi nuo se dis a no wan iizi ting fi taak bout. Plie di VIDIYO, an den wi a-go taak bout di neks kwestiyan dem.
-
Wa mek it aad fi som a di mada an faada dem taak tu dem pikni dem bout seks?
-
Wa som a di mada an faada dem did du so dat dem kuda taak tu dem pikni dem bout seks?
Di Baibl did mek wi nuo se iina dem taim ya, da worl ya we Sietan a kanchuol wuda get wikida an wikida. Riid 2 Timoti 3:1, 13, an den wi a-go taak bout da kwestiyan ya:
-
Som a di wikid piipl dem we it taak bout iina vors 13 moles di likl pikni dem. So den, wa mek di mada an faada dem fi mek shuor se dem taak tu dem pikni dem bout seks an ou fi protek demself fram piipl we mait-a waahn fi moles dem?
Yu did nuo se?
Di Jeuova Witnis dem mek buk, vidiyo an wol iip a ada tingz we di mada an faada dem kyan yuuz fi tiich dem pikni dem bout seks an ou fi protek demself fram piipl uu mait-a waahn fi moles dem. Si som a dem ya:
-
Protek Yu Pikni Dem (vidiyo)
-
Lorn Fram Di Bes Tiicha We Eva Liv Pan Di Ort, chapta 10 an 32
-
““Som Tingz We Kyan Elp Yu Fi Taak Tu Yu Pikni Dem Bout Seks” (Wiek Op! No. 5 2016)
6. Yu fi rispek yu mada an yu faada
Unu we a pikni an tiinieja, di wie ou unu taak tu unu mada an unu faada wi shuo ef unu rispek dem. Plie di VIDIYO, an den wi a-go taak bout di neks kwestiyan dem.
-
Wa mek it gud fi wan yong sumadi tek di taim fi taak tu dem mada an dem faada?
-
Wen dem a taak tu dem mada an faada, ou dem kyan dwi’it iina wan wie we shuo se dem rispek dem?
Riid Pravorbz 1:8, an den wi a-go taak bout da kwestiyan ya:
-
Wen wan yong sumadi mada ar faada tel im wa fi du, ou im fi fiil bout dat?
7. Yu fambili fi worship Jeuova tugeda
Di Jeuova Witnis dem av wan taim we dem pik evri wiik fi dem an dem fambili stodi di Baibl tugeda. Wa a som a di sitn dem we dem kyan du wen dem a du dem fambili Baibl stodi? Plie di VIDIYO, an den wi a-go taak bout di neks kwestiyan dem.
-
Wa wan fambili kyan du fi mek shuor se dem aalwiez a kip dem fambili Baibl stodi?
-
Wen dem a du dem fambili Baibl stodi, wa di mada an faada dem kyan du fi mek shuor se dem du tingz we a-go elp dem fambili an it no dedi dedi?—Luk pan di fos picha iina da lesn ya.
-
Wa a som a di sitn dem we kyan mek it aad fi yu du yu fambili Baibl stodi?
Bak iina di taim wen di Baibl did a rait, Jeuova did tel di Izrelait dem se dem fi aalwiez mek taim fi dem an dem fambili taak bout Gad Wod. Riid Dyuutaranami 6:6, 7, an den wi a-go taak bout da kwestiyan ya:
-
Ou yu kyan du wa da skripcha ya se?
Tingz we yu kyan du fi yu fambili Baibl stodi:
-
Stodi di sitn dem we unu a-go du iina di miitn dem tugeda.
-
Riid wan paat iina di Baibl we yu fambili wuda laik an taak bout it.
-
Ef yu av likl pikni, yu kyan dongluod ar print wan a di sitn dem fi pikni we de pan jw.org.
-
Ef yu pikni dem a tiinieja, unu kyan taak bout wan a di sitn dem we dem rait fi dem pan jw.org.
-
Yu an yu pikni dem kyan jres op laik di piipl dem iina wan a di tuori dem we de iina di Baibl an ak out wa dem did du.
-
Unu kyan wach wan a di vidiyo dem we de pan jw.org an taak bout it.
SUMADI MAIT-A SE: “Di Baibl tuu aad fi di pikni dem andastan yaa man.”
-
Wa yu wuda ansa dem an se?
DIS A WA YU FI MEMBA
Jeuova waahn di mada an faada dem fi lov dem pikni dem, gruo dem gud an protek dem. Im waahn di pikni dem fi du wa dem mada an faada se an dem fi av nof rispek fi dem tu. An im waahn aal a dem fi worship im tugeda.
Wa yu did lorn iina da lesn ya?
-
Wa di mada an faada dem fi du fi gruo dem pikni dem gud an fi protek dem fram tingz we kyan ort dem?
-
Ou di pikni dem kyan shuo se dem av nof rispek fi dem mada an faada?
-
Wen wan fambili mek taim evri wiik so dat dem kyan stodi di Baibl tugeda, ou dat kyan elp dem?
CHEK OUT SOM MUO SITN
Wa a som tingz we yu pikni dem niid fi nuo so dat wen dem get big dem kyan diil wid di prablem dem iina laif?
“Siks Tingz We Yu Pikni Dem Niid Fi Lorn” (Wiek Op! No. 2 2019)
Lorn bout som tingz we di Baibl se we kyan elp di wan dem we a tek kier a dem mada an faada wen dem get uol.
Luk pan wa elp wan man we neehn nuo notn bout ou fi gruo pikni fi ton wan gud gud faada.
A Jeuova Elp Wi Fi Nuo Wa Fi Du Wen Wi Did A Gruo Wi Pikni Dem (5:58)
Luk pan som tingz we di faada dem kyan du so dat dem an dem bwai pikni dem kyan kluos kluos.
a Azkaadn tu wa wi lorn fram di Baibl fi chrietn out riili miin fi karek ar fi tiich. It no miin fi biit op biit op, bata bruuz ar fi se ar du tingz we a-go ort sumadi.—Ifiijan 6:4.
