ĨSOMO YA 50
Mũsyĩ Waku Ũtonya Kwĩthĩwa na Ũtanu Ata?—Kĩlungu kya 2
Syana nĩ mũthĩnzĩo kuma kwa Yeova. Na endaa asyai masũvĩe mũthĩnzĩo ũsu nesa. Yeova nũnengete asyai motao maseo matonya kũmatetheesya meanĩsye kĩanda kĩu. O na ĩngĩ ũtao ũsu no ũtetheesye syana kwĩanĩsya kĩanda kyoo nĩ kana mũsyĩ wĩthĩwe na ũtanu.
1. Nĩ ũtao wĩva Yeova ũnengete asyai?
Yeova endaa asyai mende syana syoo, na maitũmĩa ĩvinda yingĩ vamwe nasyo ũndũ vatonyeka. O na ĩngĩ nĩwendaa asyai masũvĩane syana syoo na mĩisyo, na maitũmĩa myolooto ya Mbivilia kũimanyĩsya. (Nthimo 1:8) Atavĩtye aa-ĩthe atĩĩ: “Endeeai kũiea . . . kwosana na ũndũ Yeova waĩtye.” (Soma Aeveso 6:4.) Yeova nũtanaa yĩla asyai maatĩĩa ũtao wake yĩla mekũea syana vandũ va kũnenga mũndũ ũngĩ kĩanda kĩu.
2. Nĩ ũtao wĩva Yeova ũnengete syana?
Yeova atavĩtye syana atĩĩ: “Mewʼei asyai menyu.” (Soma Akolosai 3:20.) Yĩla syana syeewʼa asyai moo na syamanenga ndaĩa, nimatanĩthasya, o nake Yeova nũtanaa. (Nthimo 23:22-25) Yesũ nĩwaiie ngelekanyʼo nzeo yĩla waĩ mũnini. O na kau ndaĩ na naĩ, nĩweewʼaa asyai make na nĩwamanengete ndaĩa.—Luka 2:51, 52.
3. Mũtonya kũmũthengeea Ngai mũnango ata mwĩ vamwe ta mũsyĩ?
Ethĩwa wĩ mũsyai, vai nzika kana wĩenda syana syaku imwende Yeova o tondũ ũmwendete. Ĩndĩ ũtonya kwĩanĩsya ũndũ ũsu ata? Nĩ kwa kwĩka kĩla Mbivilia yaĩtye: “Imanyĩasye syana syaku na kĩthingʼĩĩsyo, na ineenae ndeto isu yĩla ũilyĩ nyũmbanĩ yaku, na yĩla ũendaa nzĩanĩ.” (Kũtũngĩlĩlwa Kwa Mĩao 6:7) Kwoou, no nginya ũtũngĩlĩĩlae ũndũ mũna ĩngĩ na ĩngĩ yĩla ũũmanyĩsya syana syaku nĩ kana iũlilikane. Ĩandĩko yĩĩ yĩonanyʼa kana kĩla ĩvinda nĩwaĩle kũmanthaa myanya ya kũneena na syana syaku ĩũlũ wa Yeova. Nĩ ũndũ wa vata kĩla kyumwa mũkethĩawa na ĩvinda ya kwĩkaa ũthaithi wa mũsyĩ mwĩ inywonthe. O na ethĩwa mũi na syana, nĩ ũseo mũkethĩawa na ĩvinda ya kwĩmanyĩasya Ndeto ya Ngai kĩla kyumwa na mũkatetheka mũno.
ĨMANYĨSYE MŨNANGO
Ĩmanyĩsye wone maũndũ amwe matonya kũtetheesya mũsyĩ wĩthĩwe na ũtanu, na onthe mayĩwʼa me asũvĩĩku.
4. Manyĩsya syana syaku wĩ na wendo
No vethĩwe vate laisi kũmanyĩsya kana. Kwoou Mbivilia ĩtonya kũtethya ata? Somai Yakovo 1:19, 20, na ĩndĩ mũineenea makũlyo aa:
-
Asyai matonya kwonanyʼa wendo ata yĩla mekũea ngewa na syana syoo?
-
Nĩkĩ mũsyai ũtaĩlĩte kũnenga kana ũkanyʼo yĩla ũthatĩte? a
5. Sũvĩa syana syaku
Nĩ kana ũsũvĩe syana syaku, nĩ ũndũ wa vata mũno ũneene na kĩla kana ke koka ĩũlũ wa kũmanyana kĩ-mwĩĩ. Nũtonya kwĩwʼa ũsu wĩ ũndũ ũte laisi. Ĩloelei VITIO, na ĩndĩ mũineenea makũlyo aa maatĩĩe:
-
Nĩkĩ wĩthĩawa wĩ ũndũ ũte laisi kwa asyai amwe kũneena na syana syoo ĩũlũ wa kũmanyana kĩ-mwĩĩ?
-
Asyai amwe matũmĩĩte nzĩa syĩva kũelesya syana syoo ĩũlũ wa ũndũ ũsu?
O tondũ wathani wonanĩtye, nthĩ ĩno ya Satani ĩendeee kũthũkĩĩa. Somai 2 Timotheo 3:1, 13, na ĩndĩ mũineenea ĩkũlyo yĩĩ:
-
Andũ amwe athũku ala mawetetwe mũsoanĩ wa 13 nĩmatũmĩaa syana naĩ maũndũnĩ ma kũmanyana kĩ-mwĩĩ. Kwoou, nĩkĩ ne ũndũ wa vata asyai kũmanyĩsya syana syoo ĩũlũ wa kũmanyana kĩ-mwĩĩ, na ũndũ itonya kwĩsũvĩana na andũ ta asu?
We nĩwĩsĩ?
Ngũsĩ sya Yeova nĩsyumĩthĩtye ũvoo mwingĩ ũtonya kũtetheesya asyai kũmanyĩsya syana syoo ĩũlũ wa kũmanyana kĩ-mwĩĩ, na mayĩisũvĩana na ala matonya kũsyĩka naĩ maũndũnĩ ta asu. Kwa ngelekanyʼo, sisya:
6. Nenga asyai maku ndaĩa
Syana na andũ ma mũika no monanyʼe kana nĩmanengete asyai moo ndaĩa kwosana na ũndũ meũmaneenyʼa. Ĩloelei VITIO, na ĩndĩ mũineenea makũlyo ala maatĩĩe.
-
Nĩkĩ syana na andũ ma mũika maĩle kũneenasya asyai moo me na ndaĩa?
-
Mũndũ wa mũika atonya kũneena na asyai make kwa nzĩa yĩva ĩkwonanyʼa kana nũmanengete ndaĩa?
Somai Nthimo 1:8, na ĩndĩ mũineenea ĩkũlyo yĩĩ:
-
Mũndũ wa mũika aĩle kwĩka ata yĩla asyai make mamũtavya kĩla waĩle kwĩka?
7. Mũthaithei Yeova mwĩ vamwe ta mũsyĩ
Mĩsyĩ ya Ngũsĩ sya Yeova nĩyĩthĩawa na ĩvinda kĩla kyumwa ya kwĩmanyĩsya Mbivilia me vamwe. Yo mwaĩlĩte kwĩka ata yĩla mũkwĩka ũthaithi wa mũsyĩ? Ĩloelei VITIO, na ĩndĩ mũineenea makũlyo aa maatĩĩe:
-
Andũ ma mũsyĩ matonya kwĩka ata nĩ kana kĩla kyumwa methĩawe na ũthaithi wa mũsyĩ mateũtĩĩa?
-
Mũsyai atonya kwĩka ata nĩ kana ũthaithi woo wa mũsyĩ wĩthĩwe wĩ wa kwendeesya?—Sisya visa wa mbee ĩsomonĩ yĩĩ.
-
Nĩ kyaũ kĩtonya kũtuma vethĩwa vate laisi andũ ma mũsyĩ kwĩmanyĩsya me vamwe?
Ĩvindanĩ ya Aisilaeli, Yeova endaa andũ ma mũsyĩ maneeneae Maandĩko me vamwe mateũtĩĩa. Somai Kũtũngĩlĩlwa Kwa Mĩao 6:6, 7, na ĩndĩ mũineenea ĩkũlyo yĩĩ:
-
Ũtonya kũatĩĩa mwolooto ũũ ata?
Maũndũ mũtonya kwĩka ũthaithinĩ wa mũsyĩ:
-
Ũmbanyʼai maũmbano ma kĩkundi.
-
Somai na mũineenea ngewa yĩ Mbivilianĩ mũtonya kũtanĩa.
-
Ethĩwa wĩ na syana nini, umya kana ũtumbĩthye ũvoo ũkonetye syana, nthĩnĩ wa jw.org/kam.
-
Ethĩwa wĩ na syana sya mũika, neeneai ũvoo ũkonetye amũika nthĩnĩ wa jw.org/kam.
-
Thaũkai ngewa yĩ Mbivilianĩ mwĩ na syana syenyu.
-
Ĩloelei na mũineenea vitio yĩ nthĩnĩ wa jw.org.
ANDŨ AMWE MAASYA: “Syana iyĩsa kũelewa nĩ ũvoo ũla wĩ Mbivilianĩ, yĩ vinya kũeleeka.”
-
We ũtonya kwasya ata?
KĨLA TWEEMANYĨSYA
Yeova endaa asyai mende, mamanyĩsye, na maisũvĩa syana syoo. Nasyo syana nĩsyaĩle kũnenga asyai moo ndaĩa na iimewʼa. O na endaa andũ ma mũsyĩ mamũthaithe me vamwe.
Makũlyo ma Kũsyokeleela
-
Asyai matonya kũmanyĩsya na kũsũvĩa syana syoo ata?
-
Syana itonya kwonanyʼa ata kana ninengete asyai masyo ndaĩa?
-
Andũ ma mũsyĩ makatetheka ata ethĩwa makamanthaa ĩvinda kĩla kyumwa nĩ kana meke ũthaithi wa mũsyĩ me vamwe?
MAŨNDŨ ANGĨ MA KWĨMANYĨSYA
Nĩ maũndũ ta meva matonya kũtetheesya kana kaku yĩla kakilye kũtwʼĩka mũndũ mũima?
“Masomo Thanthatũ Syana Syaĩle Kwĩmanyĩsya” (Amkeni! Na. 2 2019)
Soma ĩũlũ wa motao Mbivilia ĩnengete ala masũvĩaa asyai moo akũũ.
“Mbivilia Yaasya Ata Ĩũlũ wa Kũsũvĩa Asyai Makũa?” (Ũvoo wĩ kĩsesenĩ)
Ĩloele vitio wone ũndũ mũndũũme ũmwe ũteesĩ ũndũ ũtonya kũea syana wesie kũtwʼĩka ĩthe mũseo.
Soma wone ũndũ aa-ĩthe matonya kũlũlũmĩĩlya ngwatanĩo yoo vamwe na imwana syoo.
a Mbivilianĩ, kũkanyʼa kũkonanĩtye na kũmanyĩsya, kũtongoesya, na kũtetheesya mwana avĩndũe mosũanĩo kana mwĩkalĩle mũthũku. Ĩndĩ kũyonanasya kũkaũmĩsya kana kũkeka maũndũ ma ũngʼendu.—Nthimo 15:5.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
