LIÇÃO 50
Família ũ hãn ri ken kỹ jagnẽ mỹ sigsér nỹtĩnh mũ? — Vẽnh kãpóv 2
Jeová vỹ ẽg mỹ krẽ ag vin tĩ, tag tỹ tỹ há tãvĩ nĩ. Ti tỹ panh ag kar mỹnh fag tỹ fag krẽ ki rĩr há han ve sór tĩ. Jeová vỹ mỹnh fag kar panh ag mỹ vẽnh jyvẽn há ag vin tĩ, ag tỹ ge han jé. Topẽ vẽnh jyvẽn há ag tỹ krẽ ag ajũna ke tĩ gé, krẽ ag vỹ mũ há han jé, kar ag família mỹ sigsér nỹtĩ jé.
1. Jeová ne kãmén tĩ, mỹnh fag kar panh ag mỹ?
Jeová tỹ mỹnh fag kar panh ag tỹ fag krẽ ag to há nỹtĩ kar fag tỹ jagnẽ mré hã nỹtĩ ve sór tĩ. Ti tỹ mỹnh fag kar panh ag tỹ fag krẽ jy nĩgãn tĩ ve sór tĩ gé, kar ag tỹ fag krẽ kanhrãnrãn tĩ, Topẽ Vĩ Rá vẽnh jyvẽn há ag tỹ. (Provérbios 1:8) Ti tỹ ke tĩ panh ag mỹ: ‘Ãjag krẽ jyvẽn nĩ, ag mỹ Jeová jykre kãmén nĩ, ag tỹ mĩ mũn jé.’ (Éfeso 6:4 le kem nĩ.) Mỹnh fag kar panh ag tỹ tag han kỹ, Jeová vỹ mỹ sér tĩ. Mỹnh fag kar panh ag tãvĩn tỹ krẽ ag jẽꞌỹnꞌỹn kỹ, ti tỹ mỹ sér tĩ gé.
2. Jeová ne kãmén tĩ, krẽ ag mỹ?
Jeová vỹ kãmén tĩ, krẽ ag mỹ: “ãjag han mũ fag vĩ jẽmẽm nĩ.” (Colossos 3:20 le kem nĩ.) Krẽ ag vỹ ag mỹnh fag kar panh ag jẽmẽ há han kỹ, Jeová tỹ mỹ sér tĩ. Kar ag mỹnh fag kar panh ag tỹ mỹ sér tĩ gé. (Provérbios 23:22-25) Jesus gĩr nĩn kã, ti tỹ há nĩ vã. Ti pi ti ki nén ũ kórég nĩ vã. Ge ra, ti tỹ ti mỹnh kar ti panh jẽmẽ há tĩ vã. — Lucas 2:51, 52.
3. Hã ri ken kỹ família Topẽ rã hã nỹtĩnh mũ?
à tỹ krẽ ag nĩn kỹ, ã tỹ ag tỹ Jeová to há tĩ ve sór tĩ. à hã ri ken kỹ tag han ke mũ? Topẽ Vĩ Rá vỹ ke tĩ: “Tỹ ãjag krẽ kanhrãn nĩ. Vẽnh jykre tag tóm nĩ, ãjag ĩn krẽm, ãjag tỹ hẽ mĩ mũ tá ke gé.” (Deuteronômio 6:7) Hẽn ri ke mũn, ã tỹ ki kanhrãn nĩ, ã tỹ ã krẽ ag mỹ nén ũ ki kanhrãn kỹ, ã tỹ ti mỹ tó e han ke nĩ. Kỹ vẽnh rá tag tỹ ã mỹ ven tĩ, ã tỹ Jeová to kãmén mãn ke nĩ, ã krẽ ag mỹ. à tỹ tag han jé, semỹnỹ kar ki, kurã ũ kãmĩ óra kuprẽg nĩ, ã kar ã família mré, Topẽ jykre to jykrén mũ han jé. à tỹ krẽ ag tũ nĩn kỹ, ge ra ã tỹ óra ũ kuprẽg kỹ, ã tỹ Bíblia to kanhrãn jé semỹnỹ kar ki, tag vỹ ã mỹ há han ke mũ.
VẼNH KANHRÃN KÃFÓR NĨ
Ha vé vẽnh jyvãn há ag tỹ família kar ajũna ke tĩ, família tỹ mỹ sigsér kar vẽnh ki rĩr há han nỹtĩ jé.
4. Ã tỹ nén ũ to ã krẽ ag kanhrãn mũ, ã tỹ ag to há ven mũ
Kejẽn ẽg mỹ jagy nĩ, ẽg tỹ nén ũ há ag to krẽ ag kanhrãnrãn jé. Topẽ Vĩ Rá hã ri ken kỹ ã ajũna kenh ke mũ? Tiago 1:19, 20 le kem nĩ. Kar jagnẽ mré vẽmén nĩ, nén ũ tag ag to:
-
Panh ag kar mỹnh fag ag krẽ ag jagnẽ mré vẽmén kỹ, fag hã ren kỹ fag krẽ to há ven tĩ?
-
Mỹ ne tugrĩn, panh kar mỹnh fag ag kósin jyvẽn ke tũ nĩ, ag tỹ jũn kỹ nỹtĩ ra? a — Ha vé vẽnh rá sĩ ti.
5. Ã krẽ ag jy nĩgãn nĩm nĩ
Kejẽn, ã tỹ mỹꞌã nĩ, ã tỹ ã krẽ ag mỹ ũn tỹ jagnẽ mré nỹ nỹ ja to kãmén jé, hã ra ã tỹ tag han kỹ, ã tỹ ã krẽ ag jy nĩgãn tĩ. Ha vé VÍDEO ti. Kar jagnẽ mré vẽmén nĩ, nén ũ tag ag to:
-
Panh ũ ag kar mỹnh ũ fag mỹ jagy nĩ, fag tỹ fag krẽ mỹ ũn tỹ jagnẽ mré nỹ kỹ to kãmén nĩ jé. Mỹ ne tugnĩn?
-
Panh ũ ag kar mỹnh ũ fag hã ren kỹ fag krẽ mỹ ũn tỹ jagnẽ mré nỹ nỹ ja to kãmén tĩ?
Topẽ Vĩ Rá vỹ tó ja, ũri ũn ag vỹ ũn jykre pãno nỹtĩ. 2 Timóteo 3:1, 13 le kem nĩ. Kar jagnẽ mré vẽmén nĩ, tag to:
-
Nũmro 13 sĩ ti vỹ ẽg mỹ kãmén tĩ, ũn vẽjykre pãno ag to, ki kanhró ẽg tỹ nỹtĩ ag kãmĩ ũn ag tỹ gĩr mré nỹ nỹ ja, ag tỹ ag vóg kónãn jé. Kỹ, ne tugnĩn tỹ nén ũ há tãvĩ nĩ, panh ag kar mỹnh fag tỹ fag krẽ ag mỹ ũn tỹ jagnẽ mré nỹ nỹ ja to kãmén kỹ, kar ag krẽ kanhrãnrãn kỹ, ag tỹ gĩr vóg kónãn jafã to jy nĩgãn jé?
à mỹ ki kanhró nĩ?
Jeová Kãmén Fã ag vỹ vẽnh rá ag, vídeo ag kar áudio ag nỹtĩ, ag tỹ panh ag kar mỹnh fag ajũna ke tĩ, fag tỹ fag krẽ ag mré vẽmén jé, ũn tỹ jagnẽ mré nỹ kỹ to, kar fag tỹ ag kanhrãnrãn jé, ag tỹ jy nĩgãn tĩ, gĩr vóg kónãn jafã to. Ha vé nén ũ ag ti:
-
à krẽ ag jy nĩgãn nĩ (vídeo)
-
“Ã ne han ke mũ ti, ã tỹ ã krẽ ag mré vẽmén jé, ũn tỹ jagnẽ mré nỹ kỹ to” (Despertai!, n.º 5 tỹ 2016)
6. Ã panh kar ã mỹnh respeita kem nĩ
Ũn gĩr ag, kyrũ ag kar tytãg fag tỹ fag panh ag kar fag mỹnh fag vĩ jãmã kenh ke nỹtĩ, fag tỹ jagnẽ mré vĩn kỹ. Ha vé VÍDEO ti. Kar jagnẽ mré vẽmén nĩ, nén ũ tag ag to:
-
Ne tugnĩn kyrũ ag kar tytãg fag mỹ há nĩ, fag tỹ vãsãn kỹ, fag panh ag kar fag mỹnh fag mré vĩ jé?
-
Ũn kyrũ ag kar tytẽg fag hã ri ken kỹ fag panh kar fag mỹnh respeita ke tĩ, fag tỹ jagnẽ mré vĩn kỹ?
Provérbios 1:8 le kem nĩ. Kar jagnẽ mré vẽmén nĩ, tag to:
-
Hã ren kỹ kyrũ ti, ke tũ nĩn kỹ tytẽg fi tag han ge nĩ, ti mỹnh kar ti panh ti mỹ ke kỹ?
7. Jeová adora kem nĩ, ã família mré
Família tỹ tỹ Jeová Kãmén Fã nĩn kỹ, semỹnỹ kar mĩ, ag tỹ óra kuprẽg tĩ, ag tỹ jagnẽ mré Topẽ Vĩ Rá to kanhrãnrãn jé. Ag tỹ tag to: Família mré, Topẽ jykre to jykrén mũ, ke tĩ. Ag hã ren kỹ ge han tĩ? Ha vé VÍDEO ti. Kar jagnẽ mré vẽmén nĩ, nén ũ tag ag to:
-
Família ne han ke nĩ, ag tỹ Família mré, Topẽ jykre to jykrén mũ han jé, semỹnỹ kar mĩ?
-
Panh ag kar mỹnh fag ne han ke nỹtĩ, fag tỹ Família mré, Topẽ jykre to jykrén kỹ, vẽnh kar tỹ mỹ há nỹtĩ, kar fag krẽ ajũna ke jé? — Ha vé kãgrá vén ti, lição tag kã.
-
à hã mỹ, nén ũ ag tỹ ne ã mỹ jagy nĩ, ã tỹ Família mré, Topẽ jykre to jykrén jé?
Vãsỹ Israel povo ag kãmĩ, Jeová tỹ família ag tỹ jagnẽ mré Topẽ vĩ to vẽmén tĩ ve sór tĩ vã. Deuteronômio 6:6, 7 le kem nĩ. Kar jagnẽ mré vẽmén nĩ, tag to:
-
à ne han ke nĩ, ã tỹ vẽnh jyvẽn há tag ki króm jé?
Tag vỹ ã ajũna ke tĩ, ã tỹ Família mré, Topẽ jykre to jykrén jé:
-
Vẽnh kanhrãn vén nĩ, ã tỹ Topẽ Vĩ Rá to kanhrãn kãfór jé, vẽnhmãn ki.
-
Topẽ Vĩ Rá ki, vẽnh kãme ũ le ke tĩ, kar tag to jagnẽ mré vẽmén jé.
-
à tỹ gĩr nĩn kỹ, atividade para crianças site jw.org ki terém nĩ, ke tũ nĩn kỹ imprimi kem nĩ.
-
à tỹ krẽ ag kyrũ ke tũ nĩn kỹ tytãg nĩn kỹ, site jw.org vẽnh rá tỹ kyrũ ag kar tytãg fag jé to jagnẽ mré kãmén jé.
-
Vẽnh kãme Topẽ Vĩ Rá to kãgran nĩ, ã krẽ ag mré.
-
Site jw.org ki, vídeo vem nĩ kar ti to jagnẽ mré vẽmén nĩ.
ŨN PIPIR AG VỸ KE TĨ: “Gĩr ag mỹ jagy nĩ, ag tỹ Topẽ Vĩ Rá to kanhrãnrãn jé.”
-
à ne tónh?
à NE KANHRÃN JA TI
Jeová tỹ (1) panh ag kar mỹnh fag tỹ fag krẽ ag to há, kanhrãnrãn kar ag jy nĩgãn mũ ve sór tĩ, (2) krẽ ag tỹ ag panh ag kar ag mỹnh fag vĩ jẽmẽ há, kar ag respeita ke tĩ kar, (3) família mré Jeová adora ke tĩ gé.
Jykrinkrén mũ
-
Panh ag kar mỹnh fag hã ren kỹ fag krẽ kanhrãnrãn tĩ, kar ag jy nĩgãn tĩ?
-
Krẽ ag hã ren kỹ fag panh ag kar mỹnh fag respeita ke tĩ?
-
Ne tugnĩn ẽg mỹ há nĩ, ẽg tỹ Família mré, Topẽ jykre to jykrén kỹ, semỹnỹ kar mĩ?
VẼNH KANHRÃN KÃFÓR MŨ
Vẽnh jyvẽn há ag tỹ ne ã kósin ajũna ke tĩ, ti tỹ tỹ ũn sanh há nĩ jé?
“Vẽnh jyvẽn há ag tỹ 6 to ã kósin kanhrãn jé” (Despertai!, n.º 2 tỹ 2019)
Ha vé Topẽ Vĩ Rá ki, vẽnh jyvẽn há ag tỹ ũn ag tỹ ti panh kar ti mỹnh kófa ki rĩr tĩ ajũna ke tĩ.
“Topẽ Vĩ Rá ne kãmén tĩ, ũn tỹ ti mỹnh kar ti panh kófa ki rĩr tĩ kỹ?” (Vẽnh rá tỹ jw.org)
Ha vé, ũn tỹ ki kagtĩg nĩ vã, ti ne han ke nĩ ti, ti krẽ ag kanhrãnrãn jé. Hã ra, ti tóg vẽsỹ ũn panh há han mũ.
Ha vé ũn panh hã ren kỹ ti kósin jagnẽ mré hã kãfór ke mũ ti.
“Ũn panh hã ren kỹ ti kósin jagnẽ mré hã kãfór ke mũ?” (A Sentinela, 1.º tỹ novembro tỹ 2011)
a Vẽnh ra sĩ: Topẽ Vĩ Rá ki vẽnh vĩ tỹ “jyvẽn” ẽg mỹ kãmén tĩ, ũn tỹ ũn mỹ nén ũ kanhrãn kỹ, ũn tỹ ũn mỹ vẽnh jyvẽn há nĩm kỹ, kar ũn tỹ ũn mỹ kygnẽ ja ẽn ven tĩ kỹ. Hã ra, jyvẽn pijé tỹ panh kar mỹnh fag tỹ ag kósin vóg kónãn tĩ. — Provérbios 19:18.
