ITHOMO RĨA 50
Nĩ Kĩĩ Kĩngĩteithia Famĩlĩ Yaku Gũkorũo na Gĩkeno?—Gĩcunjĩ gĩa 2
Ciana nĩ kĩheo kuuma kũrĩ Jehova. Erĩgagĩrĩra aciari mamenyagĩrĩre kĩheo kĩu wega. Jehova nĩ aheanĩte ũtaaro mwega ũrĩa ũngĩteithia aciari gwĩka ũguo. Ũtaaro wake ningĩ nĩ wonanagia ũrĩa ciana ingĩka nĩguo iteithĩrĩrie famĩlĩ yao gũkorũo na gĩkeno.
1. Nĩ ũtaaro ũrĩkũ Jehova aheete aciari?
Jehova erĩgagĩrĩra aciari mende ciana ciao na mahũthagĩre mahinda maingĩ o ũrĩa kũngĩhoteka hamwe nacio. Ningĩ nĩ endaga aciari magitagĩre ciana ciao kuumana na maũndũ moru na mahũthagĩre motaaro ma Bibilia gũcimenyeria. (Thimo 1:8) Erĩte maithe ũũ: “Thiĩi na mbere [kũrera ciana cianyu] . . . mũgĩcitaaraga na njĩra ya Jehova.” (Thoma Aefeso 6:4.) Jehova nĩ akenaga rĩrĩa aciari marũmĩrĩra ũtongoria wake makĩrera ciana ciao na maga kwĩhokera mũndũ ũngĩ wĩra ũcio.
2. Nĩ ũtaaro ũrĩkũ Jehova aheete ciana?
Jehova erĩte ciana ũũ: “Athĩkagĩrai aciari anyu.” (Thoma Akolosai 3:20.) Rĩrĩa ciana ciathĩkĩra aciari a cio na ciamahe gĩtĩo, nĩ itũmaga Jehova akene o hamwe na aciari a cio. (Thimo 23:22-25) Jesu nĩ aaigire kĩonereria kĩega rĩrĩa aarĩ mwana. O na gũtuĩka aarĩ mũkinyanĩru, nĩ aathĩkagĩra aciari ake na akamahe gĩtĩo.—Luka 2:51, 52.
3. Nĩ kĩĩ kĩngĩmũteithia gũkuhĩrĩria Ngai mũrĩ famĩlĩ?
Angĩkorũo ũrĩ mũciari, hatarĩ nganja nĩ wendaga ciana ciaku ciende Jehova o ta ũrĩa wee ũmwendete. Hihi nĩ kĩĩ kĩngĩgũteithia kũhingia ũndũ ũcio? Nĩ kũhũthĩra ũtaaro ũyũ wa Bibilia: “No mũhaka [ũrutage ciana ciaku ciugo cia Jehova] na ũkaragia ũhoro wacio rĩrĩa ũikarĩte thĩ gwaku nyũmba na rĩrĩa ũrathiĩ na njĩra.” (Gũcokerithia Maathani 6:7) Kũringana na kohoro ka magũrũ-inĩ ka rĩandĩko rĩu, kiugo “kũruta” no gĩtaũrũo “gũcokagĩra harĩ kana gũtĩtĩrithagia harĩ.” No kũhoteke nĩ ũĩ atĩ no mũhaka ũikare ũgĩcokagĩra kaũndũ harĩ ciana ciaku nĩguo ikaririkanage. Rĩandĩko rĩu rĩronania atĩ aciari nĩ magĩrĩirũo gwethaga mĩeke ya kwaria na ciana ciao igũrũ rĩgiĩ Jehova. Nĩ ũndũ mwega kũbanga ihinda rĩa gũkoragwo na ũthathaiya wa famĩlĩ o kiumia. O na angĩkorũo mũtirĩ na ciana, nĩ mũrĩgunĩkaga mwahũthagĩra mahinda o kiumia kwĩruta Kiugo kĩa Ngai.
THUTHURIA MAKĨRIA
Reke tuone motaaro mangĩteithia andũ othe thĩinĩ wa famĩlĩ gũkorũo na gĩkeno na kũigua marĩ na ũgitĩri.
4. Menyagĩria ciana ciaku ũrĩ na wendo
No ũkorũo ũtarĩ ũndũ mũhũthũ kũmenyeria mwana. Hihi Bibilia ĩngĩteithia atĩa? Thomai Jakubu 1:19, 20, mũcoke mwarĩrĩrie ciũria ici:
-
Aciari mangĩonania wendo atĩa makĩaranĩria na ciana ciao?
-
Nĩkĩ mũciari ndagĩrĩirũo kũrũnga ciana ciake hĩndĩ ĩrĩa arĩ mũrakaru? a
5. Gitagĩra ciana ciaku
Nĩguo ũgitĩre ciana ciaku, nĩ ũndũ wa bata mũno kwaria na o mwana ũhoro wĩgiĩ ngomanio. Ũndũ ũcio no ũkorũo ũtarĩ mũhũthũ. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Nĩ kĩĩ gĩtũmaga ũkorũo ũrĩ ũndũ mũritũ harĩ aciari amwe kwaria na ciana ciao ũhoro wĩgiĩ ngomanio?
-
Aciari amwe mahũthĩrĩte njĩra ĩrĩkũ gũtaarĩria ciana ciao ũhoro wĩgiĩ ngomanio?
O ta ũrĩa kwarathĩtwo, andũ thĩinĩ wa thĩ ĩno ya Shaitani marathiĩ o na mbere kũũruha. Thomai 2 Timotheo 3:1, 13, mũcoke mwarĩrĩrie kĩũria gĩkĩ:
-
Andũ amwe aganu arĩa magwetetwo thĩinĩ wa mũhari wa 13 nĩ mekaga ciana maũndũ moru. Gũkĩrĩ ũguo-rĩ, nĩkĩ nĩ ũndũ wa bata aciari kũruta ciana ciao ũhoro wĩgiĩ ngomanio na ũrĩa ingĩĩgitĩra kuumana na andũ ta acio?
Hihi nĩ ũĩ?
Aira a Jehova nĩ marutaga indo nyingĩ cia gũteithia aciari kũruta ciana ciao ũhoro wĩgiĩ ngomanio na gũcigitĩra itigekwo maũndũ moru. Kwa ngerekano rora:
6. Heaga aciari aku gĩtĩo
Ciana na andũ ethĩ no monanie atĩ nĩ maheete aciari ao gĩtĩo kũgerera ũrĩa mamaaragĩria. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Nĩkĩ nĩ ũndũ wa bata harĩ mũndũ mwĩthĩ kwaragĩria aciari ake na njĩra ya gĩtĩo?
-
Mũndũ mwĩthĩ angĩarĩria aciari ake atĩa na njĩra ĩronania atĩ nĩ amaheete gĩtĩo?
Thomai Thimo 1:8, mũcoke mwarĩrĩrie kĩũria gĩkĩ:
-
Mũndũ mwĩthĩ agĩrĩirũo gwĩka atĩa rĩrĩa aheo ũtaaro nĩ aciari ake?
7. Thathayagiai Jehova mũrĩ famĩlĩ
Famĩlĩ cia Aira a Jehova nĩ ibangaga ihinda o kiumia rĩa gũthathaiya marĩ hamwe. Hihi nĩ maũndũ ta marĩkũ mũngĩka hĩndĩ ya ũthathaiya wa famĩlĩ? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Nĩ kĩĩ kĩngĩteithia famĩlĩ gũkoragwo na Ũthathaiya wa Famĩlĩ ũtaratĩĩrĩrio?
-
Hihi mũciari angĩka atĩa nĩguo famĩlĩ yake ĩgunĩkage na ĩgakenera ũthathaiya wao wa famĩlĩ?—Rorai mbica ĩrĩa ĩrĩ kĩambĩrĩria-inĩ kĩa ithomo rĩrĩ.
-
Nĩ maũndũ marĩkũ mangĩtũma mũritũhĩrũo kwĩruta mũrĩ hamwe?
Thĩinĩ wa Isiraeli ya tene, Jehova nĩ eerĩgagĩrĩra famĩlĩ ciaragĩrĩrie ũhoro wĩgiĩ Maandĩko kaingĩ. Thomai Gũcokerithia Maathani 6:6, 7, mũcoke mwarĩrĩrie kĩũria gĩkĩ:
-
Ũngĩhũthĩra atĩa ũtaaro ũcio?
Maũndũ mũngĩka hĩndĩ ya ũthathaiya wa famĩlĩ:
-
Kũhaarĩria mĩcemanio ya kĩũngano.
-
Gũthoma na kwarĩrĩria gĩcunjĩ kĩa Bibilia kĩrĩa famĩlĩ yaku ĩgũkenera.
-
Angĩkorũo mũrĩ na ciana nini, no mũrute kana mũcabe ũndũ ũmwe ciana ingĩka, thĩinĩ wa jw.org/ki.
-
Angĩkorũo mũrĩ na ciana irĩ mĩaka-inĩ ya ũtinĩnja, no mwarĩrĩrie gĩcunjĩ kĩmwe kĩgiĩ andũ ethĩ thĩinĩ wa jw.org/ki.
-
Gũthaaka rũgano rũmwe rwa Bibilia hamwe na ciana cianyu.
-
Kwĩrorera na kwarĩrĩria video thĩinĩ wa jw.org/ki.
ANDŨ AMWE MOIGAGA: “Bibilia nĩ nditũ mũno ciana itingĩtaũkĩrũo nĩyo.”
-
Wee ũngiuga atĩa?
ŨRĨA TWERUTA
Jehova endaga aciari mendage ciana ciao, magacimenyeria, na magacigitĩra; ciana ciathĩkagĩre aciari a cio na ikamaheaga gĩtĩo; na andũ thĩinĩ wa famĩlĩ magathathayagia Jehova marĩ hamwe.
Ciũria cia gũcokera
-
Aciari mangĩmenyeria na magitĩre ciana ciao atĩa?
-
Ciana ingĩonania atĩa atĩ nĩ iheete aciari a cio gĩtĩo?
-
Kũbanga ihinda rĩa gũthathayagia Jehova o kiumia mũrĩ famĩlĩ gũkoragwo na ũguni ũrĩkũ?
RIKĨRA
Nĩ maũndũ marĩkũ mũciari angĩruta mwana wake nĩguo amũhaarĩrie nĩ ũndũ wa hĩndĩ ĩrĩa agaatuĩka mũndũ mũgima?
Thoma wone motaaro marĩa Bibilia ĩheete arĩa marũmbũyagia aciari ao akũrũ.
“Bibilia Yugaga Atĩa Igũrũ Rĩgiĩ Kũrũmbũiya Aciari Akũrũ?” (Gĩcunjĩ thĩinĩ wa jw.org/ki)
Rora wone ũrĩa mũthuri ũmwe ũtoĩ kũrera ciana aatuĩkire mũciari mwega.
a Thĩinĩ wa Bibilia, kiugo “kũrũnga” kĩonanagia kũruta mwana, kũmũtongoria, na kũmũteithia agarũrĩre mwĩcirĩrie ũtarĩ mwega kana mĩthiĩre ĩtarĩ mĩega. Gĩtionanagia gwĩka mwana maũndũ moru kana kwaga tha.—Thimo 19:18.
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
