OSHILESHWA 50
Oshike tashi dulu okukwafela oukwaneumbo weni u kale wa hafa?— Oshitukulwa 2
Ounona ove li oshali ya dja kuJehova. Nokwa teelela ovadali va file oshisho oshali ya tya ngaho. Jehova okwa yandja omayele oo taa dulu okukwafela ovadali va dule okuninga ngaho. Omayele aye otaa dulu yo okukwafela ounona va shiive kutya oshike ve na okuninga, opo va xumife komesho ehafo moukwaneumbo.
1. Omayele elipi Jehova a pa ovadali?
Jehova okwa hala ovadali va kale ve hole ovana nokukala hava kala efimbo lihapu navo, ngaashi tashi shiiva. Okwa hala yo ovadali va amene ovana vavo koinima oyo tai dulu oku va etela oshiponga nova kale hava longifa omafinamhango Ombiibeli, eshi tave va deula. (Omayeletumbulo 1:8) Ombiibeli oya ti: ‘Ootate, tekuleni ovana veni metwokumwe newiliko laJehova.’ (Lesha Ovaefeso 6:4.) Jehova oha kala a hafa, ngeenge ovadali tava tekula ovana metwokumwe newiliko olo e va pa, ndele haku va yandja va ka tekulwe kuvamwe.
2. Omayele elipi Jehova a pa ounona?
Jehova okwa lombwela ounona a ti: “Dulikeni kovakulunhu veni.” (Lesha Ovakolossi 3:20.) Ngeenge ounona ova fimaneka nohava dulika kovakulunhu vavo, ohashi hafifa Jehova nosho yo ovadali vavo. (Omayeletumbulo 23:22-25) Jesus okwa tula po oshihopaenenwa shiwa, eshi a li okaana. Nonande okwa li omunhu a wanenena, okwa li ha dulika nokwa li a fimaneka ovadali vaye.— Lukas 2:51, 52.
3. Ongahelipi tamu dulu okweehena popepi naKalunga mu li oukwaneumbo?
Ngeenge ou li omudali, osha yela kutya owa hala ounona voye va kale ve hole Jehova, ngaashi ove u mu hole. Ongahelipi to dulu okuhanga elalakano olo? Omokutula moilonga osho Ombiibeli ya popya, eshi ya ti: “Ove u noku di findila [eendjovo daJehova] movana voye noku di tonga fimbo u li omutumba meumbo loye ile fimbo u li mondjila nongeenge to ka nangala nongeenge to penduka.” (Deuteronomion 6:7) Oshitya “okufindila” osha hala okutya okuhonga to endulula lwoikando oshinima. Luhapu, oho kala wa pumbwa okweendulula oshinima, opo ounona va dule oku shi dimbuluka. Omushangwa ou owa hala okutya owa pumbwa okukala ho kongo efimbo tali wapalele, opo u popye nounona voye kombinga yaJehova. Osha fimana yo okukala hamu kongo efimbo oshivike keshe, opo mu ninge elongelokalunga loukwaneumbo. Ngeenge ku na ounona, natango oto dulu okumona ouwa mokukala ho kongo efimbo oshivike keshe u konakone Eendjovo daKalunga paumwene.
KONAKONA MOULE
Konakona omaetepo, oo taa dulu okukwafela oukwaneumbo weni, opo u kale wa hafa nowa amenwa.
4. Deula ovana voye pahole
Haalushe hashi kala shipu okudeula ounona. Ndele ongahelipi Ombiibeli tai dulu oku ku kwafela u ninge ngaho? Lesha Jakob 1:19, 20, ndele tamu kundafana omapulo taa shikula:
-
Ongahelipi ovadali tava dulu okupopya novana vavo, tave shi ningi pahole?
-
Omolwashike omudali ehe na okuyandja outekuduliko kovana pefimbo opo a handuka? a
5. Amena ovana voye
Opo u dule okwaamena ovana voye, owa pumbwa okukala ho popi nokaana keshe kombinga yomilele. Otashi dulika shiha kale shipu okuninga ngaho. Dana OKAVIDIO, ndele tamu kundafana omapulo taa shikula.
-
Omolwashike hashi kala eshongo kovadali vamwe okupopya novana kombinga yomilele?
-
Ovadali vamwe ohava yelifile ngahelipi ovana vavo kombinga yomilele?
Ngaashi Ombiibeli ya xunganeka, ounyuni waSatana otau ende tau naipala neenghono. Lesha 2 Timoteus 3:1, 13, ndele tamu kundafana epulo tali shikula:
-
Ovanhu vamwe, ovo va popiwa movelishe 13 kutya ovakolokoshi, ohava hepeke ounona pamilele. Omolwashike sha fimana kovadali okuhonga ovana vavo kombinga yomilele nosho yo nghee tava dulu okuliamena vo vene, ngeenge va hangika kovakolokoshi ovo?
Owe shi shiiva tuu?
Eendombwedi daJehova oda nyanyangida oishangomwa ihapu, oyo tai dulu okukwafela ovadali va honge ovana vavo kombinga yomilele nonghee ve na okuliamena komahepeko opamilele. Pashihopaenenwa, tala okavidio noileshomwa tai landula:
-
Amena ounona voye (okavidio)
-
“Honga ounona voye kombinga yomilele” (Kala oupafi! No. 5 2016)
6. Fimaneka ovadali voye
Ounona nosho yo ovanyasha otava dulu okuulika kutya ova fimaneka ovadali vavo monghedi omo hava popi navo. Dana OKAVIDIO, ndele tamu kundafana omapulo taa shikula.
-
Omolwashike sha fimana kounona va kale hava popi novadali vavo nefimaneko?
-
Ongahelipi ounona tava dulu okupopya novadali vavo monghedi oyo tai ulike kutya ove va fimaneka?
Lesha Omayeletumbulo 1:8, ndele tamu kundafana epulo tali shikula:
-
Ounona ove na okulinyenga ngahelipi, ngeenge ovadali vavo tave va pe omalombwelo?
7. Longeleni Jehova mu li oukwaneumbo
Omaukwaneumbo Eendombwedi daJehova ohaa ningi elongelokalunga loukwaneumbo oshivike keshe. Mbela elongelokalunga loukwaneumbo oli na okuningwa monghedi ya tya ngahelipi? Dana OKAVIDIO, ndele tamu kundafana omapulo taa shikula.
-
Oshike tashi ka kwafela oukwaneumbo u kale hau ningi elongelokalunga loukwaneumbo pandjikilile?
-
Oshike osho ovadali tava dulu okuninga, opo elongelokalunga loukwaneumbo li kale la mwenyopala?— Tala efano pehovelo loshileshwa eshi.
-
Oshike tashi dulu okwiimba oukwaneumbo weni u kale hau konakona pamwe Ombiibeli?
MuIsrael shonale, Jehova okwa li a teelela omaukwaneumbo aeshe a kale haa kundafana Omishangwa pandjikilile. Lesha Deuteronomion 6:6, 7, ndele tamu kundafana epulo tali shikula:
-
Ongahelipi to dulu okutula moilonga efinamhango eli?
Omaetepo e na sha nelongelokalunga loukwaneumbo:
-
Lilongekidileni okwoongala.
-
Lesheni nokukundafana ehokololo lopaMbiibeli, olo oukwaneumbo weni tau dulu okuhafela.
-
Ngeenge ou na ounona vashona, tapa, ile u pilinde oinyangadalwa i na sha nounona ko jw.org.
-
Ngeenge ou na ovanyasha, oto dulu okukundafana navo shimwe shomoitukulwa i na sha novanyasha ko jw.org.
-
Otamu dulu okudana oshinyandwa sha kanghamena kehokololo lopaMbiibeli pamwe nounona voye.
-
Taleni nokukundafana okavidio konhumba ke li ko jw.org.
VAMWE OHAVA TI: “Ombiibeli oidjuu unene kounona oku i uda ko.”
-
Ove oto ti ngahelipi?
ENGONGO
Jehova okwa hala ovadali va kale ve hole ounona vavo, ve va deule noku va amena; okwa hala ounona va kale va fimaneka nokudulika kovadali vavo nokwa hala yo omaukwaneumbo a kale tae mu longele a hangana.
Eendululo
-
Ongahelipi ovadali tava dulu okudeula nokwaamena ounona vavo?
-
Ongahelipi ounona tava dulu okuulika kutya ova fimaneka ovadali vavo?
-
Ouwa ulipi tamu dulu okumona, ngeenge omwa kala hamu kongo efimbo oshivike keshe mu ninge elongelokalunga loukwaneumbo?
TALA OUYELELE WA WEDWA PO
Oilihongomwa ilipi tai dulu okukwafela ounona ve lilongekidile oukulunhu?
“Oilihongomwa ihamano oyo ounona va pumbwa okulihonga” (Kala oupafi! No. 2 2019)
Lihonga omaetepo okudja mOmbiibeli oo taa dulu okukwafela ovo tava file oshisho ovadali vavo ovanamido.
Tala nghee omulumenhu umwe, oo a li ehe shii kutya na tekule ngahelipi ounona vaye, e lihonga okukala e li xe omudali e li nawa.
Otwa hongwa kuJehova nghee tu na okutekula oukwaneumbo wetu (5:58)
Konakona nghee ooxe tava dulu okupameka ekwatafano lavo novanamati vavo.
“Oshike tashi dulu okukwafela ooxe va kale ve na ekwatafano liwa novanamati vavo?” (Oshungonangelo, Januali-Marsa 2012)
a PaMbiibeli, okuyandja “outekuduliko” osha hala okutya okuyandja omalombwelo, ewiliko nosho yo epukululo. Inashi hala nande okutya okumonifa umwe oixuna, ile okukala nonyanya.— Omayeletumbulo 4:1.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
