ILINNIAGASSAQ 50
Ilaqutariittut qanoq pilluarsinnaavisi? – Immikkoortoq 2
Meeqqat Jehovamit tunissutaapput. Jehovap kissaatigaa angajoqqaat meeqqaminnik isumaginnilluassasut. Taamaaliorsinnaaqqullugit siunnersorpai. Aamma ilaqutariit pilluarsinnaaqqullugit meeqqat susinnaanerannik siunnersuuteqarpoq.
1. Jehovap angajoqqaat qanoq siunnersorpai?
Jehovap kissaatigaa angajoqqaat meeqqatik asassagaat, piffissaqarfigilluassagaat, sernissussagaat najoqqutassiallu Biibilimeersut atorlugit ilinniartissagaat. (Ussatit 1:8) Ataataasut Biibilimi ima peqquneqarput: ‘Meeqqasi Jehovap iluarisaatut perorsarlugillu siunnersorsigit.’ (Efesossimiut 6:4 atuarsiuk). Angajoqqaat peqqussut tamanna maleruaraangassuk akisussaaffitsillu allamut isumagitinngikkaangassuk Jehova nuannaartarpoq.
2. Jehovap meeqqat qanoq siunnersorpai?
Jehovap meeqqat ima peqquai: “Angajoqqaasi sutigut tamatigut naalassigit.” (Kolossimiut 3:20 atuarsiuk). Meeqqat angajoqqaaminnut naalakkaangamik ataqqinnikkaangamillu Jehova angajoqqaatillu nuannaartittarpaat. (Ussatit 23:22-25) Jiisusi meeqqanut maligassiuivoq, naammalluinnartuullunimi angajoqqaani ataqqillugillu naalattuarpai. – Lukkarsi 2:51, 52.
3. Ilaqutariittut Guutimut qanoq qanillinerusinnaavisi?
Meeraqaruit kissaatigigunarpat nammineq asanninnittulli meeqqatit Jehovamik asannilissasut. Qanoq ikiorsinnaagitit Biibilimi ima nassuiarneqarpoq: ‘[Jehovap oqaasii] erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavillu.’ (Mosesimik 5. 6:7) Maluginiarnikuugunarpat meeqqavit ilinniartitsissutigisatit eqqaamassappatigit oqaatigeqattaartariaqarlugit. Taamatuttaaq Jehova pillugu meeqqavit ilinniartinnissaannut akulikitsumik periarfissarsiortariaqarputit. Sapaatit-akunneri tamaasa ilaqutariittut Biibilimik misissueqqissaaqatigiinnermut piffissaqartarussi iluaqutigissavarsi. Meeraqanngikkuilluunniit sapaatit-akunneri tamaasa piffissami aalajangersimasumi Biibilimik misissueqqissaarneq iluaqutigissavat.
ITISILIINEQ
Ilaqutariittut pilluarsinnaajumallusi toqqissisimasinnaajumallusilu siunnersuutitsialaat misissukkit.
4. Meeqqatit asannittumik perorsakkit
Meeqqanik perorsaaneq imaannaanngitsuusinnaavoq. Biibili iluaqutaasinnaava? Jaaku 1:19, 20 atuarsigit apeqqutillu uku eqqartorlugit:
-
Angajoqqaat meeqqatik oqaloqatigigaangamikkit qanoq asannittuusinnaappat?
-
Sooq angajoqqaat kamallutik oqaaqqissaarisassanngillat? a
5. Meeqqatit illersukkit
Qitornat illersorumallugu pingaaruteqangaarpoq atoqatigiinneq pillugu ilinniartinnissaa. Immaqa ilaasa taamaaliornissartik paqumigisarpaat. VIDEO takusiuk apeqqutillu tulliuttut eqqartorlugit.
-
Sooq angajoqqaat ilaasa atoqatigiinneq pillugu meeqqaminnik oqaloqateqarnissartik ajornakusoortittarpaat?
-
Angajoqqaat ilaat atoqatigiinneq pillugu qanoq nassuiaariaaseqarsimappat?
Siulittuutigineqartutut inuit Saatanimit sunnerneqartartut pissutsimikkut ajorsigaluttuinnarput. Timuutiusimut 2. 3:1, 13 atuarsigit apeqqullu una eqqartorlugu:
-
Inuit ajortut versi 13-imi eqqaaneqartut ilaat meeqqanik kinguaassiuutitigut atornerluisarput. Tamanna eqqarsaatigalugu angajoqqaat meeqqamik atoqatigiinnermut tunngasunik aamma atornerluisartunut imminut qanoq illersornissaannik ilinniartinnissaat sooq pingaaruteqarpa?
Nalunngiliuk?
Angajoqqaat atoqatigiinneq pillugu meeqqaminnik ilinniartitsinerminni aamma atornerluisartunut illersuinerminni atorsinnaasaat Jehovap Nalunaajaasuisa saqqummersittarpaat. Assersuutigalugu uku takukkit:
-
Meeqqasi illersorsigit (video)
-
“Meeqqat atoqatigiinneq pillugu qanoq ilinniartissinnaagit” (Iteritsi! nr. 5 2016)
6. Angajoqqaatit ataqqikkit
Meeqqat inuusuttuaqqallu angajoqqaaminnik ataqqinninnertik oqaloriaatsimikkut ersersissinnaavaat. VIDEO takusiuk apeqqutillu tulliuttut eqqartorlugit.
-
Sooq meeqqap inuusuttuaqqalluunniit angajoqqaaminut ataqqinnittumik oqaluttarnissaa pingaaruteqarpa?
-
Meeraq inuusuttuararluunniit angajoqqaaminik ataqqinninnini ersersikkumallugu qanoq oqaloriaaseqarsinnaava?
Ussatit 1:8 atuarsiuk apeqqullu una eqqartorlugu:
-
Meeraq inuusuttuararluunniit angajoqqaaminit ilitsersorneqaraangami qanoq qisuariartassava?
7. Ilaqutariittut Biibili misissoqqissaartarsiuk
Ilaqutariit Jehovamik Nalunaajaasuusut sapaatit-akunneri tamaasa Jehova guutisiorfigalugu Biibilimik misissueqqissaaqatigiittarput. Ilaqutariittut Biibilimik misissueqatigiinnermi suut sammineqarsinnaappat? VIDEO takusiuk apeqqutillu tulliuttut eqqartorlugit.
-
Sapaatit-akunneri tamaasa Biibilimik misissueqatigiikkumallutik ilaqutariinniittut tamarmik immikkut susinnaappat?
-
Angajoqqaat ilaqutariittut Biibilimik misissueqatigiinneq qanoq soqutiginartuutissinnaavaat nuannersuutillugulu? – Allaaserisap aallaqqaataani asseq takuuk.
-
Ilaqutariittut Biibilimik misissueqatigiinniarnissinnut suut aporfiusinnaappat?
Jehovap Israalikkut peqquai ilaqutariittut Allakkanik Illernartunik eqqartueqatigiittassasut. Mosesimik 5. 6:6, 7 atuarsigit apeqqullu una eqqartorlugu:
-
Najoqqutassiaq allassimaffimmiittoq qanoq atorsinnaaviuk?
Ilaqutariittut Biibilimik misissueqatigiinnermut siunnersuutit
-
Ataatsimiinnissamut piareersaqatigiigitsi.
-
Oqaluttuaq Biibilimeersoq ilaquttavit nuannarisinnaasaat atuariarlugu eqqartorsiuk.
-
Ukiukitsunik meeraqaruit jw.org-imi meeqqanut suliassat arlaat atorsiuk.
-
Inuusuttuaraateqaruit jw.org-imi taakkununnga allaaserineqartut arlaat atorsiuk.
-
Oqaluttuamik Biibilimeersumik isiginnaartitsisuusaaritsi.
-
Videut jw.org-imiittut arlaat isiginnaariarlugu eqqartorsiuk.
OQARTOQARTARPOQ: “Biibili meeqqanut paasiuminaappallaarpoq.”
-
Qanoq oqassagaluarpit?
EQIKKAANEQ
Jehovap kissaatigaa angajoqqaat meeqqatik asassagaat, ilinniartissagaat illersussagaallu. Aamma kissaatigaa meeqqat inuusuttuaqqallu angajoqqaatik ataqqillugillu naalattassagaat. Kiisalu kissaatigaa ilaqutariit Biibilimik misissueqatigiittassasut.
Uteqqiineq
-
Angajoqqaat meeqqatik qanoq ilinniartillugillu illersorsinnaavaat?
-
Meeqqat angajoqqaaminnik qanoq ataqqinnissinnaappat?
-
Sapaatit-akunneri tamaasa Biibilimik misissueqatigiittarussi qanoq iluaqutigissavisiuk?
NAMMINEQ MISISSUGASSATIT
Meeqqat inersimasunngunnginnerminni suut ilinniartariaqarpaat?
“Meeqqat ilinniartariaqagaat arfinillit” (Iteritsi! nr. 2 2019)
Angajoqqaanik utoqqarnik isumaginnittartunut Biibilimi sunik siunnersuuteqartoq atuaruk.
Meeqqanik perorsaanermik sianigisaqanngitsoq qanoq ataataallualersoq takuuk.
Qanoq perorsaassanerluta Jehovamit ilinniartinneqarpugut (5:58)
Ataataasut ernerminnut qanoq qaninnerusumik attaveqalersinnaasut atuaruk.
a Biibilimi perorsaaneq eqqaaneqaraangat ilitsersuineq, siulersuineq aamma naqqiineq pineqartarput. Timikkut oqaatsikkullu annersitsineq peqqarniinnerlu pineqanngisaannarput. – Ussatit 4:1.
Soqutigisinnaasatit allat
APEQQUTIGINEQARTARTUT
Jehovap Nalunaajaasuisa Biibilimik pikkorissartitsinerat suugami?
Jehovap Nalunaajaasuisa Biibilimik pikkorissartitsinerat akeqanngilaq, Biibilimillu nutsigaq sunaluunniit atorsinnaavat. Aamma ilaquttatit ikinngutitilluunniit pikkorissarnermut ilaserisinnaavatit.
