LUFUNJISHO 50

Kisemi Kyenu Kyafwainwa Kwikala Byepi Bulongo?—Lubaji 2

JIZHAI

Baana ke bupe kufuma kwi Yehoba. Ukeba’mba bansemi balamenga bulongo baana babo. Yehoba wapa bansemi mafunde afwainwa kwibakwasha kuyuka bya kulama bulongo baana babo. Kabiji mafunde a Yehoba afwainwa kukwasha baana kubanga bintu byawama byafwainwa kulengela kisemi kwikala bulongo.

1. Yehoba wakambizha bansemi kuba ka?

Yehoba wakambizha bansemi kutemwa baana babo ne kwikalanga pamo nabo kimye kyabaya. Kabiji ukeba bansemi kuzhikijila baana babo ku bintu byatama ne kwingijishanga mafunde a mu Baibolo pa kufunjisha baana babo. (Byambo bya Maana 1:8) Wabuula bansemi babalume amba: ‘Funjishainga (baana benu) maana a Yehoba.’ (Tangai Efisesa 6:4.) Yehoba utemwa bingi inge bansemi ke balondele mikambizho yanji pa kukomesha baana babo. Kabiji kechi utemwa inge bansemi bapa muntu mukwabo kwibafunjishishangako baana babo ne.

2. Yehoba wakambizha baana kuba ka?

Yehoba wakambizha baana kuba’mba: “Saka mukookela bansemi benu.” (Tangai Kolose 3:20.) Umvwe baana banemeka ne kukookela bansemi babo, bakatokeshanga Yehoba ku muchima ne bansemi babo pamo. (Byambo bya Maana 23:22-25) Yesu byobyo aubile byo ajinga mwanyike. Nangwa kya kuba wajinga waoloka, wakookelanga ne kunemeka bansemi banji.—Luka 2:51, 52.

3. Mwafwainwa kuba byepi pa kuba’mba kisemi kyenu kifwenye kwipi ne Lesa?

Inge mwi bansemi, mukebesha bingi baana benu kutemwa Yehoba byonkatu byo mwamutemwa. Pano mwafwainwa kwibakwasha byepi? Mwafwainwa kubanga byaamba Baibolo amba: “Mwafwainwa kwibifunjishanga [byambo bya Yehoba] na mukoyo baana benu ne kwibyambanga pa kwikala mu nzubo yenu ne pa kwenda mu jishinda.” (Mpitulukilo ya mu Mizhilo 6:7) ‘Kufunjisha na mukoyo’ kulumbulula kubwezhabwezhapo bintu. Onkao mambo, mwayuka’mba mwafwainwa kubwezhabwezhapo bintu bimo pa kuba’mba baana benu bebilabijile. Kino kinembelo kyalumbulula’mba anweba bansemi kimye kyonse mwafwainwa kwikalangapo na kimye kya kufunjishanga baana benu pe Yehoba. Kyawama bingi kimye kyonse kisemi kutangilanga Baibolo pamo. Inge baana mufwabo, napotu kikemukwasha bingi umvwe saka mwikalapo na kimye kya kutanganga Mambo a Lesa.

FUNJILAIPO BIKWABO

Monai mashinda awama afwainwa kukwasha kisemi kwikala bulongo.

4. Funjishainga baana benu mu butemwe

Kufunjisha baana kechi kwapeela ne. Nanchi Baibolo wafwainwa kwimukwasha byepi? Tangai Yakoba 1:19, 20, ne kwisamba ano mepuzho:

Bansemi bafwainwa kumwesha byepi amba batemwa baana babo inge babena kwisamba nabo?
Mambo ka bansemi o bafwainwa kubujila kufunjisha baana babo saka bazhingila? a

5. Zhikijilainga baana benu

Kyanema bingi kwisamba na mwana umo umo pa kyubilo kya kwilaala pa kuba’mba mwibazhikijile. Kechi kyapeela kwisamba pa uno mutwe na baana ne. Tambai VIDYO, ne kwisamba ano mepuzho.

VIDYO: Zhikijilainga Baana Benu ku Bintu Byatama (2:58)

Mambo ka bansemi bamo o bakankelwa kwisamba na baana babo pa kwilaala?
Ñanyi mashinda bansemi bamo o bengijisha pa kwisamba na baana babo pa kwilaala?

Byonkatu byaambijile jimo Baibolo, ntanda ya kwa Satana ibena kutaminakotu. Tangai 2 Timoti 3:1, 13, ne kwisamba buno bwipuzho:

Bantu batama bo baambapo mu kyepelo 13 bakuna baana. Mambo ka o kyawamina bansemi kufunjisha baana babo pa kwilaala ne pa byo bafwainwa kwizhikijila bene ku bakuna baana?

Bishinka bikwabo

Bakamonyi ba kwa Yehoba banemba mabuku ne kufyatula mavidyo avula bingi afwainwa kukwasha bansemi bya kufunjisha baana babo pa kwilaala ne bya kwibazhikijila. Monai:

Zhikijilainga Baana Benu (vidyo)
Fundai ku Mufunjishi Wayukisha, kitango 10 ne 32
“Kufunjisha Mwanenu Kuchina Bulalelale” (Labainga! Na. 5 2016)

6. Nemekainga bansemi benu

Mu ñambilo, banyike ne baana bakoma bafwainwa kumweshanga’mba bapa mushingi bansemi babo. Tambai VIDYO, ne kwisamba ano mepuzho.

VIDYO: Nakonsha Kwisamba Byepi na Bansemi Bami? (2:19)

Mambo ka o kyawamina mwana kwisamba na bansemi banji mu mushingi?
Mwana wafwainwa kumwesha byepi amba wanemeka bansemi banji pa kwisamba nabo?

Tangai Byambo bya Maana 1:8, ne kwisamba buno bwipuzho:

Mwana wafwainwa kuba byepi inge bansemi banji bamukambizha kubapo bintu bimo?

7. Ikalaingapo na kimye kya kutangila pamo Baibolo kisemi kyonse

Bisemi bya Bakamonyi ba kwa Yehoba bikala kimye kyonse na mutanchi wa kupopwela kwa kisemi. Akuno kupopwela kwa kisemi kwafwainwa kwikala byepi? Tambai VIDYO, ne kwisamba ano mepuzho.

VIDYO: Kupopwela kwa Kisemi—Mikiika ne Byawama Bifumamo (8:04)

Kisemi kyafwainwa kuba byepi pa kuba’mba kikalenga na Kupopwela kwa Kisemi kimye kyonse?
Ñanyi kintu kyafwainwa kuba nsemi pa kuba’mba kupopwela kwa kisemi kuwamenga?—Monai kipikichala kiji patendekela uno mutwe.
Ñanyi bintu byakonsha kwimulengela kubula kufunjilanga pamo Mambo a Lesa mu kisemi kyenu?

Mu Isalela kala, Yehoba wakambizhe bisemi kwisambanga Binembelo kimye kyonse. Tangai Mpitulukilo ya mu Mizhilo 6:6, 7, ne kwisamba buno bwipuzho:

Mwafwainwa kwingijisha byepi kino kinembelo?

Mashinda akwingijisha pa kupopwela kwa kisemi:

Nengezhainga kupwila.
Tangainga ne kwisambapo pa jishimikila ja mu Baibolo jisakutemwa kisemi kyenu.
Inge muji na baana ba bacheche, kopololai ne kupulinta bibaaba byaamba pa baana biji pa jw.org.
Inge muji na baana baji na myaka kutendekela pa 13 kufika pa 19, kopololai ne kupulinta bibaaba byaamba pa banyike biji pa jw.org.
Fwanyikizhainga ne kwibepekezha anweba ne baana benu kwikala bantu bo baambapo mu jishimikila ja mu Baibolo jo mubena kutanga.
Tambainga ne kwisambanga pa mavidyo aji pa jw.org.

BANTU BAMO BAMBA’MBA: “Atweba twapayankana bingi. Kimye tufwakyo kya kwikala pamo na baana betu ne kwibafunjisha byaamba Baibolo.”

Mwafwainwa kukwasha byepi bantu bamba bino?

ÑANYI BISHINKA BYO MWAFUNDA?

Yehoba wakambizha bansemi kutemwa baana babo, kwibafunjisha ne kwibazhikijila. Kabiji ukeba baana kunemeka ne kukookela bansemi babo ne bisemi kutangilanga pamo Baibolo.

Mepuzho a kupitulukamo

Bansemi bafwainwa kufunjisha byepi baana babo ne kwibazhikijila?
Baana bafwainwa kunemeka byepi bansemi babo?
Ñanyi bintu byawama bifumamo inge kisemi kikala na kupopwela kwa kisemi kimye kyonse?

Mwapwisha kufunda pa:

Ubai bino

Ipuzhaipo balongo ne banyenga bamo mu kipwilo kwimubuulako mashinda mwa kubila na kupopwela kwa kisemi.

Bikwabo:

Kikonkwanyi kyenu kikwabo

KEBAI BISHINKA BIKWABO

Ñanyi bintu byafwainwa kukwasha baana benu kwikala bulongo kufikatu ne byo bakakoma?

“Bintu 6 byo Mwafwainwa Kufunjisha Baana” (Labainga! Na. 2 2019)

Funjilaiko ku mashinda awama aambapo Baibolo afwainwa kukwasha boba babena kulama bansemi babo bakoma.

“Baibolo Waambapo’mba ka pa bya Kulama Bansemi Bakoma?” (Kibaaba kiji pa jw.org)

Monai byaubile mwanamulume umo wabujile kuyuka bya kukomesha baana banji byo afunjile bya kwibalama bulongo.

Yehoba Witufunjisha bya Kukomesha Baana Bulongo (5:58)

Monai bintu byafwainwa kukwasha bansemi babalume kukosesha bulunda bwabo na baana.

“Bansemi ba Balume Bakonsha Kwikala Byepi Kwipi na Baana Babo ba Balume?” (Kyamba kya Usopa, January 1, 2012)

a Mu Baibolo, kyambo kya “kufunjisha” kipasha na kupana mikambizho, kutangijila mwana ne kumukwasha kupimpula byubilo byanji byatama. Kujimuna mwana kechi kulumbulula kukanama ne.—Byambo bya Maana 4:1.