LƐSIN 50
Aw Yu Famili Go Gɛt Gladi-At?—Pat 2
Pikin dɛn na gift frɔm Jiova. I ɛkspɛkt mama ɛn papa dɛn fɔ kia fɔ da gift de. Jiova dɔn gi fayn advays dɛn we go ɛp mama ɛn papa dɛn fɔ du dat. In advays dɛn go ɛp pikin dɛn fɔ du ɔl wetin dɛn ebul fɔ mek dɛn famili go bifo.
1. Us advays Jiova gi mama ɛn papa dɛn?
Jiova ɛkspɛkt mama ɛn papa dɛn fɔ lɛk dɛn pikin dɛn ɛn fɔ spɛn bɔku tɛm wit dɛn. I want bak mama ɛn papa dɛn fɔ protɛkt dɛn pikin dɛn frɔm bad tin dɛn ɛn fɔ yuz Baybul prinsipul dɛn fɔ tren dɛn. (Prɔvabs 1:8) I tɛl papa dɛn se: “Una kɔntinyu fɔ . . . tren [una pikin dɛn] lɛk aw Jiova se.” (Rid Ɛfishians 6:4.) Jiova de gladi if mama ɛn papa dɛn fala wetin i se we dɛn de mɛn dɛn pikin dɛn, ɛn dɛn nɔ gi ɔda pɔsin di wok fɔ mɛn dɛn.
2. Us advays Jiova gi to pikin dɛn?
Jiova tɛl pikin dɛn se: “Una obe una mama ɛn papa dɛn.” (Rid Koloshians 3:20.) We pikin dɛn rɛspɛkt ɛn obe dɛn mama ɛn papa dɛn, dɛn de mek Jiova gladi ɛn dɛn mama ɛn papa dɛn bak de gladi. (Prɔvabs 23:22-25) Jizɔs bin sɛt fayn ɛgzampul we in na bin pikin. Pan ɔl we i pafɛkt, i bin obe ɛn rɛspɛkt in mama ɛn papa.—Lyuk 2:51, 52.
3. Aw una go kam nia Gɔd as famili?
If yu na mama ɔ papa, wan dawt nɔ de fɔ se yu go want yu pikin dɛn fɔ lɛk Jiova jɔs lɛk aw yusɛf lɛk am. Aw yu go du dis? Na bay we mama ɛn papa dɛn du wetin di Baybul tɔk we i se: “Dɛn fɔ mek shɔ se dɛn tich dɛn pikin dɛn di lɔ dɛn gud gud wan so dat dɛn go ebul rid dɛn we dɛn de na os, na trit, we dɛn de wok ɛn we dɛn de blo.” (Ditarɔnɔmi 6:7) Fɔ “tich” kin min, fɔ ripit sɔntin. Sɔntɛm yu no se yu fɔ de ripit sɔntin to yu pikin dɛn ɔltɛm so dat dɛn go mɛmba am. Dis skripchɔ min se yu fɔ luk fɔ chans ɔltɛm fɔ tɔk to yu pikin dɛn bɔt Jiova. I fayn fɔ sɛt tɛm ɛni wik fɔ wɔship Jiova as famili. If yu nɔ gɛt pikin dɛn, yu kin stil bɛnifit bay we yu sɛt tɛm ɛni wik fɔ stɔdi Gɔd in Wɔd.
LAN MƆ
Lan bɔt sɔm tin dɛn we go ɛp yu famili fɔ fil sef ɛn fɔ gɛt gladi-at.
4. Tren yu pikin dɛn wit lɔv
Fɔ tren pikin nɔ kin izi. Aw di Baybul go ɛp? Rid Jems 1:19, 20, dɔn una tɔk bɔt dɛn kwɛstyɔn dɛn ya:
-
Aw mama ɛn papa dɛn go sho lɔv we dɛn de tɔk to dɛn pikin dɛn?
-
Wetin mek mama ɔ papa nɔ fɔ disiplin in pikin we i vɛks? a
5. Protɛkt yu pikin dɛn
Fɔ protɛkt yu pikin dɛn, i rili impɔtant fɔ mek yu tɔk to ɛni wan pan dɛn bɔt mami ɛn dadi biznɛs. I kin luk at fɔ du. Ple di VIDIO, dɔn una tɔk bɔt di kwɛstyɔn dɛn we de dɔŋ.
-
Wetin mek i nɔ kin izi fɔ mek sɔm mama ɛn papa dɛn tɔk to dɛn pikin dɛn bɔt mami ɛn dadi biznɛs?
-
Us we dɛn we sɔm mama ɛn papa dɛn dɔn ɛksplen to dɛn pikin dɛn bɔt mami ɛn dadi biznɛs?
Akɔdin to wetin di Baybul bin dɔn tɔk, Setan in wɔl de wikɛd mɔ ɛn mɔ. Rid 2 Timoti 3:1, 13, dɔn una tɔk bɔt dis kwɛstyɔn:
-
Sɔm pan di wikɛd pipul dɛn we dɛn tɔk bɔt na vas 13, kin du mami ɛn dadi biznɛs wit pikin dɛn. So wetin mek i impɔtant fɔ mek mama ɛn papa dɛn tich dɛn pikin dɛn bɔt mami ɛn dadi biznɛs, ɛn aw fɔ protɛkt dɛn pikin dɛn frɔm pipul dɛn we de du mami ɛn dadi biznɛs wit pikin dɛn?
Yu bin no?
Jiova Witnɛs dɛn gɛt bɔku buk, magazin, ɛn vidio dɛn we go ɛp mama ɛn papa dɛn fɔ tich dɛn pikin dɛn bɔt mami ɛn dadi biznɛs ɛn fɔ protɛkt dɛn frɔm di wan dɛn we lɛk fɔ du mami ɛn dadi biznɛs wit pikin. Fɔ ɛgzampul, wach:
-
Protɛkt Yu Pikin Dɛn (vidio)
-
“Tich Yu Pikin bɔt Mami ɛn Dadi Biznɛs” (Awek! No. 5 2016)
6. Rɛspɛkt yu mama ɛn papa
Pikin dɛn ɛn di wan dɛn we dɔn pas twɛlv ia, kin sho se dɛn rɛspɛkt dɛn mama ɛn papa dɛn bay di we aw dɛn de tɔk to dɛn. Ple di VIDIO, dɔn una tɔk bɔt dɛn kwɛstyɔn dɛn ya we de dɔŋ.
-
Wetin mek i rili impɔtant fɔ yɔŋ pɔsin fɔ tɔk wit rɛspɛkt to in mama ɛn papa?
-
Aw yɔŋ pɔsin go tɔk to in mama ɛn papa di we we de sho se i de ɔnɔ dɛn?
Rid Prɔvabs 1:8, dɔn una tɔk bɔt dis kwɛstyɔn:
-
Aw yɔŋ pɔsin fɔ biev we in mama ɛn papa de tɛl am wetin fɔ du?
7. Wɔship Jiova as famili
Famili dɛn we na Jiova Witnɛs dɛn kin sɛt tɛm ɛni wik fɔ wɔship Gɔd togɛda. Aw dis famili wɔship fɔ tan lɛk? Ple di VIDIO, dɔn una tɔk bɔt di kwɛstyɔn dɛn we de dɔŋ.
-
Aw famili dɛn go ebul fɔ du dɛn famili wɔship ɛni wik?
-
Wetin mama ɛn papa dɛn go du fɔ mek famili wɔship fayn ɛn fɔ mek dɛn ɛnjɔy am?—Wach di fɔs pikchɔ na dis lɛsin.
-
Wetin kin mek i nɔ izi fɔ mek yu famili stɔdi togɛda?
Insay di Izrɛlayt dɛn tɛm, Jiova bin de ɛkspɛkt famili dɛn fɔ tɔk bɔt di skripchɔ dɛn ɔltɛm. Rid Ditarɔnɔmi 6:6, 7, dɔn una tɔk bɔt dis kwɛstyɔn:
-
Aw yu go aplay dis prinsipul?
Aydia dɛn fɔ famili wɔship:
-
Pripia fɔ kɔngrigeshɔn mitin dɛn.
-
Rid ɛn tɔk bɔt wan Baybul stori we yu famili go rili ɛnjɔy.
-
If yu gɛt smɔl pikin dɛn, dawnlod ɔ print sɔm tin dɛn we de na jw.org we pikin dɛn kin ebul fɔ du.
-
If yu gɛt pikin dɛn we dɔn pas 12 ia, una tɔk bɔt wan atikul na jw.org bɔt pikin dɛn we dɔn pas 12 ia.
-
Akt wan Baybul stori wit yu pikin dɛn.
-
Una wach ɛn tɔk bɔt wan fim na jw.org.
SƆM PIPUL DƐN KIN SE: “I at fɔ mek pikin dɛn ɔndastand di Baybul.”
-
Wetin yu go se?
WETIN YU DƆN LAN?
Jiova want mama ɛn papa dɛn fɔ lɛk, tren, ɛn protɛkt dɛn pikin dɛn; pikin dɛn fɔ rɛspɛkt ɛn obe dɛn mama ɛn papa dɛn; ɛn famili dɛn fɔ wɔship Jiova togɛda.
Rivyu
-
Aw mama ɛn papa dɛn go tren ɛn protɛkt dɛn pikin dɛn?
-
Aw pikin dɛn go sho ɔnɔ to dɛn mama ɛn papa dɛn?
-
Us bɛnifit famili dɛn go gɛt if dɛn sɛt tɛm ɛni wik fɔ wɔship togɛda as famili?
DU MƆ RISACH
Us lɛsin dɛn go ɛp yu pikin dɛn fɔ di tɛm we dɛn go big?
Lan sɔm fayn advays dɛn we di Baybul gi to pipul dɛn we de tek kia ɔf dɛn mama ɛn papa we dɔn ol.
“Wetin di Baybul Se bɔt fɔ Tek Kia ɔf Mama ɛn Papa dɛn We Dɔn Ol?” (Atikul na di wɛbsayt)
Lan bɔt aw wan man we nɔ bin no aw fɔ mɛn pikin dɛn bi gud papa.
Lan wetin papa dɛn go du fɔ mek dɛn gɛt tayt padi biznɛs wit dɛn bɔypikin dɛn.
“Aw Papa dɛn Go Gɛt Tayt Padi Biznɛs wit Dɛn Bɔypikin Dɛn?” (Di Wachtawa, Novɛmba 1, 2011)
a Insay di Baybul, fɔ “disiplin” min, fɔ tich ɛn gayd pikin, ɛn fɔ ɛp am fɔ chenj di bad we aw i de tink ɔ biev. I nɔ ɛva min se dɛn fɔ du dɛn bad ɔ wikɛd tin dɛn.—Prɔvabs 4:1.
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
