SUƐI LEBOLII 50

Yɛɛ Tosa yɛ Mi Yuŋgu Numndo Wa a Nyaale?—Pɛl 2

PILEI

Ke fula Chɛhowa o ba wo chuauwa cho ni. Nduyɛ, o yeema mi kalaŋ chuauwa bii kioo hoo nyɛkɛndɛi. Chɛhowa ke kalaŋ chuauwa sila mala nda le hei tosaa wo. Sila ndɔɔ nɔla vɛlɛ mbo mala chuauwa, le mi nda bɛɛ tosa mi yuŋgoo wa a nyaale.

1. Sila yɛɛ Chɛhowa ke yɛ kalaŋ chuauwa

Chɛhowa yeema mi kalaŋ chuauwa kaala chuauwaa ndaa nduyɛ ma chua teleŋndo tau a nda. O yeema vɛlɛ ma manda nda yɔŋii kpundɛlaŋ la komal nda. Nduyɛ, ma soliŋ Baabuiyo kpeku le nda pɛɛkoo. (Pulɔwaa 1:8) Mbo dimul finyaa aa: “La wa chuauwaa nyaa . . . pɛɛkoo, nduyɛ mi la manda nda o nɛi Chɛhowa wo choo.” (Nuawɔ Ɛfisiaŋnda 6:4.) Mi Chɛhowa naŋ kɔl tau te kalaŋ chuauwa tol pɛ sila ndɔɔ kɔɔli le chuauwaa ndaa mandaa. O yeema mi wana cheleŋ mandal nda chuauwaa ndaa le.

2. Sila yɛɛ Chɛhowa ke yɛ chuauwa?

Chɛhowa dimul chuauwa aa: “La diikuŋ wanaa velu nya wa.” (Nuawɔ Koloosiaŋnda 3:20.) Te chuauwa ke pɛ wanaa velu nda wa bɛɛleŋ nduyɛ ma diikuŋ nda, mi Chɛhowa a wanaa velu nda wa naŋ kɔl tau. (Pulɔwaa 23:22-25) Teleŋ Chiisu wa o pɔmbɔ wo, mbo kɛsi tamasi kɛndɔɔ a hei okɔɔ. Mi che bɛɛ o wa walaŋ, kɛ mi ndoo diikuŋ wanaa velu ndu wa. Nduyɛ, mi ndoo ke nda bɛɛleŋ.—Luku 2:51, 52.

3. Vɛɛ nya nɔla yɛ mi la sɔɔŋguu Mɛlɛka ikɛi o yuŋgoo niŋ?

Te kala chuaa ŋ cho ni, yeemɛi cho num le mi chuauwaa numnda kaala Chɛhowa mɛɛ ŋ kaala ndu yɛ. Yɛɛ ŋ nɔ yɛ ma tosa le ma sɔla batiuwaa hoo? A nɔ ma tosa nyɛ Baabuiyo dimi wo. Ndu cho ni: “La wa chuauwaa nyaa [sawala Chɛhowalaŋ] pɛɛkoo le teleŋ o teleŋ. Te la chal o la nyalo chiɛilaŋ niŋ pɛ, la soo a laŋ okɔɔ. O nɛi bɛɛ nya wa kɔlaŋ pɛ, la soo a laŋ okɔɔ.” (Ditɔnɔmii 6:7) Nyɛ bolle Baabuileŋ ndeŋ le dimi wo chɔm maa a nɔ ma biunuŋ chuauwaa numnda pɛɛkoo. Teleŋndaŋ lapum, mɛɛ ma miŋgi sondoo o nyɛ pilɔɔ choo daandi daandi le mbo chal nda o lakɔl. Bolle Baabuileŋ ndeŋ le sim vɛlɛ maa lɔɔlɔɔ a nɔ ma wa nɛilaŋ nuuviaa, le suɛi o chuauwaa numnda lo a Chɛhowa okɔɔ. Lelaŋ, o bɛnda mi la kɛsi teleŋndo o lɔɔ o lɔɔ bɛŋgu le waa pɛɛku leyuŋgoo tosaa. O yɔŋ bɛɛ mi la nɔ ŋchuau le, la cho tɔnɔɔ sɔla tau te la wa pɛ teleŋndo chuaa o lɔɔ o lɔɔ bɛŋgu le Diom Mɛlɛkaa pɛɛkoo.

CHƆƆLU YAASIAA

Tofawɔ sɔɔŋ pum ŋ tosa mi yuŋgoo wa a nyaale, nduyɛ mi wana o wana wa hɛnɛkɛ wo.

4. Pɛɛku chuauwaa numnda o kaalaa niŋ

O cho suɛi bɛɛŋ le chuauwa pɛɛkoo le. Kɛ vɛɛ Baabuiyo nɔla yɛ mbo mala num? Nuawɔ Chemisi 1:19, 20, okoŋ mi la suukaŋ o nyunalaŋ ndaŋ choo:

Vɛɛ kalaŋ chuauwa chɔm yɛ chuauwaa ndaa kaalaa, te a wa pɛ suukaŋndo a nda?
Le yɛɛ a nɔ ma sila chuauwaa ndaa a tumboo le? a

5. Manda chuauwaa numnda

Te a yeema pɛ ma manda chuauwaa numnda, o bɛnda ma soo o chua kɛ kɛ lo a hiniei okɔɔ. Mi hei wa lepum suɛi lasiɔmbu le dimioo. Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Manda Chuauwaa Numnda le Ma Fafaŋ ‘Suɛi Dɛnɛ Wɔɔŋnde’ (2:58)

Le yɛɛ kalaŋ chuauwa apum cha yɛ ndi ikala le suɛi o chuauwaa ndaa lo a hiniei okɔɔ?
O nɛila kuɛɛ niŋ kalaŋ chuauwa apum tɛɛsiallɛ niŋ chuauwaa ndaa a hiniei okɔɔ?

Dɛnɛ wɔɔŋndo cho hiouwɔɔ lachi a yɔŋnɔŋndo o chieeŋ Setanaa niŋ, a mɛɛ Baabuiyo dimi yɛ. Nuawɔ 2 Timoti 3:1, 13, okoŋ mi la suukaŋ o nyunaa hoo choo:

Mi wanaa dɛnɛ wɔɔŋaa sɔɔŋ 13 dimi haa wa apum kpuuwa chuaambuaa. Lelaŋ, le yɛɛ i cho yɛ suɛi sɔvɛ le mi kalaŋ chuauwa soo o chuauwaa ndaa lo a hiniei okɔɔ, nduyɛ ma chɔm nda nɛila nda fafaŋ wanaa kpuuviaa wa?

A sina pa?

Seiyaa Chɛhowaa soli niŋ yaulaŋ a vidueilaŋ tau, le kalaŋ chuauwa malaa ma pɛɛku chuauwaa ndaa a chiɛiniŋndo okɔɔ. Nduyɛ, ma manda nda yɔŋii wanaa dɛnɛ wɔɔŋnda tosal nda nyɛ. Le tamaseliiyo, la tiŋ la cho laŋ ni:

Manda Chuauwaa Numnda (vidueiyo)
Pɛɛku Wana Pɛɛkaa Bɛndoo o Ba, buŋgɛi 10 a 32
“Pɛɛku Chuauwaa Numnda a Chiɛiniŋndo Okɔɔ” (“Tiondoo!” No. 5 2016)

6. Ke wanaa velu numnda bɛɛleŋ

Mɛɛ chuaambuaa a feleŋguaa suaa o wanaa velu nda wa lo yɛ chɔm ni maa a nɔ bɛɛleŋ le nda. Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Vɛɛ Ya Suaa yɛ o Wanaa Velu Ya Wa Lo? (2:19)

Le yɛɛ i cho yɛ suɛi sɔvɛ, le mi feleŋgɔnɔɔ soo o wanaa velu ndu wa lo a lebɛɛ?
Vɛɛ feleŋgɔnɔɔ suaa yɛ o wanaa velu ndu wa lo o nɛi lebɛɛ niŋ?

Nuawɔ Pulɔwaa 1:8, okoŋ mi la suukaŋ o nyunaa hoo choo:

Yɛɛ feleŋgɔnɔɔ nɔ yɛ mbo tosa te wanaa velu ndu wa ke ndu pɛ silaa?

7. La piɛi Chɛhowa diompilɛ o yuŋgoo niŋ

Mi yuŋgula Seiyaa Chɛhowaa kɛsi teleŋndo o lɔɔ o lɔɔ bɛŋgu, le Chɛhowa piɛiyo diompilɛ. Vɛɛ pɛɛku leyuŋgoo hoo tosaŋ yɛ? Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Pɛɛku leYuŋgoo—Simultaŋ a Tɔnɔla Cho le Ndu Tosaa Laŋ (8:04)

Yɛɛ mala yɛ mi yuŋgoo sɔla teleŋndo le pɛɛku leyuŋgoo tosaa lɔɔ o lɔɔ?
Yɛɛ kalaŋ chuauwa nɔ yɛ ma tosa le mi pɛɛku leyuŋgoo yeela nduyɛ mi wana o wana sɔla tɔnɔɔ leniŋ?—Tofa fotueiyo o suɛi lebolle hei kandɔŋndo.
Yɛɛ tosa yɛ ndi ikala le pɛɛku leyuŋgoo tosaa diompilɛ?

O Isɔluɛi niŋ sindɛ, Chɛhowa ndoo yeema mi yuŋgulaŋ laa wa suukaŋndo teleŋ o teleŋ o Diom ndɔɔ choo. Nuawɔ Ditɔnɔmii 6:6, 7, okoŋ mi la suukaŋ o nyunaa hoo choo:

Vɛɛ ŋ duau yɛ sawa mandaa hoo o wali niŋ?

Kɛɛsiaalaŋ le pɛɛku leyuŋgoo:

La bɛɛndiaŋ diompilɛ le bɔŋaŋndaŋ o lɔɔ bɛŋgu.
La chua bundɛi nya hɛnaŋ o Baabuiyo niŋnde mi la veelu diomndaŋ, okoŋ mi la suukaŋ lechoo.
Te la nɔ pɛ chuaambuaa pɔmbuaa, la kua o jw.org mi la hivi ɔɔ mi la solul nda buŋgaŋ nda tosal nda le pɛɛkoo woŋ o pei choo.
Te la nɔ pɛ chuaambuaa feleŋguaa, la kua o jw.org okoŋ, mi la suukaŋ a buŋgaŋ cho loŋ le feleŋguaa woŋ okɔɔ.
La tuula vɛlɛ bundɛi Baabuiye a chuauwaa nyaa latulu.
La tofa vidueiyo o jw.org mi la suukaŋ lechoo.

TE WAŊNDO DIMI PƐ AA: “Baabuiyo cho yau chuaambɔ le.”

Yɛɛ ŋ cho yɛ dimi?

SƆƆŊ KULLOŊ

Chɛhowa yeema mi kalaŋ chuauwa kaala chuauwaa ndaa, ma pɛɛku nda, nduyɛ ma manda nda. O yeema mi chuauwa ke wanaa velu nda wa bɛɛleŋ, nduyɛ ma diikuŋ nda. O yeema vɛlɛ mi yuŋgulaŋ la piɛi ndu diompilɛ.

Nyunala miiŋgaa choo laŋ

Vɛɛ kalaŋ chuauwa pɛɛku yɛ chuauwaa ndaa nduyɛ ma manda nda?
Vɛɛ chuauwa chɔm yɛ maa a nɔ bɛɛleŋ le wanaa velu nda wa?
Tɔnɔla yɛɛ yuŋgoo sɔla yɛ te a kɛsi pɛ teleŋndo le waa pɛɛkoo a Mɛlɛka okɔɔ lɔɔ o lɔɔ?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Nyuna waŋnda o kundaa niŋ le ma chɔm num nɛila ŋ tosa pɛɛku leyuŋgoo laŋ.

Nyɛ cheleŋ:

Your other goal

CHƆƆLU SƆƆŊ PUM TOFA

Sɔɔŋ kuɛɛ cho yɛ chua numndo mala te o sul pɛ kaasoŋnɔ?

“Sɔɔŋ Ŋɔmpum Chuaambuaa Nɔ Ma Pɛɛku Woŋ” (“Tiondoo!” No. 2 2019)

Nuawɔ sila Baabuiyo yɔŋgu le wanaa manda yuuwa ɔɔ wanaa lanaa wa.

“Yɛɛ Baabuiyo Dimi yɛ a Wanaa Velu Naa Wa Mandaa te A Yuuwa Pɛ?” (Kɔ o tɛɛŋgei choo)

Tofawɔ ma che mɛɛ finya ndoo sina a chuauwa mandaa okɔɔ le wo, sɔla batiuwaa mbo manda chuauwaa nduaa nyɛkɛndɛi yɛ.

Chɛhowa Pɛɛku Naa le Yuŋgu Naa Mandaa Ni (5:58)

Pɛɛku ma sina mɛɛ finyaa tosa mi chaŋyɛi kɛndɛi wa nda tɛɛŋ a chuauwaa nduaa piaanduaa yɛ.

“Vɛɛ Chaŋyɛi Kɛndɛi Wa yɛ Finyaa Tɛɛŋ a Chuauwaa Nduaa Piaanduaa?” (Bandu Mɛŋgɛlaa, Bɛŋgufɔnɔɔ 1, 2011)

a O Baabuiyo niŋ, silaa chiɛɛliaŋ a waŋndo pɛɛkoo, nɛi chɔmaa ndu kioo, a ndu miŋgioo o nɛi. Kɛ o sim le ndu bɛɛlaŋ tɛɛmbuuwo ɔɔ biyɔɔ ndu ŋuasu ŋuasu le.—Pulɔwaa 4:1.