DILONGI 50
Yinki mutindu dibuta na nge lenda vuanda na kiese?—Kitini 2
Bana kele dikabu yina mekatuka na Yehova. Yandi melomba na bibuti batanina mbote dikabu yango. Yehova mepesa malongi ya nduenga yina lenda sadisa bibuti na kusala yau. Malongi na yandi kena kumonisa diaka mambu yina bana lenda sala samu na kutula kiese na dibuta.
1. Yinki malongi Yehova mepesa na bibuti?
Yehova melomba na bibuti bazola bana na bau mpe balutisaka ntangu mingi kintuadi na bau. Yandi zola diaka bibuti tanina bana na bau na mambu ya yimbi mpe basadila bansikudukusu ya Biblia samu na kulonga bau. (Bingana 1:8) Yandi metubila batata: ‘Beno tatamana kulonga [bana na beno] . . . na banduengoso ya Yehova.’ (Tanga Baefezo 6:4.) Yehova kesepelaka kana bibuti kena kulanda lutuadusu na yandi ntangu bakena kuyundula bana na bau mpe kana bakena kupesa ve kiyekua na bau na muntu yankaka.
2. Yinki malongi Yehova mepesa na bana?
Yehova melonga bana: ‘Beno zitisa bibuti na beno na mambu nionso.’ (Tanga Bakolosai 3:20.) Ntangu bana kena kuzitisa mpe kutumamina bibuti na bau, bakesepedisaka Yehova mpe bibuti na bau. (Bingana 23:22-25) Yesu bikaka kifuani mosi ya mbote ntangu yandi vuandaka muana. Atako yandi vuandaka muntu ya kukoka, yandi tumaminaka mpe yandi zitisaka bibuti na yandi.—Luka 2:51, 52.
3. Yinki mutindu dibuta na nge lenda pusana penepene na Nzambi?
Kana nge kele kibuti, kondua ntembe nge kezola bana na nge bazola Yehova mingi mutindu nge kezodilaka yandi. Yinki mutindu nge lenda kokisa lukanu yango? Na kusalaka yina Biblia metuba: ‘Nge fueti kotisa [Mpova ya Yehova] na bana na nge mpe kutubila yau ntangu nge kevuanda na yinzo mpe ntangu nge ketambula na nzila.’ (Kulonga 6:7) “Kukotisa” zola monisa kulonga na kuvutukilaka mambu. Mutindu mosi mpe, nge mezaba ti nge fueti vutukilaka diambu mosi mbala na mbala na bana samu bazimbakana yau ve. Verse yayi zola tuba nge fueti sosa mbala na mbala maluaku ya kutubila bana na nge mambu metadila Yehova. Yakele dibanza mosi ya mbote kubaka ntangu konso sabala samu na kusala nsambudulu ya dibuta. Kana nge kele na bana ve, nge kebaka mambote na kubakaka ntangu konso sabala samu na kulonguka Mpova ya Nzambi.
KOTA NA MPINDA
Tadila malongi yina ketungaka kiese mpe luvuvamu na luzingu ya dibuta.
4. Longa bana na nge na nzola
Kulonga muana lenda vuanda diambu ya mpasi. Yinki mutindu Biblia lenda sadisa nge? Tanga Yakobo 1:19, 20, mpe na manima tadila biuvu yayi:
-
Yinki mutindu bibuti lenda monisa nzola ntangu bakena kusolola na bana na bau?
-
Samu na yinki kibuti fueti pesa ve disiplini na muana na yandi ntangu yandi kele na nganzi? a
5. Tanina bana na nge
Samu na kutanina bana na nge, yakele mfunu mingi kusolola na mosi mosi na bau mambu yina metadila kusangisa nzutu. Yalenda vuanda diambu ya nsoni mpe ya mpasi. Tula VIDEO, mpe na manima tadila biuvu yayi melanda.
-
Samu na yinki yakevuandaka mpasi samu na bibuti yankaka kusolola na bana na bau mambu metadila kusangisa nzutu?
-
Na yinki mutindu bibuti yankaka kesasilaka bana na bau mambu metadila kusangisa nzutu?
Mutindu Biblia samunaka yau, yinza ya Satana mekuma yimbi mpenza. Tanga 2 Timoteo 3:1, 13, mpe na manima tadila kiuvu yayi:
-
Bantu yankaka ya yimbi yina verse 13 metubila kebebisaka bana na kusangisaka na bau nzutu. Na yau, samu na yinki yakele mfunu samu na bibuti balonga bana na bau mambu metadila kusangisa nzutu mpe mutindu balenda kukitanina bau mosi na bantu yina kebebisaka bana?
Nge zabaka yau?
Bambangi ya Yehova kebimisaka bisadulu mingi yina kesadisaka bibuti samu na kulonga bana na bau mambu metadila kusangisa nzutu mpe kutanina bau na bantu yina kebebisaka bana. Na kifuani, tala:
-
Tanina bana na nge (video)
-
““Koteya mwana makambo etali kosangisa nzoto” (Lamuká! No. 5 2016)
6. Zitisa bibuti na nge
Bana mpe bantuenia lenda monisa luzitu na bibuti na bau na mutindu na bau ya kusolola na bau. Tula VIDEO, mpe na manima tadila biuvu yayi melanda.
-
Samu na yinki yakele mfunu mingi na ntuenia na kusolola na luzitu nionso na bibuti na yandi?
-
Yinki mutindu ntuenia lenda monisa luzitu na bibuti na yandi na mutindu na yandi ya kutubila bau?
Tanga Bingana 1:8, mpe na manima tadila kiuvu yayi:
-
Yinki ntuenia fueti sala ntangu bibuti na yandi mezabisa yandi diambu yina yandi fueti sala?
7. Beno sambila Yehova na kati ya dibuta
Mabuta ya Bambangi ya Yehova kebakaka ntangu ya mbote konso sabala samu na kusala nsambudulu ya dibuta. Nsambudulu yango lenda vuanda yinki mutindu? Tula VIDEO, mpe tadila biuvu yayi melanda.
-
Yinki mutindu dibuta lenda vuanda na programe ya nsambudulu ya dibuta mbala na mbala?
-
Yinki kibuti lenda sala samu nsambudulu yango vuanda na malongi yina kesadisa mpe yavuanda ntangu mosi ya kiese?—Tala foto ya ebandeli ya dilongi yayi.
-
Yinki lenda kumisa nsambudulu na beno ya dibuta mpasi?
Na Yisaele ya ntama, Yehova lombaka na mabuta na kutubilaka mbala na mbala mambu yina metadila Masonukua. Tanga Kulonga 6:6, 7, mpe na manima tadila kiuvu yayi:
-
Yinki mutindu nge lenda sadila nsikudukusu yango?
Mabanza ya kusadila na nsambudulu ya dibuta:
-
Kukibongisa samu na balukutakanu ya kimvuka.
-
Kutanga mpe kusolola disolo mosi ya Biblia yina kesepedisa dibuta na nge.
-
Kana nge kele na bana ya fioti, telesharje to bimisa na papie disolo mosi yina metadila bana na jw.org.
-
Kana nge kele na bana yina mekuma bantuenia, beno tadila disolo mosi yina metadila bantuenia na jw.org.
-
Sala mua teatre ya masolo ya Biblia na bana na nge.
-
Beno tala mpe beno tubila video na jw.org..
BANTU YANKAKA METUBA: “Biblia kele mpasi mingi samu bana bakusa yau.”
-
Yinki nge ketuba?
BUNKUFI
Yehova melomba bibuti bazola, balonga mpe batanina bana na bau; na ndambu yankaka bana bazitisa mpe batumamina bibuti na bau; mpe mabuta basalaka nsambudulu kintuadi.
Mvutukulu
-
Yinki mutindu bibuti lenda longa mpe kutanina bana na bau?
-
Yinki mutindu bana lenda monisa luzitu na bibuti na bau?
-
Yinki kele mambote ya kubakaka ntangu konso sabala samu na kusala nsambudulu ya dibuta?
SOSA
Yinki malongi kebongisa muana na nge samu yandi kuma na nduenga ntangu yandi kekuma mbuta?
“Mateya Motoba oyo bana basengeli koyekola” (Lamuká! No. 2 2019)
Longuka malongi ya mfunu yina Biblia mepesa samu na bayina kesadisaka bibuti na bau yina mekuma biboba.
“Biblia elobi nini na likambo etali kosunga baboti oyo bakómi mibange?” (Disolo na Internet)
Tala mutindu bakala mosi yina zabaka ve mutindu ya kuyundudila bana kumaka tata mosi ya mbote.
Tadila mutindu batata lenda kumisa ngolo nguizani na bau na bana na bau ya babakala.
a Na Biblia, “disiplini” zola monisa malongi, lutuadusu, mpe nsembolo. Yazola monisa ve kulutisa ndilu to kuniokola.—Bingana 4:1.
