SIRONGWA 50
Ngapi omu epata lyoge nali kara noruhafo?—Ruha 2
Vana kuna kara uhwi wokutunda kwaJehova. Age kundindira kovakurona va pakere mbili uhwi owo. Jehova kwa gava mavyukiso aga naga va vatera. Mavyukiso ogo kuvatera vanona va dive eyi nava rugana yipo epata li kare noruhafo.
1. Mavyukiso musinke ga gava Jehova kovakurona?
Jehova kuna hara vakurona va hare vana vawo ntani va litulire po siruwo sokukara nawo. Age kuna hara hena vakurona va popere vana vawo koyiponga nokuvaronga pokuruganesa nompango domoBibeli. (Yisewe 1:8) Age kutantera vaguhya ‘va pukurure [vana vawo] kuliza neyi ga hara Hompa.’ (Resa Vaefeso 6:4.) Jehova kuhafa apa vakurona ava kwama mavyukiso gendi pokurera vana vawo, ntani pokudira kuvagava va ka va rere po wopeke.
2. Mavyukiso musinke ga gava Jehova kovanona?
Jehova kutantera vanona asi: “Omu limburukwe kovakurona veni.” (Resa Vakorosi 3:20.) Apa vanona ava fumadeke nokulimburukwa vakurona vawo, awo kuhafesa Jehova ntani novakondi vawo. (Yisewe 23:22-25) Jesus kwa tulire po sihonena sosiwa apa ga kere munona. Nampili ngomu ga kere muntu gokusikilira mo, age nga limburukwa nokufumadeka vakondi vendi.—Rukasa 2:51, 52.
3. Ngapi nomu hedera pepi naKarunga ngepata?
Nsene wa kara novana, ove nampo ono hara vana woge va hare Jehova ngwendi moomu wa mu hara. Ngapi omu no yi sikisa mo eyi? Pokurugana eyi za tanta Bibeli asi: ‘Ronga vana woge [nonkango daJehova]. To di va sansekere nsene membo ono kara ndi morugendo ndi kuna pwizumuka ndi to rugana.’ (Deuteronomium 6:7) Kuronga kwa kwatera mo kuruguruka kuronga yininke. Nove wa yi diva asi mokuninka asi vanona va diworoke yininke, wa hepa kuruguruka kuyivatantera. Etjangwa eli kulikida asi twa hepa kupapara nompito yipo tu ronge vana vetu kuhamena Jehova. Alyo egano lyewa nsene mu litulira po siruwo nkenye sivike yipo mu lironge kuhamena Jehova ngepata. Nsene kapi wa kara novana, ove simpe ngo gwanena mo uwa nsene o litulira po siruwo sokulironga Nonkango daKarunga nkenye sivike.
LIRONGA KO YOYINZI
Konakona magano aga naga vatera epata li kare noruhafo ntani mepopero.
4. Ronga vana woge monkedi zeharo
Ayo kapisi ureru kuronga munona. Ngapi nazi kuvatera Bibeli? Resa Jakopo 1:19, 20, makura zogereni mapuro aga:
-
Ngapi vakurona nava likida eharo nsene kuna kuuyunga novana vawo?
-
Nsene vakurona vana handuka, morwasinke nava dilira kupukurura vana vawo posiruwo oso? a
5. Popera vana woge
Mokupopera vana woge, ayo ya kara nomulyo o zogere novana woge navenye kuhamena eligwanekero panyama. Eyi kuvhura yi kare udigu kuyirugana. Likida VIDIYO, makura zogereni mapuro aga naga kwama ko.
-
Morwasinke ayi digoperere vakondi vamwe kuuyunga novana vawo kuhamena eligwanekero panyama?
-
Ngapi omu vakurona vamwe va fatwilira vana vawo kuhamena eligwanekero panyama?
Ngwendi moomu tupu va yi pumba, uzuni waSatana kuna kudonapa unene. Resa 2 Timoteusa 3:1, 13, makura zogereni epuro eli:
-
Vadinikarunga vamwe ava va tumbura movelise 13, kukwatera vanona kononkondo. Yipo nye, morwasinke ya karera mulyo kovakurona va ronge vana vawo kuhamena eligwanekero panyama nomu nava vhura kulipopera vene?
Wa yi diva ndi?
Nombangi daJehova kwa pwagesa yimbapiratjangwa yoyinzi eyi nayi vatera vakurona va ronge vana vawo kuhamena eligwanekero panyama nomu nava lipopera vene. Tara ko sihonena simwe:
-
Popera vana woge (vidiyo)
-
Lirongera ko koMurongi goMunene, egaununo 10 ntani 32
6. Fumadeka vakondi woge
Vanona novadinkantu kuvhura va likide efumadeko monkedi ezi ava uyungisa vakurona vawo. Likida VIDIYO, makura zogereni mapuro aga naga kwama ko.
-
Morwasinke ya karera nomulyo vadinkantu va uyungise vakurona vawo nefumadeko?
-
Ngapi omu vadinkantu nava uyungisa vakurona vawo monkedi ezi nazi likida efumadeko?
Resa Yisewe 1:8, makura zogereni epuro eli:
-
Yisinke na rugana mudinkantu nsene vakondi vendi tava mu pukurura?
7. Karereni Jehova ngepata
Mapata goNombangi daJehova kulitulira po siruwo nkenye sivike va karere Jehova kumwe. Yininke musinke ava rugana poukareli wepata? Likida VIDIYO, makura zogereni mapuro aga naga kwama ko.
-
Ngapi omu epata nali kara noukareli wepata nkenye sivike?
-
Yisinke nava rugana vakurona yipo vemepata va gwanene mo uwa nokuhafera ukareli wepata?—Tara efano lyokuhova mosirongwa esi.
-
Yininke musinke nayi ninkisa epata lyeni yi mu karere udigu kurugana ukareli wepata?
Mosiruwo soVaisraeli vanare, Jehova kwa pangerere mapata ga zogere nkenye apa kuhamena Matjangwa. Resa Deuteronomium 6:6, 7, makura zogereni epuro eli:
-
Ngapi no tura pasirugana mpango ozo?
Magano gokuruganesa poukareli wepata:
-
Liwapaikireni mapongo.
-
Reseni nokuzogera yihorokwa yomoBibeli eyi nali hafera epata lyeni.
-
Nsene wa kara novanona, kwateka sirongwa sovanona ko-jw.org.
-
Nsene wa kara novanona wovadinkatu, zogereni sirongwa sovadinkantu ko-jw.org.
-
Ruganeni sidanauka somoBibeli kumwe novana veni.
-
Tarereni vidiyo ko-jw.org nokuzizogera.
VAMWE KUTANTA ASI: “Vanona kapi ava kwata egano Bibeli.”
-
Ngapi no limburura?
YINKE ONO LIRONGO?
Jehova kuna hara vakurona va hare nokuronga vana vawo ntani nokuvapopera. Age hena kwa hara vanona va fumadeke nokulimburukwa vakurona vawo, ntani mapata ga mu karere kumwe.
Erugururomo
-
Ngapi omu vakurona nava ronga vana vawo nokuvapopera?
-
Ngapi omu vanona nava likida efumadeko kovakurona vawo?
-
Mauwa musinke nava gwanena mo vemepata nsene va kara noukareli wepata nkenye sivike?
MAUZERA GAMWE
Yirongwa musinke nayi vatera munoge a liwapaikire udinkantu?
“Yirongwa ntazimwe eyi va hepa kulironga vanona” (Awake! No. 2 2019)
Lironga magano gomoBibeli aga azi gava kovantu ava ava pakere mbili vakurupe.
“Yisinke za uyunga ko Bibeli kuhamena omu natu pakera mbili vakondi wovakurupe?” (Sirongwa sokoIntaneta)
Lironga omu ya tompokere mugara gumwe ogu ga dilire kudiva kurera vana vendi.
Tara omu vaguhya nava nkondopeka elikwatakano lyawo novana vawo wovagara.
“Ngapi omu vaguhya nava kara nelikwatakano lyenene novana vawo wovagara?” (Ruhungu, 1 Mangundu 2011)
a Kuliza noBibeli, kupukurura kwa hamena mo kuronga munona, kumuvyukisa ntani nokumuvatera a rundurure nkareso zendi. Amo kapi mwa hamena mo kuhepeka munona ndi kumutekura nonyanya.—Yisewe 4:1.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
