Awˬ lawn 50
Hkʼaˬ hkʼe te leh yehˬ kʼa hkʼaw ha lehˬ ve cawˬ gʼa tuˬ le?—Awˬ tawn 2
Yaˇ lehˬ Yaˬhoˉvaˬ geh gʼa ve laꞈ shawnˍ hpehꞈ ve yoˬ. Yaˬhoˉvaˬ lehˬ awˬ pa awˬ e htaꞈ laꞈ shawnˍ chi hkʼa dehꞈ nyi haꞈ shaˉ tcuh gaˇ ve yoˬ. Awˬ pa awˬ e chi hkʼe te gʼa tuˬ Yaˬhoˉvaˬ beˆ maˍ laˇ hkawˇ gu teh taˍ ve yoˬ. Chi hkʼoˆ kaꞈ, yehˬ kʼa hkʼaw ha lehˬ ve cawˬ tuˬ yaˇ hkʼaˬ hkʼe te gʼa ve Liꞈ hpu hkʼaw beˆ maˍ piˇ ve yoˬ.
1. Yaˬhoˉvaˬ lehˬ awˬ pa awˬ e htaꞈ aˬ htoꞈ ma beˆ maˍ piˇ ve le?
Yaˬhoˉvaˬ lehˬ awˬ pa awˬ e yawˇ hui ve yaˇ htaꞈ haꞈ tcuh gaˇ leh, te gʼa ve hkʼe yaˇ geh awˬ yanˇ hkʼa dehꞈ yehˇ tcuh gaˇ ve yoˬ. Chi hkʼoˆ kaꞈ, yawˇ hui ve yaˇ htaꞈ kawˆ ve maˇ gʼa heuˆ la tuˬ nyi haꞈ shaˉ tcuh gaˇ ve yoˬ. Leh yaˇ htaꞈ maˍ piˇ tuˬ Liꞈ hpu hkʼaw laˬ ve beˆ maˍ laˇ hkawˇ yehˇ tcuh gaˇ ve yoˬ. (Tawˇ naˉ ve 1:8) Yaˬhoˉvaˬ lehˬ awˬ pa hpehꞈ ve chaw htaꞈ kʼoˆ piˇ ve, ‘nawˬ hui yaˇ hu ve awˬ hkʼaw lo Yaˬhoˉvaˬ maˍ laˇ ve hkʼe, yawˇ hui htaꞈ hkʼa dehꞈ maˍ piˇ leh sheh kʼai˗o.’ (Eˇfeˇsuꞈ 6:4 gʼaw sheˍ.) Liꞈ hpu hkʼaw beˆ maˍ laˇ ve hkʼe, awˬ pa awˬ e yawˇ hui ve yaˇ htaꞈ yawˇ hui hkʼaˇ yawˇ hui hu ve kʼo, Yaˬhoˉvaˬ ha lehˬ jaˇ tuˬ yoˬ.
2. Yaˬhoˉvaˬ lehˬ yaˇ teˇ hpaˍ htaꞈ aˬ htoꞈ ma beˆ maˍ piˇ ve le?
Yaˬhoˉvaˬ lehˬ yaˇ teˇ hpaˍ htaꞈ kʼoˆ piˇ ve, “awˬ pa awˬ e ve tawˇ hkawˇ htaꞈ na yuˬ˗oꞈ.” (Kawˇlawˇsehˇ 3:20 gʼaw sheˍ.) Yaˇ awˬ pa awˬ e htaꞈ yawˆ yan leh na yuˬ htaˇ, Yaˬhoˉvaˬ leh awˬ pa awˬ e htaꞈ ha lehˬ tuˬ te piˇ ve yoˬ. (Tawˇ naˉ ve 23:22-25) Yeˍsuˆ yaˇ ehˉ htaˇ, yawˇ daꞈ jaˇ ve henˇ yuˬ tuˬ hpehꞈ ve yoˬ. Awˬ pa awˬ e maˇ biˇ ve chaw hpehꞈ leh yawˇ biˇ ve chaw hpehꞈ ve htawˇ, awˬ pa awˬ e hkawˇ na yuˬ leh yawˆ yan piˇ ve yoˬ.—Luˉkaꞈ 2:51, 52.
3. Nawˬ ve yehˬ kʼa Yaˬhoˉvaˬ geh meuˆ daꞈ maˇ la tuˬ, nawˬ hkʼaˬ hkʼe ga piˇ gʼa ve le?
Nawˬ awˬ pa awˬ e hpehꞈ ve kʼo, nawˬ Yaˬhoˉvaˬ htaꞈ haꞈ ve hkʼe yaˇ htaꞈ kaꞈ haꞈ tcuh gaˇ ve yoˬ. Chi nawˬ hkʼaˬ hkʼe te gʼa tuˬ le? Nawˬ chi hkʼe te gʼa tuˬ Liꞈ hpu hkʼaw kʼoˆ laˇ ve, ‘nawˬ hui ve yaˇ teˇ hpaˍ htaꞈ htawˇ, Yaˬhoˉvaˬ hkawˇ maˍ piˇ˗oˆ. Yehˬ hkʼaw chehˇ htaˇ maˇ kʼoˆ, yaꞈ kʼaw te toˇ chehˇ htaˇ maˇ kʼoˆ, gʼaˇ jehˇ chehˇ htaˇ maˇ kʼoˆ, kanˉ te chehˇ htaˇ maˇ kʼoˆ, maˍ piˇ tcuhˉ taˍ˗oꞈ.’ (Bon maˍ ve 6:7) “Maˍ piˇ tcuhˉ taˍ˗oꞈ” tehꞈ kʼoˆ ve lehˬ, teˇ hkui teˇ hkui maˍ piˇ ve htaꞈ kʼoˆ gaˇ ve yoˬ. Nawˬ ve yaˇ htaꞈ awˬ lawn teˇ lawn lawn tawnˇ gʼa tcuh gaˇ ve kʼo, nawˬ yawˇ htaꞈ teˇ hkui teˇ hkui gʼa kʼoˆ maˍ piˇ ve yoˬ. Leh Liꞈ hpu chi teˇ tawn kʼoˆ gaˇ ve, awˬ pa awˬ e Yaˬhoˉvaˬ ve awˬ lawn hkʼaˬ htaˆ kaꞈ yaˇ htaꞈ gʼa maˍ piˇ ve yoˬ. Chi hkʼoˆ kaꞈ, teˇ shinˉ le le yehˬ kʼa hkʼaw oˉ kʼoˍ pui ve hkʼaˬ htaˆ kaꞈ te cawˇ ve yoˬ. Nawˬ yaˇ maˇ cawˬ ve htawˇ, teˇ shinˉ le le awˬ yanˇ hkʼa dehꞈ shawˍ teh leh, Liꞈ hpu henˇ ve kʼo nawˬ awˬ bon gʼa tuˬ yoˬ.
Henˇ shiˍ maˇ la tuˬ
Liꞈ hpu hkʼaw ve beˆ maˍ laˇ hkawˇ lehˬ yehˬ kʼa hkʼaw ve chaw teˇ gʼaˇ le le ha lehˬ ve cawˬ tuˬ, leh maˇ dawˇ haˍ tuˬ hkʼaˬ hkʼe te ga laˇ gʼa ve le, teˇ geh henˇ sheˍ.
4. Nawˬ ve yaˇ htaꞈ haꞈ pehnˇ ve hkʼaw maˍ piˇ˗oˆ
Yaˇ htaꞈ maˍ piˇ ve lehˬ hkʼaˬ htaˆ kaꞈ sha ve maˇ heˆ. Yaꞈ hkʼaˇ, Liꞈ hpu hkʼaˬ hkʼe ga laˇ gʼa ve le? Yaˍkoˆ liꞈ 1:19, 20 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ pa awˬ e yawˇ hui ve yaˇ geh tawˇ yaw daꞈ htaˇ, yaˇ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le?
-
Aˬ htoꞈ ma pa taw awˬ pa awˬ e nyi ma zuhˆ chehˇ htaˇ, yaˇ htaꞈ maˇ maˍ piˇ cawˇ ve le? a
5. Nawˬ ve yaˇ htaꞈ haꞈ shaˉ piˇ˗oˆ
Nawˬ ve yaˇ htaꞈ haꞈ shaˉ piˇ tuˬ, hawˉ hkʼaˆ yaˇ miˇ teˇ geh zuhꞈ ve awˬ lawn kʼoˆ maˍ piˇ ve a yeˇ uiˍ jaˇ. Yaꞈ hkʼaˇ, nawˬ ve yaˇ geh awˬ lawn chi yaw daꞈ tuˬ nawˬ yaꞈ taw ve yoˬ hehˉ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw awˬ pa awˬ e teˇ hpaˍ hpaˍ yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn maˇ kʼoˆ maˍ piˇ haˆ ve le?
-
Awˬ pa awˬ e teˇ hpaˍ hpaˍ yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn hkʼaˬ hkʼe kʼoˆ maˍ piˇ ve le?
Liꞈ hpu hkʼaw kʼoˆ ve, Saˍtanˍ ve miˬ guiˬ lehˬ shaˬ te shaˬ haiˬ la tuˬ yoˬ. 2 Tiˆmoˉseˍ liꞈ 3:1, 13 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Kaˇ nanˉ ehˉ 13 hkʼaw kʼoˆ ve, haiˬ ve chaw lehˬ shaˬ te shaˬ haiˬ la leh, yaˇ htaꞈ naˬ mvuhˇ naˬ taweh te piˇ la ve yoˬ. Chi htaꞈ pa taw, awˬ pa awˬ e yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn kʼoˆ maˍ piˇ ve, leh yaˇ htaꞈ naˬ mvuhˇ naˬ taweh maˇ gʼa te la tuˬ ve awˬ lawn kʼoˆ maˍ piˇ ve lehˬ, aˬ htoꞈ ma pa taw a yeˇ uiˍ jaˇ ve le?
Nawˬ shiˍ˗aˬ laˇ?
Awˬ pa awˬ e hpehꞈ ve chaw yawˇ hui ve yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn kʼoˆ maˍ piˇ leh, shu yawˇ hui ve yaˇ htaꞈ naˬ mvuhˇ naˬ taweh maˇ gʼa te la tuˬ ve awˬ lawn kʼoˆ maˍ piˇ tuˬ, Yaˬhoˉvaˬ ve Shaˉhkiˆhkanˍ ve chaw laꞈ caˉ laiˉ ceuˬ te tawˆ ve yoˬ. Tawˇ pa haˉ te kʼo:
-
“Yaˇ htaꞈ hawˉ hkʼaˆ yaˇ miˇ teˇ geh zuhꞈ ve awˬ lawn kʼoˆ maˍ piˇ sheˍ” (Tu loˬ! 2016 hkʼawꞈ 5 kʼoˆ teˇ kʼoˆ)
6. Nawˬ ve awˬ pa awˬ e htaꞈ yawˆ yan˗o
Yaˇ ehˉ leh yaˇ nehˬ teˇ hpaˍ awˬ pa awˬ e htaꞈ yawˆ yan piˇ ve tehꞈ, tawˇ yaw ve leh te ve hkʼaw hpeuꞈ maw piˇ gʼa ve yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te yaˇ ehˉ leh yaˇ nehˬ awˬ pa awˬ e htaꞈ yawˆ yan ve hkʼaw yaw piˇ ve lehˬ awˬ bon cawˬ ve le?
-
Yaˇ ehˉ leh yaˇ nehˬ awˬ pa awˬ e geh tawˇ yaw daꞈ htaˇ yawˆ yan ve hkʼaw hkʼaˬ hkʼe te yaw piˇ gʼa ve le?
Tawˇ naˉ ve liꞈ 1:8 gʼaw leh na hkawˇ chi htaꞈ tawˇ yaw daꞈ sheˍ:
-
Awˬ pa awˬ e beˆ maˍ laˇ htaˇ, yaˇ ehˉ leh yaˇ nehˬ hkʼaˬ hkʼe te cawˇ ve le?
7. Yehˬ kʼa hkʼaw ve chaw hkʼa peu˗eˬ Yaˬhoˉvaˬ htaꞈ teˇ geh oˉ kʼoˍ pui ve
Yaˬhoˉvaˬ ve Shaˉhkiˆhkanˍ ve chaw teˇ yehˬ kʼa le le, teˇ shinˉ le le awˬ yanˇ shawˍ teh leh yehˬ kʼa hkʼaw oˉ kʼoˍ pui ve teˇ geh te ve yoˬ. Yehˬ kʼa hkʼaw oˉ kʼoˍ pui htaˇ ngaˬ hui aˬ htoꞈ ma te gʼa ve le? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Teˇ shinˉ le le yehˬ kʼa hkʼaw oˉ kʼoˍ pui gʼa tuˬ yehˬ kʼa hkʼaw ve chaw hkʼaˬ hkʼe te gʼa ve le?
-
Yehˬ kʼa hkʼaw oˉ kʼoˍ pui htaˇ pyawˍ leh awˬ bon gʼa tuˬ, awˬ pa awˬ e aˬ htoꞈ ma te gʼa ve le?—Chi teˇ lawn tanˬ htaˇ ve awˬ han htaꞈ nyi sheˍ.
-
Nawˬ ve yehˬ kʼa hkʼaw oˉ kʼoˍ maˇ gʼa pui tuˬ, tawˍ laˇ tsuhˇ laˇ ve aˬ htoꞈ ma cawˬ ve le?
Iˉsaˍreˍlaˆ chaw ve awˬ co˗e htaˇ, Yaˬhoˉvaˬ lehˬ teˇ yehˬ kʼa le le htaꞈ yawˇ maˍ piˇ ve awˬ lawn hkʼaˬ htaˆ kaꞈ yaw daꞈ tcuh gaˇ ve yoˬ. Bon maˍ ve liꞈ 6:6, 7 gʼaw leh na hkawˇ chi htaꞈ tawˇ yaw daꞈ sheˍ:
-
Beˆ maˍ laˇ hkawˇ chi htaꞈ nawˬ hkʼaˬ hkʼe te gʼaꞈ te gʼa tuˬ le?
Yehˬ kʼa hkʼaw oˉ kʼoˍ pui htaˇ te gʼa ve awˬ ceuˬ teˇ hpaˍ:
-
Hkriꞈ yaˇ awˬ moˍ hpawnˬ daꞈ tuˬ teˇ geh gu ve.
-
Nawˬ ve yehˬ kʼa hkʼaw ve chaw dawˇ cawˇ ve awˬ lawn Liꞈ hpu teˇ geh gʼaw leh tawˇ yaw daꞈ ve.
-
Nawˬ ve yaˇ maˇ uiˍ sheˍ ve kʼo, vehˆsaiˉ jw.org hkʼaw cawˬ ve yaˇ ehˉ te gʼa ve awˬ ceuˬ dao˗lonꞈ gʼa ve, maˇ heˆ kʼo yanˍ tawˆ gʼa ve.
-
Nawˬ ve yaˇ, yaˇ nehˬ hpehꞈ ve kʼo, vehˆsaiˉ jw.org hkʼaw cawˬ ve yaˇ nehˬ awˬ pon awˬ lawn nyi leh tawˇ yaw daꞈ sheˍ.
-
Nawˬ ve yaˇ geh Liꞈ hpu hkʼaw cawˬ ve awˬ lawn leˍ guiˇ sheˍ.
-
Vehˆsaiˉ jw.org hkʼaw cawˬ ve VDO nyi leh tawˇ yaw daꞈ sheˍ.
Chaw teˇ hpaˍ kʼoˆ ve: “Liꞈ hpu lehˬ yaˇ ehˉ awˬ pon na gʼa tuˬ haˍ jaˇ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Yaˬhoˉvaˬ lehˬ awˬ pa awˬ e yawˇ hui ve yaˇ htaꞈ haꞈ ve, maˍ piˇ ve, leh nyi haꞈ shaˉ tcuh gaˇ ve yoˬ. Leh yaˇ teˇ hpaˍ htawˇ awˬ pa awˬ e htaꞈ yawˆ yan leh, na yuˬ tcuh gaˇ ve yoˬ. Yaˬhoˉvaˬ lehˬ yehˬ kʼa hkʼaw ve chaw hkʼa peu˗eˬ yawˇ htaꞈ teˇ geh oˉ kʼoˍ pui tcuh gaˇ ve yoˬ.
Kʼawꞈ gʼaꞈ na ve
-
Awˬ pa awˬ e yawˇ hui ve yaˇ htaꞈ hkʼaˬ hkʼe te maˍ piˇ leh haꞈ shaˉ piˇ gʼa ve le?
-
Yaˇ lehˬ awˬ pa awˬ e htaꞈ yawˆ yan ve tehꞈ hkʼaˬ hkʼe te hpeuꞈ maw piˇ gʼa ve le?
-
Teˇ shinˉ le le awˬ yanˇ shawˍ teh leh yehˬ kʼa hkʼaw oˉ kʼoˍ pui ve kʼo, aˬ htoꞈ ma awˬ bon gʼa tuˬ le?
Kʼawꞈ caˉ nyi gʼa ve
Yaˇ uiˍ la kʼo daꞈ ve chaw hpehꞈ tuˬ, aˬ htoꞈ ma awˬ lawn maˍ piˇ cawˇ ve le?
“Awˬ pa awˬ e yaˇ htaꞈ maˍ piˇ cawˇ ve 6 lawn” (Tu loˬ! 2019 hkʼawꞈ 2 kʼoˆ teˇ kʼoˆ)
Awˬ pa awˬ e mawˇ˗oˬ ve htaꞈ nyi haꞈ shaˉ ve chaw awˬ pon, Liꞈ hpu hkʼaw yawˇ hui htaꞈ aˬ htoꞈ ma beˆ maˍ piˇ ve le, gʼaw nyi sheˍ.
Awˉ lawˉ htaˇ awˬ pa teˇ gʼaˇ yawˇ ve yaˇ htaꞈ hu tuˬ ve awˬ hkʼaˇ maˇ shiˍ. Yaꞈ hkʼaˇ, yawˇ daꞈ ve awˬ pa hpehꞈ gʼa tuˬ aˬ htoꞈ ma ga piˇ ve le, nyi sheˍ.
Yaˇ htaꞈ hkʼaˬ hkʼe maˍ piˇ tuˬ Yaˬhoˉvaˬ ngaˬ hui htaꞈ maˍ laˇ ve (5:58)
Awˬ pa lehˬ yawˇ ve yaˇ paˍ geh hkʼaˬ hkʼe te meuˆ daꞈ maˇ la gʼa tuˬ le, gʼaw nyi sheˍ.
a Liꞈ hpu hkʼaw “maˍ laˇ ve” tehꞈ kʼoˆ ve lehˬ beˆ maˍ laˇ ve, leh maˇ daꞈ ve te hkʼaˇ dawˇ hkʼaˇ htaꞈ gu tuˬ maˍ laˇ ve htaꞈ kʼoˆ gaˇ ve yoˬ. Chi lehˬ dawˆ ve, maˇ heˆ leh hehnˇ ve hkʼaw te piˇ ve htaꞈ kʼoˆ gaˇ ve maˇ heˆ.—Tawˇ naˉ ve 4:1.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
