ບົດທີ 50
ເຮັດແນວໃດຄອບຄົວຈຶ່ງຈະມີຄວາມສຸກຫຼາຍຂຶ້ນ?—ຕອນທີ 2
ລູກເປັນຄືຂອງຂວັນທີ່ມາຈາກພະເຢໂຫວາ. ແລະເພິ່ນກໍຢາກໃຫ້ພໍ່ແມ່ເບິ່ງແຍງຂອງຂວັນນີ້ຢ່າງດີ. ເພິ່ນເລີຍໃຫ້ຄຳແນະນຳທີ່ຢູ່ໃນຄຳພີໄບເບິນເພື່ອຊ່ວຍພໍ່ແມ່ໃຫ້ເຮັດແບບນັ້ນໄດ້. ແລະຄຳແນະນຳທີ່ຢູ່ໃນຄຳພີໄບເບິນກໍຈະຊ່ວຍໃຫ້ລູກຮູ້ວ່າເຂົາເຈົ້າຈະເຮັດຫຍັງໄດ້ແດ່ເພື່ອເຮັດໃຫ້ຄອບຄົວມີຄວາມສຸກຫຼາຍຂຶ້ນ.
1. ພະເຢໂຫວາໃຫ້ຄຳແນະນຳຫຍັງກັບພໍ່ແມ່?
ພະເຢໂຫວາຢາກໃຫ້ພໍ່ແມ່ຮັກລູກແລະໃຊ້ເວລາກັບລູກໃຫ້ຫຼາຍທີ່ສຸດເທົ່າທີ່ຈະເຮັດໄດ້. ເພິ່ນຢາກໃຫ້ເຂົາເຈົ້າປົກປ້ອງລູກແລະສອນລູກໂດຍໃຊ້ຄຳແນະນຳທີ່ມາຈາກຄຳພີໄບເບິນ. (ສຸພາສິດ 1:8) ພະເຢໂຫວາບອກຄົນທີ່ເປັນພໍ່ວ່າ: “ໃຫ້ລ້ຽງດູ [ລູກ] ດ້ວຍ . . . ຄຳຕັກເຕືອນຈາກພະເຢໂຫວາ.” (ອ່ານເອເຟໂຊ 6:4) ພະເຢໂຫວາຈະມີຄວາມສຸກຫຼາຍຖ້າພໍ່ແມ່ລ້ຽງລູກໂດຍເຮັດຕາມສິ່ງທີ່ເພິ່ນບອກໄວ້ໃນຄຳພີໄບເບິນແລະບໍ່ປ່ອຍໃຫ້ຄົນອື່ນມາເຮັດໜ້າທີ່ພໍ່ແມ່ແທນເຂົາເຈົ້າ.
2. ພະເຢໂຫວາໃຫ້ຄຳແນະນຳຫຍັງກັບຄົນທີ່ເປັນລູກ?
ພະເຢໂຫວາບອກຄົນທີ່ເປັນລູກວ່າ: “ໃຫ້ເຊື່ອຟັງພໍ່ແມ່.” (ອ່ານໂກໂລຊາຍ 3:20) ເມື່ອລູກນັບຖືແລະເຊື່ອຟັງພໍ່ແມ່ ເຂົາເຈົ້າກໍເຮັດໃຫ້ພະເຢໂຫວາແລະພໍ່ແມ່ມີຄວາມສຸກ. (ສຸພາສິດ 23:22-25) ຕອນທີ່ພະເຢຊູຍັງເປັນເດັກນ້ອຍເພິ່ນເປັນຕົວຢ່າງທີ່ດີຫຼາຍ. ເຖິງວ່າເພິ່ນຈະເປັນມະນຸດທີ່ສົມບູນແບບ ແຕ່ເພິ່ນກໍເຊື່ອຟັງແລະນັບຖືພໍ່ແມ່ຂອງເພິ່ນ.—ລູກາ 2:51, 52
3. ເຈົ້າຈະຊ່ວຍຄອບຄົວໃຫ້ສະໜິດກັບພະເຢໂຫວາຫຼາຍຂຶ້ນໄດ້ແນວໃດ?
ຖ້າເຈົ້າເປັນພໍ່ແມ່ ເຈົ້າຄືຊິຢາກໃຫ້ລູກຮັກພະເຢໂຫວາຄືທີ່ເຈົ້າຮັກເພິ່ນ. ແຕ່ເຈົ້າຈະເຮັດແບບນັ້ນໄດ້ແນວໃດ? ເຈົ້າຈະເຮັດແບບນັ້ນໄດ້ໂດຍເຮັດຕາມຄຳແນະນຳໃນຄຳພີໄບເບິນທີ່ບອກວ່າ: “ເຈົ້າຕ້ອງໝັ່ນສອນລູກຂອງເຈົ້າ [ດ້ວຍຄຳສອນຂອງພະເຢໂຫວາ] ຕອນທີ່ເຈົ້ານັ່ງຢູ່ເຮືອນແລະຍ່າງຢູ່ຫົນທາງ ຕອນທີ່ເຈົ້ານອນແລະລຸກແຕ່ນອນ.” (ພະບັນຍັດ 6:7, ລ.ມ.) ຄຳວ່າ “ໝັ່ນສອນ” ໝາຍເຖິງສອນບາງເລື່ອງເລື້ອຍໆ. ຖ້າເຈົ້າຢາກຈະຊ່ວຍໃຫ້ລູກຈື່ບາງເລື່ອງໄດ້ ເຈົ້າກໍຕ້ອງເວົ້າເລື່ອງນັ້ນກັບເຂົາເຈົ້າເລື້ອຍໆ. ດັ່ງນັ້ນ ຂໍ້ຄຳພີນີ້ກຳລັງບອກວ່າພໍ່ແມ່ຄວນຫາໂອກາດລົມກັບລູກເລື່ອງພະເຢໂຫວາເປັນປະຈຳ. ນອກຈາກນັ້ນ ເຈົ້າຄວນຈັດໃຫ້ມີການນະມັດສະການພະເຢໂຫວານຳກັນເປັນຄອບຄົວທຸກອາທິດ. ເຖິງວ່າເຈົ້າຈະບໍ່ມີລູກ ເຈົ້າກໍຈະໄດ້ຮັບປະໂຫຍດຖ້າເຈົ້າຈັດເວລາໄວ້ທຸກອາທິດເພື່ອສຶກສາບາງເລື່ອງຈາກຄຳພີໄບເບິນ.
ຮຽນຮູ້ຫຼາຍຂຶ້ນ
ຄຳແນະນຳທີ່ເປັນປະໂຫຍດໃນຄຳພີໄບເບິນຈະຊ່ວຍໃຫ້ທຸກຄົນໃນຄອບຄົວມີຄວາມສຸກແລະຮູ້ສຶກປອດໄພ.
4. ສອນລູກດ້ວຍຄວາມຮັກ
ການສອນລູກອາດບໍ່ແມ່ນເລື່ອງງ່າຍສະເໝີໄປ. ແຕ່ຄຳພີໄບເບິນມີຄຳແນະນຳຫຍັງກ່ຽວກັບເລື່ອງນີ້? ອ່ານຢາໂກໂບ 1:19, 20 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ພໍ່ແມ່ທີ່ຮັກລູກຄວນຈະລົມກັບລູກແບບໃດ?
-
ເປັນຫຍັງຕອນທີ່ພໍ່ແມ່ກຳລັງໃຈຮ້າຍ ເຂົາເຈົ້າບໍ່ຄວນອົບຮົມສັ່ງສອນລູກ? a
5. ປົກປ້ອງລູກຂອງເຈົ້າ
ເປັນເລື່ອງສຳຄັນຫຼາຍທີ່ພໍ່ແມ່ຈະລົມກັບລູກກ່ຽວກັບເລື່ອງເພດເພື່ອຈະປົກປ້ອງເຂົາເຈົ້າ. ແຕ່ເຈົ້າອາດຮູ້ສຶກອາຍທີ່ຈະລົມກັບລູກກ່ຽວກັບເລື່ອງນີ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງອາດເປັນເລື່ອງຍາກສຳລັບພໍ່ແມ່ບາງຄົນທີ່ຈະລົມກັບລູກເລື່ອງເພດ?
-
ພໍ່ແມ່ບາງຄົນໃຊ້ວິທີໃດແດ່ເພື່ອລົມກັບລູກເລື່ອງເພດ?
ຄຳພີໄບເບິນບອກວ່າໂລກຂອງຊາຕານຈະຊົ່ວຮ້າຍຫຼາຍຂຶ້ນເລື້ອຍໆ. ອ່ານ 2 ຕີໂມທຽວ 3:1, 13 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນຂໍ້ 13 ບອກວ່າຄົນຊົ່ວຈະແຮ່ງຊົ່ວຮ້າຍຂຶ້ນ ຄົນຊົ່ວບາງຄົນມັກທຳຮ້າຍເດັກນ້ອຍທາງເພດ. ດັ່ງນັ້ນ ເປັນຫຍັງຈຶ່ງສຳຄັນທີ່ພໍ່ແມ່ຈະສອນລູກກ່ຽວກັບເລື່ອງເພດແລະສອນວິທີປ້ອງກັນໂຕຈາກຄົນທີ່ທຳຮ້າຍເດັກນ້ອຍທາງເພດ?
ເຈົ້າຮູ້ບໍ?
ພະຍານພະເຢໂຫວາມີໜັງສືແລະວິດີໂອຫຼາຍເລື່ອງທີ່ຊ່ວຍໃຫ້ພໍ່ແມ່ສອນລູກກ່ຽວກັບເລື່ອງເພດ ແລະຈະຊ່ວຍໃຫ້ພໍ່ແມ່ຮູ້ວິທີປົກປ້ອງລູກຈາກການຖືກທຳຮ້າຍທາງເພດ. ຕົວຢ່າງເຊັ່ນ:
-
ປົກປ້ອງລູກຂອງເຈົ້າ (ວິດີໂອ)
-
ຮຽນຈາກຄູຜູ້ຍິ່ງໃຫຍ່ ບົດທີ 10 ແລະ 32
-
“ສອນລູກເລື່ອງເພດ” (ຕື່ນເຖີດ! ສະບັບທີ 5, 2016)
6. ນັບຖືພໍ່ແມ່ຂອງເຈົ້າ
ຕອນທີ່ລົມກັບພໍ່ແມ່ ເດັກນ້ອຍແລະໄວລຸ້ນຈະເຮັດໃຫ້ເຫັນແນວໃດວ່າເຂົາເຈົ້ານັບຖືພໍ່ແມ່. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງຈຶ່ງສຳຄັນທີ່ເດັກນ້ອຍແລະໄວລຸ້ນຈະລົມກັບພໍ່ແມ່ດ້ວຍຄວາມນັບຖື?
-
ເດັກນ້ອຍແລະໄວລຸ້ນຈະເຮັດຫຍັງໄດ້ແດ່ເພື່ອຈະລົມກັບພໍ່ແມ່ດ້ວຍຄວາມນັບຖື?
ອ່ານສຸພາສິດ 1:8 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເດັກນ້ອຍແລະໄວລຸ້ນຄວນເຮັດແນວໃດເມື່ອໄດ້ຮັບຄຳແນະນຳຈາກພໍ່ແມ່?
7. ນະມັດສະການພະເຢໂຫວານຳກັນເປັນຄອບຄົວ
ທຸກອາທິດພະຍານພະເຢໂຫວາແຕ່ລະຄອບຄົວຈະຈັດເວລາໄວ້ສະເພາະເພື່ອນະມັດສະການປະຈຳຄອບຄົວ. ເຮົາຈະເຮັດຫຍັງໄດ້ແດ່ໃນການນະມັດສະການປະຈຳຄອບຄົວ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຮົາຈະເຮັດແນວໃດເພື່ອຈະມີການນະມັດສະການປະຈຳຄອບຄົວໄດ້ທຸກອາທິດ?
-
ພໍ່ແມ່ຈະເຮັດຫຍັງໄດ້ແດ່ເພື່ອໃຫ້ການນະມັດສະການປະຈຳຄອບຄົວມ່ວນແລະມີປະໂຫຍດ?—ເບິ່ງຮູບທຳອິດຂອງບົດນີ້
-
ອັນໃດອາດເຮັດໃຫ້ບໍ່ງ່າຍສຳລັບຄອບຄົວຂອງເຈົ້າທີ່ຈະມີການນະມັດສະການປະຈຳຄອບຄົວນຳກັນ?
ໃນສະໄໝກ່ອນ ພະເຢໂຫວາຢາກໃຫ້ຄົນອິດສະຣາເອນທຸກຄອບຄົວລົມກັນກ່ຽວກັບຄຳສອນຂອງເພິ່ນເປັນປະຈຳ. ອ່ານພະບັນຍັດ 6:6, 7 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຈົ້າຈະເຮັດຕາມຄຳແນະນຳນີ້ໄດ້ແນວໃດ?
ເຈົ້າຈະເຮັດຫຍັງໄດ້ແດ່ໃນການນະມັດສະການປະຈຳຄອບຄົວ?
-
ກຽມການປະຊຸມນຳກັນ.
-
ອ່ານແລະລົມກັນກ່ຽວກັບເລື່ອງລາວທີ່ໜ້າສົນໃຈໃນຄຳພີໄບເບິນ.
-
ຖ້າລູກຂອງເຈົ້າຍັງນ້ອຍຢູ່ ໃຫ້ດາວໂຫຼດຫຼືພິມກິດຈະກຳສຳລັບເດັກນ້ອຍຈາກເວັບໄຊ jw.org.
-
ຖ້າເຈົ້າມີລູກທີ່ເປັນໄວລຸ້ນ ໃຫ້ລົມກັນກ່ຽວກັບບົດຄວາມສຳລັບໄວລຸ້ນທີ່ຢູ່ໃນເວັບໄຊ jw.org.
-
ຫຼິ້ນລະຄອນກ່ຽວກັບເລື່ອງລາວທີ່ຢູ່ໃນຄຳພີໄບເບິນກັບລູກ.
-
ເບິ່ງແລະລົມກັນກ່ຽວກັບວິດີໂອທີ່ຢູ່ໃນເວັບໄຊ jw.org.
ບາງຄົນເວົ້າວ່າ: “ຄຳພີໄບເບິນຍາກເກີນໄປສຳລັບເດັກນ້ອຍ.”
-
ຖ້າມີຄົນເວົ້າແບບນີ້ ເຈົ້າຈະຕອບແນວໃດ?
ສະຫຼຸບ
ພະເຢໂຫວາຢາກໃຫ້ພໍ່ແມ່ຮັກລູກ ສອນລູກ ແລະປົກປ້ອງເຂົາເຈົ້າ ເພິ່ນຢາກໃຫ້ລູກນັບຖືແລະເຊື່ອຟັງພໍ່ແມ່ນຳ ແລະຢາກໃຫ້ທັງຄອບຄົວນະມັດສະການເພິ່ນນຳກັນ.
ຄຳຖາມທົບທວນ
-
ພໍ່ແມ່ຈະສອນແລະປົກປ້ອງລູກໄດ້ແນວໃດ?
-
ລູກຈະເຮັດໃຫ້ເຫັນແນວໃດວ່າເຂົາເຈົ້ານັບຖືພໍ່ແມ່?
-
ຖ້າຈັດເວລາໄວ້ສະເພາະໃນແຕ່ລະອາທິດເພື່ອນະມັດສະການປະຈຳຄອບຄົວນຳກັນ ທັງຄອບຄົວຈະໄດ້ຮັບປະໂຫຍດຫຍັງແດ່?
ເບິ່ງເພີ່ມເຕີມ
ມີເລື່ອງສຳຄັນຫຍັງແດ່ທີ່ເຈົ້າຕ້ອງສອນລູກເພື່ອຈະຊ່ວຍກຽມເຂົາເຈົ້າໃຫ້ເປັນຜູ້ໃຫຍ່ທີ່ດີ?
“6 ເລື່ອງທີ່ພໍ່ແມ່ຕ້ອງສອນລູກ” (ຕື່ນເຖີດ! ສະບັບທີ 2, 2019)
ຄຳພີໄບເບິນມີຄຳແນະນຳຫຍັງສຳລັບຄົນທີ່ເບິ່ງແຍງພໍ່ແມ່ສູງອາຍຸ.
“ຄຳພີໄບເບິນເວົ້າແນວໃດກ່ຽວກັບການເບິ່ງແຍງພໍ່ແມ່ທີ່ສູງອາຍຸ?” (ບົດຄວາມໃນເວັບໄຊ)
ແຕ່ກ່ອນຜູ້ຊາຍຄົນໜຶ່ງບໍ່ຮູ້ວ່າຈະລ້ຽງລູກແນວໃດແຕ່ອັນໃດຊ່ວຍລາວໃຫ້ເປັນພໍ່ທີ່ດີໄດ້.
ພໍ່ກັບລູກຊາຍຈະສະໜິດກັນຫຼາຍຂຶ້ນໄດ້ແນວໃດ?
“ພໍ່ກັບລູກຊາຍຈະສະໜິດສະໜົມກັນຢູ່ສະເໝີໄດ້ແນວໃດ?” (ຫໍສັງເກດການ 1 ພະຈິກ 2011)
a ໃນຄຳພີໄບເບິນຄຳວ່າ “ອົບຮົມສັ່ງສອນ” ໝາຍເຖິງການສອນ ການແນະນຳ ແລະການແກ້ໄຂຄວາມຄິດແລະການກະທຳທີ່ບໍ່ຖືກຕ້ອງ. ຄຳນີ້ບໍ່ໄດ້ໝາຍເຖິງການທຳຮ້າຍຫຼືການໃຊ້ຄວາມຮຸນແຮງ.—ສຸພາສິດ 4:1
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
