TUTO 50
Ki Lika Mañi Zekona Kumitusa Kuba ni Tabo Mwa Lubasi?—Kalulo 2
Bana ki mpo yezwa ku Jehova. Jehova ubata kuli bashemi bababalele hande bana babona. Kacwalo, ufile bashemi likelezo zekona kubatusa kueza cwalo. Bana ni bona habasebelisa likelezo zeo, bakona kutahisa tabo mwa lubasi.
1. Jehova ubata kuli bashemi baezeñi?
Jehova ubata kuli bashemi balate bana babona mi batandange nako yeñata ni bona. Hape ubata kuli bashemi basileleze bana babona kwa lika zekona kubatahiseza butata, ni kubaluta ka kuitusisa Bibele. (Liproverbia 1:8) Jehova ufa bashemi babaana kelezo yeli: ‘Muzwelepili kuhulisa bana bamina ka kelezo ya Jehova.’ (Mubale Maefese 6:4.) Jehova watabanga habona bashemi inze bahulisa hande bana babona kufita kufa buikalabelo bo ku mutu yomuñwi.
2. Jehova ubata kuli bana baezeñi?
Jehova ulaela bana kuli: “Muutwe bashemi bamina.” (Mubale Makolose 3:20.) Haiba bana bakuteka bashemi babona ni kubautwa, bakatabisa Jehova hamohocwalo ni bashemi babona. (Liproverbia 23:22-25) Jesu naatomile mutala omunde sina mwana. Nihaike kuli upetahalile, Jesu naautwa ni kukuteka bashemi bahae ba fa lifasi.—Luka 2:51, 52.
3. Lubasi lwamina lukona kusutelela cwañi ku Mulimu?
Haiba mu bashemi, mubata kuli bana bamina balate hahulu Jehova inge momu mulatela. Mukona kueza cwañi cwalo? Mukona kueza cwalo ka kusebelisa kelezo ya mwa Bibele ye, yeli: “Unani kualuta bana bahao ka kukuta-kutela ni kuabulela hauinzi mwa ndu yahao, ni hauzamaya mwa nzila, ni haulobala, ni hauzuha.” (Deuteronoma 6:7) Taba yeo iama kuluta mutu yomuñwi nto yeñwi ka kukuta-kutela. Mwendi mulemuhile kuli bana bamina bakona feela kuutwisisa nto yeñwi haiba mukuta-kutela kubahupulisa za nto yeo. Liñolo le litalusa kuli muswanela kufumananga nako ya kuluta bana bamina ka za Jehova. Muswanela kulapelanga sina lubasi sunda ni sunda. Haiba hamuna bana, musakona kufumananga nako sunda ni sunda ya kuituta Linzwi la Mulimu.
MUBATISISE
Munyakisise zemukona kueza kuli muswalisane ni kuba ni tabo mwa lubasi.
4. Mubonise lilato hamuluta bana bamina
Kuluta mwana haki musebezi obunolo. Bibele ikona kumitusa cwañi hamunze muluta mwanaa mina? Mubale Jakobo 1:19, 20, mi kihona mukanyakisisa lipuzo zelatelela:
-
Bashemi bakona kubonisa cwañi lilato habaambolisana ni bana babona?
-
Ki kabakalañi mushemi yanyemile hasaswaneli kukalimela mwanaa hae? a
5. Musileleze bana bamina
Kuli mukone kusileleza bana bamina, muswanela kuambolanga ni mañi ni mañi wabona ka za somano. Taba yeo ikona kubonahala taata. Mubuhe VIDIO, mi kihona mukanyakisisa lipuzo zelatelela.
-
Ki kabakalañi bashemi babañwi habasa lukuluhangi kuambola ni bana babona ka za somano?
-
Ki lika mañi zebaezize bashemi babañwi kuli batuse bana babona kuziba litaba zeama somano?
Sina mone kupolofitezwi, miinelo mwa lifasi le, lelibusiwa ki Satani, izwelapili kuba yemaswe hahulu ni kufita. Mubale 2 Timotea 3:1, 13, mi kihona mukanyakisisa puzo yelatelela:
-
Batu babañwi babamaswe babatalusizwe mwa timana 13 bashengulanga banana. Kacwalo, ki kabakalañi bashemi habatokwa kulutanga bana babona litaba zeama somano ni kubaluta mobakona kuisileleleza kwa batu babamaswe babakona kubashengula?
Kana mwaziba?
Lipaki za Jehova bahatisize litaba zeñata zekona kutusa bashemi kuluta bana babona ka za somano ni kusileleza bana babona kwa batu babamaswe. Ka mutala, mubone:
-
Musileleze Bana Bamina (vidio)
-
“Kuluta Mwanaa Mina ka za Somano” (Muzuhe! No. 5 2016)
6. Bana mukuteke bashemi bamina
Bana bakona kubonisa kuli bakuteka bashemi babona ka mobaambolela ni bona. Mubuhe VIDIO, mi kihona mukanyakisisa lipuzo zelatelela.
-
Ki kabakalañi mwana haswanela kuambolanga hande ni bashemi bahae?
-
Mwana ukona kuambola cwañi ni bashemi bahae ka nzila yebonisa kuli wabakuteka?
Mubale Liproverbia 1:8, mi kihona mukanyakisisa puzo yelatelela:
-
Mwana uswanela kueza cwañi bashemi bahae haba mubulelela zaswanela kueza?
7. Mulapele Jehova sina lubasi
Mabasi a Lipaki za Jehova abanga ni nako ya kuituta hamoho za Mulimu sunda ni sunda. Ki lika mañi zebaezanga ka nako ya kulapela sina lubasi? Mubuhe VIDIO, mi kihona mukanyakisisa lipuzo zelatelela.
-
Ki lika mañi zekona kutusa lubasi kubanga ni nako ya kulapela sina lubasi kamita?
-
Ki lika mañi zaswanela kueza mushemi kuli atuse lubasi lwahae kuikola kulapela sina lubasi?—Mubone siswaniso sesi fa likepe 209.
-
Ki lika mañi zekona kutahisa kuli kube taata kulapela hamoho sina lubasi?
Mwa linako za Maisilaele, Jehova naalaezi bashemi kuli bafumanange nako ya kumulapela sina lubasi kamita. Mubale Deuteronoma 6:6, 7, mi kihona mukanyakisisa puzo yelatelela:
-
Mukona kusebelisa cwañi sikuka sesi kwa timana ye?
Zemukona kueza ka nako ya kulapela sina lubasi:
-
Kuitukiseza mikopano ya puteho.
-
Kubala ni kunyakisisa likande la mwa Bibele lemutabela.
-
Haiba munani bana babanyinyani, mwakona kuitusisa litaba ze fa jw.org.
-
Haiba munani bana babasa nonoboka, mwakona kuitusisa litaba zekona kubatusa ze fa jw.org.
-
Mueze papali ya litaba za mwa Bibele ni bana bamina.
-
Mubuhe ni kunyakisisa vidio yeñwi ye fa jw.org.
BABAÑWI BABULELANGA KULI: “Banana habakoni kuutwisisa Bibele.”
-
Mukona kualaba cwañi mutu yabulela cwalo?
LITABA KA BUKUSWANI
Jehova ubata kuli bashemi balate bana babona, babalute, ni kubasileleza, mi hape ubata kuli bana bakuteke bashemi babona ni kubautwa, ni kuli mabasi aswalisane hamoho kumulapela.
Mulundulule
-
Bashemi bakona kuluta cwañi bana babona ni kubasileleza?
-
Bana bakona kubonisa cwañi kuli bakuteka bashemi babona?
-
Lubasi lukona kutusiwa cwañi haiba lufumananga nako sunda ni sunda kuituta za Mulimu hamoho?
MUBONE LITABA ZEÑWI
Ki lituto mañi zekona kutusa mwanaa mina kuyoba mutu yomunde hakahula?
“Lituto ze 6 Zebatokwa Kulutiwa Banana” (Muzuhe! No. 2 2019)
Muitute zebakona kueza batu babababalelanga basupali.
“Bibele Ibulelañi ka za Kubabalela Bashemi Babasupezi?” (Taba ya fa webusaiti)
Mubone zenetusize muuna yomuñwi kuhulisa hande bana bahae.
Munyakisise zekona kutusa bashemi babaana kuba ni silikani sesinde ni bana babona babashimani.
a Ka kuya ka Bibele, “kalimelo” ikopanyeleza kulaela, kufa ketelelo, ni kuhakulula. Kacwalo, kukalimela hakutalusi kunyandisa mwanana kamba kumueza ka lunya.—Liproverbia 4:1.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
