KIFUNDWA 50
Le Kisaka Kyenu Kibwanya Kwikala na Nsangaji Namani?—Kipindi 2
Bana i kyabuntu kitamba kudi Yehova. Yehova usaka bambutwile balame senene kino kyabuntu. Madingi a tunangu atamba kudi Yehova o akakwasha bambutwile mwa kulamina bana. Kadi abwanya ne kukwasha bana balengeje mu kisaka mwikale nsangaji.
1. Le i madingi’ka Yehova apēle bambutwile?
Yehova usaka bambutwile basanswe babo bana ne kupityija nabo kitatyi kivule. Usaka bakinge bana ku bintu bibwanya kwibona kadi usaka bengidije misoñanya ya mu Bible pa kwibafundija. (Nkindi 1:8) Yehova unena bashabo amba: “Mwibatamijei [benu bana] . . . ne kwibadyumuna bidyumu bya Yehova.” (Tangai Bene Efisesa 6:4.) Yehova usangalanga shi bambutwile balonda bulombodi bwandi pobatamija babo bana pampikwa kupāna kiselwa’kya ku muntu mukwabo.
2. Le i madingi’ka Yehova apēle bana?
Yehova udingila bana’mba: “Kōkelai bambutwile benu.” (Tangai Bene Kolose 3:20.) Shi bana balēmeka ne kukōkela bambutwile babo, nabya bakasangaja Yehova ne bambutwile babo bene. (Nkindi 23:22-25) Yesu wāshile kimfwa kiyampe paādi mwanuke. Nansha byaādi mubwaninine, wādi ukōkele bambutwile bandi ne kwibalēmeka.—Luka 2:51, 52.
3. Le kisaka kituntulu kibwanya namani kufwena pabwipi na Leza?
Ne kutatana kwine mpika, banwe bambutwile musakanga bana benu basanswe Yehova monka momumusanshilwe. Le mubwanya namani kufikila pa kino kitungo? I na kulonga byobya binena Bible amba: “Ukebikoma [binenwa bya Yehova] mu bobe bana, ne kwisamba’byo poshikete mu njibo ne poenda mu dishinda.” (Kupituluka mu Bijila 6:7) ‘Kukoma,’ i kufundija na kupituluka misunsa mivule mu kintu kimo. Muyukile kala amba bimulombanga kupitulukapituluka mu kintu kimo pa kusaka’mba benu bana bakwatyile’kyo. Kino kisonekwa kilombola’mba mufwaninwe kyaba kyonso kukimba mikenga ya kwifunda na benu bana myanda ya Yehova. I biyampe kwilamija’ko kitatyi kampanda yenga ne yenga kya kutōta mu kisaka. Shi kudipo na bana, nobe ubwanya kwilamija’kyo yenga ne yenga mwanda wa kwifunda Kinenwa kya Leza.
LANGULUKA BININGE
Tala madingi amo a kamweno abwanya kulengeja kisaka kyenu kikale na nsangaji ne na mutyima-ntenke.
4. Fundija bobe bana na buswe
Kufundija mwana kekupēlengapo. Ino le Bible ubwanya kukukwasha? Tangai Yakoba 1:19, 20, ne kwisambila pa bino bipangujo:
-
I muswelo’ka ubwanya bambutwile kulombola buswe kitatyi kyobesamba na babo bana?
-
Mwanda waka mbutwile kafwaninwepo nansha dimo kulemununa bandi bana palobele? a
5. Kingai benu bana
Pa kukinga benu bana, bilomba kulonga buninge bwa kwisamba na mwana ne mwana pa mwanda utala kusambakena pamo. Padi ukokeja kukolelwa. Talai VIDEO, ne kwisambila pa bino bipangujo:
-
Mwanda waka bikomenanga bambutwile bamo kwisamba na babo bana myanda itala kusambakena pamo?
-
Le bambutwile bamo baingidije manwa’ka pa kushintulwila babo bana myanda itala kusambakena pamo?
Monka mokyālailwe mu bupolofeto, ino ntanda ya Satana yendanga ibipila’ko. Tangai 2 Temote 3:1, 13, ne kwisambila pa kino kipangujo:
-
Bantu bamo mu bano babi batelelwe mu vese 13, bonanga bana na kulāla nabo. Pene’pa, mwanda waka i kya mvubu bambutwile bafundije babo bana myanda itala kusambakena pamo ne muswelo obakokeja kwikinga abo bene ku bano bañonaona?
Le wadi uyukile?
Batumoni ba Yehova balupulanga bingidilwa bivule bya kukwasha bambutwile bafundije babo bana myanda itala kusambakena pamo ne kwibakinga ku kuno konwa. Tala kimfwa:
6. Lēmekai bambutwile benu
Bana banuke ne batame babwanya kulēmeka bambutwile babo mu muswelo obesamba nabo. Talai VIDEO, ne kwisambila pa bipangujo bilonda’bya.
-
Mwanda waka i kya kamweno bankasampe besambe na bambutwile babo na bulēme?
-
I muswelo’ka ubwanya nkasampe kwisamba na bambutwile bandi mu muswelo ulombola’mba wibapēle bulēmantu?
Tangai Nkindi 1:8, ne kwisambila pa kino kipangujo:
-
Le nkasampe ufwaninwe kulonga bika kitatyi kyapebwa bulombodi na bambutwile bandi?
7. Tōtelai pamo Yehova mu kisaka
Bisaka bya Batumoni ba Yehova bītūdilanga’ko kitatyi yenga ne yenga kya kutōtela pamo. Le kuno kutōtela pamo kubwanya kulongwa namani? Talai VIDEO, ne kwisambila pa bino bipangujo:
-
I muswelo’ka ubwanya kisaka kutūla’ko mpangiko ya butōtyi bwa kisaka bwa kyaba ne kyaba?
-
Le bambutwile bakalonga bika pa kusaka’mba butōtyi bwa kisaka bwikale bwa kamweno kadi busangaja?—Tala kifwatulo kidi ku ngalwilo kwa kino kifundwa.
-
I bika bibwanya kukoleja kisaka kyenu kikomenwe kwifundila pamo?
Mu Isalela wa kala, Yehova wādi usaka bisaka bikale kwisambila pamo kitatyi ne kitatyi myanda ya mu Bisonekwa. Tangai Kupituluka mu Bijila 6:6, 7, ne kwisambila pa kino kipangujo:
-
I muswelo’ka omubwanya kulonda uno musoñanya?
Milangwe imoimo ya mu butōtyi bwa kisaka:
-
Mubwanya kuteakanya kupwila.
-
Mubwanya kutanga ne kwisambila pa nsekununi imo ya mu Bible ikokeja kusangela kisaka kyenu.
-
Shi mudi na bana batyetye, tentulai nansha kutampa madevwala a bana adi pa jw.org.
-
Shi mudi na bana ke batame’ko, mwisambilei pa bishinte bitala bansongwa bidi pa jw.org.
-
Mubwanya kwengelekeja kukaya nsekununi ya mu Bible na benu bana.
-
Mubwanya kutala ne kwisambila pa video kampanda ya pa jw.org.
BANTU BAMO BANENANGA’MBA: “Bible i mukomo bininge, bana kebabwanyapo kwivwana’ye.”
-
Le ubwanya kunena’po namani?
MU KĪPI
Yehova usaka bambutwile basanswe babo bana, bebafundije ne kwibakinga; usaka bana nabo balēmeke ne kukōkela bambutwile babo; kadi usaka bisaka bimutōtele pamo.
Pitulukai’mo
-
Lelo bambutwile babwanya namani kufundija ne kukinga babo bana?
-
Lelo bana babwanya namani kulēmeka babo bambutwile?
-
I kamweno’ka kadi mu kwitūdila kitatyi yenga ne yenga kya kutōtela pamo mu kisaka?
KIMBA
Le i bifundwa’ka bikateakanya obe mwana atame senene?
Tala madingi a kamweno aleta Bible ku boba balama muntu ubela.
“Le I Bika Binena Bible pa Mwa Kulelela Bambutwile Banunu?” (Kishinte kya pa Entelenete)
Tala muntu umo wadi kayukilepo mwa kutamijija bana mwawaikadile ke shabana mufike’po.
Tala muswelo ubwanya bashabo kukomeja kipwano kyabo na bana.
“Le Bashabo Babwanya Namani Kupwana na Babo Bana?” (Kiteba kya Mulami, 1 Kweji 11, 2011)
a Mu Bible, kishima “bulemununi” kibadilwa’mo kupāna bulombodi, kupāna bwendeji, ne kusendulula. Kekishintululangapo kona nansha kususujañana.—Nkindi 4:1.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
