DILONGESHA DIA 50
Mua kuikala ne disanka mu dîku (Tshitupa 2)
Bana ndipa dia kudi Yehowa. Mmusue bua baledi babalame bimpe. Yehowa udi ufila mibelu mimpe idi mua kuambuluisha baledi bua benze nanku. Mibelu yende idi kabidi ileja bana tshia kuenza bua dîku diabu dionso kuikaladi ne disanka.
1. Mmibelu kayi idi Yehowa upesha baledi?
Yehowa udi ulomba baledi bua banange bana babu ne bikale basomba nabu bikole padiku mushindu. Mmusue kabidi bua bikale bakuba bana babu bua muntu kabenzedi bibi to, ne bikale babalongesha mêyi a mu Bible. (Nsumuinu 1:8) Udi wambila batatu ne: ‘Tungunukayi ne kukolesha bana benu ne didimuija dia Yehowa.’ (Balayi Efeso 6:4.) Yehowa udi usanka padi baledi balonda buludiki buende mu mudimu wabu wa kudikoleshila bana, kabayi bashila muntu mukuabu bujitu abu to.
2. Mmibelu kayi idi Yehowa upesha bana?
Yehowa udi wambila bana ne: “Tumikilayi baledi benu.” (Balayi Kolosayi 3:20.) Padi bana banemeka baledi babu ne babatumikila, badi basankisha Yehowa ne baledi babu kabidi. (Nsumuinu 23:22-25) Malu avua Yezu muenze patshivuaye muana ndilongesha kudi bana bonso. Nansha muvuaye mupuangane, uvua utumikila baledi bende ne ubanemeka.—Luka 2:51, 52.
3. Mmunyi mudi dîku dienu dijima mua kusemena pabuipi ne Nzambi?
Biwikala muledi, udi mua kuikala ujinga bua bana bebe banange Yehowa bikole anu muudi mumunange. Mmunyi muudi mua kukumbaja bualu ebu? Tumikila mubelu wa mu Bible eu: “Udi ne bua [kubueja mêyi a Yehowa] munda mua bana bebe ne kuakula bua bualu buawu paudi usomba mu nzubu muebe, [ne] paudi wenda mu njila.” (Dutelonome 6:7) Muaku ‘kubueja’ udi umvuija kuambuluila muntu tshintu tshiudi umulongesha. Pamuapa udi uvuluka ne: bitu bimpe wewe kuambuluila bana bualu misangu ne misangu bua kubuvulukabu. Mvese eu udi umvuija ne: mbimpe wikale ukeba mpunga ya kulongesha bana bebe malu a Yehowa pa tshibidilu. Nudi mua kuditekela dituku dia kuenza ntendelelu wa mu dîku ku lumingu luonso. Wewe kuyi ne bana, kusungula tshikondo tshia kudilongela Dîyi dia Nzambi ku lumingu nekukuambuluishe.
BUELA MU BUONDOKE
Tumonabi malu adi makumbane kuenza adi mua kuambuluisha dîku dionso dijima bua kukubibua ne kuikala ne disanka.
4. Longesha bana bebe ne dinanga
Kulongesha muana ki nkupepele to. Mmunyi mudi Bible mua kukuambuluisha? Balayi Yakobo 1:19, 20, pashishe nuandamune nkonko eyi:
-
Mmushindu kayi udi baledi mua kuleja mudibu banange bana babu padibu bayukila nabu?
-
Bua tshinyi ki mbimpe bua muledi kupesha muana dinyoka padiye ne tshiji? a
5. Kuba bana bebe
Bua wewe kukuba bana bebe, mbimpe wewe kuyikila ne muana yonso bua malu a mubidi wa bulume ne bukaji. Bidi mua kukuenza kabundu. Tangilayi FILME, pashishe nuandamune nkonko idi ilonda.
-
Bua tshinyi bitu bikolela bamue baledi bua kuyikila ne bana babu bua malu a mubidi wa bulume ne bukaji?
-
Mmushindu kayi udi baledi bakuabu bumvuije bana babu malu a mubidi wa bulume ne bukaji?
Anu mukavua Bible mulaye, bulongolodi budi Satana ukokesha ebu budi buenda bubipa bikole. Balayi 2 Timote 3:1, 13, pashishe nuandamune lukonko elu:
-
Bamue ba mu bantu babi badibu batele mu mvese wa 13 batu banyanga bana ne malu a masandi. Nunku, bua tshinyi mbimpe baledi balongeshe bana babu malu a mubidi wa bulume ne bukaji ne mushindu wa kudikubabu kudi badi mua kubanyanga ne malu a masandi?
Udi mumanye anyi?
Bantemu ba Yehowa batu bapatula bintu bia bungi bidi biambuluisha baledi bua kulongesha bana babu malu a mubidi wa bulume ne bukaji ne kubakuba kudi badi mua kubanyanga. Tshilejilu, tangila:
-
Kuba bana bebe (filme)
-
“Longesha bana bebe malu adi atangila mubidi wa bulume ne bukaji” (Tabulukayi! No. 5/2016)
6. Nemeka baledi bebe
Bana bakese ne bansonga ba bitende badi mua kuleja baledi babu kanemu mu ngakuilu wabu kumpala kuabu. Tangilayi FILME, pashishe nuandamune nkonko idi ilonda.
-
Bua tshinyi mbikumbane bua nsonga wa tshitende kuikalaye ne kanemu padiye uyukila ne baledi bende?
-
Mmunyi mudiye mua kuyukila nabu ne kanemu konso?
Balayi Nsumuinu 1:8, pashishe nuandamune lukonko elu:
-
Ntshinyi tshidi muana ne bua kuenza padi baledi bende bamubela?
7. Ikalayi nutendelela pamue mu dîku dienu
Mêku a Bantemu ba Yehowa atu aditekela dîba dijalame ku lumingu dia kuenza ntendelelu pamue mu dîku. Ntendelelu wa mu dîku eu utu wenzeka mushindu kayi? Tangilayi FILME, pashishe nuandamune nkonko idi ilonda.
-
Mmushindu kayi udi badi mu dîku mua kufika ku dikala benza ntendelelu wa mu dîku misangu yonso?
-
Tshidi muledi mua kuenza bua ntendelelu wa mu dîku kukuatshishaye bantu bonso ne kubalengelela ntshinyi?—Tangilayi tshimfuanyi tshia ku ntuadijilu kua dilongesha edi.
-
Ntshinyi tshidi mua kunupangisha bua kulonga Bible popamue?
Mu Isalele wa kale, Yehowa uvua mulombe bavua mu dîku bua kuikalabu bayukila malu a mu Dîyi diende pa tshibidilu. Balayi Dutelonome 6:6, 7, pashishe nuandamune lukonko elu:
-
Mmunyi muudi mua kutumikila dîyi edi?
Ngenyi ya mua kuenza ntendelelu wa mu dîku:
-
Nudi mua kulongolola bisangilu.
-
Nudi mua kubala bualu bua mu Bible budi busankisha dîku dienu, nuenu kubuyukidilangana.
-
Binuikala ne bana batekete, nudi mua kubambuila midimu ya bana ya mu jw.org anyi kubapatuilayi pa mabeji.
-
Nuenu ne bana ba bitende, nudi mua kuyukila nabu malu a mu biena-bualu bia mu jw.org bia bana ba bitende.
-
Nudi mua kuenza dinaya ne bana dia nuidikija bualu kampanda bua mu Bible.
-
Nudi mua kutangila filme wa mu jw.org, nuenu kuyukila malu adimu.
BAMUE BATU BAMBA NE: “Bana kabena mua kumvua malu adi mu Bible to.”
-
Wewe udi wamba bishi?
TSHIA KUKUATA
Yehowa mmusue bua baledi banange bana babu, babalongeshe, ne babakube; mmusue bua bana banemeke baledi babu ne babatumikile; ne mmusue bua badi mu dîku bonso bikale bamutendelela popamue.
Diambulula
-
Mmunyi mudi baledi mua kulongesha bana babu ne kubakuba?
-
Bana badi mua kunemeka baledi babu mushindu kayi?
-
Mmasanka kayi adi bena mu dîku bapeta padibu baditekela dîba ku lumingu luonso bua ntendelelu wa mu dîku?
BIA KUTANGILA KABIDI
Mua kulongolola muana bua nsombelu wa ku bukulumpe
“Malu asambombo adi bana ne bua kulonga” (Tabulukayi! No. 2 2019)
Mona mibelu mimpe idi Bible upesha badi balama baledi babu bakadi bakulakaje.
“Ntshinyi tshidi Bible wamba bua dilama baledi bakadi banunu?” (Tshiena-bualu tshia mu jw.org)
Mona muvua muntu uvua kayi mumanye mua kukolesha bana mulue muledi muimpe.
Mona mudi batatu mua kukolesha bulunda ne bana babu ba balume.
“Mmunyi mudi batatu mua kuibidilangana ne bana babu ba balume?” (Tshibumba tshia Nsentedi, 1/1/2012)
a Mu Bible, muaku “dinyoka” udi umvuija dilongesha muana, dimuludika, ne dimuambuluisha bua alekele meji mabi anyi tshikadilu tshibi. Kadiena diumvuija tshikisu anyi luonji to.—Nsumuinu 15:5.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
