ZIRLAI 50
Engtin Nge Chhûngkaw Hlim I Neih Theih Ang?—Ṭhen 2
Fanaute hi Jehova thilthlâwnpêk an ni a. Nu leh pate chu, a thilpêk ṭha taka enkawl tûrin a beisei a ni. Jehova chuan chutianga enkawl tûra ṭanpui theitu thurâwn ṭha tak nu leh pate hnênah a pe a. Chu chuan fate chu chhûngkaw hlim tak siamnaa tel ve tûrin a ṭanpui thei bawk.
1. Jehova’n nu leh pate hnênah eng thurâwn nge a pêk?
Jehova’n nu leh pate chu an fate hmangaih tûr leh a tam thei ang bera hun hmanpui tûrin a duh a. Nu leh pate chu thil ṭha lo laka an fate vênghim tûr leh an fate zirtîrnaah Bible thu bulte hmang tûrin a duh bawk a ni. (Thufingte 1:8) Jehova chuan pate hnênah heti hian a hrilh a ni: ‘In fate chu Lalpa zilhnaah chuan enkawl rawh u,’ tiin. (Ephesi 6:4 chhiar rawh.) Nu leh pate’n an fate enkawlna kawnga a kaihhruaina an zawm a, mi dang hnêna he mawhphurhna an hlan loh hian Jehova chu a lâwm a ni.
2. Jehova’n naupangte hnênah eng thurâwn nge a pêk?
Jehova’n naupangte hnênah: “In nu leh in pate thu zâwm rawh u,” tiin a zirtîr a. (Kolossa 3:20 chhiar rawh.) Naupangte’n an nu leh pate an zah a, an thu an âwih hian Jehova leh an nu leh pate an tihlim a ni. (Thufingte 23:22-25) Isua’n a naupan lai khân entawn tûr ṭha a siam a. Mi ṭha famkim a ni chung pawhin a nu leh pate thu âwihin, anni chu a zah a ni.—Luka 2:51, 52.
3. Engtin nge chhûngkua angin Pathian in hnaih lehzual theih ang?
Nu emaw, pa emaw i nih chuan i fate chu nangmah anga Jehova hmangaih tûrin i duh ngei ang. He thiltum hi engtin nge i hlen theih ang? Bible sawi: “In fate [Jehova thu] ṭhahnemngai takin in zirtîr ang a, in ina in ṭhut lai te, kawnga in kal lai . . . tein in sawi ṭhîn tûr a ni,” tih thu hi zâwmin i hlen thei a ni. (Deuteronomy 6:7) ‘Ṭhahnemngai taka zirtîr’ tih chu thil engemaw zirtîr nawn fo tihna a ni a. Chu chu i fate’n hre reng tûra i duh thil engemaw i hrilh nawn fo ṭhin ang hi a ni. He Bible chângin a sawi tum chu i fate hnêna Jehova chungchâng hrilh tûrin hun remchâng i zawng reng tûr a ni tihna a ni a. Chhûngkuaa Pathian beho tûra chawlhkâr tina hun insiam chu thil ṭha tak a ni. Fate i nei lo a nih pawhin Pathian Thu zir tûra chawlhkâr tina hun pêk chu i la hlâwkpui thei tho bawk.
ZIR BELHIN HMUH BELH RAWH
Chhûngkaw hlimna leh himna belhchhahtu thurâwn ṭangkai takte ngaihtuah rawh.
4. I fate chu hmangaihna nên zirtîr rawh
Fate zirtîr chu a harsa thei a. Engtin nge Bible-in a ṭanpui theih che? Jakoba 1:19, 20 chhiarin, hêng zawhnate hi sawiho vang che u:
-
Nu leh pate’n an fate an biak hunah engtin nge hmangaihna an lantîr theih?
-
Engvângin nge nu emaw, pa emawin a thinrim laiin fate a thunun loh vang? a
5. I fate vênghim rawh
I fate vênghim tûr chuan mipat hmeichhiatna chungchâng sawipui chu thil pawimawh tak a ni a. Chu chu a zahthlâk deuh mai thei. VIDEO chu chhuah la, a hnuaia zawhnate hi sawiho vang che u.
-
Engvângin nge nu leh pa ṭhenkhat tân an fate mipat hmeichhiatna chungchâng sawipui chu a harsat?
-
Eng kawngin nge nu leh pa ṭhenkhat chuan an fate chu mipat hmeichhiatna chungchâng an hrilh?
Hrilh lâwk angin, Setana khawvêl chu a sual zual deuh deuh va. Timothea thawn hnih 3:1, 13 chhiarin, he zawhna hi sawiho vang che u:
-
Châng 13-naa mi sual a tihte zînga ṭhenkhat hian mipat hmeichhiatna lama naupang khawih chhiat hmangte a kâwk a. Chuvângin, engvângin nge nu leh pate tân mipat hmeichhiatna chungchâng an fate zirtîr leh chutianga khawih chhiat hmangte laka invênhim dân zirtîr chu thil pawimawh tak a nih?
I lo hre tawh em?
Jehova Thuhretute chuan mipat hmeichhiatna chungchâng an fate zirtîr tûr leh khawih chhiatna laka vênghim tûra nu leh pate ṭanpuitu hmanraw tam tak an tichhuak a. Entîr nân hêngte hi en rawh:
-
I Fate Vênghim Rawh (video)
-
“Mipat Hmeichhiatna Chungchâng I Fate Zirtîr Rawh” (Awake! No. 5 2016)
6. I nu leh pate zah rawh
Naupangte leh tleirâwlte chuan an nu leh pate chu an biak dân aṭangin an zahzia an lantîr thei a. VIDEO chu chhuah la, a hnuaia zawhnate hi sawiho vang che u.
-
Engvângin nge naupang leh tleirâwl tân nu leh pate zah thiam taka biak chu a ṭangkai?
-
Engtin nge chutianga a biak hunah zahna a lantîr theih?
Thufingte 1:8 chhiarin, he zawhna hi sawiho vang che u:
-
Engtin nge naupang leh tleirâwl chuan a nu leh pate kaihhruaina pêk chu a chhân lêt ang?
7. Chhûngkuain Jehova be rawh
Jehova Thuhretu chhûngkuate chu chawlhkâr tina Pathian beho tûrin hun an insiam a. Chhûngkuaa Pathian biakna hi eng anga hman theih nge a nih? VIDEO chu chhuah la, a hnuaia zawhnate hi sawiho vang che u.
-
Engtin nge chhûngkua chuan Chhûngkuaa Pathian biakna a neih ziah theih?
-
Engtin nge nu leh pate chuan chhûngkuaa Pathian biakna chu mi tin tâna ṭangkai tak leh hlimawm tak an nihtîr theih?—He zirlaia a thupui chunga milem en rawh.
-
Chhûngkuaa zirna neih chu engin nge i tân tiharsa mai thei?
Hmân lai Israel huna chhûngkuate chu Jehova’n Pathian Lehkha Thu sawiho ziah tûrin a beisei a. Deuteronomy 6:6, 7 chhiarin, he zawhna hi sawiho vang che u:
-
Engtin nge he thu bul hi i nunpui theih?
Chhûngkuaa Pathian biakna atâna rawtnate:
-
Kohhran inkhâwm atâna inbuatsaih.
-
I chhûngkuain nuam an tih tûr Bible-a thilthleng chhiara sawiho.
-
Fa la naupang deuhte i nei a nih chuan, jw.org-a naupangte tâna tih tûrte chu i download emaw, i print chhuak emaw thei ang.
-
Fa tleirâwlte i nei a nih chuan jw.org-a tleirâwlte tâna thuzakte zînga pakhat sawiho.
-
I fate nêna Bible-a mite lemchan.
-
Kan website jw.org-a video pakhat en a, sawiho.
MI ṬHENKHAT SAWI DAN: “Naupangte tân Bible chu hriatthiam theih rual a ni lo.”
-
Engtin nge i ngaih?
KHAIKHAWMNA
Jehova chuan nu leh pate chu an fate hmangaih a, zirtîr a, vênghim tûrin a duh a; fate chu an nu leh pate zah tûr leh an thu âwih tûrin a duh a; tichuan chhûngkuate chu amah beho tûrin a duh a ni.
Ennawnna
-
Engtin nge nu leh pate chuan an fate chu zirtîr a, an vênhim theih?
-
Engtin nge naupangte’n an nu leh pate an zahzia an lantîr theih?
-
Chawlhkâr tina chhûngkuaa Pathian biakna neiho tûra hun insiam a hlâwknate chu engte nge ni?
HRIAT BELH NAN
Eng zirlaite’n nge i fate chu puitling tûra buatsaih ang?
Kum upa nu leh pa enkawltute hnêna Bible pêk thurâwn ṭha tak chhiar rawh.
“Kum Upa Nu leh Pate Enkawl Chungchângah Bible-in Eng Nge A Sawi?” (Website thuziak)
Fate enkawl dân tûr hre lo pa pakhat chu pa hlawhtling tak a rawn nih dân en rawh.
Pate’n an fapate nêna an inlaichînna an tihngheh theih dân ngaihtuah rawh.
“Engtin Nge Pate’n An Fapate An Pawh Reng Theih Ang?” (Vênnainsâng, December 1, 2011)
a Bible-a “thununna” tih hian zirtîrna, siamṭhatna, leh kaihhruaina a kâwk a. Chu chuan tharum thawhna leh nunrâwnna a kâwk ngai lo.—Thufingte 4:1.
You May Also Like
ZAWH FO ṬHIN ZAWHNATE
Jehova Thuhretute Ruahman Bible Zirna Chu Eng Nge Ni?
Jehova Thuhretute ruahman a thlâwna sawihona phûrawm takah Bible lehlin eng pawh i hmang thei a. I chhûngte leh i ṭhian tu pawh i sâwm thei a ni.
