XNAQʼTZBʼIL 50
¿Tiʼ jaku bʼant tuʼna tuʼn ttzalaja kyukʼil toj tjaya? (Tkabʼin plaj)
Jun oyaj qe kʼwal tuʼn Jehová ex taj tuʼn kyxqʼuqin mambʼaj kyiʼj. Tuʼntzunju, in tzaj tqʼoʼn Jehová tbʼanel consej kye. Ax ikx, o tzaj tqʼoʼn consej kye kʼwalbʼaj tuʼntzun kyonin tuʼn kytzalaj qe toj kyja.
1. ¿Alkyeqe consej in tzaj tqʼoʼn Jehová kye tatbʼaj?
Taj Jehová tuʼn tok kykʼujlaʼn tatbʼaj ex txubʼaj qe kykʼwal ex taj tuʼn kyten kyukʼil. Ax ikx, taj tuʼn kyxqʼuqin tatbʼaj qe kykʼwal tiʼj nya bʼaʼn ex tuʼn t-xi kyqʼoʼn xnaqʼtzbʼil kye ik tzeʼn in tzaj tqʼamaʼn Tyol Dios (Proverbios 1:8). In tzaj tqʼamaʼn Jehová jlu kye wibʼaj toj ja: «Kychʼiysame [...] ex kyqʼonxe kynabʼl ik tzaʼn in tmaʼn Qajaw» (uʼjinktza Efesios 6:4). In tzalaj Jehová aj tok tilil kyuʼn mambʼaj tuʼn t-xi kyxnaqʼtzaʼn kykʼwal ik tzeʼn in tzaj tqʼamaʼn Tyol ex qa mintiʼ ma t-xi kyqʼoʼn oklenj lu te juntl.
2. ¿Alkyeqe consej in tzaj tqʼoʼn Jehová kye kʼwalbʼaj?
In tzaj tqʼamaʼn Jehová jlu kye kʼwalbʼaj: «Kynimanx kymane» (uʼjinktza Colosenses 3:20). Qa ma nimen jun kʼwal kye tman ex qa ma respetarin kye, ok che tzalajel tman tuʼn ex ktzalajel Jehová tuʼn (Proverbios 23:22-25). Kyaj tqʼoʼn Jesús jun tbʼanel techel tej kʼwalxtoq, tuʼnju xi tbʼiʼn qe ttat ex respetarin kye, maske aj il qe (Lucas 2:51, 52).
3. ¿Tiʼ jaku bʼant kyuʼn familia tuʼn kyok laqʼeʼ ttxlaj Jehová?
Qa ateʼ tkʼwala, tajlo teya tuʼn tten ax kykʼujlabʼil tiʼj Jehová ik tzeʼn teya. ¿Tzeʼn jaku bʼant jlu tuʼna? Aj t-xi tbʼinchaʼna aju in tzaj tqʼamaʼn Biblia: «Kukx kymanxe [qe tyol Jehová] kye kykʼwaʼle, ex che yoline kyiʼj tuj kyjaye ex tuj kybʼeye» (Deuteronomio 6:7). Aju txol yol «kukx kymanxe», a t-xilen tuʼn t-xi qʼet xnaqʼtzbʼil te jun xjal ex tuʼn kukx t-xi naʼn te. In nel-lo tnikʼa tiʼj jlu tuʼnju il tiʼj tuʼn t-xi tqʼamaʼna jun tiʼ nimku maj kye tkʼwala tuʼntzun miʼn tikʼ tnaʼl kyuʼn. In tzaj tyekʼin texto qa il tiʼj tuʼn tel tpaʼna ambʼil aj tex qʼij tuʼn tyolina tiʼj Jehová kyukʼil tkʼwala. Tuʼntzunju, nim toklen tuʼn tel tpaʼna ambʼil tuʼn t-xnaqʼtzana tiʼj Tyol Dios kyukʼil toj tjaya tkyaqil seman. Axpe ikx qa mintiʼ tkʼwala, nim jaku tzʼonin tiʼja qa ma xnaqʼtzana tiʼj Tyol Dios tkyaqil seman.
QO JYON MAS TQANIL
Qo xnaqʼtzan kyiʼj junjun tbʼanel consej jaku tzʼonin kyiʼj familia tuʼn kytzalaj ex tuʼn tok kyxqʼuqin kyibʼ.
4. Xnaqʼtzanxa qe tkʼwala tukʼil kʼujlabʼil
At maj kwest tuʼn kychʼiyset kʼwal. Tuʼntzunju, ¿tzeʼn jaku tzʼonin Tyol Dios tiʼja? Kyuʼjinktze Santiago 1:19 ex 20 ex che yoline kyiʼj xjel lu:
-
¿Tzeʼn jaku kubʼ kyyekʼin mambʼaj kykʼujlabʼil kyiʼj kykʼwal aj kyyolin kyukʼil?
-
¿Tiquʼn nya toj tumel tuʼn t-xi tkawin jun mambʼaj tkʼwal aj ttzaj tqʼoj? a
5. Bʼaʼn tuʼn t-xqʼuqina kyiʼj tkʼwala
Tuʼn t-xqʼuqina kyiʼj tkʼwala, bʼaʼn tuʼn tyolina tukʼil teyele junjun kye tiʼjju tuʼn tkubʼ kuẍeʼ jun xinaq tukʼil jun xuʼj, maske jaku kubʼ tnaʼna nya bʼaʼn aj tyolina tiʼj jlu kyukʼil. Kyqʼonke kywitze tiʼj VIDEO ex che yoline kyiʼj xjel lu:
-
¿Tiquʼn kwest in nela kye junjun tatbʼaj tuʼn kyyolin kyukʼil kykʼwal tiʼjju aj tkubʼ ten jun xinaq tukʼil jun xuʼj?
-
¿Tiʼ o tzʼonin kyiʼj junjun mambʼaj tuʼn kyyolin tiʼj jlu kyukʼil kykʼwal?
Ik tzeʼn kyaj tqʼamaʼn Tyol Dios, mas in kubʼ kybʼinchaʼn xjal nya bʼaʼn toj ambʼil jaʼlo. Kyuʼjinktze 2 Timoteo 3:1 ex 13 ex che yoline kyiʼj xjel lu:
-
Ik tzeʼn in tzaj qʼamaʼn toj versículo 13, ateʼ junjun nya bʼaʼn xjal in che ok ten kyiʼj tal kʼwal. Tuʼntzunju, ¿tiquʼn nim toklen tuʼn t-xi tqʼoʼna xnaqʼtzbʼil kye tkʼwala moqa kye tala tiʼjju tuʼn tkubʼ kuẍeʼ jun xinaq tukʼil jun xuʼj? ¿Tiʼ jaku bʼant kyuʼn tatbʼaj tuʼntzun miʼn tok bʼinchaʼn nya bʼaʼn kyiʼj kykʼwal?
¿Ojtzqiʼn jlu tuʼna?
O che bʼant nim onbʼil kyuʼn testigos de Jehová aʼyeju jaku che ajbʼen kyuʼn mambʼaj tuʼn kyyolin kyukʼil kykʼwal tiʼjju tuʼn tkubʼ kuẍeʼ jun xinaq tukʼil jun xuʼj ex tuʼn miʼn tok ten jun xjal kyiʼj. Atzun junjun onbʼil jlu:
-
Che xqʼuqine kyiʼj kykʼwaʼle (video).
-
«¿Tzeʼn jaku yolina tukʼil tkʼwala tiʼjju tajbʼil tuʼn tkubʼ kuẍeʼ tukʼil jun xjal?» (¡Weʼktza!, tajlal 5 te 2016).
6. Bʼaʼn tuʼn trespetarina kye tmana
Il tiʼj tuʼn kyrespetarin kʼwal ex kuʼxun kye kyman, ex in kubʼ kyyekʼin jlu tukʼilju alkye tten in chex yolin kyukʼil. Kyqʼonke kywitze tiʼj VIDEO ex che yoline kyiʼj xjel lu:
-
¿Tiquʼn nim toklen tuʼn trespetarin jun kuʼxun aj tyolin kyukʼil tman?
-
¿Tzeʼn jaku kubʼ tyekʼin jun kuʼxun tbʼanel tmod kyukʼil ttat?
Kyuʼjinktze Proverbios 1:8 ex che yoline tiʼj xjel lu:
-
¿Alkye tmod jun kuʼxun kbʼel tyekʼin aj t-xi qʼamaʼn te tuʼn tman moqa tuʼn ttxuʼ tiʼ tuʼn tbʼant tuʼn?
7. Bʼaʼn tuʼn tkʼulina te Jehová junx kyukʼil toj tjaya
In nel kypaʼn testigos de Jehová ambʼil kykyaqil seman tuʼn kyxnaqʼtzan tiʼj Tyol Dios kyukʼil toj kyja. ¿Tiʼ in bʼant kyuʼn toj ambʼil aju? Kyqʼonke kywitze tiʼj VIDEO ex che yoline kyiʼj xjel lu:
-
¿Tiʼ jaku tzʼonin kyiʼj familia tuʼn kykʼulin te Jehová tkyaqil seman?
-
¿Tiʼ jaku bʼant kyuʼn tatbʼaj tuʼn kytzalaj qe toj kyja tiʼj ambʼil in xi kyqʼoʼn te Jehová ex tuʼn tonin kyiʼj? (Qʼonka twitza tiʼj foto tkubʼ aj ttzaj tzyet xnaqʼtzbʼil).
-
¿Atpe jun tiʼ in nel qʼinte ambʼil kyeye tuʼn kyxnaqʼtzane junx kyukʼil toj kyjaye?
Toj ambʼil ojtxe, xi tqʼamaʼn Jehová kye aj Israel tuʼn kukx kyyolin tiʼj Tyol kyukʼil kykʼwal. Kyuʼjinktze Deuteronomio 6:6 ex 7 ex che yoline tiʼj xjel lu:
-
¿Tzeʼn jaku txi tbʼinchaʼna aju in tzaj tqʼamaʼn texto lu?
Junjun tumel tzeʼn jaku tzʼok tkʼulbʼila kyukʼil toj tjaya:
-
Jaku bʼaj kybʼinchaʼne kytene kyiʼj chmabʼil.
-
Kyuʼjinktze ex che yoline tiʼj jun txʼolbʼabʼil tiʼj Tyol Dios aju jaku tzʼonin kyiʼje.
-
Qa ateʼ tal tkʼwala, tbʼanel tuʼn tkutz tdescargarina moqa tuʼn tetz t-imprimirina jun xnaqʼtzbʼil at toj jw.org kye kʼwal.
-
Qa ya kuʼxun qe tkʼwala, tbʼanel tuʼn tjaw tjyoʼna jun xnaqʼtzbʼil in yolin kyiʼj kuʼxun toj jw.org.
-
Jaku kubʼ kybʼinchaʼne jun dramatización tiʼj jun txʼolbʼabʼil tiʼj Tyol Dios.
-
Kykeʼyinke jun video toj jw.org ex che yoline tiʼj.
AJU IN TZAJ KYQʼAMAʼN JUNJUN XJAL: «Mlayx tzʼel kynikʼ kʼwal tiʼj Tyol Dios».
-
¿Tiʼ teya t-ximbʼetz tiʼj jlu?
TOJ CHʼIN YOL
Taj Jehová tuʼn tok kykʼujlaʼn mambʼaj kykʼwal, tuʼn t-xi kyqʼoʼn xnaqʼtzbʼil kye ex tuʼn kyxqʼuqin kyiʼj. Ax ikx, taj tuʼn kynimen kʼwal kye kyman ex tuʼn kyrespetarin kye, ex aju mas nim toklen, taj tuʼn kyajbʼen te.
Aju ma qo yolin tiʼj
-
¿Tzeʼn jaku txi kyqʼoʼn mambʼaj xnaqʼtzbʼil kye kykʼwal ex tuʼn kyxqʼuqin kyiʼj?
-
¿Tzeʼn jaku kubʼ kyyekʼin kʼwal qa in che respetarin kye kytat?
-
¿Tiʼ tbʼanel jaku tzaj kye familia aj tel kypaʼn ambʼil tuʼn kykʼulin kykyaqil seman te Jehová?
OJTZQINKA CHʼINTL
¿Alkyeqe xnaqʼtzbʼil jaku che onin tiʼj tkʼwala tuʼn tok tnabʼil aj tchʼiy?
«Qaq xnaqʼtzbʼil nim toklen kye kʼwaʼl» (¡Weʼktza!, tajlal 2 te 2019)
Uʼjinktza junjun tbʼanel consej in tzaj tqʼoʼn Biblia kye qeju in che xqʼuqin kyiʼj kytat ma che tijen.
«¿Tajpe Dios tuʼn kyok qxqʼuqin qman aj kytijen?» (Xnaqʼtzbʼil toj jw.org)
Qʼonka twitza tiʼj tiʼ onin tiʼj jun mambʼaj tuʼn tel tnikʼ tiʼj tzeʼn tuʼn kychʼiyset tkʼwal.
O qo tzaj xnaqʼtzaʼne tuʼn Jehová tuʼn kyxi qkawin qkʼwaʼle (5:58)
Ojtzqinka tiʼ jaku bʼant tuʼn jun mambʼaj tuʼn ttzalaj aj tten kyukʼil tkʼwal.
a Aj tyolin Tyol Dios tiʼjju tuʼn t-xi qʼet kawbʼil, atz in yolin tiʼjju tuʼn t-xi qʼet jun consej ex tuʼn t-xi bʼinchet tiʼj jun tiʼ. Ex nya atz in yolin tiʼj tuʼn tbʼaj kʼixbʼisaʼn jun xjal moqa tuʼn tbʼaj yajlaʼn (Proverbios 4:1).
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
