ESENUPANTOꞌ 50
Taatausinpai ayewîꞌ tawonkon wanî eꞌpainon? — Ipantakasaꞌ 2
Jeováya toꞌ mukuyamîꞌ ton tîrîꞌpî toꞌ yuntonon pia. Inkamoro eraꞌma toꞌ yuntononya morî pe yuꞌse Jeová wanî. Morî panamatoꞌkon tîrîiya, mîrîrî konekatoꞌpe yuntononya. Paapa panamatoꞌkon wenai, mukuyamîꞌya pîikaꞌtî eꞌpainon nîrî taatausinpai toꞌ koꞌmantoꞌpe tîpemonkonoyamîꞌ pokonpe.
1. Îꞌ panamatoꞌkon tîrî Jeováya yuntonon pia?
Tîmukukon saꞌnamatoꞌpe yuntononya yuꞌse Jeová wanî moropai toꞌ pîinamatoꞌpe toꞌya. Tîmukukon eraꞌma yuntononya morî pe yuꞌse Jeová wanî moropai toꞌ yenupakonpa Paapa yenupantoꞌkon wenai. (Provérbios 1:8) Mîîkîrîya taꞌpî yuntonon pî: “Anmukukon panamatî [Jeová] yeseru ke irumaka pata pe pra.” (Eraꞌmakî Efésios 6:4.) Jeová atausinpa senni panamatoꞌ yawîrî yunkon eꞌsaꞌ ya. Jeová atausinpa nîrî tîmukukon yenupa yuntononya ya, toꞌ pataꞌpî ya tiaronya mîrîrî kupî namai, moropai tiaronkon pî mîrîrî kuꞌtoꞌpe esaꞌtî yunkonya pepîn.
2. Îꞌ panamatoꞌkon tîrî Jeováya mukuyamîꞌ pia?
Jeováya taa mukuyamîꞌ pî: “Ayunkon moropai asankon maimu yawîrî ikuꞌtî.” (Eraꞌmakî Colossenses 3:20.) Toꞌ yuntonon yawîrî toꞌ mukuyamîꞌ eꞌsaꞌ ya, mîrîrî pî Jeová atausinpa. Yuntonon atausinpa nîrî! (Provérbios 23:22-25) Mîrîrî kupîꞌpî Jesusya more pe tîwanî yai. Imakuiꞌpî ton pra awanîꞌpî, tîîse mîîkîrî yuntonon maimu yawîrî awanîꞌpî, tîwîrî imakuiꞌsan pe toꞌ wanî tanne. — Lucas 2:51, 52.
3. Oꞌnon yeꞌka pe wîttî tawonkon erepamî eꞌpainon inîꞌ panpîꞌ Paapa pia?
San pe moropai yun pe amîrî wanî ya, Jeová saꞌnama anmukuyamîꞌya yuꞌse awanî, amîrî panpe. Oꞌnon yeꞌka pe mîrîrî konekaya eꞌpainon? Seeni panamatoꞌ yawîrî awanî ya: “Mîrîrî [taatoꞌ mîrîrî, yenupantoꞌkon iipî manni Paapa winîpai] yenupapîtî aakoꞌmamî eꞌpai awanî anmukukon pî, moropai mîrîrî pî eseurîmakî toꞌ yarakkîrî ayewîꞌ ta siꞌma, asarîya eꞌma tawîrî attî yai, awetun rawîrî moropai akuranta yai.” (Deuteronômio 6:7) Seeni imenukasaꞌya taa pî man anmu yenupa eꞌpai awanî tuꞌke iteꞌka. Epuꞌtî pî amîrî man tuꞌke iteꞌka anmu yenupa eꞌpai awanî, mîrîrî pî awenpanatatoꞌpe. Mîrîrî yeꞌnen, seeni imenukasaꞌya taa pî man anmukuyamîꞌ yeurîma eꞌpai awanî Jeová pî tuꞌke iteꞌka nîrî. Oꞌnon yeꞌka pe? Jeová yapurî eꞌpai awanî tîmurukun pe siꞌma suntaꞌka kaisarî, ayewîꞌ tawonkon pokonpe. Anmukuyamîꞌ ton pra wanî ya, Paapa Maimu pî esenupa eꞌpai awanî suntaꞌka kaisarî nîrî.
ESENUPAKÎ INÎꞌ PANPÎꞌ
Panamatoꞌkon eraꞌmakî tamîꞌnawîronkon ayewîꞌ tawonkon pîikaꞌtîiya taatausinpai toꞌ eꞌtoꞌpe moropai tîwarî toꞌ eꞌtoꞌpe.
4. Anmukuyamîꞌ yenupakî saꞌnamatoꞌ ke
Saꞌme wanî tîmukuyamîꞌ yenupatoꞌpe yuntononya. Oꞌnon yeꞌka pe Paapa Maimuya yuntonon pîikaꞌtî eꞌpainon? Eraꞌmatî Tiago 1:19, 20. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe yuntononya saꞌnamatoꞌ yenpo tîmukuyamîꞌ yarakkîrî teeseurîmakon yai?
-
Îꞌ waniꞌ awanî yeꞌnen yuntononya tîmukuyamîꞌ panama eserîke pra wanî sokoroꞌ pe siꞌma? a Imenukasaꞌ Itoꞌkoꞌ Eraꞌmakî – Nota.
5. Anmukuyamîꞌ eraꞌmakî morî pe
Morî pe anmukuyamîꞌ eraꞌmapa, eeseurîma eꞌpai awanî inkamoro yarakkîrî esenîtoꞌ pî, tîwîrî mîrîrî pî eseurîmapai pra awanî tanne. PANTON eraꞌmatî. Mîrîrî tîpo seeni itoꞌko manni pî eseurîmatî:
-
Îꞌ wanîꞌ awanî yeꞌnen saꞌme wanî yuntonon pia eseurîmatoꞌpe tîmukuyamîꞌ yarakkîrî esenîtoꞌ pî?
-
Seeni panton ya, oꞌnon yeꞌka pe yuntonon eseurîmaꞌpî tîmukuyamîꞌ yarakkîrî esenîtoꞌ pî?
Paapa Maimuya taꞌpî oꞌnon yeꞌka pe pata ena imakuiꞌpî pe, Makui yenya awanî yeꞌnen. Mîrîrî eꞌkupî pî man sîrîrîpe. Eraꞌmatî 2 Timóteo 3:1, 13. Tarîpai seeni itoꞌkoꞌ manni pî eseurîmatî:
-
Imenukasaꞌ 13 eseurîma pî man imakuiꞌsan pemonkonyamîꞌ pî. Moropai epuꞌtî pî uurînîkon man inkamoro suꞌmina moreyamîꞌ yarakkîrî. Mîrîrî yeꞌnen, îꞌ wanîꞌ awanî yeꞌnen ipîkku pe wanî yuntonon eseurîmatoꞌpe tîmukuyamîꞌ yarakkîrî esenîtoꞌ pî moropai toꞌ yenupa yuntononya moreyamîꞌ pî suꞌminansenon pî tîwarî toꞌ eꞌtoꞌpe?
Epuꞌtî pî nan?
Jeová Maimu Ekaremeꞌnenan pia tuꞌke kaaretakon man yuntonon pîikaꞌtîtoꞌpe toꞌ eseurîmatoꞌpe tîmukuyamîꞌ yarakkîrî esenîtoꞌ pî moropai toꞌ yenupatoꞌpe tîwarî toꞌ eꞌtoꞌpe moreyamîꞌ pî suꞌminansenon pî. Itoꞌko eraꞌmakî:
-
Morî pe anmukuyamîꞌ pîikaꞌtîtî (panton eraꞌmatoꞌpe)
-
Esenupakî Kureꞌnan Yenupanen yarakkîrî, esenupantoꞌ 10 moropai 32
-
“Oꞌnon yeꞌka pe eseurîma anmukuyamîꞌ yarakkîrî esenîtoꞌ pî” (Tîwarî Eꞌkî! Nº. 5, 2016 konoꞌ pî)
6. Ayuntonon maimu yawîrî eꞌkî
Moreyamîꞌ moropai maasaronkon toꞌ yuntonon maimu yawîrî toꞌ wanî, toꞌ eseurîma ya morî pe toꞌ yuntonon yarakkîrî. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen morî pe puꞌkuru wanî maasaronkon eseurîmatoꞌpe yuntonon yarakkîrî?
-
Oꞌnon yeꞌka pe maasaron eseurîma eꞌpainon ituntonon yarakkîrî morî pe?
Eraꞌmatî Provérbios 1:8. Tarîpai seeni itoꞌkoꞌ manni pî eseurîmatî:
-
Îꞌ kupî maasaronya mîîkîrî panama toꞌ yuntononya yai?
7. Ayewîꞌ tawonkon pokonpe Jeová yapurîkî
Jeová Maimu Ekaremeꞌnenan esenupa tîmurukun pe tewîꞌ tawonkon pokonpe Paapa Maimu pî suntaꞌka kaisarî. Mîrîrî eseꞌ wanî “Paapa Yapurîtoꞌ Wîttî Tawonkon Pokonpe”. Oꞌnon yeꞌka pe seeni esenupantoꞌ konekaya eꞌpainon? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ ya wîttî tawonkon pîikaꞌtî eꞌpainon Paapa Maimu pî toꞌ esenupatoꞌpe tîrumakai pra?
-
Oꞌnon yeꞌka pe “Paapa Yapurîtoꞌ Wîttî Tawonkon Pokonpe” kupî yuntononya morî pe moropai tîmukuyamîꞌ eꞌpîikaꞌtîtoꞌpe mîrîrî wenai? — Tekaton eraꞌmatî iipiaꞌtoꞌ esenupantoꞌ ya.
-
Îꞌ waniꞌ awanî yeꞌnen saꞌme wanî aapia taise, Paapa Maimu pî esenupatoꞌpe ayewîꞌ tawonkon pokonpe?
Pena, Israel ponkon tewîꞌ tawonkon yarakkîrî eseurîmatoꞌpe tîkoꞌnarî Paapa Maimu pî yuꞌse Jeová wanîꞌpî. Eraꞌmatî Deuteronômio 6:6, 7. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe seeni panamatoꞌ yawîrî awanî eꞌpainon?
Oꞌnon yeꞌka pe “Paapa Yapurîtoꞌ Wîttî Tawonkon Pokonpe” konekaya eꞌpainon?
-
Amîrî esenupa eꞌpainon eꞌmaiꞌpe ayewîꞌ ta, attî iraurî emurukuntîntoꞌ ta.
-
Tiwin imenukasaꞌ Paapa Maimu yapai erenkakî moropai eseurîmakî mîrîrî pî.
-
Simîrikkî pe anmukuyamîꞌ wanî ya, yenupantoꞌ moreyamîꞌ tonpe yapikî site jw.org wenai.
-
Maasaronkon pe anmukuyamîꞌ wanî ya, eseurîmakî toꞌ yarakkîrî imenukasaꞌkon maasaronkon tonpe, site jw.org yawon pî.
-
Esenumenkakî penaronkon Paapa poitîrîtonon pantoni moropai mîrîrî panpe kuꞌkî anmukuyamîꞌ pokonpe.
-
Panton eraꞌmakî site jw.org wenai moropai eseurîmakî mîrîrî pî.
TIARONKONYA TAA: “Paapa Maimu wanî saꞌme moreyamîꞌ pia.”
-
Îꞌ taa amîrîya?
Îꞌ PÎ ESENUPA PÎ NAN?
Tîmukukon saꞌnama, yenupa moropai toꞌ eraꞌma morî pe yuntononya yuꞌse Jeová wanî. Yuntonon maimu yawîrî mukuyamîꞌ eꞌtoꞌpe yuꞌse Jeová wanî nîrî, moropai Jeová yapurîtoꞌpe toꞌya tîmurukun pe.
Enpanatapaiꞌnîkon
-
Oꞌnon yeꞌka pe yuntononya toꞌ mukuyamîꞌ yenupa moropai toꞌ eraꞌma toꞌya morî pe?
-
Oꞌnon yeꞌka pe mukuyamîꞌ wanî eꞌpainon yuntonon maimu yawîrî?
-
Îꞌ waniꞌ awanî yeꞌnen morî pe puꞌkuru wanî esenupatoꞌpe Paapa Maimu pî ayewîꞌ tawonkon pokonpe suntaꞌka kaisarî?
INÎꞌ PANPÎꞌ ESENUPAPAI NAN?
Oꞌnon yeꞌka panamatoꞌkonya anmu pîikaꞌtî eꞌpainon morî pe arentatoꞌpe?
“Tiwin miaꞌ pona tîîmoꞌtai panamatoꞌkon man anmu yenupapa” (Tîwarî Eꞌkî! Nº. 2, 2019 konoꞌ pî)
Panamatoꞌkon Paapa Maimu yapai eraꞌmakî yunkon aꞌyekeꞌtonon moropai sankon noꞌsantonon eraꞌmanenan tonpe.
Eraꞌmakî oꞌnon yeꞌka pe tiwin warayoꞌya epuꞌtî pra wanîꞌpî oꞌnon yeꞌka pe tîmukukon eraꞌma morî pe, tîîse mîrîrî tîpo, morî yun pe mîîkîrî enaꞌpî.
Jeováya anna yenupaꞌpî oꞌnon yeꞌka pe morî pe anna mukuyamîꞌ eraꞌmatoꞌpe annaya (5:58)
Eraꞌmakî oꞌnon yeꞌka pe tiwin yun wanî eꞌpainon tînmu yonpa pe.
“Oꞌnon yeꞌka pe yun erepamî eꞌpainon tînmu pia?” (A Sentinela, 1 Novembro kapoi pî, 2011 konoꞌ pî)
a Îꞌ taa yuꞌse Paapa Maimu wanî “tîmukuyamîꞌ panamatoꞌpe toꞌya”? Mîrîrî wanî morî pe toꞌ yenupatoꞌpe moropai morî pe to yeseru eꞌtoꞌpe. Tiwin kin tîmukuyamîꞌ tarumaꞌtî yuntononya eserîke pra man. — Provérbios 4:1.
