KĨTHOOMO KĨA 50
Nĩatĩa Nja Yaaku Yũũmba Kwĩthĩrwa na Kũgwĩrua?—Gĩcuncĩ kĩa 2
Aana nĩ kĩewa kuuma kĩrĩ Jehova. Nerĩgagĩĩra aciari bamenyeera bwega kĩewa kĩu. Jehova naejaga aciari ũtaaro bwa ũũme bwa kũbatethia kũthithia ũu. Ũtaaro bwawe kinya nĩbwonanagia ũrĩa aana bomba kũthithia nĩkenda batetheeria nja kwĩthĩrwa na kũgwĩrua.
1. Nĩ ũtaaro bũrĩkũ Jehova aejaga aciari?
Jehova nerĩgagĩĩra aciari benda aana baao na batumĩra ĩgiita rĩringĩ ũrĩa kũmbĩkĩka amwe nabo. Kinya nendaga aciari bakaria aana baao kuumania na mogwati, na gũtumĩra moritani ja Bibiria jarĩ mũsingi jwa kũbaritana. (Njuno 1:8) Eraga beethe ba aana ũjũ: “Barerageni na murerere jwa kubooneria uria bathingatanikia na Mwathani.” (Thooma Aefeso 6:4.) Jehova nagwĩragua rĩrĩa aciari bathingata mwerekera jwawe, rĩrĩa bakũrera aana baao bo bongwa na tĩ kũrekeeria muntũ ũngĩ kaanya kau.
2. Nĩ ũtaaro bũrĩkũ Jehova aejaga aana?
Jehova eraga aana: ‘Athikagireni aciari benu.’ (Thooma Akolosai 3:20.) Rĩrĩa aana bathĩkĩra aciari na babatĩĩa, nĩbagwĩragia Jehova ona kinya aciari baao. (Njuno 23:22-25) Jesũ neekĩre ngerekano ĩnjega rĩrĩa aarĩ mwana. Kinya kethĩra aarĩ muntũ ũmũũjũru, naathĩkĩĩre aciari baawe na kũbatĩĩa.—Luka 2:51, 52.
3. Nĩatĩa bũũmba kũthengeera Mũrungu bũrĩ amwe ta nja?
Kethĩra ũrĩ mũciari, nĩ mma nũkwenda aana baaku benda Jehova o ta ũrĩa ũmwendete. Nĩatĩa ũũmba kũũjũria mworoto jũu? Nĩ na njĩra ya kũthithia ũrĩa Bibiria yugaga: “Nagwe uritane aana baku [rũteto rwa Jehova] na wiru, na waragie untu bwajo igita riria ukari ndene ya nyomba yaku, na witite na njira.” (Kuriikanithia Maathana 6:7) Kũritana na “wiru” nĩ kuuga kũritana ũgĩcookagĩra ũntũ. Kaingĩ, no mwanka ũcookere ũntũ kĩrĩ aana baaku kaĩrĩ na kaĩrĩ nĩkenda babũriikana. Ĩandĩko rĩu rĩrĩonania atĩ magiita jamaingĩ nũbuĩrĩte gũcwa kaanya ga kwaranĩria na aana baaku bwegie Jehova. Nĩ ũntũ bũbwega kwĩthĩrwa na ĩgiita rĩnna o kiumia rĩa kũthathayia Jehova bũrĩ amwe ta nja. Ũkeja kwĩthĩrwa ũtĩ na aana, kinya gwe womba kũgunĩka rĩrĩa wacwa kaanya o kiumia ga kwiritana Rũteto rwa Mũrungu.
ĨNJA NKŨRŨKI
Ona mendekethia jarĩa ũũmba gũtumĩra jagũgũtethia kwĩthĩrwa na ũtũũro bwa nja bũrĩ na kũgwĩrua na ũkaria.
4. Ritana aana baaku na njĩra ya wendo
Kũritana mwana bwomba kwĩthĩrwa bũrĩ ũntũ bũbũũmũ. Nĩatĩa Bibiria yũũmba gũgũtethia? Thooma Jakubu 1:19, 20, rĩu bwarĩĩrie biũria bibi:
-
Nĩatĩa aciari bomba kwonania wendo rĩrĩa bakwaria na aana baao?
-
Nĩkĩ mũciari rĩrĩa athũũri, atĩbuĩrĩte gũkanũkia mwana waawe? a
5. Karia aana baaku
Nĩkenda ũkaria aana baaku, nĩũntũ bwa gĩtũmi kwaranĩria na o mwana mantũ jegie kũmenyana kĩmwĩrĩ. No wigue nthoni kũthithia ũu. Tega VIDIO, rĩu bwarĩĩrie biũria bibi bithingatĩte.
-
Nĩkĩ bũrĩ ũntũ bũbũũmũ kĩrĩ aciari bamwe kwaranĩria na aana baao bwegie kũmenyana kĩmwĩrĩ?
-
Nĩ njĩra ĩrĩkũ aciari bamwe batumĩrĩte kwaranĩria na aana baao bwegie kũmenyana kĩmwĩrĩ?
O ta ũrĩa kwaroretue, nthĩgũrũ ĩjĩ ya Shaitani nĩĩtĩte ĩkĩthũũkaga nkũrũki. Thooma 2 Timotheo 3:1, 13, rĩu bwarĩĩrie kĩũria gĩkĩ:
-
Bamwe ba antũ baathũũku barĩa bagweti kĩrĩ mũstaarĩ jwa 13 nĩbagwataga aana baniini kĩainya. Kwou, nĩkĩo bũrĩ ũntũ bwa gĩtũmi kĩrĩ aciari kũritana aana baao bwegie kũmenyana kĩmwĩrĩ, na ũrĩa bomba gwikaria kuumania na antũ baathũũku?
Ũramenya?
Akũũjĩ ba Jehova nĩbathuranĩrĩte into bibingĩ birĩa bitethagia aciari kũritana aana baao bwegie kũmenyana kĩmwĩrĩ, na kũbakaria kuumania na mogwati. Ngerekano, tega:
6. Tĩĩa aciari baaku
Aana babaniini na babeethĩ bomba gũtĩĩa aciari baao gũkũrũkĩĩra rwaria rwao. Tega VIDIO, rĩu bwarĩĩrie biũria bibi bithingatĩte.
-
Nĩkĩ bũrĩ ũntũ bwa gĩtũmi kĩrĩ muntũ ũmwĩthĩ kwaranĩria na aciari baawe na njĩra ya gĩtĩĩo?
-
Nĩatĩa muntũ ũmwĩthĩ omba kwaranĩria na aciari baawe na njĩra ĩkwonania nakũbatĩĩa?
Thooma Njuno 1:8, rĩu bwarĩĩrie kĩũria gĩkĩ:
-
Nĩatĩa muntũ ũmwĩthĩ abuĩrĩte gwĩtĩkĩĩria rĩrĩa aciari baawe bamwa kĩrĩra?
7. Thathayieni Jehova bũrĩ amwe ta nja
Nja cia Akũũjĩ ba Jehova nithuuraga ĩgiita rĩmwe o kiumia rĩa kũthathayia Jehova barĩ amwe. Nĩatĩa ũthathayia bwa nja bũthithagua? Tega VIDIO, rĩu bwarĩĩrie biũria bibi bithingatĩte.
-
Nĩmbi biũmba gũtethia antũ kwĩthĩrwa na Ũthathayia bwa Nja o kiumia batĩgũtĩĩra?
-
Nĩatĩa mũciari omba kũthithia nĩkenda bagwĩrĩrua ũthathayia bwa nja, na bomba kũgunĩka kuumania nabu?—Tega mbica ĩrĩa yambĩtie kĩthoomone gĩkĩ.
-
Nĩmbi biũmba gũtũma bwĩthĩrwa bũrĩ bũbũũmũ kĩrĩ gwe kwiritana amwe na bangĩ ndeene ya nja?
Kĩrĩ Israeli ya karaaja, Jehova eerĩgagĩĩra nja ciao imenyeria kwaranĩria ĩrĩ amwe bwegie Maandĩko. Thooma Kuriikanithia Maathana 6:6, 7, rĩu bwarĩĩrie kĩũria gĩkĩ:
-
Nĩatĩa ũũmba gũtumĩra ũritani bũbũ?
Mantũ jarĩa ũũmba kũthithia kĩrĩ ũthathayia bwa nja:
-
Thuranĩreni mĩcemanio ya kĩuthũrano.
-
Thoomeni na bwarĩĩrie rũgono rwa Bibiria rũrĩa nja yeenu ĩkagwĩrĩrua.
-
Kethĩra bũrĩ na aana babaniini, rita kana ũcabithie kuuma kĩrĩ jw.org mantũ jakũthithia jegie aana
-
Kethĩra ũrĩ na aana babeethĩ, arĩĩrieni mantũ ja kũthooma jegie antũ babeethĩ kĩrĩ jw.org.
-
Thithieni ĩtinda rĩa rũgono rwa Bibiria na aana baaku.
-
Tegeni na bwarĩĩrie vidio kĩrĩ jw.org.
ANTŨ BAMWE BAUGAGA: “Mantũ jarĩa jarĩ kĩrĩ Bibiria nĩ jamoomũ mono, aana gũciũkĩrwa nĩjo.”
-
Ũũmba kuuga atĩa?
NA NJĨRA ĨNKUĨ
Jehova arĩenda aciari bende aana baao, babaritane, na babakarie; aana nabo batĩĩe aciari na babaathĩkĩre; na bonthe ndeene ya nja bathathayie Jehova barĩ amwe.
Gũcookera
-
Nĩatĩa aciari bomba kũritana aana baao na kũbakaria?
-
Nĩatĩa aana bomba gũtĩĩa aciari baao?
-
Kũrĩ na baita irĩkũ cia kwĩthĩrwa na ĩgiita rĩnna o kiumia rĩa kũthathayia Jehova bũrĩ amwe ta nja?
CŨNKŨŨNA
Nĩ ithoomo birĩkũ bigatethia mwana waaku kwithuranĩra kwaa muntũ mũgima?
“Ithoomo Bitantatũ Birĩa Aana Bakũbatara Kwiritana” (Amkeni! Na. 2 2019)
Iritane motaaro jarĩa Bibiria ĩejanaga jagũtethia barĩa bamenyagĩĩra antũ baakũrũ.
“Nĩatĩa Bibiria Yugaga Bwegie Kũmenyeera Aciari Baakũrũ?” (Thooma intanetine)
Ona ũrĩa muntũ mũrũme ũmwe oombĩre kwaa baaba ũmwega, kinya kethĩra mberene ataijĩ kũrera aana.
Iritane ũrĩa beethe ba aana bomba gũtuma ũcoore bũbwega na ataana baao.
