SAK 50

Y maanda wãn tɩ y zakã pʋgẽ vɩɩm yɩ noogo?—Babg a 2

ÉCOUTER EN

Kãmbã yaa a Zeova kũuni. A ratame tɩ roagdbã ges b yell neere. A kõta roagdbã sagls sẽn yaa sõma n tõe n sõng-b tɩ b tõog n maan rẽ. A saglsã tõe n sõnga kambã me tɩ b bãng b sẽn tõe n maane, n sõng tɩ sũ-noog zĩnd zakã pʋgẽ.

1. Bõe la a Zeova rat tɩ roagdbã maane?

A Zeova ratame tɩ roagdbã nong b kambã, la b baood weer wa b sẽn tõe n be ne-ba. A leb n datame tɩ roagdbã kogl b kambã tɩ bũmb ra maan-ba, la b tũnug ne sagls nins sẽn be Biiblã pʋgẽ wã n sõng-b tɩ b paam minim. (Yel-bũnã 1:8) A yeta ba-rãmbã yaa: “Bɩ y kell n wub [y kambã] a Zeova . . . saglsã pʋsẽ.” (Karm-y Efɛɛz rãmb 6:4.) A Zeova sũur noomame, roagdbã sã n tũud yẽ saglsã n wubd b kambã, n pa rɩkd b kambã wubrã n bas ne ned a to ye.

2. Bõe la a Zeova rat tɩ kambã maane?

A Zeova yeta kambã yaa: “Sakd-y y ba-rãmbã la y ma-rãmbã.” (Karm-y Kolos rãmb 3:20.) Kãmbã sã n waoogd b roagdbã la b sakd-ba, noogda a Zeova sũuri, la b roagdbã me sũuri. (Yel-bũnã 23:22-25) A Zeezi kõo mak-sõngo, a sẽn wa n paoodẽ wã. Baa ne a sẽn da zems zãngã, a ra waoogda a roagdbã sẽn da pa zems zãngã, la a sakd-ba.—Luk 2:51, 52.

3. Bõe la y tõe n maan tɩ yãmb ne y zakã rãmb zoodã ne a Zeova tall pãnga?

Y sã n tara kamba, sãmbg kae tɩ y ratame tɩ bãmb me nonga a Zeova wʋsgo, wa yãmba. Rẽ wɛɛngẽ, bõe la y tõe n maan sõng-ba? Yaa y sẽn na n tũ Biiblã sẽn yet tɩ y segd n dɩka a Zeova goamã n “zãms y kambã. Yãmb sã n zĩ y zakẽ, bɩ y gomd a yelle, la y sã n kẽnd sor zug me, bɩ y gomd a yelle.’ (Tõodo 6:7) B sẽn yeel tɩ “zãmsã” rat n yeelame me tɩ “togs n yɩlme.” Yaa vẽeneg tɩ y miime tɩ naoor wʋsgo, yaa tɩlɛ tɩ y togs y kambã bũmb kẽer n yɩlme, sẽn na yɩl tɩ b wa tẽege. Vɛrse wã goamã rat n yeelame tɩ y segd n wae n baooda segb n gomd a Zeova yell ne y kambã. Yɩta sõma tɩ yãmb ne y zakã rãmb fãa yãk wakat semennã pʋgẽ, n naagd taab n zãmsd Biiblã. Baa y pa tar kamba, y sã n baood weer n zãmsd Biiblã semen fãa, na n naf-y lame.

D BAO N BÃNG N PAASE

D ges sagls sẽn be Biiblã pʋgẽ, n tõe n sɩd sõng zakã rãmb fãa tɩ b paam sũ-noogo, tɩ b yam me gãe bãane.

4. Zãmsd-y y kambã ne nonglem

Zãms biig tõeeme n pa yɩ nana baa-baa. La wãn to la Biiblã tõe n sõnge? Karm-y Zak 1:19, 20, tɩ rẽ poor bɩ y leok sogsgã:

Roagdbã sã n wa gomd ne b kambã, wãn to la b tõe n wilg tɩ b nong-b lame?
Bõe yĩng tɩ roagd pa tol n segd n kibl a biig ne sũ-yikri? a

5. Kogl-y y kambã

Sẽn na yɩl n kogl y kambã, yaa tɩlɛ tɩ y gom pag ne rao lagengã yell ne y biig fãa. Woto maaneg tõe n yɩɩ toogo. Ges-y VIDEO wã, tɩ rẽ poor bɩ y leok sogsgã.

VIDEO: Kogl-y y kambã ne wẽng buud fãa (2:58)

Bõe yĩng tɩ yaa toog ne roagdb kẽer tɩ b gom pag ne rao lagengã yell ne b kambã?
Roagdb kẽer maana wãn n bilg b kambã pag ne rao lagengã sẽn yaa bũmb ninga?

Wa b sẽn da pĩnd n togs Wẽnnaam Gomdã pʋgẽ wã, a Sʋɩtãan dũniyã lebgda wẽng n paasdẽ. Karm-y 2 Tɩmote 3:1, 13, tɩ rẽ poor bɩ y leok sokrã:

Neb nins yell b sẽn gomd vɛrse 13 pʋgẽ wã kẽer yõgda kamba. Woto wã, bõe yĩng tɩ tar yõod tɩ roagdbã gom pag ne rao lagengã yell ne b kambã, la b kogl-b ne nin-wẽnsã?

Yãmb miime bɩ?

A Zeova Kaset rãmbã yiisda sɛb la video-rãmb wʋsg sẽn tõe n sõng roagdbã tɩ b gom pag ne rao lagengã yell ne b kambã, la b kogl-b ne neb nins sẽn tõe n maan-b wẽngã? Wala makre, ges-y

Kogl-y y kambã (video)
Écoute le grand Enseignant, sak 10 ne 32
“Gom pag ne rao lagengã yell ne f biiga” (Réveillez-vous ! n^o 5 2016)

6. Waoog-y y roagdbã

Kambã la kom-bɩɩsã sẽn gomd ne b roagdbã to-to wã tõe n wilga b sã n waoogd-b lame. Ges-y VIDEO wã, tɩ rẽ poor bɩ y leok sogsgã.

VIDEO: M maanda wãn n sõs ne m roagdbã sõma? (2:19)

Bõe yĩng tɩ segd tɩ biig sẽn sõsd ne a roagdb to-to wã yɩ ne waoogre?
Wãn to la biig tõe n gom ne a roagdbã, tɩ wilgd t’a waoogd-b lame?

Karm-y Yel-bũnã 1:8, tɩ rẽ poor bɩ y leok sokrã:

Biig manesem tog n yɩɩ wãna, a roagdb sã n wilg-a a sẽn segd n maane?

7. Naagd-y taab n zãmsd Biiblã

A Zeova Kaset rãmbã zags pʋsẽ, b yãka wakat n naagd taab n zãmsd Biiblã semen fãa. Bõe la y tõe n maan zak pʋgẽ Biibl zãmsg a woto sasa? Ges-y VIDEO wã, tɩ rẽ poor bɩ y leok sogsgã.

VIDEO: Zak pʋgẽ Biibl zãmsgã: A zu-loeese, la a nafa (8:04)

Bõe n tõe n sõng zak rãmb tɩ b tõogd n maand zak pʋgẽ Biibl zãmsgã n pa vaandẽ?
Bõe la roagd tõe n maane, tɩ zak pʋgẽ Biibl zãmsgã tall yamleoogo, la sɩd naf zakã rãmba?—Ges-y sakã sɩngrẽ fotã.
Bõe n tõe n kɩt tɩ yɩ toog ne yãmb zakã rãmb tɩ y naag taab n zãms Biiblã?

Pĩnd wẽndẽ Israyɛll wakatẽ wã, a Zeova ra ratame tɩ zak rãmb wae n naagd taab n sõsd Gʋls-sõamyã zugu. Karm-y Tõod 6:6, 7, tɩ rẽ poor bɩ y leok sokrã:

Wãn to la y tõe n tũ no-kãnga?

Y sẽn tõe n maan y zak pʋgẽ Biibl zãmsgã sasa:

Segl-y y meng tigissã yĩnga.
Yãk-y Biiblã kibar sẽn na n yɩ y zakã rãmb noogo, tɩ y karem la y sõs a zugu.
Y sã n tara kom-bõonego, bɩ y telesarz wall y ẽmpirim kambã reem kẽer sẽn be jw.org pʋgẽ wã.
Y sã n tara kom-bɩɩse, bɩ y yãk jw.org sõsg sẽn yaa kom-bɩɩsã yĩnga, tɩ y sõs a zugu.
Tik-y Biiblã kibar ning zugu, tɩ yãmb ne y kambã maan teyaatre.
Yãk-y video sẽn be jw.org pʋgẽ n gese, la y sõs a zugu.

NEB KẼER SẼN YETE: “D tʋʋmã waoogame. D pa tar sẽk n zãmsd d kambã Biiblã ye.”

Y na n leokame tɩ bõe?

KƲMSGO

A Zeova ratame tɩ roagdbã nong b kambã, n sõngd-b tɩ b paamd minim, la b kogend-ba. A ratame tɩ kambã me waoogd b roagdbã, la b sakd-ba. A leb n datame tɩ zakã rãmb naagd taab n tũud-a.

Lebg-n-gese

Bõe la roagdbã tõe n maan n sõng b kambã tɩ b paam minim, la b kogl-ba?
Wãn to la kambã tõe n wilg tɩ b waoogda b roagdbã?
Zak rãmb sã n yãk wakat n naagd taab n zãmsd Biiblã semen fãa, a nafa wã yaa bõe?

Zãmsgã saab daare:

M sẽn tõe n maane

Sok tigingã neb a taab n gese, bõe me la m tõe n maan zak pʋgẽ Biibl zãmsgã sasa.

Bũmb a to:

Bũmb a to y sẽn dat n maane

BŨMB A TAABA

Bõe la y tõe n maan n sõng y kambã tɩ b sã n lebg kãsemb bɩ naf-ba?

“Bũmb a yoob b sẽn tog n zãms kambã” (Yʋʋmd 2019 Réveillez-vous ! N^o a 2)

Sagls sẽn be Biiblã pʋgẽ, n tõe n sõng neb nins sẽn get b roagdb sẽn kʋʋl yellã.

“Biiblã pʋgẽ, bõe la b yet ges f roagdb sẽn kʋʋl yellã wɛɛngẽ?” (Bee jw.org)

Rao a ye kibare. A ra pa mi kamb wubri, la a wa n lebga ba sẽn mi kamb wubr sõma.

A Zeova sõnga tõnd tɩ d bãng n wub d kambã (5:58)

Ba sẽn tõe n maan to-to tɩ yẽ ne a bi-ribl noom ne taab sõma.

“Bõe la ba-rãmbã tõe n maan tɩ bãmb ne b kom-dibli wã noom ne taab sõma?” (Yʋʋmd 2011 sɩpaolg kiuug pipi daar Gũusg Gasgã)

a Biiblã pʋgẽ, b sã n gomd biig “kiblg” yelle, rat n yeelame tɩ f zãms-a, n wilg-a sore, wall n rems-a t’a bas tags-wẽng bɩ manesem-wẽnga. Pa rat n yeel tɩ pãb-a wall n weoog-a ye.—Yel-bũnã 4:1.