ISAMBILILO 50
Vino Ungacita pa Kuti mu Lupwa Lwako Muwe Insansa—Uluwali 2
Awana acawila ukufuma kwe Yehova. Akalonda ukuti awakwasi wasunga icete co-o icawila cino wawapa. Akawapa na vino vingawavwa ukucita wo-o. Walanda na vino awana wangacita pakuti walenga mu lupwa mwawa insansa.
1. Avyani vino e Yehova akanena awakwasi?
E Yehova akalonda awakwasi wakunda awana wawo nu kuzanwa nawo pa mpindi nkulu. Akalonda nu kuti wacinjilila awana wawo kwe vino vingawaletelela. Nga nu kuwomvya Baibolo pa kuwasambilizya. (Imilumbe 1:8) Akanena awakwasi wa consi ukuti: “Muwawalelela [awana winu] mwi . . . sundo lya mfumu.” (Wazya Waefeso 6:4.) E Yehova akasecelela nkaninye nga cakuti awakwasi wakukonka vino akawasambilizya pa kukuzya awana wawo. Swinya akatemwa nga ca kuti wasakusecezya awana kwe wanji ukuti awano wawasunjilako.
2. Avyani vino e Yehova akanena awana?
E Yehova akanena awana ukuti: “Wana, amulimo winu mwe wa Klistu ukutontela awakwasi winu penye.” (Wazya Wakolose 3:20.) Nga cakuti awana wakucindika awakwasi nukuwatontela, wakalenga e Yehova na wakwasi wawo ukusecelela. (Imilumbe 23:22-25) E Yesu walinji acakulolela icizima nkaninye. Wacindikanga nu kutontela awakwasi wakwe nanti aca kuti weni walinji amupwililike, lelo awakwasi wakwe watalinji awapwililike.—Luka 2:51, 52.
3. Uzye mungapalamila wuli kwe Yehova mu lupwa lwinu?
Ukwasowa nu kuvwilika mwe wakwasi mukalonda awana winu ukukunda e Yehova ndi vino mwamukunda. Uzye mungawavwa wuli? Mungacita wo-o nga mukukonka vino Baibolo ikalanda ukuti: “Mwize musambilizye [amazwi ya kwe Yehova] awana winu. Mulange mukayizuka ponsi pano mwisile mutwaya twinu naponsi pano mukupita, napano mukupuza napano mukuwombanye.” (Amasundo 6:7) Muzipizile mwamanya ukuti kwawa vimwi vino munganyocezyapo ku wana winu pakuti wavizuka. Lyo-o iwaliko likusula ukuti lyonsinye muzipizile mwasyako impindi yakulanda na wana winu pe Yehova. Cakazipa nkaninye ukusyako impindi yakuwazya Baibolo nu lupwa cila sabata. Nga cakuti mutawa na wana, namwemwenye mungasyako impindi iyakuyisambilizya Baibolo cila sabata.
SAMBILILA IVICILE PA-A
Lola vino vikalenga awa mu lupwa ukuwa ni nsansa nukucinjililwa.
4. Mwawa nu lukundo pano mukusambilizya awana winu
Ukusambilizya umwana kutapepuka. Lelo e Baibolo ingamyavwa. Uzye ingamyavwa wuli? Wazyani Jemusi 1:19, 20, nu kulanzyanya ya-a amawuzyo:
-
Uzye awakwasi wangalanjizya wuli ulukundo pano wakulanda na wana wawo?
-
Amulandu ci wuno umukwasi atazipizile ukusundila awana wakwe pano afuzilwe? a
5. Mwawacinjilila
Pakuti mucinjilile awana winu, muzipizile ukulanda nawo mukulungatika pi lyasi lya kupanga icupo. Kweni ukucita wo-o kutanga kupepuke. Tambani e VIDYO, nu kulanzyanya ya-a amawuzyo.
-
Amulandu ci wuno cisipepucila ku wakwasi wamwi ukulanzyanya na wana wawo pi lyasi lya kupanga icupo?
-
Uzye awakwasi wamwi wakacita wuli pakulondololela awana wawo pi lyasi lya kupanga icupo?
Insi yakwe Satana yikuya ikuwipilakovye wulyanye vino Baibolo yalandizile lya nkani. Wazyani 2 Timoti 3:1, 13, nu kulanzyanya lyo-o iwuzyo:
-
Pe wa-a awantu wamwi awawipe wano walumbulwa pa vesi 13 wakacenda awana. Acino, amulandu ci wuno cacindamila ku wakwasi ukusambilizya awana wawo pi lyasi lya kupanga icupo nape vino wangayicinjilila kwe wano wakacenda awana?
Uzye wamanya?
Inte zya kwe Yehova wakafumya amabuku amavule yano yakakwavwa awakwasi ukusambilizya awana wawo pi lyasi lya kupanga icupo nu kuwacinjilila kwe wano wakacenda awana. Ku cakulolelako, lola:
6. Uwacindika awakwasi wako
Awana na wacitici wangalanjizya ukuti wacindika awakwasi wawo mu nzila yino wakalandilamo ku wakwasi wawo. Tambani e VIDYO, nu kulanzyanya ya-a amawuzyo.
-
Amulandu ci wuno umwana nanti uwacitici azipizile ukuwa nu mucinzi pano akulanda na wakwasi wakwe?
-
Uzye uwacitici angalanjizya wuli umucinzi pano akulanzyanya na wakwasi wakwe?
Wazyani Imilumbe 1:8, nu kulanzyanya lyo-o iwuzyo:
-
Uzye uwacitici azipizile ukucita wuli nga awakwasi wamunena ivya kucita?
7. Mwapepa Yehova ponga nu lupwa lwinu
Indupwa zya kwe Yehova zikasola uwanda wonga mwe sabata uwakupepela ponga e Yehova. Avyani vino mungacita pa mapepo ya lupwa? Tambani e VIDYO, nu kulanzyanya ya-a amawuzyo.
-
Uzye awa mulupwa wangacita wuli pakuti wawa na Mapepo ya Lupwa lyonsinye?
-
Avyani vino umukwasi azipizile ukucita pa kuti amapepo ya lupwa yazipa?—Lola icikope cakutalicila mwe lyonye isambililo.
-
Acani cino cingalenga awa mulupwa wapotwa ukusambilila ponga?
Mu mpindi zya wina Israeli e Yehova walondanga awa mulupwa walanzyanya lyonsinye pa vya mu Mawaliko. Wazyani Amasundo 6:6, 7, nu kulanzyanya lyo-o iwuzyo:
-
Uzye ungawomvya wuli co-o icisinka ci sundo?
Vimwi vino mungacita pa mapepo ya lupwa:
-
Pekanizizyani ponga ukulongana.
-
Wazyani nu kulanzyanya ilyasi lya mu Baibolo lino wonsinye mu lupwa wangivwa icete.
-
Nga mwawa na wana wano wacili awatici mungakopolola nanti ukupulinta ivya kucita ivya wana pa jw.org.
-
Nga mwawa na wana wano wali ni myaka pa kasi ke 13 ne 19 mungalanzyanya nawo ivipande vya awacitici ivya pa jw.org.
-
Citani ngati mwemwe na wana winu amwe wano mukulandwapo mwi lyasi limwi ilya mu Baibolo.
-
Tambani nu kulanzyanya e vidyo ya pa jw.org.
WAMWI WAKATI: “Twawa ni vyakucita ivivule. Ngi mpindi yakusambilizya awana Baibolo tuyifumye na kwi?”
-
Nga wewe ukutipo wuli?
IVISINKA VIKULU
E Yehova akalonda ukuti awakwasi wakunda, ukusambilizya nu kucinjilila awana wawo. Ne wana, akalonda wacindika nukutontela awakasi wawo; swinya akalonda ukuti awa mulupwa wamupepela ponga.
Avyani Vino Wasambilila?
-
Uzye awakwasi wangasambilizya wuli nu kucinjilila awana wawo?
-
Uzye awana wangalanjizya wuli ukuti wacindika awakwasi wawo?
-
Avizima ci vino vyawa mukusyako impindi cila sabata iyakupepela ponga nu lupwa?
MANYILAPO NA VINJI
Avyani vino mungasambilizya umwana winu vino vingamupekanizizya pano alifika iciimo ca wusongo?
“Amasambililo 6 Yano Awacitici Wazipizile Ukusambilila” (Loleni! Na. 2 2019)
Lola vino Baibolo ikapanda amano wano wakasunga awakwasi awakote.
“Avyani Vino Baibolo Yalanda pe Wano Wakasunga Awakwasi Wawo Awakote?” (Icipande ca pa webusayiti)
Lola vino umonsi wino atamanyile ivya kukuzya awana wakwe wacisile pakuwa umukwasi muzima.
Lola vino awakwasi wa consi wangacita pakuti wakwivwana icete na wana wawo awonsi.
a Mwe Baibolo, izwi lya kuti “ukusunda,” likasula ukusambilizya, ukutungulula umwana nukumwavwa ukuleka ukwelenganya iviwipe nanti ukuleka imisango miwipe. Kusisula ukuwa umunkalwe ku mwana nanti ukutalika ukumucuzya.—Imilumbe 19:18.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
