CILONGESA 50
Vati mu Hasa ku Yoya mu Ndzolela mu Vusoko?—Mutamba 2
Vana va pua vuana vua ku tunda kuli Yehova. Kaha ua tonda visemi va niunge vuino vuana vuaco. Ngeci ue ku va hana vimamuna vi va kuasa ku lingamo. Vimamuna via Yehova via muesa naua ngecize vanike navo va kala na mutamba ku ndzolela ya ha ndzivo.
1. Vimamuna vika Yehova ue ku hana ku visemi?
Yehova ua tonda visemi va leme vana vavo, kaha na ku uana-uana ntsimbu ya ku puamo ya ku kala navo. Ua tonda naua visemi va niunge vana, na ku pangesa Mbimbiliya ku pua luvula lua vilongesa vi ve ku hana ku vana. (Visimo 1:8) Ua leka visemi va vamala ngueni: “Lelienu [vana venu] na ku va . . . mamuna muli Muangana [Yehova].” (Tandenu Efeso 6:4.) Yehova ue ku ivua ndzolela ya kama nga visemi va kava ku tuamenena ceni mu ku longesa vana, kaha ka va nakuila kapandi kaco ku muntu ueka.
2. Cimamuna cika Yehova ua hana ku vana?
Yehova ua sika vana ngueni: “Enu vanike, tamunukenu kuli visemi venu.” (Tandenu Kolose 3:20.) Nga vana va singimika na ku ononoka visemi, ve ku vuisa kati lika visemi vavo ndzolela, vunoni na Yehova. (Visimo 23:22-25) Yesu ua sile lungano lua cili mua puile kanike. Vunoni uononokele na ku singimika visemi veni.—Luka 2:51, 52.
3. Vati mu hasa ku kaniamesa vusamba vuenu na Njambi mu vusoko?
Nga mua pua cisemi, mua vusunga, mua tonda vana venu va leme Yehova, ngue mu mua mu lema enu. Vati mu hasa ku puisamo cizango caco? Mu ku linga vi ya handeka Mbimbiliya. Nguayo: “Kaha u ka zangama mu ku a longesa kuli vana vove, kaha u ka a simutuile omo u tumama mu ndzivo yove, nomo u enda mu njila.” (Ndeutelonomi 6:7) Mezi ku “zangama mu ku longesa,” a lomboloka ku hilukila-hilukila cuma noho muntu na ci ivuisisa. Citava nenu mu tantekeya ngecize ku longesa vanike, noho ku hilukila-hilukila, linga va hase ku ci vuluka. Ngeci mukemuo, eci cinimbu ca lomboloka ngecize, mua pande ku tonda-tonda vukovelelo vua ku longesa vana via Yehova. Ca pua ca cili ku pua na ku hangula ntsimbu ya ku lemesa Yehova nkala simano. Cipue nga ka mua kele na vana, puenu na ku uana-uana ntsimbu ya ku lilongesa lizi lia Njambi nkala simano.
TANTEKEYENU VIKUAVO
Tantekeyenu vimamuna via cili vize vie ku kuasa vusoko ku yoya mu ndzolela na ku lembama.
4. Longesenu vana venu na cilemo
Ku longesa vana ca cikalu. Vati Mbimbiliya i hasa ku mi kuasa? Tandenu Tiango 1:19, 20, kaha simutuilenu ha vihula evi:
-
Vati visemi va hasa ku muesa cilemo omo va simutuila na vana?
-
Omo lia vika cisemi ka pandele ku sungamesa muana, nga na niengua? a
5. Niungenu vana venu
Ku simutuila na vana ku tuala ha via ku limona ku mivila, ca pua ca seho ya kama-kama mu ku longesa vana. Cimpande caco ca cikalu ku ci simutuila. Talenu VIDEO, kaha simutuilenu ha vihula vi na hatako.
-
Omo lia vika vamo visemi ce ku va kaluuila ku handeka via ku limona ku mivila na vana?
-
Vinjila vika ve ku pangesa vamo visemi mu ku simutuila na vana vavo ha cimpande ca ku limona ku mivila?
Ngue mu ya muesa Mbimbiliya, vupi muno mu mavu a Satana vuli na ku ila mueka honi. Tandenu 2 Timoteo 3:1, 13, kaha simutuilenu ha cihula eci:
-
Vamo vakua vupi va va tumbula mu cinimbu 13, ve ku limona na vanike ku mivila. Seho ika ya kala ha visemi ku longesa vana via ku limona ku mivila? Vati va hasa ku longesa vana ku liniunga ku vantu vaco?
Mua vi tantekeyele ni?
Vakaleho va Yehova ve ku tuhula vikuata via vingi, vie ku kuasa visemi ku longesa vana vavo via ku limona ku mivila, na vati vana va hasa ku liniunga ku vusonde vuaco. Ca ku muenako, talenu:
-
Niungenu Vana Venu (video)
-
“Longesenu Vana Venu via ku Limona ku Mivila” (Vingilenu! No. 5 2016, mu putu)
6. Singimikenu visemi venu
Vanike va vandende na tunkavala ve ku muesa kasingimiko ku visemi vavo, mu cifua ci ve ku handeka navo. Talenu VIDEO, kaha simutuilenu ha vihula vi na hatako.
-
Omo lia vika ca pua ca seho kuli mukuendze ku muesa kasingimiko omo a handeka na visemi?
-
Vati mukuendze a hasa ku handeka na visemi veni mu njila i muesa ngecize ua va singimika?
Tandenu Visimo 1:8, kaha simutuilenu ha cihula eci:
-
Vati na pande ku linga mukuendze nga visemi va mu tuma vimo?
7. Lemesenu Yehova mu vusoko
Masoko a Vakaleho va Yehova a hangula ntsimbu ya ku kala hamo na ku lemesa mu vusoko nkala simano. Vati ca fua ku lemesa mu vusoko? Talenu VIDEO, kaha simutuilenu ha vihula vi na hatako.
-
Vati vusoko vu hasa ku kala na programa ya ku Lemesa mu Vusoko?
-
Vati cisemi a hasa ku lingisa ku lemesa mu vusoko ci tovale na ku kuasa mua kama vusoko?—Talenu cikupulo ca ku vuputukilo vua cilongesa cino.
-
Mu ku mona cenu, vika vi hasa ku kaluuisa ku lemesa ca mu vusoko vuenu?
Mu Isaleli ya laza, Yehova ua tondele masoko a pue na ku simutuila via mu Visoneka via ku Lela ku sua kumo. Tandenu Ndeutelonomi 6:6, 7, kaha simutuilenu ha cihula eci:
-
Vati mu hasa ku pangesa eci citume?
Vinguli vi hasa ku kuasa mu ku lemesa ca mu vusoko:
-
Ku liviukisila viuano.
-
Ku tanda na ku simutuila via umo muzimbu ua mu Mbimbiliya u vu hasa ku lema vusoko vuenu.
-
Nga mua kala na vana va vandende, tupululenu ni tuhulenu vipanga via vanike mu saiti jw.org.
-
Nga vana venu vendela ha vunkavala, simutuilenu ha cimo cimpande ca vakuendze na vahumbe ca mu saiti jw.org.
-
Setekenu ku temunuina mpundu cifua ci uendelelemo umo muzimbu ua mu Mbimbiliya na vana venu.
-
Talenu imo video ya mu jw.org kaha simutuilenuho.
VAMO VE KU HANDEKA NGUAVO: “Mbimbiliya ya ikalu cikuma ku i longesa ku vanike.”
-
Vati mu kumbulula?
VI MU NA LILONGESA
Yehova ua tonda visemi va leme vana vavo, ku va longesa, na ku va niunga. Kaha vana co, va singimike na ku ononoka visemi vavo. Cikuavo naua, ua tonda masoko a mu lemese hamo lika.
Mpupulule
-
Vati visemi va hasa ku longesa na ku niunga vana vavo?
-
Vati vana va hasa ku muesa kavumbi ku visemi?
-
Vukuasi vuka vua kala ha ku hangula ntsimbu ya ku pua na ku lemesa hamo lika nkala simano?
KONKENUHO
Vilongesa vika vi hasa ku kuasa vana venu ku muono ua vukuluntu?
“Vilongesa 6 via Tondeka ku Longesa Vanike” (Vingilenu! No. 2 2019)
Tantekeyenu vimamuna vi ya hana Mbimbiliya kuli vaze ve ku niunga visemi va ku kulupa.
“Vika ya Handeka Mbimbiliya ku Tuala ha ku Niunga Visemi va ku Kulupa?” (Cimpande ca mu saiti)
Talenu vati umo yala ka tantekeyele ku lela vana, ua lilongesele ku lela vuino vana veni.
Hilulenu vati visemi va vamala va hasa ku kaniamesa ku likata cavo na vana vavo va vamala.
a Mu Mbimbiliya, lizi “ku sungamesa” liemanena ku longesa na ku tuamenena, kati ku yandesa.—Visimo 4:1.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
