ISIFUNDO 50
Kuyini Okungenza Imuli Ithokoze?—Ingxenye 2
Abantwana bayisipho esivela kuJehova futhi ukhangelele ukuthi abazali basiphathe kuhle isipho lesi. IBhayibhili lilamacebo avela kuJehova anceda abazali ukuthi bakhulise kuhle abantwababo. Liphinda libe lamacebo anceda abantwana babone ukuthi labo balengxenye ekwenzeni ukuthi imuli ithokoze.
1. UJehova ukhangelele ukuthi abazali babakhulise njani abantwana?
UJehova ufuna abazali bathande abantwababo njalo bazinike isikhathi sokuba labo. Ukhangelele ukuthi abazali bavikele abantwababo kuloba yini engabalimaza njalo babafundise okutshiwo liBhayibhili. (IZaga 1:8) UJehova uthi: “Bobaba . . . qhubekani libakhulisa [abantwabenu] ngokulaya langokuxwayisa okuvela kuJehova.” (Bala u-Efesu 6:4.) UJehova ufuna abazali kube yibo abakhulisa abantwababo hatshi omunye umuntu. Uyathokoza kakhulu nxa abazali bekhulisa abantwana ngendlela ayifunayo.
2. UJehova ukhangelele ukuthi abantwana benzeni?
UJehova uthi: “Bantwana, lalelani abazali benu.” (Bala uKholose 3:20.) Nxa abantwana behlonipha futhi belalela abazali, uJehova uyathokoza njalo labazali babo bayathokoza. (IZaga 23:22-25) UJesu uyisibonelo esihle abantwana abangasilingisela. Lanxa abazali bakhe babelesono, waqhubeka ebalalela futhi ebahlonipha.—ULukha 2:51, 52.
3. Imuli ingenzani ukuze ihlale iseduze loNkulunkulu?
Akuthandabuzwa ukuthi nxa ungumzali uyafuna ukuthi abantwabakho bathande uJehova njengawe. Manje ungabancedisa njani ukuthi bakwenze lokhu? IBhayibhili lithi kumele ‘ugcizelele [imithetho kaJehova] kubantwabakho, ukhulume ngayo nxa uhlezi endlini yakho, lanxa uhamba endleleni.’ (UDutheronomi 6:7) Ibala elithi ‘gcizelela’ litsho ukufundisa uphindaphinda. Yikho njengomzali kuqakathekile ukuthi uhlale uphindaphinda ngoba kuzakwenza umntanakho ahlale ekhumbula. Ivesi le itsho ukuthi kumele usebenzise loba yiliphi ithuba olitholayo ukuze ufundise abantwabakho ngoJehova. Kungaba kuhle ukuthi iviki ngayinye libe lesikhathi sokufunda ngoJehova liyimuli. Nxa lingelabantwana lingasebenzisa isikhathi leso ukuthi libale iBhayibhili.
GEBHA UJULE
Engxenyeni le sizaxoxa ngamacebo anceda abazali labantwababo ukuthi bahlale bethokoza futhi bevikelekile.
4. Bafundise kuhle abantwabakho
Ukukhulisa umntwana ngumsebenzi onzima. Kodwa iBhayibhili lingakunceda njani? Bala uJakhobe 1:19, 20 beselixoxa ngemibuzo le:
-
Abazali bangatshengisa njani ukuthi bayabathanda abantwababo ngesikhathi bexoxa labo?
-
Kungani kungamelanga umzali alaye kumbe aqondise umntwana ezondile? a
5. Vikela abantwabakho
Ukuze uvikele abantwabakho, kuqakathekile ukuthi uxoxe labo ngendaba zemacansini lanxa kungaba nzima ukukwenza lokhu. Bukelani IVIDIYO beselixoxa ngemibuzo elandelayo.
-
Kungani kunzima kwabanye abazali ukuthi baxoxe labantwababo ngezemacansini?
-
Kuyini okuncede abanye abazali ukuthi benelise ukuxoxa labantwababo ngezemacansini?
Umhlaba kaSathane ulokhu uqhubeka usiba mubi kakhulu njengoba nje iBhayibhili latsho. Bala u-2 Thimothi 3:1, 13 beselixoxa ngombuzo lo:
-
Abanye abantu ababi okukhulunywa ngabo kuvesi 13 ngabahlukuluza abantwana kwezemacansini. Kungani kuqakathekile ukuthi abazali baxoxe labantwababo ngezemacansini ukuze babavikele ebantwini abangabahlukuluza?
Ubukwazi yini?
Inhlanganiso yethu ilokunengi okunceda abazali ukuthi benelise ukufundisa abantwababo ngendaba zemacansini lokuthi babavikele ebantwini abangabahlukuluza. Nanku okunye okungakunceda:
-
Vikela Abantwabakho (ividiyo)
-
“Ukufundisa Umntanakho Ngezemacansini” (Vukani! No. 5 2016)
6. Bantwana, hloniphani abazali benu
Abantwana bangatshengisa ukuthi bayabahlonipha abazali ngendlela abakhuluma ngayo. Bukelani IVIDIYO beselixoxa ngemibuzo elandelayo.
-
Kungani kuqakathekile ukuthi umntwana akhulume ngenhlonipho labazali bakhe?
-
Angakwenza njani lokhu?
Bala iZaga 1:8 beselixoxa ngombuzo lo:
-
Umntwana kumele enzeni nxa abazali bakhe bemlaya?
7. Khonzani uJehova liyimuli
Imuli ngayinye yaboFakazi bakaJehova iba lokukhonza kwemuli iviki ngayinye. Bakwenza njani lokhu? Bukelani IVIDIYO beselixoxa ngemibuzo elandelayo.
-
Imuli ingenzani ukuze ibe lokukhonza kwemuli maviki wonke?
-
Abazali bangenzani ukuze isikhathi leso sibemnandi futhi sincede wonke umuntu emulini?—Khangela umfanekiso osekuqaliseni kwesifundo lesi.
-
Ubona angani kuyini okungenza kube nzima ukuthi lifunde iBhayibhili liyimuli?
UJehova wayefuna imuli ngayinye yako-Israyeli ibe lesikhathi sokuxoxa ngeMibhalo. Bala uDutheronomi 6:6, 7 beselixoxa ngombuzo lo:
-
Ungawusebenzisa njani umbhalo lo?
Elingakwenza ngesikhathi sokukhonza kwemuli:
-
Lungiselelani imihlangano yebandla.
-
Balani njalo lixoxe ngendaba eseBhayibhilini elizayikholisa liyimuli.
-
Nxa ulabantwana abancane ungadawuniloda kumbe uphrinte loba yini esengxenyeni yabantwana ku-jw.org.
-
Nxa ulabantwana asebekhulakhulile ungasebenzisa loba yini esengxenyeni yabasakhulayo ku-jw.org.
-
Yenzani idrama lilingisela indaba eseBhayibhilini.
-
Bukelani loba yiphi ividiyo etholakala ku-jw.org beselixoxa ngayo.
ABANYE BATHI: “Abantwana ngeke balizwisise iBhayibhili.”
-
Ungamphendula usithini umuntu otshonjalo?
ISIFINQO
UJehova ufuna abazali bathande abantwababo, babafundise futhi babavikele. Ufuna abantwana balalele njalo bahloniphe abazali babo lokuthi imuli ngayinye ibe lesikhathi sokukhonza indawonye.
Ufundeni?
-
Abazali bangabavikela njani abantwababo?
-
Abantwana bangatshengisa njani ukuthi bayabahlonipha abazali babo?
-
Kunceda ngani ukuba lesikhathi sokukhonza liyimuli maviki wonke?
THOLA OKUNENGI
Bala imagazini le ubone okunye ongakufundisa umntanakho okuzamnceda nxa esekhulile.
“Izinto Ezingu-6 Okumele Abantwana Bazifundiswe” (Vukani! No. 2 2019)
Bala isihloko lesi uzwe amacebo aseBhayibhilini anganceda abantwana abanakekela abazali asebegugile.
“IBhayibhili Lithini Ngokunakekela Abazali Asebegugile?” (Isihloko esikuwebhusayithi yethu)
Bukela ividiyo le ubone ukuthi indoda eyayingelalwazi lokukhulisa abantwana yaluthola ngaphi uncedo.
Bala isihloko lesi uzwe amacebo anganceda obaba ukuthi bazwanane lamadodana abo.
“Obaba Bangenzani Ukuze Bazwanane Lamadodana Abo?” (INqabayokulinda, November 1, 2011)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
