CIJIJO 50
Mungaitisa Kudini Kuti Mbhuri Yenyu Idakare?—Divi 2
Vana icipo cinovha kuna Jehovha. Iyena anovetera kuti vabari vataje ushoni cipo ici. Jehovha anopa vabari mazano aushoni kuti vakwanise kutaja ushoni vana vavo. Ndhungamiriro ja Mwari jinobeseravo vana kuti vaitevo divi ravo kuti mbhuri ive no mudakaro.
1. Jehovha anopa vabari ndhungamiriro japi?
Jehovha anoda kuti vabari vade vana vavo no kupeja nguva yakawanda navo kudari zvecikwanisika. Iyenazve anoda kuti vabari vangwarire vana vavo no kushandisa ndhungamiriro jo Bhaibheri pa kuvajijisa. (Mazwi Akangwara 1:8) Jehovha anovhunja vabari kudari: “Endereranyi mberi [mecirera vana venyu] mu mbhangiro no jijiso ya Jehovha.” (Verenganyi Vaefeso 6:4.) Jehovha anodakara maningi paanovona vabari vecizwira ndhungamiriro iyi. Iyenazve anodakara maningi paanovona vabari veciita basa ravo rokurera vana, votama kuripa mundhu umweni.
2. Jehovha anopa vana ndhungamiriro japi?
Vana vanovhunjwa kudari ndi Jehovha: “Zwiranyi vabari venyu.” (Verenganyi Vakorose 3:20.) Kudari vana vakazwira vabari no kuvareremeja, ivona vangadakajisa Jehovha pamwepo no vabari vavo. (Mazwi Akangwara 23:22-25) Jesu wakapa muezaniso wakanaka paainga ari mwana mudoko. Iyena wainga ari mundhu wakakwana, pikija zvakadaro, iyena waizwira no kureremeja vabari vake vacizivi kukwana.—Ruka 2:51, 52.
3. Mbhuri ingakhwederesa kudini phedo na Mwari?
Kudari muri baba kana mai, ngo zvokadi kuti munoda kuti vana venyu vade Jehovha inga ndimwi. Zvingakwanisika kudini izvi? Ngo kuita zvinonanga Bhaibheri kuti: “Unozomakonokeja kuno mwana wako, unozovereketa ndiwona wecigara pa muzi pako, no wecifamba mu gwanja rako.” (Deuteronòmio 6:7) ‘Kukonekeja’ kunoreva kujijisa weciphinda no kuphinda. Kangaije munozviziva kuti vana venyu kuti vavige zviro mu musoro, munodikana kuzviphinda kakawanda. Ngo kudaro, vhesi iyi inoda kunanga kuti munodikana kupsaka mukana wokubhuya no vana venyu ngo pamusoro pa Jehovha mukuvo wese. Njira yakanaka ngo yo kuva no nguva sumana jese kuitira kunamata Jehovha inga mbhuri. Kudari mucina vana, zvakanaka kuti muve no nguva yokujija Bhaibheri sumana jese.
NASANYI KUPSAKISISA
Vonanyi zvingabesera mbhuri yese kuti ijizwe yakadakara no kujiviririka.
4. Jijisanyi vana venyu ngo rudo
Kujijisa vana icineso kamare. Bhaibheri ringabeseresa kudini? Verenganyi Jakobo 1:19, 20, perapo bhuisananyi ngo muvhunjo jinotevera:
-
Vabari vangakhombijisa kudini rudo pavanonga vecibhuya no vana vavo?
-
Ngenyi baba kana mai avadikani kupangira mwana wavo pavanonga vakanyangajwa? a
5. Ngwariranyi vana venyu
Kuti mungwarire vana venyu, zvinosisira maningi kuti mubhuye navo ngo pamusoro po vatano. Pikija mecipseruka kuti mubhuye ngo pamusoro pazvo. Rijanyi VHIDHIYO, perapo bhuisananyi ngo muvhunjo jinotevera.
-
Ngenyi icineso kuno vabari vamweni kubhuya ngo pamusoro po vatano kuno vana vavo?
-
Vabari vamweni vangabhuya ngo njira japi kuno vana vavo ngo pamusoro po vatano?
Inga zvakananga Bhaibheri, nyika ya Sathana iri kuenderera mberi yecishatisisa. Verenganyi 2 Timoti 3:1, 13, perapo bhuisananyi ngo muvhunjo unotevera:
-
Vhesi ya 13 inobhuya ngo vandhu vakashata, asi tinozviziva kuti vamweni vakona vanojipa zvivana. Ngo kudaro, ngenyi zvinosisira kuti vabari vabhuye no vana vavo ngo pamusoro po vatano no kuvajijisa kuti vajingwarire ku vandhu vakashata?
Maizviziva here?
Zvapupu zva Jehovha zvino mabhuku akawanda anobesera vabari kuti vabhuye no vana vavo ngo pamusoro po vatano no kuvajijisa kuti vajingwarire ku vandhu vakashata. Vonanyi muezaniso jimweni:
-
Jiviriranyi Vana Venyu (vhidhiyo)
-
“Kudzidzisa Mwana Wako Nyaya Dzepabonde” (Mukai! No. 5 wo 2016)
6. Reremejanyi vabari venyu
Vana vadoko no vaya vari kuaruka vangakhombija kuti vanoreremeja vabari vavo ngo njira yavanobhuya navo. Rijanyi VHIDHIYO, perapo bhuisananyi ngo muvhunjo jinotevera.
-
Ngenyi vana vari kuaruka vanodikana kuvangisira kuti vabhuye no vabari vavo?
-
Wocidoko angaitisa kudini kuti abhuye no vabari vake ngo njira yonderemejo?
Verenganyi Mazwi Akangwara 1:8, perapo bhuisananyi ngo muvhunjo unotevera:
-
Wocidoko anodikana kuitenyi kudari vabari vake vakamuvhunja zvaanodikana kuita?
7. Kunamata Jehovha inga mbhuri
Mbhuri jo Zvapupu zva Jehovha jinopsaka nguva pa sumana kuti jijije Bhaibheri pamwepo. Izvi zvinodanijwa kuti kunamata ko mbhuri. Asi jijo iyi inoitiswa kudini? Rijanyi VHIDHIYO, perapo bhuisananyi ngo muvhunjo jinotevera.
-
Mbhuri ingaitisa kudini urongwa wo Kunamata ko Mbhuri?
-
Vabari vangaitisa kudini kuti kunamata ko mbhuri kuve kunodakajisa no kubesera vana vavo? —Vonanyi pikica yokutanga yo cijijo ici.
-
Pa mugariro wenyu, ngozvapi zvaizoita kuti mbhuri yenyu ikonehwe kuita kunamata ko mbhuri?
Jehovha waida kuti mbhuri jo Vaiziraeri kareko, jigare jecibhuisana ngo pamusoro po Matahwa. Verenganyi Deuteronòmio 6:6, 7, perapo bhuisananyi ngo muvhunjo unotevera:
-
Mungaitenyi kuti mushandise ndhungamiriro iyi?
Zvamungaita pa kunamata ko mbhuri:
-
Kunasirira musongano jo ungano.
-
Verenganyi no kubhuisana ngo zviitiko zvo mu Bhaibheri zvinodakajisa mbhuri yenyu.
-
Kudari muno vana vadoko kamare, bhasharinyi kana kuimprimiri mabasa okuita o vana vadoko anowanika mu jw.org.
-
Kudari muno vana vari kuaruka, bhuisananyi navo ngo musoro jinowanika pa divi rinoti “Vaaruki” mu jw.org.
-
Kuita mutambo jo mu Bhaibheri no vana venyu.
-
Kuvona vhidhiyo yo mu jw.org no kubhuisana ngo pamusoro payo.
VANDHU VAMWENI VANOTI: “Bhaibheri rinonesa maningi kuno vana vadoko kuti varizwisise.”
-
Imwimwi munotivo kudini?
ZVOTAJIJA
Jehovha anoda kuti vabari vade, vajijise no kungwarira vana vavo. Iyena anodazve vana vazwire no kureremeja majibaba avo nokutizve mbhuri jimunamate jiri pamwepo.
Kuhwirijira
-
Vabari vangaitenyi kuti vajijise vana vavo no kuvangwarira?
-
Vana vangakhombijisa kudini nderemejo kuno vabari vavo?
-
Ngenyi zvakanaka kuita kunamata ko mbhuri sumana jese?
ZIVANYI ZVIMWENI
Zvijijo zvapi zvingabesera mwana wenyu kudari akakura?
“Zvinhu 6 Zvinofanira Kudzidziswa Vana” (Mukai! No. 2 wo 2019, Cishona)
Vonanyi ndhungamiriro jinopa Bhaibheri ngo pamusoro pa vaya vari kukorondha vabari vavasharuka.
“Bhaibheri Rinoti Kudini ngo Pamusoro po Kutaja Vabari?” (Mu interneti)
Vonanyi kuti kuitisa kudini mwanarume umweni wainga acikazvizivi kuti waizoreresa kudini vana wakazova baba vakanaka.
Vonanyi kuti vabari vangaitisa kudini kuti vavangise ushamwari hwavo no vana vavo.
a Mu Bhaibheri, “kupangira” kunoimirira kujijisa, kupekeja ndhungamiriro no kubesera mundhu kuti aite zvakanaka. Azvidi kureva kushaisha kutaja.—Mazwi Akangwara 4:1.
