WANGƆ 50
Ngasia la ndasewa tɛ mɔ lengbi ti dungɔ na dengɔ bɛ nɛ?—Eteni 2
Ayangambi du nzɔ̃ ye mɛ lo ka tɛ Yehova. Yehova yɔ ya awa dũngɔ ayangambi bata ayati la nzɔ̃ni. Yehova hɛ̃ wangɔ mɛ lengbi ti zangɔ la. Wangɔ ni ndo za nga ayangambi ya ala hĩnga ye mɛ ala li ti nɛngɔ ya dengɔ bɛ du ka ndasewa.
1. Wangɔ mɛ Yehova hɛ̃ awa dũngɔ ayangambi nɛ?
Gwɛ̃ tɛ Yehova du ya awa dũngɔ ayangambi aye ayati la, alekisa ngoi ndoni kɔi na la. Lo ye ya, ala bata ayati la ya ta ala tengbi na kpengba lo ma, wa ala ha nga na la ndia ti ya Ngbangɔ. (Masese 1:8) Lo tɛnɛ hɛ̃ ato ayangambi ya: “Ĩ kã la na hɛ̃ngɔ la nzɔ̃ kɔdɛ nga na nzɔ̃ wangɔ, nga ma se mɛ ndo Gbia Yezo aha na ni.” (Di Efɛsɛ 6:4.) Yehova ndo ma dengɔ bɛ gba na ngoi mɛ awa dũngɔ ayangambi ndo tɔndɔ ndia ti kãngɔ ayati la, nga na ngoi mɛ ta ala ndo hɛ̃ kumba niko hɛ̃ azi mɛndɛ̃ ma.
2. Wangɔ mɛ Yehova hɛ̃ ayangambi nɛ?
Yehova yɔ ka ti ayangambi ya: “Ĩ ma nyɔ awa dúngɔ ĩ.” (Di Kɔlɔsɛ 3:20.) Ngoi mɛ ala tɔndɔ awa dũngɔ la, ni ndo hɛ̃ Yehova na awa dũngɔ la dengɔ bɛ. (Masese 23:22-25) Yezo du se lɛlo ti nzɔ̃ni na ngoi mɛndó lo nyingambi. Lo tɔndɔndó awa dũngɔ lo, abɛse du ya lo zo ti lengbingɔ.—Luka 2:51, 52.
3. Ngasia la ndasewa tɛ mɔ lengbi ti tingɔ na mangbi ti kpengbani na Nzapa nɛ?
Se mɔ dũ ayangambi, ta kitɛ da ma mɔ na gwɛ̃ ya ala ye Yehova nga ma mɔ. Wa mɔ za la ngasia? Na lingɔ ye mɛ Ngbangɔ ndo yɔ. Ngbangɔ pa ya: “Li ya [tɛnɛ tɛ Yehova] lua ndo ka bɛ ayati mɔ, mɔ lengbi ti tɛnɛngɔ ni na ngoi mɛ mɔ kaya da nga na ngoi mɛ mɔ ndo dɔ nɔ̃ ka ta lége.” (Kolimbola Mibeko 6:7) Tɛnɛ mɛ: “Li ya [tɛnɛ tɛ Yehova] lua ndo” afa hangɔ tɛnɛ kɔi, diringɔ ndoni ngoi zu. Diringɔ ndo tɛnɛ kɔi ngoi zu hɛ̃ ayangambi na lingɔ ya ta bɛ la li na ni ma. Ni ye tɛnɛngɔ ya, ale mɔ gi libaku ti tɛnɛngɔ tɛnɛ mɛ ba Yehova hɛ̃ ayati mɔ. Vɔ̃ ngoi pɔsɔ zu ti nɛngɔ ya ĩ li sambela ti ndasewa ndoni kɔi. Se ta ĩ du na nyingambi ma ko, mandangɔ Ngbangɔ ndoni kɔi alengbi ti hɛ̃ngɔ ĩ anzɔ̃ sulu.
GI HĨNGANGƆ LO MƐNDƐ̃
Gi hĩngangɔ ye mɛ azi ti ndasewa tɛ mɔ li ti nɛngɔ ya ndasewa tɛ mɔ du ndo ti dengɔ bɛ nga ndo ti nzɔ̃ni ti batangɔ tɛrɛ.
4. Kã ayati mɔ na songo
Ta kãngɔ nyingambi ndo du ngoi zu woni ma. Ngbangɔ lengbi ti zangɔ mɔ ngasia? Di Zaki 1:19, 20, wa na pɛni hɛ̃ gbinya ti ahũnda olo mɛ:
-
Ngasia la awa dũngɔ ayangambi lengbi ti fangɔ na ayati la ya ala ndo ye la na ngoi mɛ ala ndo tɛnɛ tɛnɛ na ala nɛ?
-
Nda mɛ ta yɔ ya wa dũngɔ nyingambi hɛ̃ nyi lo tumbu na ngoi mɛ lo na ngɔnzɔ ma nɛ? a
5. Bata ayangambi tɛ mɔ
Ti nɛngɔ ya mɔ bata ayati mɔ nzɔ̃ni ko, ayɔ ya mɔ kambisa hɛ̃ nyingambi kɔi kɔi lo mɛ aba bombingɔ tɛrɛ tɛ kɔli na wali. Abɛse du ya tɛnɛngɔ ni du kamɛnɛ. Ba VIDEO, wa na pɛni hɛ̃ gbinya ti ahũnda olo mɛ.
-
Nda mɛ ndo du pɛnɔ̃ ya awa dũngɔ ayangambi mɛndɛ̃ atɛnɛ tɛnɛ mɛ ba bombingɔ tɛrɛ tɛ kɔIi na wali hɛ̃ ayati la nɛ?
-
Ngasia la awa dũngɔ ayangambi mɛndɛ̃ alongandó tɛnɛngɔ tɛnɛ mɛ ba bombingɔ tɛrɛ hɛ̃ ayati la nɛ?
Nga ma se mɛ Ngbangɔ tɛnɛ na ni, gigi tɛ Satana ndo gbɛ̃ bo gbɛ̃ngɔ. Di 2 Timɔte 3:1, 13, wa na pɛni hɛ̃ gbinya ti hũnda olo mɛ:
-
Azi mɛ ndo gbɛ̃ ayangambi nga ka popo tɛ asiɔ azi mɛ vɛrsɛ 13 tɛnɛ tɛnɛ tɛ la. Nda mɛ du ngbondoni ya awa dũngɔ ayangambi akambisa tɛnɛ ti bombingɔ tɛrɛ tɛ kɔli na wali hɛ̃ ayati la nga na ndenge mɛ ala lengbi ti batangɔ tɛrɛ la na azi mɛ lengbi ti gbɛ̃ngɔ la nɛ?
Mɔ hĩnga ni?
Atɛmwɛ tɛ Yehova ndo si na ambɛti nga na video gba mɛ lengbi ti zangɔ awa dũngɔ ayangambi ya ala ha ayati la na lo mɛ ba bombingɔ tɛrɛ tɛ kɔli na wali nga na se mɛ ala bata na tɛrɛ la na azi mɛ lengbi ti gbɛ̃ngɔ la. Ba:
-
Batelá bana na yo (video)
-
“Koteya mwana likambo etali kosangisa nzoto” (Lamuka! No. 5 2016)
6. Tɔndɔ awa dũngɔ mɔ
Ayangambi lengbi ti fangɔ ya ala ndo tɔndɔ awa dũngɔ la na se mɛ ala ndo tɛnɛ na tɛnɛ hɛ̃ la. Ba VIDEO, wa na pɛni hɛ̃ gbinya ti ahũnda olo mɛ.
-
Nda mɛ du nzɔ̃ni ya palanga tɔndɔ awa dũngɔ lo na ngoi mɛ lo ndo tɛnɛ hɛ̃ la tɛnɛ nɛ?
-
Ngasia la palanga lengbi ti fangɔ ya lo ndo tɔndɔ awa dũngɔ lo na ngoi mɛ lo ndo tɛnɛ tɛnɛ hɛ̃ la nɛ?
Di Masese 1:8, wa na pɛni hɛ̃ gbinya ti hũnda olo mɛ:
-
Ye mɛ palanga li na ngoi mɛ awa dũngɔ lo hɛ̃ lo wangɔ nɛ?
7. Vɔrɔ Yehova ndoni kɔi na azi ti ndasewa tɛ mɔ
Ndasewa tɛ awa vɔrɔngɔ Yehova ndo vɔ̃ ngoi pɔsɔ kɔi kɔi ti lingɔ sambela ti ndasewa. Ala ndo li ni ngasia? Ba VIDEO, wa na pɛni hɛ̃ gbinya ti ahũnda olo mɛ.
-
Ye mɛ azi ti ndasewa li ti nɛngɔ ya ala li sambela ti ndasewa pɔsɔ kɔi kɔi nɛ?
-
Ye mɛ awa dũngɔ ayangambi li ti nɛngɔ ya sambela tɛ la ti ndasewa ɔ nzɔ̃ni, wa ni du nga ngoi ti dengɔ bɛ nɛ?—ba limɔ ti ebandeli ti wangɔ mɛ.
-
Ye mɛ lengbi ti lingɔ ya lingɔ sambela ti ndasewa ndoni kɔi ati pɛnɔ nɛ?
Yehova yɔndó ka ti azi ti Izraɛlɛ ti gã ya, ala ndo manda tɛnɛ tɛ ni ka ndasewa ngoi zu. Di Kolimbola Mibeko 6:6, 7, wa na pɛni hɛ̃ gbinya ti hũnda olo mɛ:
-
Mɔ kpã wangɔ mɛ na kwa ngasia?
Aye mɛ ĩ lengbi ti tɛnɛngɔ tɛnɛ ni na ya sambela ti ndasewa:
-
Lɛkɛngɔ bombi ndoni kɔi.
-
Ĩ di pandɛ kɔi ti ya Ngbangɔ mɛ ndasewa tɛ mɔ ndo ye wa ĩ tɛnɛ tɛnɛ na ndoni.
-
Se mɔ du na ayangambi mɛ dɛ yakele ko, mu makambo mosusu mpo na bana kaya jw.org.
-
Se mɔ du na ayangambi mɛ ala ti apalanga ko, ĩ tɛnɛ tɛnɛ mɛ ba ala kaya eteni Bilenge kaya jw.org.
-
Ndoni kɔi na ayangambi tɛ mɔ ĩ lɛ wele ti pandɛ kɔi ti ya Ngbangɔ.
-
Ĩ ba wa ĩ tɛnɛ tɛnɛ na ndo video kɔi mɛ akpã kaya jw.org.
AZI MƐNDƐ̃ NDO TƐNƐ YA: “Ta ayangambi lengbi ti gbɔ̃ngɔ nda tɛnɛ ti ya Ngbangɔ ma.”
-
Gbinya mɛ mɔ hɛ̃ nɛ?
NA NDUNU NI
Gwɛ̃ tɛ Yehova du ya awa dũngɔ ayangambi aye ayati la, akã la wa abata nga la nzɔ̃ni, ayɔ ya ayangambi tɔndɔ awa dũngɔ la wa ala vɔrɔ nga Yehova ndoni kɔi.
Bozongeli
-
Ngasia la awa dũngɔ ayangambi lengbi ti kãngɔ nga batangɔ ayangambi tɛ la nɛ?
-
Ngasia la ayangambi lengbi ti tɔndɔngɔ awa dũngɔ la nɛ?
-
Nzɔ̃ sulu mɛ lingɔ sambela ti ndasewa pɔsɔ kɔi kɔi ndo hɛ̃ nɛ?
AYE MƐNDƐ̃ MƐ MƆ LI
Wangɔ mɛ mɔ lengbi ti hɛ̃ngɔ nyi mɔ ti nɛngɔ ya aza lo na ngoi mɛ lo ti kangba nɛ?
“Mateya motoba oyo bana basengeli koyekola” (Lamuká! No. 2 2019)
Ba wangɔ mɛ Ngbangɔ hɛ̃ azi mɛ ndo bata awa dũngɔ la mɛ ati abange.
“Biblia elobi nini na likambo etali kosunga baboti oyo bakómi mibange?” (Tɛnɛ mɛ kaya intɛrnɛt)
Ba pandɛ tɛ kɔli kɔi mɛndó ta lo ndo hĩnga se ti kãngɔ ayangambi nzɔ̃ni ma, wa na gesi lo ti nzɔ̃ to.
Ba se mɛ ato ayangambi a lengbi ti lingɔ ya mangbi tɛ la na ayati la ti kɔli ati kpengbani.
“Ngasia la ato ayangambi lengbi ti tingɔ na mangbi ti nzɔ̃ni na ayati la ti kɔli nɛ?” (Linɔngi ti Sinzili ti 01/11/2011)
a Na bangɔ Ngbangɔ, tɛnɛ mɛ: “hɛ̃ngɔ tumbu” alengbi na hangɔ zo na ye, fangɔ lo na lége bere lonzingɔ zo, ta ni fa hɛ̃ngɔ nyingambi pɛnɔ̃ bere lingɔ kakulu lo tɛrɛ lo ma.—Masese 4:1.
