TLAMACHTIJLI 50
Tlen mitspaleuis xyolpaki iuan mofamilia (parte 2)
Jehová yokinmakak tajtin itlaj tlen melak kualtsin: yokinmakak inkoneuan. Niman, yejua kineki kuajli makintlajpiyakan. Ika yejon, kimijlia tlenon kinpaleuis niman ijkon uelis kintlajpiyaskej. Jehová noijki kijtoua tlenon noneki kichiuaskej tekoneuan niman ijkon melak yolpakiskej imiuan intajuan.
1. ¿Tlenon kineki Jehová makichiuakan tajtin?
Jehová kineki ika tajtin niman nantin makintlasojtlakan inkoneuan niman makixelokan tiempo para imiuan nemiskej. Noijki kineki makintlajpiyakan niman makimiskaltikan ijkon ken Biblia kijtoua (Proverbios 1:8). Jehová kimijlia tajtin: “Kuajli xkinmachtikan [...] ken toTEKO kineki” (xkita Efesios 6:4). Jehová melak kiyolpaktia ijkuak kita ika tajtin kimiskaltiaj inkoneuan ijkon ken yejua kineki niman ika xoksekimej kinmakaj yejon tekitl.
2. ¿Tlenon kineki Jehová makichiuakan tekoneuan?
Jehová kineki ika kokonej makintlakamatikan intajuan (xkita Colosenses 3:20). Tla se konetl kintlakamati niman kintlakaita itajuan, kiyolpaktia Jehová niman kinyolpaktia itajuan (Proverbios 23:22-25). Jesús melak kuajli okiteititi tlenon noneki kichiuaskej tekoneuan pampa, maski yejua xtlajtlakole katka, nochipa okintlakamat niman okintlakaitak itajuan, akin tlajtlakolejkej katkaj (Lucas 2:51, 52).
3. ¿Tlenon noneki kichiuas se familia niman ijkon más kuajli nouikas iuan Jehová?
Tla tikinpiya mokoneuan, kuajli tikmatstokej ika tiknekiskia noijki makitlasojtlakan Jehová ijkon ken tejua tiktlasojtla. ¿Tlenon uelis tikchiuas niman ijkon makitlasojtlakan Jehová? Tla tikchiua yejuin tlen Biblia kijtoua: “Xkinmachtikan nemokoneuan [on itlanauatiluan toTajtsin]. Xkintlajtlajtouilikan on tlanauatiltin ijkuak nennemij nemochan, ijkuak nennejnemij ipan ojtli” (Deuteronomio 6:7). Tlajtojli xkinmachtikan kijtosneki “ika noneki miyekpa itlaj nenkiteijliskej niman ijkon kuajli manoilnamiki”. Tla tikinpiya mokoneuan, kuajli tikmatstika ika kemantika itlaj noneki miyekpa tikimijlis niman ijkon uelis kilnamikiskej. Kuakon, yejuin texto kijtosneki ika ipan se tonajli noneki timokojtilis miyekpa tikinnojnotsas itech Jehová. Niman noijki melak kuajli ijkuak se familia kixeloua tiempo ipan semana niman ijkon san sekan kiueyichiuaskej Jehová niman nomachtiskej iTlajtol. Niman, maski tla tejua xtikinpiya mokoneuan, melak mitspaleuis tla nochipa tikxeloua tiempo ipan semana niman ijkon timomachtis Biblia.
OKSEKI XKASIKAMATI
Matikimitakan seki textos tlen uelis kinpaleuis familias kuajli manomachilikan niman más mayolpakikan.
4. Xkiskalti mokoneuj ika tlasojtlalistli
Kemantika, melak tekiyoj tikiskaltis se konetl. ¿Kenijki uelis mitspaleuis Biblia? Xkitakan Santiago 1:19, 20 niman xtlajtokan itech yejuin:
-
Tla tajtin kinekij kimititiskej inkoneuan ika kintlasojtlaj, ¿kenijki noneki kinnotsaskej?
-
¿Tleka tikijtouaj ika tla se tajtli kualantika xnoneki kimelajkatlalis ikoneuj? a
5. Xkintlajpiya mokoneuan
Tejua uelis tikintlajpiyas mokoneuan maka inpan manochiua tlen xkuajli tla tikinnojnotsa itech sexo. Melauak, kanaj kemantika tipinauis titlajtos itech yejuin. Xkitakan VIDEO niman xtlajtokan itech yejuin:
-
¿Tleka sekimej tajtin xmás kuelitaj tlajtoskej itech sexo imiuan inkoneuan?
-
¿Tlenon yokinpaleui sekimej tajtin matlajtokan itech sexo imiuan inkoneuan?
Ijkon ken yokijtojka Biblia, yejuin tlaltikpaktli tlen kiyekana Satanás melak yoijtlakauj. Xkitakan 2 Timoteo 3:1 (TNM) niman 2 Timoteo 3:13, niman xtlajtokan itech yejuin:
-
Sekimej akin xkuajkualtin tlen kinteneua 2 Timoteo 3:13 kinnajnauiltiaj kokonej. Kuakon, ¿tleka tajtin melak noneki makinnojnotsakan inkoneuan itech sexo? ¿Niman tlenon uelis kichiuaskej niman ijkon maka yakaj makinnajnauilti inkoneuan?
¿Tikmatiya yejuin?
Iteixpantijkauan Jehová kipiyaj miyek tlen uelis kinpaleuis tajtin makinmachtikan inkoneuan itech sexo niman ijkon maka yakaj makinnajnauilti. Nikan san seki tikinteneuaj:
-
Xkintlajpiyakan nemokoneuan (video)
-
Matiuelikan itech akin melak kuajli otemachti, capítulos 10 niman 32
-
“Ken uelis titlajtos itech sexo iuan mokoneuj” (¡Xtlachiakan!, núm. 5 2016)
6. Xkintlakaita motajuan
Kokonej niman telpokamej noneki kintlakaitaskej intajuan, niman yejon kiteititiaj ijkuak kuajli kinnotsaj. Xkitakan VIDEO niman xtlajtokan itech yejuin:
-
¿Tleka melak kuajli tla se telpokatl kinnotsa itajuan ika tetlakaitalistli?
-
¿Kenijki telpokamej uelis kintlakaitaskej intajuan?
Xkitakan Proverbios 1:8 niman xtlajtokan itech yejuin:
-
¿Tlenon noneki kichiuaskej telpokamej ijkuak intajuan itlaj kinnauatiskej?
7. Xueyichiuakan Jehová ken familia
Iteixpantijkauan Jehová kixelouaj tiempo nochi semanas niman ijkon kiueyichiuaskej toTajtsin ken familia. ¿Niman tlenon nochiua ijkuak noueyichiua Jehová ken familia? Xkitakan VIDEO niman xtlajtokan itech yejuin:
-
¿Tlenon uelis mitspaleuis niman ijkon xueyichiua Jehová ken familia nochi semanas?
-
¿Tlenon uelis kichiuaskej tajtin niman ijkon nochimej makuelitakan kiueyichiuaskej Jehová ken familia? (Xkita tlaixkopinajli tlen onka kampa peua yejuin tlamachtijli).
-
¿Onka itlaj tlen ueliskia mitstsakuilis xmomachti iuan mofamilia? ¿Tlenon?
Yeuejkaui, Jehová kinekiya ika israelitas manomachtikan itlanauatiluan imiuan inchanejkauan. Xkitakan Deuteronomio 6:6, 7 niman xtlajtokan itech yejuin:
-
¿Kenijki uelis tikchiuas tlen kijtoua yejuin texto?
Tlen uelis tikchiuas ijkuak tikueyichiuas Jehová iuan mofamilia:
-
Xmomachtikan tlen nopanoltis ipan tlanechikojli.
-
Xmomachtikan seki textos kampa noteneua itlaj tlen nochi mofamilia kuelitaskia kimatis.
-
Tla mokoneuan pipitikej, xtemolti noso xkixti se amatl para kokonej de jw.org.
-
Tla mokoneuan yotelpochtiakej, xtlapejpeni se tlamachtijli para telpokamej de jw.org.
-
Xchiuakan se tlamauisojli itech itlaj tlen noteneua ipan Biblia.
-
Xkitakan se video de jw.org niman xtlajtokan itech yejon.
SEKIMEJ KIJTOUAJ: “Tlen Biblia kijtoua xuelis kasikamatiskej kokonej”.
-
¿Tejua tlenon tiknemilia?
TLEN OTIUEL
Jehová kineki ika tajtin makintlasojtlakan inkoneuan, makinmachtikan niman makintlajpiyakan. Noijki kineki ika kokonej makintlakaitakan niman makintlakamatikan intajuan. Niman kineki ika nochimej san sekan makiueyichiuakan ken familia.
¿Kenon titlanankiliskia?
-
¿Tlenon uelis kichiuaskej tajtin niman ijkon kuajli kinmachtiskej niman kintlajpiyaskej inkoneuan?
-
¿Kenijki uelis kiteititiskej kokonej ika kintlakaitaj intajuan?
-
¿Kenijki mitspaleuis tla tikxeloua se tonajli ipan semana niman ijkon tikueyichiuas Jehová iuan mofamilia?
OKSEKI XKITA
¿Tlenon uelis kinpaleuis mokoneuan niman ijkon kichiuaskej tlen kuajli ijkuak yonoskaltijkej?
“6 tlamachtiltin tlen mokoneuan noneki ueliskej” (¡Xtlachiakan!, núm. 2 2019)
Xkita tlenon uelis kinpaleuis akin kitlajpiyaj yakaj akin youeuentsintiak.
“¿ToTajtsin kineki matikintlajpiyakan totajuan ijkuak youeuentsintiakej?” (Tlamachtijli de jw.org)
Xkita tlenon okipaleui se tlakatl kuajli makimiskalti ikoneuan.
Xkita kenijki se tajtli uelis más kuajli nouikas iuan ikoneuan.
a Ijkuak Biblia kiteneua tlajtojli titemelajkatlalis, kijtosneki tikpaleuis manopatla yakaj akin kichiujtika tlen xkuajli. Yejuin xkijtosneki tla noneki titetlajyouiltis (Proverbios 19:18).
Puede que también le interese
TLEN MIYEKPA NOTLAJTOLTILO
¿Kenon nochiua ijkuak se kimachtiaj itech Biblia?
Ijkuak mitsmachtiskej iteixpantijkauan Jehová uelis tijkuis maski san katlejua Biblia. Uelis ompa nemiskej mochanejkauan noso moamigos.
