FAMAHAʼÖ 50
Hewisa Enaʼö Ösöndra Waʼohahau Dödö ba Wongambatö?—Faosatö 2
Iraono no buala moroi khö Yehowa. Omasi ia na lahaogö wondrorogö buala andrö. Ibeʼe mene-mene si sökhi Yehowa khö ndra satua enaʼö tola lafalua daʼö. Mene-mene moroi khö Yehowa andrö zanolo iraono enaʼö fao ira ba wondrorogö faʼohahau dödö yomo ba nomo.
1. Hadia mene-mene nibeʼe Yehowa khö ndra satua?
Omasi Yehowa na laʼomasiʼö ndraonora ira satua, ba oya laʼogunaʼö ginötöra wefao ba ndraonora. Omasi göi ia na lalumöʼö ndraonora moroi ba deʼala ba laʼogunaʼö goi-goi Zura Niʼamoniʼö si tobali dane-dane ba wamahaʼö iraonora. (Amaedola 1:8) Imane khö ndra ama, ”Miʼebuaʼö [ndraonomi] . . . si fao fanuturu lala moroi khö Yehowa.” (Baso Efeso 6:4.) Omasi Yehowa na laʼoʼö ira satua wanuturu lala nibeʼenia ba wangebuaʼö iraonora, ba lö labeʼe noro dödö andrö ba niha böʼö.
2. Hadia mene-mene Yehowa nibeʼenia ba ndraono?
Ibeʼe Yehowa goroisa daʼa ba ndraono, ”Miʼoʼö li zatuami.” (Baso Kolose 3:20.) Na laʼoʼö ba lafosumange zatuara iraono, no laʼomusoiʼö dödö Yehowa ba omuso göi dödö zatuara. (Amaedola 23:22-25) No ibeʼe duma-duma si sökhi Yesu ba ndraono. Hewaʼae na moʼahonoa ia, hizaʼi iʼotarai ba waʼide-idenia ifosumange ba iʼoʼö li zatuania.—Luka 2:51, 52.
3. Hewisa enaʼö ahatö nösi nomou khö Lowalangi?
Na so nonomö, tatu omuso sibai dödömö na laʼomasiʼö Yehowa soroi ba dödöra. Hewisa wanolomö yaʼira? Moguna öʼoʼö mene-mene Zura Niʼamoniʼö andre: ”Mitanögö göi ba dödö ndraonomi [wehede Yehowa]. Fatunö daʼö na yomo so ami [hegöi] na ba lala.” (5 Moze 6:7) Ngawua wehede ”mitanögö” eluahania daʼö zangoromaʼö wa moguna asese öfadunö-dunö hadia nifahaʼömö. Yaʼami satua, tatu aboto ba dödömi wa lö olifu ndraonomi hadia zi no mifahaʼö, na mifuli mifasugi-sugi ba dödöra daʼö. Ayati daʼö zangoromaʼö wa moguna öʼalui ginötö enaʼö asese fahuhuo ndraʼugö ba ndraonomö sanandrösa khö Yehowa. Moguna öbeʼe ginötöu ero migu ba wamalua famahaʼö ba zi sambua omo hegöi ba wamahaʼö ba Daromali Lowalangi. Hewaʼae na lö hadöi onomö, hasambalö so mbua si sökhi nitemamö na öfalua daʼö ero migu.
ODÖDÖGÖ NASA WANGALUI
Tatutunö dania hadia manö zi tola manolo si sambua omo ba worasoi faʼahono dödö hegöi faʼomuso dödö.
4. Fahaʼö ndraonomö si fao faʼomasi
Lö aoha ba wamahaʼö iraono. Hewisa Zura Niʼamoniʼö ba wanolo satua? Baso Yakobo 1:19, 20, ba beʼe wanema li ba wanofu-nofu daʼa:
-
Hewisa zatua ba wangoromaʼö faʼomasi ba ginötö fahuhuo ira khö ndraonora?
-
Hana wa tebai lafotu ndraonora ba ginötö mofönu ira? a
5. Lumöʼö ndraonomö
Enaʼö tola ölumöʼö ndraonomö, moguna öfatunö khöra sanandrösa ba seks. Tola manö abua khömö wamalua daʼa. Futa VIDEO, ba beʼe wanema li ba wanofu-nofu daʼa:
-
Hana wa so ösa zatua, abua khöra wahuhuosa ba ndraonora sanandrösa ba seks?
-
Hewisa zatua nitutunö ba video andrö wanutunö ba ndraonora sanandrösa ba seks?
Simane si no ifaʼeleʼö Sura Niʼamoniʼö, itugu lö sökhi gulidanö Zatana andre. Baso 2 Timoteo 3:1, 13, ba beʼe wanema li ba wanofu daʼa:
-
Sambua waʼalösökhi nifalua niha nitutunö ba ayati 13, yaʼia daʼö famakao iraono. Börö daʼö, hana wa moguna lafahaʼö ndraonora ira satua sanandrösa ba seks hegöi lala si tola lafalua iraono enaʼö tola lalumöʼö ira moroi ba niha samalua si lö sökhi andrö?
Hadia öʼila?
Oya artikel hegöi video nifazökhi ndra Samaduhuʼö Yehowa si tobali fanolo khö zatua ba wamahaʼö iraonora sanandrösa ba seks hegöi ba wolumöʼö yaʼira moroi ba pelecehan seksual. Duma-dumania, faigi atö:
-
Mirorogö Ndraonomi (video)
-
”Mamahaʼö Iraono Sanandrösa ba Seks” (Sadarlah! No. 5 2016)
6. Mifosumange zatuami
Iraono side-ide hegöi si bohou ebua, tola laforomaʼö wa lafosumange zatuara moroi ba lagu wahuhuosara. Futa VIDEO, ba beʼe wanema li ba wanofu-nofu daʼa:
-
Na ifosumange zatuania iraono ba ginötö fahuhuo ia, hadia mbua nitemania?
-
Hewisa zi samösa iraono ba wangoromaʼö wa ifosumange zatuania ba ginötö fahuhuo ira?
Baso Gamaedola 1:8, ba beʼe wanema li ba wanofu daʼa:
-
Hewisa zinangeania nifalua ndraono ba ginötö laʼamenesi mazui labeʼe khönia wanuturu lala ira satuania?
7. Mifosumange Yehowa yaʼami si sambua omo
Ero migu, labeʼe ginötöra ira Samaduhuʼö Yehowa wefao ba nösi nomora ba wamalua famahaʼö ba zi sambua omo. Hadia manö nifaluara ba wamahaʼö ba zi sambua omo andrö? Futa VIDEO, ba beʼe wanema li ba wanofu-nofu daʼa:
-
Hewisa zi sambu-sambua omo wotatugöira inötö ba wamalua Famahaʼö ba zi Sambua Omo?
-
Hadia zi tola lafalua ira satua enaʼö omuso dödöra ba wamalua famahaʼö ba zi sambua omo ba latema mbuania?—Faigi gambara ba wamobörö wamahaʼö daʼa.
-
Hadia manö daha-taha irege abua wamalua famahaʼö ba zi sambua omo?
Ba götö ndraono Gizaraʼeli me föna, omasi Yehowa na no latatugöi ginötö ba zi sambu-sambua omo ba wanutunö Taromali Lowalangi. Baso 5 Moze 6:6, 7, ba beʼe wanema li ba wanofu-nofu daʼa:
-
Hewisa woloʼömö goi-goi si no tesura ba ayati daʼa?
Si tola mifalua ba wamahaʼö ba zi sambua omo:
-
Mifaʼanö hadia nitutunö ba gangowuloa.
-
Fili sambua waö-waö nitutunö ba Zura Niʼamoniʼö somasi nösi nomou. Mibaso ba mitutunö waö-waö daʼö.
-
Na so nonomö side-ide, download mazui cetak sambua bahan si no muhenaigö ba ndraono side-ide si so ba jw.org.
-
Na so ndraonomö si bohou ebua, tutunö fazambua artikel sanandrösa ba zi bohou ebua si so ba jw.org.
-
Mifadumaisi sambua waö-waö nitutunö ba Zura Niʼamoniʼö.
-
Mifaigi ba mitutunö sambua video moroi ba jw.org.
SO ZANGUMAʼÖ: ”Abua wangiʼila eluaha Zura Niʼamoniʼö. Lö ikhamö fangera-ngera ndraono.”
-
Hewisa na so zangumaʼö khömö simane daʼö, hadia öbeʼe fanema li?
RAHU-RAHU WAMAHAʼÖ
Itötöna Yehowa khö zatua enaʼö laʼomasiʼö, lafahaʼö ba lalumöʼö ndraonora. Itötöna göi ba ndraono enaʼö lafosumange ba laʼoʼö li zatuara. Baero daʼö, itötöna göi enaʼö owulo zi sambua omo ba wamalua famahaʼö ba Zura Niʼamoniʼö.
Hadia Wamahaʼö si Tola Öhalö?
-
Hewisa zatua ba wamahaʼö hegöi ba wolumöʼö iraonora?
-
Hewisa ndraono ba wamosumange satuara?
-
Hadia manö mbuania na öbeʼe ginötöu ero migu ba wamalua famahaʼö ba zi sambua omo?
ALUI NASA DANÖ BÖʼÖ
Hadia manö zi tola öfahaʼö ba ndraonomö enaʼö tobali ira niha si sökhi amuata?
”6 Ngawua Wamahaʼö Sabölö Moguna ba Ndraono” (Sadarlah! No. 2 2019)
Baso mene-mene Zura Niʼamoniʼö ba niha sondrorogö satuara si no alawa döfi.
”Hadia Niwaʼö Zura Niʼamoniʼö Sanandrösa ba Wondrorogö Satua si No Alawa Döfi?” (Artikel web)
Faigi hewisa zi samösa ira matua si lö mangila lala ba wangebuaʼö iraono tola tobali ia satua si sökhi.
Faigi hewisa zi samösa ama tola aro wahuwusania khö nononia matua.
a Ba Zura Niʼamoniʼö, ’fotu’ moʼamakhaita ia ba wanuturu lala, tegu-tegu hegöi mene-mene sanolo iraono enaʼö ibulöʼö wangera-ngerania si fasala. Tenga daʼö geluahania lafakao mazui lakilaini wamöbözi iraonora.—Amaedola 4:1.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
