FAKAAKOAGA 50
Maeke Fēfē e Magafaoa Haau ke Fiafia?—Vala 2
Ko e tau fanau ko e mena fakaalofa mai ia Iehova. Amanaki a ia ke he tau matua ke leveki fakamitaki e mena fakaalofa ia. Foaki e Iehova e fakatonuaga pulotu ke lagomatai e tau matua ke taute pihia. Ko e fakatonuaga haana ka lagomatai foki e tau fanau ke fai vala ke kautū e moui he magafaoa.
1. Ko e heigoa e fakatonuaga kua foaki e Iehova ke he tau matua?
Amanaki a Iehova ke he tau matua ke fakaalofa ke he tau fanau mo e lahi e magaaho mo lautolu. Manako foki a ia ke he tau matua ke puipui e tau fanau ha lautolu mai he hagahagakelea mo e fakaaoga e tau matapau fakaakoaga he Tohi Tapu mo fakavēaga ke fakaako a lautolu. (Tau Fakatai 1:8) Tala age a ia ke he tau matua taane: “Kia leveki ai [e tau fanau ha mutolu ke he] tau kupu fakamafana he Iki [Iehova].” (Totou Efeso 6:4.) Fiafia a Iehova ka omaoma he tau matua e takitakiaga haana ka feaki e tau fanau mo e nakai tuku age e kotofaaga ia ke he taha tagata.
2. Ko e heigoa e fakatonuaga kua foaki e Iehova ke he tau fanau?
Fakaako e Iehova e tau fanau: “Kia fanogonogo [omaoma] a mutolu ke he tau matua ha mutolu.” (Totou Kolose 3:20.) Ka fakalilifu mo e omaoma e tau fanau ke he tau matua, to fakafiafia e lautolu a Iehova mo e tau matua. (Tau Fakatai 23:22-25) Fakatoka e Iesu e fakafifitakiaga mitaki he magaaho ne tote a ia. Pete kua mitaki katoatoa a ia, ne omaoma mo e fakalilifu e ia e tau matua haana.—Luka 2:51, 52.
3. Fakatata lahi fēfē a mutolu ko e magafaoa ke he Atua?
Kaeke ko e matua a koe, manako mooli a koe ke he tau fanau ke fakaalofa lahi ki a Iehova tuga ne taute e koe. Taute fēfē e koe e foliaga nei? He taute e mena ne talahau he Tohi Tapu: “Kia fakaako atu mau ia [e tau kupu ha Iehova] ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala.” (Teutaronome 6:7) Ke “fakaako atu” kua kakano ke fatiaki tumau he taha mena. Liga iloa e koe kua lata ke fatiaki lagaloga e taha mena ke he fanau ke manatu e lautolu. Kakano e kupu Tohi Tapu nei kua lata a koe ke kumi e tau magaaho ke tutala tumau ke he tau fanau haau hagaao ki a Iehova. Kua mitaki ke fakatoka taha magaaho he tau faahi tapu takitaha ke tapuaki auloa ko e magafaoa. Ka nakai fai fanau a koe, aoga agaia ke fakatoka e magaaho he tau faahi tapu takitaha ke fakaako e Kupu he Atua.
KUMIKUMI FAKAHOKULO
Manamanatu ke he tau lagomatai aoga ke moua he magafaoa e fiafia mo e haohao mitaki e moui.
4. Fakaako e tau fanau haau ke he puhala fakaalofa
Maeke ke uka e fakaako he tama. Lagomatai fēfē he Tohi Tapu? Totou Iakopo 1:19, 20, ti tutala ke he tau hūhū nei:
-
Fakakite fēfē he tau matua e fakaalofa ka tutala mo e tau fanau ha lautolu?
-
Ko e ha kua nakai lata e matua ke akonaki e tau fanau ka ita a ia? a
5. Puipui e fanau haau
Ke puipui e fanau haau, kua aoga ke tutala a koe ke he tau tama takitaha hagaao ke he mahani fakataane mo e fifine. Liga fakafuafuakelea e mena nei. Tā e VITIŌ, ti tutala ke he tau hūhū nā.
-
Ko e ha kua uka ma e falu matua ke tutala ke he fanau hagaao ke he mahani fakataane mo e fifine?
-
He puhala fe kua fakamaama he falu matua e mahani fakataane mo e fifine ke he tau fanau?
Tuga he talahau tuai, kua holo ni ki mua e kelea he lalolagi ha Satani. Totou 2 Timoteo 3:1, 13, ti tutala ke he hūhū nei:
-
Falu he tau tagata mahani kelea he kupu 13 ne fakapilo fakakelea e tau tama he puhala feuaki. Ko e mena ia, ko e ha kua aoga ma e tau matua ke fakaako e tau fanau ha lautolu hagaao ke he mahani fakataane mo e fifine mo e puhala ke puipui e fanau mai he tau tagata mahani kelea?
Iloa nakai e koe?
Taute he Tau Fakamoli a Iehova e tau tohi loga ke lagomatai e tau matua ke fakaako e fanau hagaao ke he mahani fakataane mo e fifine mo e puipui a lautolu mai he tau tagata mahani kelea. Ma e fakatai, kitekite ke he:
-
Puipui e Fanau Haau (vitiō)
-
“Fakaako e Tama Haau Hagaao ke he Mahani Fakataane mo e Fifine” (Ala! Nu. 5 2016)
6. Fakalilifu ke he tau matua haau
Fakalilifu he tau fanau mo e tau fuata mui e tau matua he puhala ka tutala ki a lautolu. Tā e VITIŌ, ti tutala ke he tau hūhū nā.
-
Ko e ha kua uho lahi ma e tama ke tutala fakalilifu ke he tau matua haana?
-
Tutala fēfē e tama ke he tau matua haana he puhala lilifu?
Totou Tau Fakatai 1:8, ti tutala ke he hūhū nei:
-
Lata e tama ke tali atu fēfē ka tala age he tau matua e mena ke taute?
7. Tapuaki ki a Iehova ko e magafaoa
Ko e tau magafaoa he Tau Fakamoli a Iehova kua fakatoka e magaaho pauaki he tau faahi tapu takitaha ke tapuaki auloa. To fēfē la e tapuakiaga he magafaoa? Tā e VITIŌ, ti tutala ke he tau hūhū nā.
-
Taute tumau fēfē he magafaoa e tapuakiaga ha lautolu?
-
Ko e heigoa he matua ka taute ke aoga mo e fiafia e tapuakiaga he magafaoa?—Kikite e fakatino he kamataaga he fakaakoaga nei.
-
Ko e heigoa ka uka ma e magafaoa haau ke fakaako auloa?
I Isaraela i tuai, amanaki a Iehova ke he tau magafaoa ke tutala tumau ke he tau Tohiaga Tapu. Totou Teutaronome 6:6, 7, ti tutala ke he hūhū nei:
-
Fakagahua fēfē e koe e matapatu fakaakoaga nei?
Tau manatu ma e tapuakiaga he magafaoa:
-
Tauteute ma e tau feleveiaaga.
-
Totou mo e fakatutala ke he tala he Tohi Tapu kua fiafia e magafaoa haau.
-
Ka fai fanau ikiiki a koe, moua mai po ke lomi e gahua ma e tau fanau he jw.org.
-
Ka fai fanau fuata mui a koe, fakatutala ke he vala tala ma e tau fuata mui he jw.org.
-
Taute fakataitai e tala he Tohi Tapu mo e fanau haau.
-
Kitekite ti fakatutala ke he vitiō he jw.org.
PEHĒ FALU TAGATA: “Uka lahi e Tohi Tapu ma e tau fanau.”
-
Ko e heigoa haau ka talahau?
MANATU KATOA
Manako a Iehova ke he tau matua ke fakaalofa, fakaako, mo e puipui e tau fanau; ke he tau fanau ke fakalilifu mo e omaoma ke he tau matua; mo e tau magafaoa ke tapuaki auloa ki a ia.
Liu Fakamanatu
-
Fakaako mo e puipui fēfē he tau matua e tau fanau?
-
Fakakite fēfē he tau fanau e lilifu ke he tau matua?
-
Ko e heigoa e tau fua mitaki he fakatoka e magaaho he tau faahi tapu takitaha ke tapuaki auloa ko e magafaoa?
KUMI FOKI
Ko e heigoa e tau puhala ka tauteute e tama haau ma e magaaho ka lahi hake?
Fakaako e fakatonuaga he Tohi Tapu ki a lautolu ne leveki e tau matua momotua.
Kitia e tagata taane ne nakai iloa ke feaki e fanau kua eke mo matua taane ne kautū.
Manamanatu ke he puhala ka fakamalolō he tau matua taane e fakafetuiaga mo e tau tama taane ha lautolu.
“Fakatata Fēfē e Tau Matua Taane ke he Tau Tama Taane ha Lautolu?” (Ko e Kolo Toko, Ianuari-Mati 2012)
a He Tohi Tapu, hagaao e “akonaki” ke he fakatonu, takitaki, mo e fakahako. Nakai ko e fakamamahi po ke keli.—Tau Fakatai 4:1.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
